مراجعة التصاميم المعمارية وابداء الملاحظات عليها (محدث)

بحمد الله تقريباً تبلورت أفكار التصميم الأخير ووصلت لمساحة 820 كإجمالي مساحة البناء للبيت من غير المجلس والملحق اللي لازم باشوفهم مع توزيع الحوش إن شاء الله الاسبوع القادم بعد السفرة السريعة

حطيت كل الأدوار جنب بعض ورسمت خطوط أُفقية استرشادية حمراء هذي لن تكون داخلة في الرسم فقط للتوضيح .. بالنسبة للدور الأرضي بيكون فيه تعديل اضافي مفكر فيه وهو بأن نقسم صالة العائلة اللي استوت 13.2 متر طول في 5.5 عرض لقسمين قسم جلسة طعام مقابلة المطبخ اللي بيكون ماخذ الزاوية العلوية وواجهته السفلية ممكن نسويها قزاز .. وممر يطلع على برا والحمام والمغاسل القريبة نقسمها لحمام صغير مع مغسلة داخلية ولمخزن تابع للمطبخ .. والباقي يبقى كما هو يعني التعديل بيكون بسيط إن شاء الله

الدور الأول أشوفه توازن أكثر وترتب وكذلك البنتهاوس وحليت مشكلة النوافذ للغرف ببلكونات شبه داخلية وما تفتح مباشرة على الجيران .. البلكونة كسرتها بس 70 سم تظلل وتسوي كتف لخزانة الحائط

باقي شوية تعديل على الغرفة اليمنى في الأول .. اليسرى شبه جاهزة بس ممكن نضيف عليها مكان للتسريحة جنب السرير وخزانة حائط تحت مكان غرفة الملابس المغلقة

http://i.imgur.com/AUxDypz.png

هذا البنتهاوس ومساحته 156 على 331 لمسطح السقف = 47% وممكن تصغر لين 45 لو صغرنا الصالة شوي

ألاحظ لو فتحنا الباب للسطح جنب التلفزيون بيكون أفضل مقابل شرق بدل شمال وممكن نخليه قزاز يدخل علينا نور شمس الصباح

يبين موقع سكايلايت هرمي بمقاس 1.4 في 2 متر وسط الصالة مالت الدور الأول .. ممكن نسويه مرتفع يبين من الخارج

http://i.imgur.com/14VjxK0.png

للدور الأول ممكن نكرر نماذج الغرف اللي فوق تحت مع نفس وضعية السرير ألحين باضافة بلكونة وخزانة حائط اضافية وهنا ممكن نحط دريشة جانبية ونشيل الدريشة اللي في ظهر السرير ومكان التلفزيون مقابل السرير وجنبه تسريحة .. الحمامات طبعاً نفس اللي فوق

استوت عندي مساحة فوق حمام الغرفة الرئيسية يسار حق مخزن طويل وممكن نخلي فيه بايبات الحمامين المجاورين مكشوفة لسهولة الصيانة

الحمام الرئيسي إستوى مقسم أفضل بكثير عن قبل .. يسار كلش بلكونة صغيرة للزراعة ولإدخال أكبر قدر من النور على الحوض والشاور وممكن نحط مشربية جي ار سي أو خشب تتسلق عليها النبانات وتعطينا خصوصية أكثر وأصلاً حايطها يجي مرتفع وساتر .. بعدين عندنا المنطقة الرطبة مفصولة بقزاز وممكن نسوي فيها ستيم يستوي عندنا حمام بخاري وشاور وجكوزي

المغسلة استوت لها مكان بارز والمفروض واجهة كاملة مراية ومغسلتين له ولها

وباقي تعديل بعد حطيت المخطط قبل ليكتمل وفيه خصوصاً في الغرفة اليمين تحت أشياء لازم تتعدل

http://i.imgur.com/4Ru5HT9.png

الصالة فوق مكتوب العرض 5.2 وهو بعد التعديل 4.6 ومثل ما نشوفها فاضية وتعتبر ممر .. نقدر نسوي فيها فتحة بيضاوية تطل على الصالة التحتية وتبقى كفاية للحركة ولبعض نباتات الظل .. وممكن طاولة دائرية و تعطي بعد منظر وعليها زهور

مكان المنور يبين محدد بالأسود الثقيل

والدور الأرضي بديت اعدل فيه صوب المطبخ واسوي فكرتي اللي شرحتها وان شاء الله اكمل بعد العودة من السفر على نهاية الاسبوع الجاي

شيصير لو زدنا مساحة الصالة فوق وسوينا قوس على عمودين تحت يسوي خصوصية أكثر للمدخل والمدخل ممكن نخليه قزاز شفاف بالكامل يبين امتداد الصالة .. حتى الرؤية من دريشة الصالة فوق ما حولها عوائق مثل قبل والمساحة زادت حول 4 أمتار مربعة ويمكن 3 عن التعديل لكن قلت وايد عن الأساسية

http://i.imgur.com/zCqvwIw.png

هذا تصميم مبدئي شبه نهائي حق حلول الدور الارضي .. بالنسبة لطاولات الطعام ممكن تكون طاولة وحدة ملفوفة 90 درجة جاية بالطول وأكبر وتبقى لنا مساحة حق كبت حائط للكتب ولأواني الزينة

http://i.imgur.com/WX5no9X.png

لو حبينا نزيد ارتفاع الدور الارضي ممكن نزيد عتبتين 30 سم حق ال 3.9 متر وتستوي 4.2 وممكن نخليها مثل ما هي ونوسع الفتحة بين المطبخ والممر

فتحة المجلس كذلك ممكن نوسعها ونركب باب خشبي سلايدنغ حتى يكون عندنا خصوصية ونفس الوقت ممكن نفتح المكان على بعض

سويت آخر التعديلات على الدور الأول وحطيت الأدوار جنب بعض حتى يبين كيف المساحات والحوائط فوق بعض

هذي رسمة بي دي اف ممكن تتكبر بوضوح للي يحب وحلو لو نسوي فتحة بيضاوية فوق تطل على تحت بطول 3 متر وعرض 1.6 متر مثل ما هي موضحة وبتكون بين أبيام رئيسية

http://i.imgur.com/ETYa3R6.png

هنا تركيز أكثر على الدور الأول

ممكن الغرف الثنتين اللي فوق نعمل لهم قوس نفس اللي تحت عريض ونسوي خزانة حائط أمريكية تكون واجهتها في مستوى واحد مع الحائط والقوس وباسوي مثال على هذا

http://i.imgur.com/ozhXA6G.png

هذي صورة للدور الأول معدلة ونسيت احط المساحات الجديدة في السابقة هذي محدثة أكثر

الغرف كلها استوت ماستر وتوزيعها جيد .. وبالنسبة للغرف الأصغر لو حطينا سرير كوين سايز أو فل سايز بيجي أصغر هذا المحطوط مقاس الكنغ سايز .. خليت اليمين مثل ما هي للمقارنة .. واليسار طبيعي تصغر لأن خذنا مساحة للكبت .. لكن الأهم توزيع قطع الأثاث صح وخدمات الغرفة المفروض تعتبر جزء من مساحتها

التلفزيون أشوفه في الغرف اللي فوق في الرسمة وفي غرف البنتهاوس ما له داعي فقط في الغرفتين الكبار مناسب والصالات .. حطيته بس لتوضيح المكان المقترح جدام السرير

http://i.imgur.com/gojz76R.png

القوس العريض يعطي فخامة للمكان ويقسم المساحات بطريقة متقنة .. والجزء الجانبي بشكل نصف دائرة يكون مثل الروشنة الطويلة بأرفف قزاز للعطور وللصور وفوق اضاءة سبوت تنور هذا الجزء .. وممكن تكون تجميلية بلون ثاني .. أزرق ولا ثلجي والا أحمر .. وممكن نسويه أعرض للغرفة الرئيسية

بما اننا عندنا ارتفاع 3.9 وممكن نزيده ل 4.2 نقدر نرتب السقف للوبي نازل والقوس طبيعي يكون أعلى نقطة فيه 2.5 أو 2.8 بعده يجي سقف الغرفة نخليه أرفع ما يمكن

باسوي إن شاء الله رسمة للواجهة قريب

توزيع الحوش والمباني هذا منقول كما عمله الاستشاري .. كثير ملطخ المكان وبس يفكر يملي الفراغات بزراعة أو عشب واحتمال تكون أحواض مرتفعة تعرقل المشي

http://i.imgur.com/NP4yBsd.png

أبعاد البيت كانت مختلفة وبعد التعديل وتغيير باب غرفة السايق لجهة المظلات وعمل الباب سلايدنغ 4 متر ينفتح في الوسط استوعب المكان 6 سيارات تحت مظلات .. المظلات ممكن تكون حديد بواجهات جي ار سي أو اسمنت مشكل ومصبوغ مرشوش على شبك معدني .. حطيت قبل صور لهذا النوع .. حتى هنا ممكن نسويها من حائط لحائط بدون أعمدة إلا اللي على اليمين عمود في الزاوية فقط أو تشبك مع غرفة السايق

إستوت عندنا منطقة خاصة بالسيارات ومدخل للبيت بيطلع حلو لو زرعنا أشجار واشنطونيا أو رويال بالم تري على الجنبين .. المجلس بروحه وله خصوصيته وممكن نعزله بطوفة وباب أو نسوي له طوفة وليوان خاص به وحديد مشغول .. وفي رأيي يستحسن نخلي جزء طوفته سيدة وباوضح في رسم ثاني شلون .. المغاسل خليت الحايط وراهم سيدة .. ممكن يكون بارتشن بسيط من الجبس بس شكل زاويتهم قبل غلط

http://i.imgur.com/JMlPGma.png

يمكن الاشكالية الوحيدة بعد البيت عن زاوية الملحق الضيقة اللي واضحة فوق يمين .. 1.5 متر والتخطيط يشترط مترين واتوقع يتغاضون عن ذي خصوصاً من جدام حول 4 أمتار حسب ميلان حدود الأرض

هذا اللي اقصده هو عمل حد الارض المقوس كعتبة أو عتبتين لليوان المجلس وعمل جزء الحايط سيده وفوقه حديد الحماية والباب .. وضحت بعد امكانية عمل حوض سباحة مفتوح بين الزراعة وممكن نفتح له باب من الصالة وممكن نضيف عليه خدمات .. الحوض 4 في 5 مثل ما هو موضح

http://i.imgur.com/S1gJVCG.png

اليوم إن شاء الله أعتبر نفسي خلصت المقدور عليه ووضحت الصورة للمالك بإذن الله

لو سوينا واجهة المجلس زجاجية بالكامل متصلة مع الباب بيكون أفضل وبيبين منور ويكشف الجالسين فيه ( مرحب بالضيوف ) .. لو بنغطي الليوان نقدر نسوي سكايلايت هرمي وسطي ينور الداخل خلال النهار ويعطي جو غير

الواجهة عملت لها مقترح مبسط ارتفاع الأدوار فيه 4.2 + 4.2 + 3.6 للبنتهاوس .. طبعاً 3.6 نشيل منها حول 40 لسور السقف و20 للصبية نصفي على 3 صافي أو حولها

http://i.imgur.com/o5OdbSN.png

قوس الواجهة حلو يكون داخل 10 سم بس .. وممكن نحط زوايا جي ار سي تجميلية أو نسوي فتحات مستطيلة فوق الأعمدة أو كسرات في الخرسانة ونركب تشكيلة جي ار سي أو مشربية بس لازم ناخذ احتياطنا عن تعشيش الطيور بأسلاك ولا شبك خفيف ما يبين ويخرب الواجهة

عندنا خلف القوس ممكن ننزل لمبة نحاسية بتشكيلة مثل التصميم الأندلسي أو ثريا خارجية أو نسوي إنارة مخفية فوق كورنيش جبس

وهذا مقترح آخر لتوزيع الحوش تم فيه ابعاد المظلة عن حائط المجلس وعمل زراعة وممر هناك للدخول للبيت .. كما تم تمديد المظلة اليمنى لتتصل مع غرفة السايق وتتسع لأربع سيارات كما هو موضح

بالنسبة للحوض الخارجي ممكن نضيف له غرفة معدات وحمام أو اثنين مدمج معهم كبت صغير لتغيير الملابس .. ولو كان بنفس النظام اللي ناقشته سابقاً في هذا الموضوع بتكون اطلالة الصالة الخلفية على الحوض ممتعة ولازم نكبر الدريشة ونسوي باب من طرف غرفة الطعام للوصول بسهولة للحوض

الرامب بينفعنا لسهولة الركوب ونقل الأغراض للمطبخ الخارجي والداخلي وممكن نغلق بباب يعزل المنطقة عن غرفة السائق

http://i.imgur.com/NNMEEnY.png

غيرت شوي في البنتهاوس ليتناسب مع الواجهة بتحريك الباب جهة الشرق .. ووضحت طريق النزول من الدرج وأضفت عتبة فوق وعتبة في الأول حتى نوصل لإرتفاع 4.2 متر وبارتفاع 15 سم لكل عتبة .. وحصلت فرصة لعمل ستور صغير مثل ما هو موضح

http://i.imgur.com/557Yv2r.png

بما إن الباب بيكون مقابل شرق ممكن نخلي الدريشة كذلك ونغيرها من مكانها الحالي لأنها مجابلة شمال وما تفيدنا كثر الشرق حق شمس الصباح

وهذا الدور الأول بعد زيادة العتبة للدرج .. ممكن المالك لو حب يخسر شوي يضيف درايش للغرفتين الرئيسيتين في الواجهة غير العادية ممكن يركب النوع البارز بشكل ثلاثي ثنتين جاين بزاوية ووحدة سيدة .. بيعطون شكل وممكن يكونون جلسة شمسية خاصة

http://i.imgur.com/pR9hZSq.png

وهذا الدور الأرضي بعد زيادة العتبتين كلهم تحت وممكن نسوي مخزن كذلك تحت الدرج أو نفتح باب للحوش من ورا .. ويعتمد على رغبة المالك ممكن يفتح باب جهة حوض السباحة من الصالة أو بين الصالة وغرفة الطعام

http://i.imgur.com/3ydoYP7.png

بس المالك يرسل لي رايه وشيبغي احط في فايل الاوتوكاد وبرسله له وتم بحمد لله تعالى

المالك عنده تساؤل ومحتار من ثلاث نقاط بناقشها هنا وأنقلها مثل ما هي

ظ،- المغاسل المطله على الصاله في الطابق الارضي اشوفها تشوه المظهر واحب تكون مخفيه وحتى الحمام صار ماله اناره طبيعيه وتهويه ... شوف اذا ممكن تحاول تخفي المغاسل بحيث يكون في ممر وبعدها مغاسل حتى لو صغرنا المخزن
ظ¢- المخزن في الطابق الاول عرضه متر اشوف لو نلغيه ونضيفه مع مساحة غرفة الملابس للماستر او الحمام او نصغر طول البيت متر ونحذف المساحات المهدوره .. الخ

ظ£- اشرايك اذا الملاحق بدل العرض ظ¥ متر انخليه ظ¤.ظ¥

وشوف الانسب في رايك وثبته وارسله لي

رديت على كل الأسئلة خاص بس أول نقطة فكرت فيها واشتغلت عليها وعدلت التوزيع شوي وهذي صورة للغرفة الرئيسية وخدماتها .. حافظت على عزل منطقة الاستحمام وعملت بلكونة صغيرة تنور على الحمام كله وتحفظ الخصوصية وممكن تزرع لو حبينا

http://i.imgur.com/uEyb71Z.png

بالنسبة للمغاسل المطلة على الصالة تحت ممكن تركيب باب لمدخلها مع إني افضلها بقوس حتى تبين واضحة لأفراد العائلة وللضيوف لأن استخدام جلسة الطعام بتكون مشتركة وخصوصاً وقت العزايم النسائية بيكون استخدام المنطقة ككل

حل ممكن نعمله هو عمل حائط فاصل بقوس يفصل منطقة المجلس والصالة ويكون دخول الرجال أو النساء من ناحية مدخل المطبخ للمصعد لفوق .. فتحة القوس المقابلة للمصعد ممكن اغلاقها ببارتشن قابل للازالة وهذا موجود ومتوفر ووقت عدم استعماله ينقل للمخزن تحت الدرج

http://i.imgur.com/F8EStXo.png

الكسرات الحمراء المتقطعة في الحمام فوق اللي جنب المغسلة بعمق 5 سم وحق مراية كبيرة واللي جنب البانيو وفي ظهر جلسة الشاور بعمق 10 سم للشامبو والصابون .. الشاور استوى 1.2 في 1 متر ولازم يعمل من البلاط أو الرخام والرخام المعالج بمادة مانعة للانزلاق وحامية للرخام أفضل لأن يجي قطعة وحدة

ممكن فتح البارتشن الألمنيوم من ناحية الشاور لسهولة طلوع البخار لو حبينا

الجدار الفاصل ما اشوف له ضرورة قصوى وممكن استخدام بارتشن خفيف لكامل المنطقة وقت العزايم والانفتاح حلو بيكون للعائلة

السؤال الأخير كان بخصوص تصغير عرض الملحق من 5 الى 4.5 وانا اشوفه ما يسوى شيء ولا بنحتاج له بالعكس بنستفيد من النص متر حتى ممكن نحط طاولة وسط المطبخ أو جزيرة

البلكونة التابعة للحمام الرئيسي متر و40 في متر و 60 سم .. حايطها ممكن يكون بارتفاع الدريشة ومفتوح فوقه فتحة كاملة

لاحظت تحت لو كبرنا الأقواس ل 40 سم عمق حائط القوس بيطلع أفخم وبتصغر مساحة الممر شوي وبتكون عندنا فرصة لعمل روشنات مثل ما هو موضح بالأحمر المتقطع

http://i.imgur.com/tlu37qJ.png

لو حبينا نعمل الفاصل كذلك مهم نعمل الفتحة اللي في السقف وسط الصالة الأرضية بتبين أحلى مثل هذا الوضع وخليتهم جنب بعض

قبل كنت حاطها بين جسور رئيسية والحين بتكون وسطية بس أكيد لها حلول انشائية سهلة

http://i.imgur.com/SpvWTVW.png

بحمد العزيز القدير تم إكمال 12 تعديل على تصميم وبإنتظار رقم 13

الموضوع بيكون بإذن الله مفيد للمقدمين حديثاً على البناء أو على جمع أفكار للبناء .. كنت اتمنى اوصل لرقم أعلى خصوصاً إن الفترة سنة ونص مب بسيطة

شاكر الجميع ممن أسهم في الموضوع وعلى رأسهم أصحاب التصاميم وغالبيتهم فضلوا يكونون غير معروفين واتمنى نعرف شصار معاهم حتى نقدر نواصل سواء في عدم تكرار سلبية أو خطأ .. أو الانتباه لاشتراطات التخطيط أو حتى مدى استفادتهم واستحسانهم للي صار .. أو علاوة على ذلك التغيير اللي البعض ما يحسب نتائجه صح وقد يكون من ضغوط من شخص ثالث أو استشاري

شكراً لجميع الاخوان اللي شاركوا من البداية في النقد وابداء الرأي منهم سعود وبو سعود ( عزيز يو كي ) وبوخالد ومضارب دوسري واكسبرت وحمد كيو أي والكواري 1972 وستارز وأكيد باكون نسيت حد وشكر خاص للاخوات الجودي وسويت قطر اللي اعتبرهم مهندسات والاخت لبيبة

الرقم 13

اصاله العلوية لو تكون مفتوحة افضل .
الغرفة الماستر على اليمين فيها بعد المدخل طوفة على اليسار . اشوف مالها داعي . لو تنشال يعطى امتداد بصري اكثر .

والقرار له ولك .

والعفو يابوعبدالله

اقتباس:

---

المشاركة الأصلية كتبت بواسطة سعود.

الرقم 13

اصاله العلوية لو تكون مفتوحة افضل .
الغرفة الماستر على اليمين فيها بعد المدخل طوفة على اليسار . اشوف مالها داعي . لو تنشال يعطى امتداد بصري اكثر .

والقرار له ولك .

والعفو يابوعبدالله

---

هلا إخوي سعود

الرقم 13 هو للتصميم ما وصلناه للحين وبانتظار واحد يعرض تصميمه

عن الصالة العلوية في التصميم الأخير واجهتها الداخلية زجاج حتى يتم عزل صوت التلفزيون وبنفس الوقت تطل على باقي البيت ويفترض زجاج بفريم خشب أو فريملس أو ستانلس ستيل وبدون ستاير وبدون ما تكون مخفية .. حتى اليو بي في سي ينفع

والغرفة باشوف شقصتها وباعلق على ملاحظتك

الغرفة اليمين الباب يقابله قوس ووراه غرفة الملابس المكونة من كبتات مب نظام الغرفة المفتوحة .. بعد الباب يسار يفترض أما كبت أو طاولة مكياج ( تسريحة ) بس نظام واقف ما فيه مجال لكرسي .. حتى زراعة ظل تنفع

يمين عندك قوس عريض في كتوفه روشنات طولية للزينة والعطور .. يمكن الخطوط المتقطعة ما تبين واضحة بس للمهندس والرسام وعلى برنامج الاوتوكاد تبين ومعروفة

أقدر اسوي واجهات داخلية للغرف للتوضيح أكثر لو الصورة ما وضحت

اقتباس:

---

المشاركة الأصلية كتبت بواسطة معماري قطري

هلا إخوي سعود

الرقم 13 هو للتصميم ما وصلناه للحين وبانتظار واحد يعرض تصميمه

عن الصالة العلوية في التصميم الأخير واجهتها الداخلية زجاج حتى يتم عزل صوت التلفزيون وبنفس الوقت تطل على باقي البيت ويفترض زجاج بفريم خشب أو فريملس أو ستانلس ستيل وبدون ستاير وبدون ما تكون مخفية .. حتى اليو بي في سي ينفع

والغرفة باشوف شقصتها وباعلق على ملاحظتك

---

عبالي رقم التعديل ههههههه

اقتباس:

---

المشاركة الأصلية كتبت بواسطة معماري قطري

الغرفة اليمين الباب يقابله قوس ووراه غرفة الملابس المكونة من كبتات مب نظام الغرفة المفتوحة .. بعد الباب يسار يفترض أما كبت أو طاولة مكياج ( تسريحة ) بس نظام واقف ما فيه مجال لكرسي .. حتى زراعة ظل تنفع

يمين عندك قوس عريض في كتوفه روشنات طولية للزينة والعطور .. يمكن الخطوط المتقطعة ما تبين واضحة بس للمهندس والرسام وعلى برنامج الاوتوكاد تبين ومعروفة

أقدر اسوي واجهات داخلية للغرف للتوضيح أكثر لو الصورة ما وضحت

---

الحين فهمت

اقتباس:

---

المشاركة الأصلية كتبت بواسطة سعود.

الحين فهمت

---

سويت لي شغلة .. ما احب ارسم سكشن فيه تعقيد وشغل افتراضي كثير ويعتمد على حسابات التكييف والدكتات وعلى الانشائي .. تتفاجأ بالانشائي عمل لك أرضية 40 سم والا 35 وانت حاسب على 20

بديت البارحة وان شاء الله بخلص بسرعة والارتفاع يتعدل حسب التصاميم الباقية هذا بيكون مبدئي

هذا السكشن يمر في السكايلايت الهرمي ويقطع المجلس والمدخل بعد الباب القزاز والمجلس والصالة ويوضح الأقواس وبعض التجويفات في أكتاف الأقواس العريضة موضحة بالخطوط المتقطعة .. بعض الزوايا جاية مشطورة بزاوية 45 درجة وفوق قوس وتحت قطع سيدة بزاوية .. هذي بديل سهل ورخيص عن التلبيس بالخشب وتسوي حماية .. ممكن الزاوية السفلية نخليها سطح افقي ونحط فيه انارة ال اي دي تنور الكسرة هذي من تحت لفوق .. شرط الانارة تكون خفيفة 3 وات كافية وزيادة

http://i.imgur.com/kLD4juE.png

إفترضت الأبيام شبه مخفية وعرضتها شوي والتكييف دكت سبلت 40 في 90 سم للدكتات .. حصلت ارتفاع صافي يوصل 3.14 متر وممكن نسوي عمق أكثر في الجبس في الوسط يزيد الارتفاع

ما وضحت تفاصيل العازل فوق السطح وطبقات الارضيات وطبقة البلاستر

هذي رسمة محسنة والخرسانة أوضح بنقشتها اللي تبين داكنة شوي مع تعديل بسيط حق قوس مغاسل المجلس وزيادة مقترحات لطبقة جبس مرتفعة أكثر

http://i.imgur.com/yRlPf4M.png

توضيح مهم للجميع من يبني وناوي يبني .. لعدم حصول شلخ في التقاء سور السقف بالخرسانة تحته لازم نمدد الصبية لأعلى .. أو بعد صب السقف نغمس قضبان حديدية قصيرة فيه بحيث تبقى بارزة بحدود 10 سم - 15 سم .. 10 لو أحببنا البروز بحدود 10 سم وكذلك ال10 سم كفاية لبروز 15 سم خرسانة تصب لاحقاً كقاعدة لسور السقف

ليشٌ؟ لأن هذه النقطة ضعيفة وسور السقف يتعرض لضغط من سكريد العازل وكذلك من الهواء فينشأ شلخ بينه وبين الخرسانة .. هذا بالاضافة لتمديد الأعمدة لأعلى السور ومع عمل الروابط الجانبية بالحديد

http://i.imgur.com/HquYjoa.png

خط العازل وضحته فوق مايل ميلان بسيط لتصريف ماء المطر ولازم يكون في الطرف ما يقل عن 4 سم حتى ما يتكسر وفوقه تجي طبقات العزل اللي بعضها في حالة الدبل سكريد تكون بعد سكريد السلوب عازل المياه وفوقه الحرارة وبينهم طبقات عزل خاصة وبعدين طبقة حماية وبعدين السكريد الثاني اللي يكون بسمك 3 سم سمك متساوي وحماية للعازل الحراري .. يعني الطبقات تكون بحدود 15 سم في الطرف وتزيد في بعض الحالات لغاية 25 و 30 سم في الوسط حسب مسافة السطح للتصريف

سويت مقطع ثاني يوضح واجهة الدرج الداخلية وبيت المصعد مثل ما هو موضح هنا

http://i.imgur.com/If624JE.png

المقطع a-a هو الأول اللي وضحته قبل .. بناء على المقطعين نقدر نسوي الأرضيات والأسقف نوع ال One way slab with spandrel beam وهذا يخلي الجسور فقط في الأطراف وفي الوسط مثل ما هو موضح والتقوية بالحديد في الاتجاه القصير .. بهذا يكون عندنا مجال لرفع التكييف قليل بعد لو نحب

التكييف بيكون ثلاث وحدات دكت سبلت حق تحت مثل ما هو موضح ونقدر نسوي سقف جبس مزدوج بأي شكل نحب

فوق كذلك ممكن بنفس الطريقة 3 وحدات قوية بحدود 6 طن اعتقد كفاية ولازم لها تصميم تكييف مختص .. الدور الأخير يفترض تكييف سبلت عادي حيث إن الإرتفاع صافي الحين مع مقترح الجبس 2.78 بالضبط .. وهذا على أساس ارتفاع كامل للبيت 12.5 وممكن يسمحون لين 13.5 باستثناء بيكون نقدر نسوي البيت كله دكت سبلت

وهذا مقطع a-a

http://i.imgur.com/FXK42WN.png

المقطع b-b يوضح الجزء الخلفي من البيت من أمام الدرج وعندنا من تحت يمين باب المطبخ يفتح على الجهة اللي صوبنا ما يبين وهو مفتوح وبعدين الكاونتر .. طبعاً الرسم ناقص كاونتر الحايط اللي يكون شوي أنزل بحدود 30 سم وأشياء كثيرة مثل الكراسي .. المهم الصورة توضح .. بعدين قوس بعده على اليمين يبدأ الدرج وبيت المصعد وزاويته مشطورة حتى ما تنكسر وشكلها يكون حلو .. بعد باب المصعد يجي باب الستور اللي يكون تحت بسطة الدرج المرتفعة ويكون هذا خاص بمواد التنظيف وبعض الأشياء البسيطة .. بعدين موضح باب الغرفة وهو مفتوح في حيز التسريحة أو غرفة الملابس اللي أمام الحمام وبعده بعد باب الحمام يبين مفتوح

فوق الأُمور مشابهة الا باب الستور الثاني في البنتهاوس بعرض بسيط .. ممكن لو حبينا نضيف شيء حلو نسوي مقابل باب المصعد سكايلايت هرمي صغير 1.2 في 1.2 ينور المنطقة ذي وممكن يكون مرتفع وبارز يعطي شكل حلو للبيت

http://i.imgur.com/pmP0sfW.png

أحد الإخوان طلب مقترح حق بيت له ومساحة أرضه مناسبة لتصاميم كثيرة وقلت مبدئيا يشوف شيء من الموجود واقدر اغير عليه حسب حاجته .. اشتغلت على النوع اللي على زاوية ومساحته تقريباً 800 متر بيناسب حق أرضه

أتمنى يكون واضح وبناقش الأدوار الباقية بعدين وهي موجودة في الموضوع .. سويت نموذجين من نفس النوع ما ادري 3

http://i.imgur.com/1LE4GJx.png

عندي تصميم قديم مساحته 600 للدورين مع البنتهاوس بتزيد حول 730 بتوصل ومع الملاحق أكيد أكثر

بس اشتغل عليه وارتبه أكثر وإن شاء الله بيطلع مناسب أكثر للكثير من الأراضي والتصاميم

لو قللنا المواقف الداخلية بيكون الوضع أحلى ونحتاجها مقسومة وبباب واحد حتى يكون عندنا مواقف قريبة عند السائق وعند الملحق وكذلك عند مدخل البيت لسيارة صاحب البيت

http://i.imgur.com/cz4o1ar.png

هذي صورة الحوش للتصميم الثاني وأكيد باعدل عليه حتى يكون المطبخ قريب للملحق

مبدئياً الدور الأول فيه 4 غرف وصالة ومكتب وغرفة رياضة صغيرة وبانتري .. والبنتهاوس فيه غرفة نوم وغرفة ممكن تكون نوم أو مخزن وبانتري وحمام

وتحت عندنا غرفتين بس يحتاجون ترتيب

http://i.imgur.com/IhBS3zu.png

المالك بس باقي يقول لي أي تصميم يحب ووين جهة الشمال والشرق

رتبت التصميم كامل من أرضي وأول وبنتهاوس مع توزيعة الحوش .. بس لاحظت يمكن لو عكسنا وضع البيت بحيث اللي يسار يكونون يمين بيستوي يمكن عملي أكثر والغرف اللي تحت بتكون ورا بعيدة عن الحوش .. لكن بنفس الوقت بيخترب نظام البنتهاوس .. الصالة العائلية حلو لو تطل على الحوش يبين الداخل واللي طالع .. بنشوف شيصير بنجرب التصميمين

http://i.imgur.com/VJILBAC.png

فوق عندنا 4 غرف مع صالة مبتعدة عن الغرف وماخذه زاوية عن الازعاج .. مقابلها مكتب للبيت او نقدر نسويه سينما منزلية صغيرة وللعب بواجهة زجاج

أعتقد ألحين فكرة تبديل المواقع استوت واضحة حتى المطبخ الداخلي لو طل على الحوش يستوي أحلى الواحد ما يحس بوحشة للمكان .. بس بعد يمكن غرفة السايق ورا تضايق اللي في المطبخ

http://i.imgur.com/Fb3bxbp.png

البنتهاوس من غرفة وغرفة مخزن أو نقدر نخليها صالة رياضية ونغير استخدام التحتية أو مكتبة أو أي اختيار

نلاحظ كذلك كسرات الحمام كبرت فوق شوي هو اقتراح لعمل النافذة متصلة لحد السقف وبحيث تكون منحنية فوق البانيو للنور الطبيعي من أعلى

الدكتات للخدمات للماء وللصرف الصحي على جانبي النافذة وتسمح لنا بعمل قاعدة النافذة عريضة لوضع نبات ظل أو استخدامها كرف

http://i.imgur.com/EeyeaF0.png

http://i.imgur.com/EeyeaF0.png

هذي الحالة قصدي وممكن نعدل البنتهاوس على ورا حتى يفتح على جهة الحوش .. بس وضعية الدرج حلاتها ورا بعد وصعبة تصير

بيطلع عندنا البنتهاوس بمساحة 119 وفيه غرفتين بحماماتهم ومساحة الأول 291 والأرضي كذلك 291 ومساحة البنتهاوس تقارب 41% من اجمالي المساحة اللي بتطلع للفيلا بحدود 700 متر

ما اخفيكم علم إني مختار هذا التصميم حق بيت ولدي ويمكن أصغر فيه شوي بحيث اني الغي البنتهاوس

هذا الوضع الثاني ما نقول الجديد وأشوفه أحسن خصوصاً نوافذ الدرج تطل على الحوش وفي العادة تكون مفتوحة للانارة بدون ستاير وللحين ما ادري شوضع البيت من ناحية الشرق والغرب بس عارف إنه على شارعين وان الجيران فوق ويسار الأرض

http://i.imgur.com/cyqUeVh.png