مراجعة التصاميم المعمارية وابداء الملاحظات عليها (محدث)

استكمال للتصميم السابق هذا البنتهاوس أو التعديل عليه .. التوزيع الحين أحسن والمساحة زادت بس 56 متر مربع عن قبل

https://i.imgur.com/Li51Pbc.png

واستوت الصالة جانبية تطل على مدخل البيت وعلى الحوش وهذا ممكن حسب القوانين الجديدة للتخطيط .. كذلك قدرنا نسوي قبة تدخل النور من فوق للفتحة في الدائرية في صالة الدور الأول للدور الأرضي

ممكن نشيل مترين من مساحة البناء بتفريغ السقف فوق البلكونة اللي هي تحصيل حاصل امتداد المجلس تحت ومكانها جنب الغرفة الرئيسية .. هذي ممكن نخليها للزراعة نباتات متسلقة في اصيصات ونعمل حساب تمديد للري بالتنقيط لها .. كذلك ممكن نرفع جدرانها مع عمل فتحات صغيرة للشجر ينتشر منها على الجنب وصوب دريشة المجلس .. ونبقي مكان للتشمس لو نبغي نسوي حمام شمسي .. فوق بس امتداد جسر مع حافة السقف يعطي تشكيل معماري كتلي بارز .. ويكون مثل ما هو موضح فيه عمدان في الزوايا ديكورية تتصل بزوايا هذي الجسور العلوية

https://i.imgur.com/GWkJsLq.png

حطيت الرسمتين جنب بعض حتى توضح الصورة

وأظن صورة القبة بثمان درايش فوق واضحة فوق الفتحة الدائرية والفتحة الدائرية تنفتح على نافورة في الدور الأرضي

نصحت المالك بإزالة البروزات حول الدرايش ومحاولة عزل الجدران الخارجية أما بعازل وطابوق خارجي اضافي أو بفوم وحجر أو بفوم وبلاستر .. أو بالطرق اللي غطيتها في موضوع العزل الحراري

القبة الصغيرة كانت حول 3 أمتار لمساحة صغيرة وكانت تابعة للغرفة الجانبية حولت المساحة لصالة تلفزيون وصغرت القبة للنص .. حتى ممكن ازالتها لو كبرنا درايش الصالة وزدناها بتكون لنا اطلالة شاملة على الحوش ونور طبيعي كفاية متى ما حبينا ونقدر نكتفي بالقبة الكبيرة ونرفعها شوي بحيث تبين من مسافة بعيدة

ألحين مع وجود عوازل قوية ودرايش وأبواب ما تخلي الهواء والغبار يدخل تستوي أوقات ضغوط قوية على مراوح الشفط .. لازم ينسحب هواء يحل مكانه هواء خارجي .. ومهم لتهوئة البيت نسوي فتحات لدخول الهواء الخارجي بنسب بسيطة .. بعض التكييف المتطور فيه خاصية الهواء المتجدد ولو ركبنا هالنوع تنحل المشكلة .. يبقى لو باب غرفة مغلق ومحكم ما يسرب هواء ودورة المياه داخل بعد نواجه شفط ضعيف

انا شرحت الحل حق بيتي الجديد وكان الحديقة الوسطية المغلقة والمغطاة منها يدخل هواء خارجي اليها مفلتر عن الغبار بس وفيها يتشبع بالاوكسجين بسبب الزراعة وثم يدخل البيت وكل غرفة بيتم تمديد بيب لها فوق الجبس ويطلع في أرضية الغرفة تحت السرير مثلاً أو جنبه أو في زاوية عليها قطعة أثاث تخفيه ويكون قابل للتسكير لو ما نفعت السالفة

بيوت الأمريكان فيها هذا النظام حتى للفراغ في الجدار الخارجي وفي السقف اللي يجي من طبقتين وغالب بيوت الدول المتطورة في مجال البنيان .. في رأيي أي واحد بيبني لازم يحسب حساب قليل من الهواء المتجدد لكل غرفة حتى لو عن طريق بايب يدخل من الخارج وعليه فلتر معين عن الغبار وأتوقع هذي الفلاتر موجودة

منطقة الدرج والمصعد تختلف مع كل دور .. في الأرضي مستغلين تحت الدرج كمخزن ومسوين له سقف .. السقف بيكون متدرج حسب تدرج الدرج بس القطعة في الوسط بتكون سقف سيدة

https://i.imgur.com/iFajjkf.png

الأرضي انا خليته مثل ما سواه الاستشاري والأول ضفت عليه عتبات زيادة وصلوا لعدد 34 عتبة وهذي مهمة لتحديد الارتفاع .. لو بنمشي مع ارتفاع 13 سم للعتبة بنوصل لإرتفاع 4.42 متر من أرضية الدور الأرضي لين أرضية الأول ولو بنزيدها لين 14 سم بنوصل لإرتفاع 4.76 .. والارتفاعين مريحين لركوب الدرج أكيد 13 أسهل

يعني توزيع الارتفاعات ممكن يكون 30 سم للحوش مع سلوب من الشارع اللي هو 0 + 30 للأرضي أو 45 سم مثل ما نحب + 4.76 + 4.76 بنكون استهلكنا 10.12 من المسموح 14.5 أو حسب قرار التخطيط للمنطقة .. الباقي 4.38 للبنتهاوس .. بنشيل سمك السقف يمكن 30 سم وبنشيل سور السقف ممكن 80 سم بتبقى لنا 3.28 ارتفاع صافي اشوفه مريح جداً ولو التخطيط عطونا ارتفاع عام 13.5 متر ممكن نقلل من ارتفاع الأدوار على حسب شكثر يبقى لنا .. بالنسبة لإرتفاع الدور الأخير بعض شركات المصاعد تطلب صافي 4 متر لبيت المصعد وهذي حلها سهل .. نسوي سقف بيت المصعد صافي 4 متر وننزل باقي صبية سقف البنتهاوس حتى يكون عندنا مجال نسوي سور سقف يغطي التكييف

خلونا في المهم .. الأرضية الوسطية بتكون بارتفاع شوي أرفع من عتبات الدرج اليمنى ويمكن توصل وسط أو أعلى اللي فوق بين الدريشتين حتى تعطينا ارتفاع مناسب للستور يوصل لحدود مترين صافي .. فوقها بتكون قاعدة لنباتات ظل متسلقة تطلع على الدرابزين الجزئي مثل ما هو موضح هنا

https://i.imgur.com/0OxWvAY.png

الدور الأخير بيستوي عندنا فراغ خلف الدرج معكوس عن مكان المخزن نقدر نستغله لمطبخ صغير للشقة العلوية .. والتمديد من الحمام القريب .. يعني الدرج بيكون عندنا متغير ندخل في فراغ ضيق ويتسع وبعدين في الأخير يضيق بس كله مع وجود دريشة مقابلة ونور طبيعي

https://i.imgur.com/VUb4foh.png

يمكن بنظطر نرفع ارضية المطبخ عتبتين حتى نحصل ارتفاع صافي تحت الدرج للمرور = 2متر تقريباً .. نفس وضع سقف المخزن تحت وهذي نقطة مهمة لهذا النوع من التفصيل

مثل هذا الوضع .. كذلك ممكن نسوي عتبات للمخزن لتوسيع الفراغ تحت

هنا أضفت 4 عتبات يعني لو كان ارتفاع كل عتبة 13 بنحصل ارتفاع لا يقل عن 180 سم تحت للمرور تحت المطبخ من الدرج وهو كافي ولو سوينا كل عتبة 14 سم بنحصل مترين

https://i.imgur.com/sA4iAag.png

وهذا الدور الأرضي والتعديل فقط اضافة عتبات نازلة لتحت للمدخل وهنا حتى ممكن نستغني عنها بس لو اضفناها بتعطينا ارتفاع فوق 2.5 متر صافي تحت سقف الستور

https://i.imgur.com/CGjV9oR.png

تساؤل .. كثيرين يفكرون في الشكل ويعززونه على حساب الفاعلية والعملياتية للمبنى أو لجزء من المبنى .. من ضمنهم حتى مسؤولي التخطيط

مثال نسوي دكتات حتى نخفي البايبات وكأن البايبات شيء قبيح وسيء مع إن أغلب الدول يسوونها خارجية اللي للمطر واللي للصرف بعضها تجي داخلية وتطلع من تحت البيت .. اللي لإمداد المياه تجي داخل تجويف الحائط أو من تحت البيت في قنوات خاصة بها واظن الهدف حمايتها من عوامل الجو من برد قوي أو ثلج في بعض الأحيان يسد البايبات

الحلول .. اللي بيسوي عزل خارجي يقدر يمدد كل تمديداته مخفية في الغلاف الخارجي وكيفه يبي يركب غطاء قابل للفك أو بلاستر سهل تكسيره بعد وفتحه لو احتاج للصيانة

اللي ما يبي يسوي عزل خارجي يتورط في اختيار دكت ويسكرها بجي ار سي .. وشفت واحد مسكر ببورسلان والصورة مقتبسة من حساب شركة الحجر هوم ستون .. ما تعاونت معاهم بس لي صديق مركب حجر عندهم يمدح في شغلهم وتعاملهم ويمكن من 10 هو الوحيد اللي اقابله يمدح في شركة حجر

https://i.imgur.com/qzDFij3.jpg

من الصورة واضح لي إنه لو تم رفع ميلان القرميد فوق كان بيبين أحلى للقريب من البيت .. التقسيمه لبانلات طلعت ديكورية خارجية موفقة ومدمجة معاها بعض الدكتات المغطاة بالبورسلان .. واللي ناقل التصميم ناقله حسب شرح فني الشركة .. الخوف من التمدد وقت الحرارة وسقوط وانكسار البورسلان وأظن لو مركب بحوف معدنية U- channels وهذي معباة سيليكون أو أي مادة مرنة تسمح بالتمدد أفضل .. بنفس الوقت تركب ببراغي ممكن فتحها .. صراحة ما ادري بالتفاصيل

المهم لو حبينا نسوي شيء رخيص وبدون ما نسوي عزل خارجي أما مستخسرينه أو بنسوي عازل مباشرة بدون حائط مزدوج وبفراغ وبيدون سمك الحائط الخارجي حول 27 سم مع البلاستر .. نقدر نسوي أماكن الحمامات بس حائط داخلي فيه تجويفات الدكت اللي نبغيها وبنفس الوقت نقدر نسوي تجويفات اضافية للتخزين أو للزينة .. الحائط مب شرط يكون طابوق ممكن يكون مارين بلايوود مركب على خشب .. أو سمنت بورد أو حتى طابوق اضافي لو نحب بس افضل المارين بلايوود أو الجبس المقاوم للرطوبة

مثل هذا التفصيل تقريباً .. وهذا لحمام من حمامات البيت السابق الغرفة اليمنى وهي متكررة من الأرضي لين البنتهاوس .. بايبات التغذية يسار تكون ممدة مباشرة على الطابوق وتنزل من السطح .. هذي ممكن نسوي لها جزء بسيط ينفتح أو يزال مثبت ببراغي وشوية سيليكون .. حتى أي تجويف للصابون والشامبو ما يوصل للطابوق وقصدي ما نحفر فيه .. للتسليك نقدر نكسر شوي ونمدد البايب للخارج .. حتى مقاول الصرف بيشتغل براحته والبايبات اللي بتكون داخلية بتكون باردة ما توصلها الحرارة القوية في الصيف ولا البرودة في الشتاء .. والشكل عندنا من الخارج ما فيه جسم غريب ونظيف ومرتب

أي بايب تصريف مطر ممكن نمدده بنفس الطريقة ومن خلال الحمامات

https://i.imgur.com/magh5mE.png

شفتوا الفتحة فوق للتهوئة للحمام في الصورة .. نفسها بيكون بروز بايب فتحة التسليك اللي بتكون مغطاة باحكام ويمكن ما تنفتح طول العمر

هذا توضيح للبوكس اللي ورا مراية المغسلة وامتداد بابه لتحت شوي يغطي انارة مخفية موضحها شكل خط عريض متقطع .. هذي الإنارة يجي مكانها داخل من فوق في التجويفات الثانية .. أكيد بنحتاج انارة ال اي دي مقصوص لها في المراية من الجنبين تكون مركزة على الوجه ونحتاج نقطة كهرباء داخل البوكس

https://i.imgur.com/TVdHAMG.png

شيصير لو حبينا نركب خزان طرد مخفي للكرسي؟

الكرسي بيكون نفسه مكان الخزان الحالي بنركب الحديد الخاص بخزان الطرد ويفترض تثبيته في الارضية ببراغي وفي الحائط الطابوقي ويجي الحائط المستعار حوله وتمديد الماي واصل له من خلاله .. بس التجويف أما بنسويه فوقه أو بنلغيه .. تغطيته المفروض ما تكون بخرسانة واسمنت كثيرين يغلطون هذا الغلط .. جبس أو بلايوود مغطى ببلاط

https://i.imgur.com/TVdHAMG.png