يوتيوبيات البناء .. مقاطع تثقيفية متجددة

ما اشوف فيه داعي البايبات تمر تحت السقف في غرف وصالات فقط لتوصيلها للحمامات والمطابخ .. نقدر نسوي دكتات راسية نازلة من السقف أو طالعة من الارض لو عندنا غرفة مياه تحت الارض ومنها للحمامات .. التمديد فوق السقف صحيح يعرض البايبات لحرارة الشمس بس ممكن نسوي لها عزل حراري وهو ضروري وممكن لو حبينا نسوي لها ممر طابوقي مغطى .. شفت بيت ممدينها تحت سور السقف المائل اللي فوقه قرميد ودوم تقريباً تحت الظل .. أخيراً عندنا مناور الخدمات حتى بعرض 60 سم كفاية للنور والتهوئة والطول حسب ما يتوفر

https://www.youtube.com/watch?v=6CM1G2HkwL8

أكيد هذا الاجراء ضروري للمشاريع الكبيرة لضبط الجودة لكن اللي اعرفه إن البلدية مختصة برقابة مصانع الردي مكس والمفروض نشر تقارير مخبرية عن العينات ومحاسبة الشركات المقصرة
والمفروض عندنا تصنيف رقمي للخرسانة ومحتوياتها

https://www.youtube.com/watch?v=RaGJXEu9S24

هنا واضحة لي رداءة الشغل في الطابوق المفكك بفجوات كبيرة غير معبأة في الاتجاه الراسي .. هذي يسهلونها المقاولين وبعض الاستشاريين إنها بعد البلاستر بتتغطى .. صحيح لكن تبقى منطقة ضعيفة تنشأ منها الشلوخ الحرارية

بعدين في آخر الفيديو نشوف سور برتقالي أو مائل للبرتقالي مع تشجير اللون الأخضر متماشي مع البرتقالي ويضيع حدته

https://www.youtube.com/watch?v=r8J4FhK6nqI

تصميم السقف الممتد والطائر في واجهة الفيديو السابق جميل معمارياً لكن كارثة انتقال حراري سريع للداخل ولازم عزله حرارياً جيد من تحت والجوانب وفوق .. يحتاج تفصيل عزل حراري معقد

بو عبدالله ما شفنا شيء غير هالنصايح العامة.. يمكن انت لقطت التصميم لكني ما شفت شيء. ردنا للمهندس اليماني أو للقفاري :)

سؤال .. البنيان بطريقة ال cement block .. ايش رايك فيه؟؟

اقتباس:

---

المشاركة الأصلية كتبت بواسطة سالم الزهران

بو عبدالله ما شفنا شيء غير هالنصايح العامة.. يمكن انت لقطت التصميم لكني ما شفت شيء. ردنا للمهندس اليماني أو للقفاري :)

---

ما فهمت شتقصد بالضبط بو زيد .. ردي الأخير الاثنين كله لفيديو القفاري الأخير في اللستة ورديت عليه في اليوتيوب برد مقارب .. هو يشوف كل شيء زين وما يركز في السلبيات وهذي سلبيات ممكن تفاديها بسهولة

اقتباس:

---

المشاركة الأصلية كتبت بواسطة SouthK

سؤال .. البنيان بطريقة ال cement block .. ايش رايك فيه؟؟

---

إذا تقصد الطابوق الحامل بدون أعمدة هذا تصميم موفر ةكله تركيب وسريع .. البداية تنعمل أساسات بسيطة شريطية تحت الطابوق بس وبعدين يقومون الطابوق ببناء مستقيم وبجودة عالية ومونة متوازنة .. في فلوريدا غالب بيوتهم دورين وثلاثة بهذي الطريقة وبيوت كبيرة وقريبة لبيوتنا .. الأسقف تجي هولوكور تتركب في يوم بكرين على الطابوق مباشرة وينصب فوقها سكريد بسيط أعتقد بعد التمديدات

حتى الطابوق يكون نظيف وسيدة أوقات كثيرة ما يتشطب صبغ سيدة بدون بلاستر ولا جبس

آسف مصطلح سمنت بلوك ما مر علي في السابق كله كونكريت بلوك اللي هو الطابوق العادي مثل اللي عندنا 7 كيلو نيوتن .. ويمكن المصطلح يعني نفس الشيء

اقتباس:

---

المشاركة الأصلية كتبت بواسطة معماري قطري

ما فهمت شتقصد بالضبط بو زيد .. ردي الأخير الاثنين كله لفيديو القفاري الأخير في اللستة ورديت عليه في اليوتيوب برد مقارب .. هو يشوف كل شيء زين وما يركز في السلبيات وهذي سلبيات ممكن تفاديها بسهولة

---

اممم عيل ما عرفت القفاري.. احسبه واحد ثاني.. الحاصل ما استفدنا شيء من تعليقاته.. ودي انه بين لنا شيء في التصميم.. كله مصور نفسه.

اقتباس:

---

المشاركة الأصلية كتبت بواسطة سالم الزهران

اممم عيل ما عرفت القفاري.. احسبه واحد ثاني.. الحاصل ما استفدنا شيء من تعليقاته.. ودي انه بين لنا شيء في التصميم.. كله مصور نفسه.

---

هو ينصح نصائح عامة وأوقات يحط تفاصيل ويعرض بضاعة جديدة .. أشوف تركيزه تسويقي أكثر بس بعد شرحه وافي في مرات كثيرة .. هنا أكيد ما ركز على الشغل في الموقع ركز على أهمية الزيارة

الله يوفقهم هو واليمني مجتهدين بس يتحاشون الرد على تعليقاتي في اليوتيوب خايفين من سجن الحاير الظاهر مع إن أوقات تعليقاتي شكر وتوضيح أكثر للنقاط اللي يعرضونها .. وانا مشجع للكل وفي كل الدول في عرض هذي الأُمور والتوضيح للمقدمين على البناء .. هم الإثنين أكيد أحسن مني في الشجاعة في الكلام عن طريق التصوير والكاميرا انا للحين ما عندي الجرأة عام لكن خاص اوضح ملاحظاتي بالتصوير والتعليق برسائل فيديو صوت وصورة