مراجعة التصاميم المعمارية وابداء الملاحظات عليها (محدث)

في الصورة السابقة اضطريت اخلي بروز السقف للغرفة المثمنة كما هو لأن طلع عندي بروز الواجهة ما يغطيه مثل ما هو واضح .. لكنه يغطي الجزء صوب دورة المياه وهذي صورة مكبرة لدورة المياه جهة الشاور والكرسي والمغسلة .. وحطيت خيال رجال واقف بالأزرق وواحد قاعد بالأصفر بس ما يبين واضح دقيق الملاحظة بيشوفه

مقترح كورنيش الجبس بس 10 سم فوق فتحة الباب 2.5 متر من الأرضية وبيكون فاصل بين نص الجدار العلوي اللي بيكون صبغ مقاوم للرطوبة وما تحت الكورنيش بتكون سلابات بورسلان كبيرة موجودة 2.5 في 3.5 متر وممكن تجي بالطول بدون قص مع إن قصها بسيط .. الشاور المطري واضح وضروري جهة الكرسي يسار نركب شاور يدوي ( تلفون ) وهذا ما وضحته .. يسار مبين الباب اللي يدخل على غرفة الملابس الطوالية من خلف جلسة التسريحة وسقف هذا الجزء نازل حتى يغطي الدكت أو وحدة التكييف الداخلية لو ركبنا دكت سبلت

https://i.imgur.com/v0ZaXMh.png

غيرت صبغة الجالس حتى يبين بس فرطت رجله ما انصبغت .. كاسر خاطري كأنه شاري أسهم بلدنا ومتورط

موضح مكان التجويفات بعمق 10 سم للصابون والشامبو والاكسسوارات أكيد يبي لها تخطيط واضافة صوب المغاسل نقدر نركب مثل ما هو موضح بوكس جانبي بعمق 15 سم وبباب وبارتفاع 120 سم وعرض حسب المتوفر والا لازم نوضح تجويفه في المخطط الأرضي .. المراية ببرواز خشب وممكن نخليها بارزة شوي ونحط اضاءة تحتها مخفية وحلاتها اضاءة بلون مزاجي Mood Ambient Lighting وجنب المراية عندنا مكان لإضاءة مركزة جانبية تنور الوجه .. السبوتات من فوق حلاتها معلقة بسلك مشدود من حايط لحايط وبارتفاع معقول فوق الجبس حتى تكون قريبة للتغيير 3.4 متر مناسب وتكون نقطية فوق الشاور وفوق كرسي الشاور جدامه بشوي وفوق المغاسل تنور وسط كل مغسلة .. تستوي عندنا 4 أنواع من الإضاءة بأربع مفاتيح .. ولو نبي نضيف مود لايتنغ حق التجويفات تجي مع مراية المغسلة ممكن وللمود لايتنغ حلاتها لونين أقل شيء أو ال اي دي متلون بعدة الألوان

https://i.imgur.com/lJlv4Jp.png

من الصورة السابقة أشوف لو نعدل ارتفاع قاعدة الدريشة وننزلها 20 سم ما بيبين اللي يسبح وبتكون الدريشة شوي أكبر

من أيام مار علي تصميم مسوي درايش الحمامات للأرض .. صج شوي مخربة توزيعة الحمام بحيث لازم نخليها قرب المغسلة .. والمالك يقول نيته يخليها رملية ما يبين شيء وراها

صباح الخير بو عبدالله، كنت ف بالي انشدك عن اقل مساحة حمام تكون عملية وممكن ما يتضايق فيها الواحد .. لأنك أحياناً تحب تسوي حمام في الحوش .. فلازم يكون عملي ومب كبير واحترت.

اقتباس:

---

المشاركة الأصلية كتبت بواسطة سالم الزهران

صباح الخير بو عبدالله، كنت ف بالي انشدك عن اقل مساحة حمام تكون عملية وممكن ما يتضايق فيها الواحد .. لأنك أحياناً تحب تسوي حمام في الحوش .. فلازم يكون عملي ومب كبير واحترت.

---

صباح النور اخوي بو زيد

سهالات الله يسلمك عطني المساحة المتوفرة باسوي لك تصميم مقترح والمساحة اقصد الأبعاد وشيحيط بها وعندك حرية أكثر وسهولة كبيرة .. آخر واحد انا سويته كان في الارتداد وسكرت الارتداد بالكامل .. عندي رخصة له من قبل حسب تخطيط حوض السباحة وبنيته بالطابوق وعلى جزء من حوض زراعي تم احلال تربته وبطابوق بدون أي جسور وأعمدة خرسانية والسقف معدني معزول ( سندويش بانل ) وركبت له جهاز بخار .. حطيت له صور كثيرة

ألحين الفكر شوي تغير تقدر تسوي شاور خارجي حوله زراعة ومسكر بجدران جانبية بس مفتوح للهواء من فوق وجنبه شاور داخلي هذا لو المساحة متوفرة .. 1.8 في 1.8 تكفي ومريحة لمغسلة وكرسي وشاور ولو عندك لحد 90 سم في 90 سم لخارجي كفاية لكن عرض 110 مناسب و 120 مسكت ومريح للي بيسبح بالنسبة للشاور

تقدر تضيف ميزة السقف الزجاجي لو جزئي فوق الشاور ويستوي عندك حمام منور وداخلي حتى لو شجرة قريبة تظلل عليه بتستمع بشوفتها وانت تسبح

عدلت شوي على التكييف بدال ما يكون داخل جهة الغرفة يكون من جهة دورة المياه المكان أوسع .. وسواء بنسوي دكت سبلت أو مركزي لهذي المنطقة كل شيء ممكن بسهولة

في الخارج فوق عندنا باب مقابل مكان الدرج وهذا اختياري ممكن نخليه فتحة للدخول والخروج من التجويف اللي تحول لمخزن صغير وجدامه بتكون وحدة التكييف الخارجية في حالة الدكت سبلت أو الوحيدة في حالة المركزي أو ال في ار في .. ولو طلبنا تكييف متطور في ار في مع سحب رطوبة وهواء نقي باكسجين حتى نقدر نسوي تغطية للمكيف فوق وتهوئة بمروحة شفط للحرارة الناتجة من التكييف والرطوبة الناتجة نقدر نستغلها لزراعة اصيصات في السقف

قسم خلف التسريحة الوسطي بين المكتب والحمام وضحت فيه كبت صغير وفيه طاولة ونبات ظل على جنب الباب اللي يوصل لغرفة الملابس .. هذا ممكن بسهولة نسحب الباب 70 سم ولو حبينا حتى 80 ممكن ونسوي تجويفات بنفس العمق لكبت ثابت يمين الباب ولأرفف خشبية واسعة ممكن السفلية لتخزين الشناط الكبيرة وممكن بباب يغطيها والعلوية أرفف زجاجية وانارة فوقها نستغل كل رف للعدة استعمالات ممكن ميني بار وممكن لإصيص زراعة احداها .. باوضح هذا المقترح على التوزيع الأرضي

https://i.imgur.com/Rk5kgPu.png

اللي يرجع للمقطع الطولي الآخر بيلاحظ إن التكييف تمرر بين النافذتين السقفيتين في منطقة الحمام يعني كل شيء معمول حسابه

منطقة المكتب نسيت اشرحها .. الواجهة الزجاجية يفترض تطل على البلكونة المزروعة وخليت الباب محرك شوي يسار حتى اسوي كتف تتجمع فيه الستارة بحيث تنسحب فقط من جهة وحدة .. خصوصاً مع بداية النهار والمخفي فعال للقزاز ما يبين الداخل ويبين الخارج بيطلع المكتب شرح وبيسوي جو الدخول للغرفة ممتع بس كاسر خاطري الرجال اللي مقندم شكله أما مشتري بلدنا والا مشجع المنتخب ومتعصب

الستارة للمكتب لو كانت البلاستيكية الطولية بتكون خفيفة وسهل تنفتح كل وقت .. عندنا حتى القماشية تنفع والخشبية

هذا قصدي بالتجويفات وهذي بعمق 80 سم وصغرت عرض الحائط ل 10 سم ولو نبغي نسويه خرسانة لنا الحرية حتى يكون عبارة عن خزنة كبيرة حتى الباب ممكن نركب نوع خاص صعب كسره مع إني اشوف الطابوق والخشب كفاية .. اللي خلف الباب بعرض 90 سم واللي فيها اصيص الزراعة بعرض 80 سم

https://i.imgur.com/yivHoEg.png

قبل شفت الدبليو سي العربي أو الأرضي وقلت يمكن اختيار المالك ويمكن حاطه الاستشاري تحصيل حاصل .. هذا لو مب محتاجينه ممكن نخلي مكانه كبت قزاز للفوط وتحت الكبت غسالة صغيرة للملابس الخاصة وحتى ممكن المساحة تكفي لبديه مع السابق بس بترتيب خاص .. منطقة الشاور والجكوزي ممكن نغطيها بزجاج وتستوي محكمة الاغلاق وتستوي حمام بخار بالاضافة لباقي الاستخدامات ولو فكرنا نسويها حمام بخار أفضل نحول الشاور مكان الجكوزي ونخلي بيب البخار يمر من تحت الجكوزي ويطلع في طرف العتبات .. يصخن الجكوزي ويستوي مثل البلاطة الصاخنة في الحمامات التركية واللي جربها يعرف شاقصد .. هشكل يكون عندنا اول ان ون .. مكينة البخار صغيرة كهربية وأحسن تكون جهة غرفة الملابس واعتقد ممكن نركبها جنب الجكوزي وهو في مكانه على الوضع هذا

نقطة مهمة ومهم توضيحها وهي التمديدات سواء للصرف الصحي أو للمياه ما دام عندنا جدار خارجي غلافين طابوق وسيبوريكس والسيبوريكس في الخارج بدون أي عوائق خرسانية هذا نقدر نقص فيه ونركب بايباتنا .. مثل ما هو موضح التغطية بشوية بلاستر على الصحي وبقطع سيبوريكس ممكن بسيليكون تثبيت ممكن ازالته أو ازالة القطع للتصليح لو احتجنا لبايبات التعذية .. ونفتك من دكت كبيرة وبارزة وشكلها مقزز والجي ار سي مكلف بدون فايدة

https://i.imgur.com/kK3VrTV.png

ولو انا مكان المالك باركب عازل حراري فوم 3 أو 5 سم وفوقه ألواح السيبوريكس يعني بيكون الحائط 20 سم طابوق داخلي عليه الجسور الخرسانية وفيه فقط تمديدات الكهرباء وبايبات التكييف والاتصالات والكاميرات و5 سم فوم جهة الخارج تغطي كل شيء وفوقها حماية سيبوريكس 10 سم وهذي بتكون كافية لعمل فجوات للبايبات وتغطيتها بعد بعازل وبلاستر لو حبينا وبنحميها من الحرارة القوية وقت الصيف والبرودة وقت الشتاء ومن أشعة الشمس فوق البنفسجية والشكل الخارجي بيبين نظيف ومرتب بدون بروزات ما لها داعي

البعض يطلع شاطر أو متشيطر ويقول ليش نسوي عزل لحوائط الحمامات والفكرة من العزل هي عدم ترك ثغرة تدخل منها الحرارة أو البرودة بتركيز عالي وتنتشر في باقي البيت .. حتى من الحمام تدخل وتسري للغرف المجاورة

بعدين إذا الحمام مواجه رياح باردة وقت الشتاء أرضيته تبرد وسقفه كذلك ويشع البرودة للداخل وهذا أكيد ملاحظ في البيوت الغير معزولة أو اللي معزولة عزل ضعيف مثل اللي يستخدم طابوق معزول لكن المونة بين الطابوق تمرر الحرارة والجسور والأرضيات المتصلة بها نفس الشيء