مراجعة التصاميم المعمارية وابداء الملاحظات عليها (محدث)

بعض الامور أغفلتها والرسمة فوق مب كاملة وفيه تعديلات عليها بس لإيصال المبدأ التصميمي والفكرة

الدور الأول والبنتهاوس بعد تغيير وضعية الغرف وتغيير البنتهاوس بالكامل

المساحة الإجمالية للبيت 701 متر مربع وللملحق مع المجلس بما انهم متصلين 166 بمجموع نقدر نقول 867 متر مربع وهذي المساحة نادر نقدر نحصل فيها 8 غرف كاملة قصدي ال 700 متر .. ثنتين تحت لهم ممر خاص ممكن اغلاقه عن ازعاج البيت تحت وأربع فوق بينهم الغرفة الرئيسية تطل على الحوش ومعاها غرفة ملابس كبيرة .. وثنين فوق كلش يعتبرون قسم كامل للعيال لو كبروا

باقي شيء ما سويته وهو عمل غرفتين لبنتين متصلتين وممكن نقسمهم في المستقبل وبشوف شالأفضل وحاط عيني على اللي في الأول اللي جنب بعض

http://i.imgur.com/PIGLPq0.png

بارك الله فيك ويعطيك العافيه. لي رجعه باذن الله

اقتباس:

---

المشاركة الأصلية كتبت بواسطة منقاش

بارك الله فيك ويعطيك العافيه. لي رجعه باذن الله

---

تنور الموضوع بوجودك ونبي ملاحظات

عرفت من المالك إن جهة اليمين جهة الشمال وتحت الشرق ويسار الجنوب وفوق الغرب

الحمد لله الجهات تأثيرها بسيط على البيت مع إني كنت متمني بدال الشمال شرق .. المالك تعليقه إن وهذا اقتباس " اللي اشوفه ان الاول مافيه شي لك انت كساكن للبيت غير المقعد اليومي. اما الباقي شكلي بس او للضيوف. "

واللي واضح من تخطيط الدور الأول إن فيه عندنا بانتري صغير والمفروض بدون فرن لأن بيكون للشاي وللميكروويف للتصخين والثلاجة تكون كبيرة مهمة للمشروبات والفواكه ونحتاج مغسلة صغيرة للصحون والأكواب + المكتب عندنا مغلق بواجهة زجاجية للدراسة بهدوء مع رؤية باقي العائلة وترتيبه ممكن يكون حسب الحاجة بطاولات صغار للدراسة مع كبتات للكتب ومكان للطابعة وممكن لو حبينا نفتح دريشة جهة الجنوب + الصالة الرياضية كافية لثلاث قطع بسيطة وممكن نحط فيها أرفف أو كبت لتخزين عدة التنظيف

الغرفة الرئيسية ماخذه حيز جيد ومقسمة صح .. نقدر نسوي فيها غرفة ملابس بكبتات بدون أبواب اللي تجي بباب ينقفل للخصوصية وممكن نركب قفل الكتروني بالبصمة أو الأرقام .. تسريحة عريضة مقابلة الغرفة الباب شوي بعيد عن منطقة السرير ومقابل لباب الحمام حتى لسهولة غسيل الحمام حتى لو واحد نايم عادي

غرف البنات الثنتين فوق ممكن نخليهم مفتوحين على بعض وفي البداية نستعمل سريرين مفردين ونخلي مثلا الغرفة اليسرى للجلوس والدراسة وحتى التلفزيون مع إني احب اشجع إن التلفزيون يكون في الصالات فوق وتحت للجميع .. بعدين في حال الكبر ممكن فصل الغرفتين بسهولة بحائط كامل طابوق أو بجبس أو خشب أو حتى باب يمكن يفتح وقت الحاجة

عزلت منطقة النوم بباب عن الصالة والدرج والمكتب

وهذا توضيح لكلامي السابق وقبل كان كل شيء موجود الا تعديل الغرفة وعزل منطقة الدرج والجلوس عن منطقة النوم

ضفت السكايلايت الهرمي 1.6 في 1.6 لصالة الجلوس

http://i.imgur.com/kknUkF2.png

يتراوى لي على هالحال الضيوف حدهم تحت بس

نجي لتحت ولمنطقة الضيوف ولو حبينا نستغل الصالة التحتية أوقات للضيوف ممكن نعمل جدار فاصل وقوس بين بيت الدرج والصالة ( مع إني افضل الوضع السابق ) لكن هذا الوضع بيخلي امكانية لو كانوا فيه حريم في الصالة والرجال بيدخلون فوق ممكن يدخلون عن طريق باب المطبخ وللدرج أو المصعد مباشرة

ولو حابين نسوي فتحات في هذا الجدار مسكرة بزجاج مزخرف أو معشق وإنارة بين الطبقتين مخفية بعد بيكون الوضع حلو والخيارات كثيرة .. حتى من ضمنها نعمل جدار 10 سم بس

http://i.imgur.com/CmA8bvh.png

المجلس زين يكون مغلق للخصوصية وحتى أوقات يجي مدرس للعيال فيستغلونه

وبهذا اشوف التصميم منتهي لو حابه المالك يتوكل على الله ويطبقه مع الاستشاري لباقي التخصصات .. إنشائي وكهرباء وميكانيك ودفاع مدني ويخلص الرخصة

بالنسبة للإرتفاعات عندنا مجال لإرتفاع عالي لكن انصح بالتكييف السبلت الجداري والمعلق في بعض الأماكن ( السقفي ) والأمر يرجع للمالك .. رسومات الاوتوكاد جاهزة والحمد لله تصميم رقم 13 خلص في فترة قياسية وبانتظار رقم 14

إضافة بسائطية على المجلس الخارجي مع بعض التعديليشن ولا اظن التخطيط بيوافق على مساحة ملحق هالكبر بس يستاهل المحاولة والمساحة بتكون حول 900 متر مربع

http://i.imgur.com/Vn1Dv3O.jpg

كنت مفكر اخلي الغرفة بابها جهة ليوان المجلس .. قصدي غرفة السايق بس تخيلت صعوبة التواصل معاه وحتى توصيل الأكل له بيكون صعب وطلع لي سهل نعمل مقلط أو غرفة للطعام مع مجلس يومي أرضي لو حبينا

بعد ما عرفت اتجاهات الشمس حسيت إن الغرفة الرئيسية مظلومة فقلت ليش ما اكبرها واحرك المكتب مكان الصالة الرياضية بتستوي عندنا كل الغرف في مكان خاص وهاديء بعيد عن الصالة .. وكذلك بتكون الغرفة الرئيسية مطلة على شرق وجنوب للشمس في أغلب الوقت

أضفت نوع الدرايش اللي يجي بارز بحيث تدخل الشمس لجلسة صغيرة كافية ل 3 أو 4 أشخاص مع طاولة وسطية للشاي وحتى أوقات للريوق في الغرفة أو حق التشمس وقت الصبح والمغرب .. الستارة بتكون مثبتة في جزء الحائط وتغلق بحيث تقسم الجلسة مع الدريشة عن الغرفة

http://i.imgur.com/ia74eGC.png

طبعاً مع عمل الزوايا القائمة في الجدران مشطورة 45 درجة حتى ما تنكسر ولا تعور اللي يصطدم بها وكذلك منظر جمالي

البارحة حسيت بارتباط قوي مع هذا التصميم واشتغلت على أفكار للسقف وبتنعكس على الواجهة .. رتبت النوافذ فوق بعض لكل الأدوار وعدلت في التصميم الداخلي قليل حسب النوافذ ونوعيتها .. صراحة سهرت لحد الفجر .. وأذكر رفيجي صاحب التصميم الأساسي ما كنت متفرغ وقتها ومخي مشتت وكنت مشتغل أكثر على التسعير .. صج عدلت شوي لكن هذي التعديلات كثير أكثر أكيد بيزعل علي

وصلت للسقف من فوق وكيف ترتيبه ينعكس على الواجهة .. الغربية ما عندنا مشكلة في كون النوافذ فوق بعض لأنها صوب الملحق ولا تبين للداخل .. والجنوبية مع إنها فوق بعض كذلك هي ورا وتغطيها طوفة البيت الخارجية وحتى اللي بيكون ورا بيكون قريب ما يلحق يرفع راسه فوق يشوف استقامة الدرايش وهذا مبدأ ينطبق عندي على كل المباني ويعطينا فرصة نركز أكثر على الداخل من الخارج .. الواجهتين اللي لازم يكونون مرتبين حتى في استقامة الدرايش فوق بعض هم الشمالية الطويلة والشرقية واللي فيها مدخل البيت الرئيسي

خلونا نروح صوب السقف وبعدين اسوي رسمات للواجهات

http://i.imgur.com/VLgOx0x.png

السقف لو سويناه جزئي بسور مائل بقرميد يغطي شوي على الواجهة هنا خليته 25 سم بروز ومايل ناحية الداخل متر .. وفي مكان البنتهاوس بيطلع سيدة لحد ارتفاع سقف البنتهاوس

طريقة سور السقف سهلة منه جزء مايل وجزء مستقيم وجزء أُفقي .. الأُفقي هو صبية السقف أثناء عملها بعد الجسر نخليها ممدودة 25 سم من سطح واجهة البيت .. بعدين بعد قبل الصب مباشرة نكون محددين مكان الحوائط العمودية ومركبين حديد تسليح بسيط جداً بحيث يناسب حائط خرساني بإرتفاع 1.3 متر أو 1.2 متر حسب رغبتنا بس ال 1.3 أو حتى 1.4 بتخلي السور مرتفع (ساتر ) وبنفس الوقت يعطينا سلوب قوي يخلي القرميد المايل يبين واضح

بعد صب الأُفقي يكون حديد العمودي بارز وجاهز ينصب بسمك بس 10 سم لأنه خرساني وبتكون قوته كفاية ونبغي وزنه خفيف لذلك نقلل عرضه .. يبقى عندنا المائل واللي بيجي على سطحه القرميد .. المائل نسويه بالخشب ( مارين بلايوود) مثبت ببراغي خرسانة على خشب مربع وعلى الخرسانة وفوقه عزل بتومين ويتركب القرميد

ولو بنسوي عزل حراري على الجدران نعمل حسابنا حق سمك العازل ونعزل واجهة خرسانة السقف وأسفلها

الخطوط المايلة هذي سلوبات جريان ماء المطر جهة بايب الصرف وعندنا ثلاثة في تجويف البايبات والرابع بيكون وراء البيت وممكن نخفيه بطابوقة زيادة تنبني عليه أحلى وأرخص من الجي ار سي ولو خليناه مكشوف ورا ما يضر

السقف كحل ثاني ممكن نسويه مبسط بتقليل الحوائط المايلة والقرميد .. وحل ثالث إن نزيل القرميد بالكامل ونسويه مبسط بدون درايش بارزة .. وحل رابع إننا نسوي الدرايش البارزة بس بدون سقف مايل وقرميد ممكن السقف سيدة ويكون سقفها نازل وله سور سقف بسيط ولازم يحتاج تصريف ماء مطر

http://i.imgur.com/KQs9VZ2.png

سويت بعض الرسومات من أمس وقبل بس للحين ما حطيتها وبعضها للحين ماكملتها مثل الواجهة

شاغلني تعديل الغرفة الرئيسية لأنها دوم هي الأهم وفصلتها عن باقي الغرف بحيث تكون مب من خلال الممر مثل قبل .. وهذي كلها اختيارات وتفكير بصوت عالي حتى يسهل الإختيار على من يحب التصميم .. والتصميم هذا وغالبية التصاميم مب حق شخص واحد واللي يعجبه شيء باطبقه له وبارسل فايل الاوتوكاد ومستعد اتابع معاه لين حتى يخلص الموافقات

رسمت هنا كذلك خطتي حق ستاير النوافذ البارزة حتى توضح الصورة والباقي نقدر نسوي لها ستائر تقليدية .. هذي تكون غائرة ومثبتة في أطراف الحائط لو اغلقت تبين سيدة ولو انفتحت يبين التجويف والجلسة

http://i.imgur.com/W4S1xLg.png

نركز أكثر على منطقة غرفة النوم الرئيسية والتعديل تم بتغيير مكان الباب والغاء التسريحة بحيث ننقلها جنب السرير داخل ممكن .. يستوي عندنا لوبي صغير بباب في كل جهة واحد للحمام اللي وسعناه واستوى طوله 5 متر في متر و80 سم وهذي التوزيعة الأُولى أضفت شاور مغلق بروحه

http://i.imgur.com/2kZ20SQ.png

وهذا المقترح أشوفه أفضل .. جمعت الشاور والبانيو في منطقة رطبة مسكرة بزجاج و ما ننسى عندنا النافذة مواجهة جنوب وتدخلها الشمس طول اليوم وجاية لفوق منطقة الشاور يعني جزئياً سقفية

http://i.imgur.com/Qkz7iar.png

هنا تخليت عن فكرة الأقواس العريضة لأن الأبواب العادية تسد مكانها وعرض 20 سم كافي .. قللت طول غرفة الملابس 10 سم واستوى العرض 1.8 بس نسيت اعدله خليته 1.7 في 1.7 مثل ما هو واضح .. واستوى عندي البعد الرأسي 2.1 ونقدر نحط اصيص زراعة

بالنسبة للحمام هذا التوزيع أحلى بس مشكلة بعد الصرف للكرسي لازم نتأكد منها مع مهندس ميكانيكي مختص وأتوقع تصير ولها حلول ثانية .. إحداها بما أن الإرتفاع عندنا 4.5 متر ممكن نسوي التصريف تحت سقف الحمام التحتي المستعار بعمل فتحة من الأساس في الخرسانة ويتجه للصرف بسلوب جيد وبدون أي مشاكل بإذن الله وتوزيع الحمام يكون مثالي مثل ما تشوفون .. ونقدر زيادة نرفع أرضية الشاور والجكوزي شوي ونخلي الجكوزي نص نازل لسهولة الدخول داخله .. كذلك توجد جكوزيات لها باب ومقعد ويوصل الماء للرقبة تقريباً وهذا مريح أكثر وممكن نستخدمه .. شيء مهم ما ننسى جهاز البخار لأن هذا بيكون شاور وستيم وجكوزي .. البخار زين تكون له المساحة كبيرة

http://i.imgur.com/MFf5gZN.png

اللي يعجبني في هذا التصميم إنه اقتصادي وما فيه ممرات كبيرة واسعة ومساحات ضائعة .. وفيه كل احتياجات العائلة حتى فيه قسم تحت من غرفتين وقسم بنتهاوس من غرفتين وبانتري .. ومع الواجهة والقطاع الطولي بيبين أكثر ونقدر نطوره في اتجاهات عديدة بدون حدود معينة

الواجهات سويتها بطريقتين وحدة بدريشة وسطية بارزة ووحدة بدريشة وسطية عادية .. وأكيد الملاك يحبون بعضهم الحجر وهو له فنه ولمساته ويفترض تصميمه يدخل من الأساس وبعضهم يحبون الزينة الزايدة وانا اركز على التوازن والواجهات الجميلة بحدود ووقار

أفكر بما اننا نستعمل درايش قوية ومانعة للغبار وعازلة للحرارة ليش نسوي تظليل وبروزات ونخليها سيدة أفضل .. القرميد شوي ومنه أنواع حتى نوع يجي أسفله بتومين وعازل ويركب على لوح خشب وحسب النوع اللي بنحتاجه وبنركبه يجي التفصيل .. والزوايا لها قطع خاصة أما توضح برسم تفصيلي أكثر أو تكتب في المواصفات بصورة واضحة

http://i.imgur.com/Dll6L1M.png

الدرج كل عتبة 12 سم وارتفاع أرضية المدخل 48 سم ما اشوف فيه داعي للدرابزين ولو حبينا نقدر نسوي جدار 10 سم أو حديد مشغول

عملت إضافة بعض قطع الجي آر سي وعمودين للمدخل وسويت الواجهة الثانية

http://i.imgur.com/ZGlmq4p.png

الواجهة الجانبية ونشوف فيها كيف دكتات التصريف للحمام مرتفعة والدريشة بينهم من قطعتين قطعة عمودية وقطعة مايلة تمثل منور سقفي .. ورفعت سور السقف جهة الدريشة حتى يعطي خصوصية أكثر ولا يمكن حد من فوق يطل على تكرمون الحمام .. الدريشة عالية وممكن القطعة العمودية نخليها محببة وحاجبة للرؤية والمائلة بتكون رفيعة كثير وحلاتها تكون شفافة لدخول نور الشمس وامكانية رؤية السماء من داخل

http://i.imgur.com/cj7zJgf.png

من أهم المخططات عندنا القطاع الطولي واللي يقص المبنى ويراوينا شداخله

فيه أشياء كثيرة مفقودة وما يلاحظها الا مختص وانا ركزت على المهم .. عندنا الباب فوق السطح المفروض مرتفع عن أرضية السطح الخرسانية وأرضية السطح الخرسانية تجي فوقها طبقات العزل وميلانه .. الأرضيات للغرف تتكون من طبقات كذلك ولازم نوضح النعلات

ببساطة هذا رسم ناقص لكن المهم يوصل الفكرة لنا

النوافذ في غرفة النوم الرئيسية في الوسط يسار بتجي جنب السرير وعندنا مساحة كافية بحيث نسويها عريضة ونازلة لحد 50 سم من الأرضية حتى نشوف انفتاحها جهة خلف البيت والجنوب ونور الشمس يدخل الغرفة .. ممكن نسويها ضيقة وطوالية وجاية فوق الكوميدينو بالضبط .. طبعاً ما نهتم وايد للي تحت لأن ورا البيت ولا تبين للناس من الخارج والداخل من ورا ما يقدر يدقق في كل شيء ورا زراعة وهذا أقرب شيء لنظره والحائط

http://i.imgur.com/J0YzDLW.png

الدرابزين بيكون قطعة بسيطة بس جهة المفتوح صوب الكراسي .. ومن تحت نقدر نسوي جزء طوفة يغطي الدرج .. انا خليته للتوضيح بس .. والزوايا الجانبية لبيت المصعد مشطورة وبتقويس من أعلى

ملاحظة مهمة .. المصاعد الحديثة مكينتهم داخل بيت المصعد وصغيرة وتحتر وتصخن بير المصعد وتصخن داخل المصعد بالتالي .. لذلك حلها بعمل فتحات تهوية صوب الجهة الخلفية من الدرج هنا بيكون في يمين الصورة من تحت بشبك ألمنيوم لدخول الهواء البارد ومن فوق كلش مروحة شفط بسيطة ودكت تطلع الهواء برا وبحيث يكون معدل تطليع الهواء بسيط ما يطرد الهواء البارد بل يطرد الساخن المرتفع في بيت المصعد ليحل مكانه بارد من أسفل

تحت يمين عندنا الصالة التحتية وانا عملت حائط فاصل حتى يعزل المنطقة نوعاً ما وسويت فتحات دائرية في الجدار هذي موضح وراها الدرج بخطوط خفيفة ممكن تكون مفتوحة ومسكرة بحديد مشغول حتى ما يحاول طفل يدخل منها أو مغطاة بطبقتين زجاج معشق أو ملون وفي الوسط إنارة فتبين منورة دوم .. أو ببساطة غطاء خشبي داخل في الوسط وبرواز دائري وفي الوسط لوحة مربعة وقد تكون صور أفراد العائلة

الحمام الرئيسي وتقريباً كل حمام فوق له سكايلايت متصل مع الدريشة وهنا توضيح له بمقطع طولي في الحمام جهة الشاور .. والإرتفاع حول 3.6 متر وانا بالنسبة للحمامات حدي 3 متر ويمكن أقل حتى لتبديل الليتات أسهل .. ولو حبينا نسوي الإرتفاع عالي نشوف ليتات جانبية أو نازلة معلقة

http://i.imgur.com/3UGSnFp.png

الرجال اللي مع الشلة طوله متر و 80 وحطيته بس للتوضيح

التصميم كل ما تاخذ وقتك فيه وتشتغل عليه أكثر يطلع مدروس وشرح وواضح للمستفيد .. والمستفيد عندي انا كلكم وانا بنفسي استفيد لأني مستقر على هذا التصميم لولدي ويمكن بدون بنتهاوس لتقليل تكلفة البناء ولعدم حاجته له وممكن اسويه بالبنتهاوس

شلت الشباب اللي يتناقشون داخل طردتهم وحطيت واحد يتسبح الله يستر عليه

البوردر مهم ويفصل نوعين من البلاط ممكن بالكامل غير .. فوق وضحت الحمام الفوقي مال البنتهاوس كيف وفيه تعديل عليه وتوضيح شلون بيكون راكب فوق وداخل شوي داخل حتى يفتح جزء من السقف للنور

http://i.imgur.com/dkDv0av.png

بالنسبة للإضاءَة بما إن الارتفاع كبير لازم نخليها مثبتة أما على خشب حتى الدنجل ينفع ويكون جاي بالعرض مثبت من حائط لحائط والإنارة مثبتة فيه ويطلع الخشب ديكور حلو ولا يأثر في الإرتفاع .. أو ننزل السقف بالكامل بالجبس ونسوي السبوتات فيه .. يعني 2.8 مناسب وجمالية المنور بعد بنحافظ عليه وفي المرحلة القادمة باسوي هذا الخيار بإذن الله

سامحوني امكانيات البرنامج هذا بسيطة لكن واضحة بقدر كافي .. فيه برامج ثانية أقوى خصوصاً للتوضيح ثلاثي الأبعاد وهذا ثنائي بالطريقة القديمة

للي يصمم أو ناوي يبني لازم يعمل فايل ويسجل كل النقاط ويشوف الخيارات التصميمية يناقشها مع مختص .. الإتجاهات كثيرة وبعضها مكلف بدون معنى وبدون فائدة .. بعض المصممين يهمل عندنا عنصر مهم اللي هو النور الطبيعي .. وبعضهم يجط قطعة عادية لكن سعرها عن 10 قطع ويمكن أطقم ولا ابالغ صدقوني .. في الأخير القطعة زادت كم سم أو قصرت كم سم ما تفرق كثير في التصميم

كمثال بعض الناس يدورون جكوزي دفش وكبير يكفي حق 2 ويمكن أكثر .. يخلص الماي وهو يكون فيه بروحه .. وبعضهم يختارون صح والمقاسات الموجودة للحجم العادي غالبيتها ما تزيد على 2 في 80 سم .. وإحنا حمامنا السابق طوله 5 متر ونشوفه تقريباً مقسوم من النص بالقزاز والباب الزجاجي واستوى عندنا حيز رطب يتكون من شاور بمقعد ( للشياب ) + جكوزي + إمكانية عمل نظام بخار .. وعندنا المنور السقفي بيكون مسوي جو وسهل عمله لأنه في حيز غائر

شيء مهم نسيته .. الحمام اللي فوقه دريشته مب مسموح تكون في هذي الجهة الا تكون صغيرة ومرتفعة ولازم نسويها تطل على السطح

سويت انعكاس للجهة الثانية من الحمام ونزلت شوي السقف لحد 3.2 متر ورفعت شوي الدريشة

لازم جسور أرضية الحمام تكون معكوسة حتى ما يستوي شلخ بين الطابوق والخرسانة وعدلتها هنا

http://i.imgur.com/OI2YS0V.png

بايب التصريف حق الكرسي يبين سلوبه زين وسبوت لايت مكانه تحت الجسر مسلط على الجكوزي وثاني يفترض فوق الشاور

الكرسي طوله 70 سم كما في الصورة والباب يفتح صوبه .. يعني ندخل مقابلين المغسلة مباشرة ولازم نحط قطعة بلاستيك تمسك الباب ليضرب في الكرسي

بالنسبة للتهوئة أما نسوي فتحة فوق الجبس ولوفر قريب من الباب لدخول الهواء من غرفة الملابس أو نسوي امداد هواء تكييف بارد .. وانا افضل اللوفر ومروحة الشفط بتدخل هواء بارد وبتشتغل بأريحية لأن المكان بيكون مب مكتوم

الشكل بعد التعديل الأخير برفع الطوفة بس هنا الارتفاع الصافي 3.6 وحطيت توضيح لفتحة الباب بخطوط متقطعة .. الحاجز الزجاجي ممكن يكون بفريم أو فريملس يعطي انفتاح أكثر

المراية فكرتها تكون معمولة ببرواز عريض خشب ووراها خشب يغلفها ويحمي طلاءها من التحلل وهذي يسويها أي محل زجاج وبرخيص مقارنة بالنوعيات الجاهزة .. تثبت على خشب مربع مثبت ببراغي في الحائط حتى تبين كأنها طافية .. وتكون بارزة حول 10 سم من التجويف اللي هو 10 سم وانارة مخفية تنور التجويف اللي يكون ببلاستر أو جبسوم بورد مصبوغ صبغ ضد الماء وصدفي أو أبيض

http://i.imgur.com/jBcdGn6.png

بناءً على الفكرة الموجودة طريقة حوض الشاور العادي مب حلوة والأفضل نسويه من قطعة وحدة من الرخام أو القرانيت المعالج واللي عليه مادة مانعة للانزلاق .. وحلاته يجي مع نعلات جانبية مشابهة .. فيكون عندنا أكبر مساحة للوقوف وبسلوب خفيف جهة قناة تصريف مع بايب عريض ومفتاح مانع لرجوع الماء والروائح ووصلة مباشرة لبايب التصيف الكبير

مثل هذا الوضع تقريباً

http://i.imgur.com/TTRCEtx.png

هنا نشوف كيف قناة التصريف شبه مخفية .. نقدر نسويها فتحة مغطاة جزئياً بقطعة رخام ممكن تنشال ويتنظف تحتها والماء يتصرف وراها قرب حد كرسي الجلوس

http://i.imgur.com/9KOo8zu.png

وإشتغلت على توزيع آخر بحيث أغير وضعية الجكوزي واخلي باب الشاور والجكوزي ينفتح من الوسط ويكون عندي مجال اكبر المراية .. بيستوي عملي أكثر وابغي تفاعل وأسئلة وانتقاد مب بس مشاهدات

الوضع الجديد ممكن أفضل ومثل ما قلت التصميم ما يوقف عند حد وكل مقترح جديد يكون مدروس أكثر

هذا مثلاً إستوى سهولة الدخول والباب وسطي أفضل واتصال كاونتر المغسلة مع الحاجز القزاز بيكون أحلى .. وإستوت منطقة الشاور واسعة والحوض مثل ما هو ما تغير ونقدر لو نبغي نحط حوض زاوية بعد الوضع سهل وبحط مثال لحوض الزاوية

http://i.imgur.com/JLlwmF0.png

تفصيل مهم لمغسلة الحمام والمراية يوضحه هذا القطاع الطولي مع موقع الباب في الحاجز القزاز اللي يفصل منطقة الشاور والجكوزي عن باقي الحمام

الكسرة في الحائط عمقها 10 سم ومثل ما ذكرت تكون مصبوغة بلون صدفي أو أبيض حتى يعكس نور الإنارة المخفية

http://i.imgur.com/gYins3B.png

تسليت بعمل مقترح حق البيسمنت ولتوضيح المنور اللي في الحوش واللي نازل بمستوى البيسمنت .. هذا اللي مسويه بعرض 1 متر ممكن النزول له من الحوش بدرج خشب أو حديدي لصيانة منهول المضخة اللي المفروض تكون ورا الحمام لو استدعت الحاجة .. وطبعاً أطراف الحفرة أو البلكونة النازلة تكون بسور حماية عن السقوط لو حد مر ورا البيت .. ولو ارتداد البيت هو العادي 3 متر بيتبقى لنا 2 تقريباً ناقص سمك سور الحماية اللي ممكن يكون 10 سم وهو كافي للخدمات وللزراعة كذلك

http://i.imgur.com/BL48X8Q.png

المساحة الزايدة بتكون عندنا 175 وهنا لغرفة ومخزن كبير وممكن نخليها لغرفة ومخزن وصالة وممكن نضيف مساحة إضافية لو حبينا .. بس بهالوضع تستوي المساحة الاجمالية للبناء للفيلا بس 944 متر مربع وب 9 غرف كلها تعتبر ماستر وبعضها بغرف ملابس كبيرة + الحمامات معاها + صالتين وغرفتين طعام ومجلس

هذي الصورة شوي أوضح

http://i.imgur.com/cKC1x3W.png

وكل الغرف والأدوار فوق بعض يعني نظام البناء الخرساني بيكون مدروس وبسيط

نتناقش انا وأحد الإخوان في هذا التصميم الأخير .. وكنت اقول إن الممرات قليلة ومساحة البناء ما فيها مساحات ضائعة وعرض الممر متر و 60 سم قال وايد قليل .. وهذا توضيح برجال شايل شنطة .. لأن عرض الرجل بحدود 50 - 60 سم وعندنا الممر لو اثنين يمرون جنب بعض بتبقى مسافة حتى متر و20 ومتر و40 مسافة كافية لشخصين

http://i.imgur.com/ljvul2O.png

وهذا توضيح للبلكونة النازلة مع البيسمنت وكيف الواحد يقدر يمشي بسهولة فيها وحتى ممكن يزرع ويرتب الزراعة في اصيصات .. وشمس الجنوب مؤكد بتنور هذا المكان بإذن الله

http://i.imgur.com/3CE4f6D.png

ما اهتميت لتفاصيل الدرج واعتقدت انها كافية لكن نبهني لها الموضوع الثاني اللي يسئل عن اضاءة الدرج

عندنا حيز الدرج 7.3 في 4.2 وهو مساحة معقولة لو بنسوي بيسمنت بيضيع الفضاء اللي خلف الدرج بسبب العتبات النازلة ولو مب مسوين بيكون عندنا مجال نسوي مخزن صغير .. المصعد عرضه مثالي 1.4 متر وعمقه 1.8 وعرض عتبات الدرج 1.2 أيضاً كافي لشخصين ولنقل الكراسي الطويلة .. والمساحة جدام كممر وواجهة مصعد جيدة

بالنسبة للدرج باوضح عدة أفكار لتصميمه وقصدي تشطيبه لكن لازم تتخذ في الحسبان من الأساس .. الدرابزين عندنا بيكون محدود وبسيط وأقل ما يمكن ونقدر نسويه خارج طرف الدرج من تحت ومشبوك مع بيت المصعد .. وفيه طريقة لو حبينا نسوي مسكة متواصلة مع نهاية الدرابزين ومقصوص لها في بيت المصعد العملية سهلة بس نحدد مكانها ونعملها أثناء الصب

هذي بداية الدرابزين حماية بس في بداية الدرج

http://i.imgur.com/PsyIkDn.png

ما لونتها لون غير بس واضحة ان شاء الله وبكمل وقت آخر بإذن الله

هذي صورة توضيحية لنموذجين باستخدام السيراميك أو البورسلان للواجهة بسمك 8 ملم .. اللي فوق البروز كله 3 سم من الواجهة ولازم نشوف للواجهة سيراميك بعرض 12 سم بالغلط خليتها 9 سم وتكون القطع موزعة على عرض العتبة اللي هو 120 سم يعني ممكن ناخذ 12 في 12 مربعين بعدد 10 حق كل عتبة أو 12 في 24 بعدد 5 حق كل عتبة أو 12 في 30 بعدد 4 حق كل عتبة مثل ما بوضح في المثال القادم

اللي تحت البروز 5 سم وتقدرون تقيسون وتشوفون شكثر ولا شيء .. بعدين الحواف لافة ما عندنا مشكلة لا تنكسر لو انضربت ومنظرها حلو وناعمة

بالنسبة للحواف هذي وبلاطة العتبة تنعمل بسهولة بأي نوع من الغرانيت أو الرخام .. كذلك نحصلها جاهزة من البورسلان أرخص ومخصصة للدرج .. وتجي بعدة ألوان منها الرمادي أو الأسود أو البني الفخاري وننسق معاها قطعة الواجهة وممكن تجي بنقوشات وألوان تختلف وحطيت صور لأمثلة عديدة في موضوع صور عمرانية ونقاش حولها

تحت خلوا نقول مقدمة البلاطة راهية بعرض 6 سم وفي الثنتين القص حق شريط الاضاءة واضح ومقاسه واضح .. واحد نص سنتيمتر في 1.5 سم وواحد 1 سم في 2 سم .. التمديد لو ما سويناه نقدر نسويه في المونة اللي تحت البلاط بس بسلك قوي ومحمي وبعناية خلال التركيب

http://i.imgur.com/hHTe4Bg.png

وهنا توضيح لواجهة الدرج بس ثلاث عتبات وشلون يبين لنا البرطم أو الحافة تفرق بين عرض 3 سم في البلاطة نفسها أو عرض مزدوج 6 سم .. والنقشات افتراضية وأكيد في الطبيعة بنحصل أحلى بوايد

http://i.imgur.com/XnQOXdu.png

شيء مهم ناخذه في اعتبارنا عند تصميم الدرج هو عدد العتبات والارتفاع الكلي من دور لدور .. مثال هنا عندنا 30 عتبة ولو خلينا كل عتبة 15 سم وهو المقياس المعتاد والمعقول في الراحة بيطلع لنا الارتفاع 4.5 .. لكن لو فرضنا نبغي الدرج مريح أكثر أو سوبر مريح ننزل ارتفاع كل عتبة فينزل الارتفاع العام فلو خلينا كل عتبة 14 سم بنحصل 14 في 30 = 4.2 متر وهو يطلع صافي حول 3.9 لو الصبية كانت 30 سم و 3.9 ارتفاع كافي حتى للتكييف المركزي أو الدكت سبلت

نفترض بنسوي العتبات تدليع أكثر بإرتفاع 13 سم وهذا بيعطينا ارتفاع 3.9 وبعد كافي وصافي بيطلع حول 3.6 وحتى حق دكت سبلت ممكن .. ولو بنقول بنركب تكييف سبلت عادي حتى ممكن نسوي كل عتبة 12 سم ونحصل ارتفاع 3.3 صافي وعندنا للجبس طبقتين 30 أو 40 سم

بعضنا ما يبي تعقيد زايد .. يقول باسوي الدرج بلاط شعبي وباركب عليه سجاد وحتى ممكن مع حشوة تحتية ( أندرلي ) وبيكون مريح وعملي وهذا باسوي له تفصيل مريح .. وسويته في بيتي وحطيت صوره بعد سابقاً ولا يكلف شيء و للحين السجادة ما تغيرت وملصوقة بغراء مب مثبتة بقطع نحاسية وتجميلية .. وحسب موقع الدرج نقرر درجة التجميل اللي نبغيها

موضوع ممتاز ومفيد

أنا ابحث عن تصميم مميز و يتوافر فيه فكره الأجنحه هل ممكن احصل شي مماثل ؟

اقتباس:

---

المشاركة الأصلية كتبت بواسطة koketa

موضوع ممتاز ومفيد

أنا ابحث عن تصميم مميز و يتوافر فيه فكره الأجنحه هل ممكن احصل شي مماثل ؟

---

مرحبا بتواجدك إخوي

عندك الأخير الدور الأرضي فيه جناح من غرفتين مفصولتين عن باقي الصالة والبيت وأشوفه سهل وعملي وفيه حركات معمارية حلوة .. فوق كذلك للبنتهاوس ولو تبغي بيسمنت ممكن تسوي قد احتياجك .. الدور الأول موضح قسم غرفتين للبنات كافية مع بعض لأربع بنات ثنتين في كل غرفة وكل غرفة بحمامها ومساحات التخزين فيها واضحة .. وغرفتين رئيسيتين ثنتين بغرف ملابس تدخلها وبباب مفصول .. مع إنه تصميم متوسط المساحة 760 ولو بنضيف بيسمنت ممكن يوصل أقصى شيء ل 1060 وبحدود 10 غرف

غير داخل الموضوع كذا تصميم تنطبق عليه الاحتياجات

وحتى لو تبغي تعديلات محددة مستعد وكذلك لو عندك تصميم تبغي عليه تعديلات بحيث يتناسب مع احتياجك وأرضك العملية سهلة وللجميع

إخواني نصيحة لوجه الله في هذا اليوم المبروك وهو يوم جمعة المسلمين

أي تصميم ما نعتبره حصري وخاص بنا ونتجرد من ( لي انا بروحي ) وخلونا نتفق إن المباديء التصميمية تقريباً متقاربة وشفنا كيف التصاميم تتشابه حتى عند الاستشاريين ويشتغلون على نماذج محددة ويطورون فيها .. وانا واحد منكم وفيكم حطيت تصميم بيتي واللي يبغيه حلال عليه مع إني مسويه من الصفر لكن لازم حد مسوي فكرة مشابهة من قبل

في النهاية لكل شخص ذوقه واحتياجه وممكن شخص يطور على نموذج ويطلع شغله أفضل بكثير من الأساسي والله يوفقه ويستاهل ولازم نتمنى ونحب لإخواننا ما نحب لأنفسنا

احلا شي برطم الدرج يابوعبدالله

بس اللي يبي يركب مكيفات سنترال أو دكت وديكور جبس طبقتين

لازم يخلي الارتفاع عالي مب اقل من 5 متر

عني حاولت ارفع السقف ورفعته لين 4.20 وراح منه 90 سنتيميتر للجبس والدكتات

ونزل عندي السقف

والدفان مع الفنشينغ لين التبليط طلع 15 سنتيميتر

يعني من 4.20 صفيت على ارتفاع 3.15 مع الكرانيش يُبين نازل السقف عندي

ولو ادري ان السقف راح ينزل جذي كان تنازلت عن مكيفات الدكت في سبيل ارتفاع السقف

حاولت ارفع البيت اكثر ماقدرت بسبب عتبات الدرج راح تزيد وراح تخرب تصميم البيت

لان مع ارتفاع السقف لازم تزيد عتبات الدرج وبتزيد ( البراطم )

وإذا تزيد عتبات الدرج راح تغير مداخل بيبان البيت لانها راح تتداخل مع مداخل البيبان وعتبات الدرج

وإذا تغير مكان مداخل البيبان سوى اذا عندك مدخل قريب الدرج تحت اوغرفه فوق وبتغير قليل في مكان تحريك الباب بس راح يخترب عليك الديكور شوي وخاصه اذا جنب الدرج المصعد ومدخل للبيت تحت زي اللي عندي

نصيحتك في محلها بو سعود للي يبي يرفع ارتفاع زائد

وبخصوص البرطم صج كلمة عامية بس تترجم كلمة Lipping

الارتفاع الموجود هنا كله ما نحسب الحشوات اللي تحت لكن المقصود ببداية الدرج نبتدي من نهاية أرضية البيت المشطبة .. يعني لازم ينحسب المستوى من الأساس ومن تأسيس الدرج لذلك تحصل أول عتبة مرتفعة كثير والأخيرة يجي بعدها نزول حتى ينوزن مستوى الدفان أو الخرسانات اللي تحت البلاط .. اللي ينقص عندنا في الإرتفاع هو بس سماكة صبية السطح وبعدين أي شيء احنا نسويه تحت صبية السطح مثل الجبس والدكتات .. والدكتات لو خليناها جانبية بنقدر نرفع الجبس في الوسط ويعطينا احساس بسعة المكان والارتفاع .. كذلك لو سوينا الجسور مسطحة أو قليلة النزول نفترض 20 سم بس والدكتات تحتها تجي 40 أو 50 فراغ 10 سم وتحته الدكت 40 وتحت يجي الجبس ممكن بحدود 10 سم .. وصلنا 80 سم ومع الجبس دبل حسب التصميم بيزيد عندنا النزول .. لكن نقدر نسوي مثل ما قلت تصميم للجبس مع الدكتات بحيث تجي جانبية والجبس في الوسط مرتفع

الخلاصة اللي يفضل ارتفاع عالي وتكييف دكتات يعمل حسابه من الأساس

Lipping لها استخدامات وايد يامعماري

يعتمد وين تستخدم :victory:

الا سؤال يابش مهندس وين اقدر احصل مادة لاتكس latex اللي تستخدم لتقوية الإسمنت أو مادة الغراء لاصق البلاط

تدمر مايبيعها بروحها لازم تأخذ منهم مادة الغراء مع بعض يجيك عندهم لتر يتخلط مع كيس الغراء يوم طلبت منه يبيعني إياها رفض

رحت تاسكو عندهم بس نوع ثاني وسعره غالي الغالون ب ظ،ظ¨ظ* ريال

هذا عندك معلومات عن هالمادة تفيدنا لان خبرك هالهنود والبنغال مايعرف الخصائص بس يبي يبيعك اَي شي

تسأله تقول له هذا لاتكس مايعرف شنو لاتكس