مراجعة التصاميم المعمارية وابداء الملاحظات عليها (محدث)

أكيد الدريشة بتكون مفصولة لجزء علوي متحرك وسفلي ثابت

يمكن متابعتي للتصميم هنا تخليني أفكر بصوت عالي واركز شوي على النقاط الصغيرة وترابطها مع بعض .. عدلت شوي على طبيلة السيارات باضافة مخزن وبرغولا خشبية تزين مدخل الطبيلة المفتوح من فوق وتكون متصلة معاه .. وتكون فيها انارة نقطية سبوتات صغيرة موجهة لتحت ونفسها لسقف الطبيلة .. سقف الطبيلة بيكون حديدي عادي وفي آخره قناة ينزل فيها ماي المطر وينزل عن طريق بايبات للحديقة .. المخزن لعدة السيارات وعدة تنظيفها

https://i.imgur.com/MWDuE4f.png

وهذي الواجهة للطبيلة وتبين قطع تثبيت البرغولا .. الأطراف الخشبية بالبني بتكون مرتفعة شوي ما تخرب واجهة الطبيلة الخرسانية .. إستخدمت نفس الزوايا القمرية ونفس قطع زاوية الجدار ونفس الدخول تحت لعمق 2 سم وارتفاع 20 سم هذي بتكون فيها انارة شريطية مخفية

https://i.imgur.com/GDJho7x.png

وسط الطبيلة بصورة مقربة وتغيرت السيارة لمرسيدس اس قديم هذا اللي حصلته

https://i.imgur.com/hUswGCS.png

اللي يشوف السيارات والأشخاص وكثير أشياء تتكرر في الرسم وتفاصيلها وحدة .. هذي يسمونها Icons وهي تعتبر وحدات رسم معينة ويسمونها بلوكات نفس الطابوقة تعتبر قطعة رسم وحدة .. يسحبها الواحد ويحطها في أي تصميم يبي ويسوي لها سكيل حتى تكون قريبة للواقع .. مثلاً انا اخلي الرجال طوله متر و 80 سم والسيارة عرضها مترين والا اطلع عرضها بالضبط من النت وانقله بمقياس رسم لتكون بالضبط بمقياس واقعي

للي يحبون يتابعون ويتعلمون الاوتوكاد حتى حصلت مخططات جاهزة بس تنقصها تفاصيل وايد وبعضها مخططات غبية .. هذا رابط فيه كثير واستوت مواقع كثيرة بعضها تبيع وبعضها تعطي شوي مجاناً

https://dwgmodels.com/cad_library/

أي حد عنده سؤال والا يحب يتعلم انا حاضر .. العملية سهلة بس شوي مملة وتحتاج صبر وصراحة تعتبر تطوير ذاتي

استغربت من أحد الإخوان كان يتابع معاي تصميم بيته وبدأ يبنيه بنفسه .. ألحين ما شاء الله وصل لتصميم السور الخارجي وأرسل لي تصاميم مقترحة أقول رايي فيها .. طلع هو مشتغلها بطريقة احترافية وبتشكيل ثلاثي الأبعاد وبانارة

ما اشوف نفسي بالغت في التصميم والمواد غالبها رخيصة وبسيطة لتقليل التكلفة ولإعطاء طابع مغاير للتصاميم المعتادة .. وتهمني آرائكم أكيد اشوف المتابعة ما شاء الله متواصلة بدون تعليق

عدلت جزئية مظلة باب الحوش وضحتها حتى تتناسب مع الواجهة والتوزيع الأرضي .. باقي الرصيف جهة المباني لازم أوضحه ومفكر أسويه حجر يمكن الجزء الوحيد في البيت الرصيف وأحواض الزراعة بتكون حجرية وإحتمال لو حصلت حجر بازلتي يكون أحسن اللي يكون داكن اللون .. وبتكون فيه انارة نقطية صغيرة تنور على الأرضية وتكون إنارة هادئة وخافتة

https://i.imgur.com/gRiN0Ot.png

يهمني إني أمشي على خطة للبناء وتصميم قد ما اقدر ما اغير فيه شيء .. الدرايش الملونة فوق في مدخل البوابة احتمال شوي أرفعها بس وازنتها حتى تنشر نور متلون وتبين متوازنة مع اللي في قوس درايش المجلس .. وحطيت شوي منها فوق مدخل البيت

إرتفاع البوابة 5.44 متر والله يعين على التخطيط والاستشاري

الكسرة هذي مثل الطوق في أعلى البوابة 10 سم ارتفاعها وعمقها 5 سم بس مفكر ازيد الإرتفاع ل 15 سم .. بيكون فيها شريط انارة مخفي والنور بس يبين فيها .. نفس الطريقة للبيت ولما يشبه النعلة في الارض أو التقاء الحائط مع الأرض بس بتكون الانارة مخفية فوق وتنور على تحت

https://i.imgur.com/hX6K2ko.png

فكرة تصميم حديثة وغير مكلفة .. شريط الال اي دي 25 متر ب 180 ريال ويعمر وانارته بطاقة بسيطة جداً 3 وات .. أعتقد باكون وفقت بإذن الله بين المزج بين التصميم الحديث وبعض العناصر التراثية

مع رسم الواجهة الداخلية للبيت لاحظت إن حوض السباحة بارتفاع متر وعشرين سم فوق الأرض بيكون ما يبين للجالس .. قلت انزله 50 سم تحت الأرض ويكون بس مرتفع 70 سم أو 75 سم أدق وفي الأطراف بيكون 80 سم .. وضحت مكان الرصيف وبيكون مرتفع بحدود 10 سم وما بيكون رصيف بالمعنى المعروف بيكون عبارة عن أرضية حجرية مفكر تكون فاتحة شوي عن أرضية السيارات مكان السيارات حجر بازلتي رمادي ومكان الحديقة حجر جيري بيج مائل للأبيض

هذي الرسمة المعدلة يبينون السيارات في موقف الزوار ( كلهم زوار راهيين أما أهل البيت سيارات عادية )

https://i.imgur.com/DUuVMpx.png

بالنسبة لتصريف مياه الأمطار اقتنعت بطريقة تخزينه في تانكيين تحت أرض الحديقة بحيث يكون ميلان الطريق بسيط وجهة الوسط من الصوبين

هذا بيكون خط البيب في الجزء الأمامي والتانكي بيكون محفور له في الحديقة حتى ينزل الماي بفعل الجاذبية وبعدين لسقي الحديقة بمضخة .. وفي حال ارتفع الماي وملأ الخزان تماتيك المضخة تفضي منه وتصب في الحديقة اللي بتكون مستوى منخفض شوي وأخيراً لو حوض الزراعة انملأ ماي مثلاً أمطار كارثية يطلع الماي عن طريق بايبات في السور تفتح على السكة الخارجية والحكومة تتورط فيه

https://i.imgur.com/b4Of8LV.png

باحسب كمية المياه اللي ممكن تنزل حسب أقوى أمطار مسجلة في يوم واحد وباشوف خزانات تكفي لها

وهذا الجزء الثاني .. طبعاً الخط يسار البيت بتلتقي معاه الخطوط النازلة من السقف من تحت الارض وتمر المياه في البايبات باتجاه الخزان المدفون واللي على اليمين نفس الحال ولو شفت تانكي واحد كبير يكفي باسويه واحد وأعتقد يكفي لأن لو المياه عبأت التانكي تفضيه المضخة على الزراعة والزراعة مساحتها كبيرة تشيل مياه كفاية ولو تعبأ حوض الزراعة تطلع المياه عن طريق فتحة في الجدار للخارج عملية اوتوماتيكية ما يتدخل فيها حد .. شرايكم؟

https://i.imgur.com/Id13DpF.png

زدت ارتفاع الطبيلة ل 2.3 صافي وفي الوسط بتكون حول 2.5

https://i.imgur.com/RHOmkpu.png

من التفاصيل اللي اشتغلت عليها دورة المياه الرئيسية تبين هنا كما هي في السابق وناقشت وضعها وجنبها دورة مياه عادية لإحدى الغرف

https://i.imgur.com/re8Ds4S.png

الفكرة كانت قسم الحمام الكبير الى اثنين واحد صغير وواحد كبير شوي اليسار ممكن يكون 4 قطع واحتياطي لو اليمين مشغول أو متعطل أو بس للتغيير .. على طريقة بعض سويتات الفنادق وفكرة تعلمتها من صديق مطبقها في بيته

اللي على اليسار دريشته بتكون نازلة ومقابلة الباب بالضبط وتطل على الحديقة الداخلية وممكن تكون بستارة بلاستيكية أو خشبية أو محببة للخصوصية ( زجاج رملي ) .. اللي على اليمن استوعب جميع القطع ما عدا طاولة المكياج والطاولة قريبة وغرف الملابس قريبة .. طلع عندنا حيز بسيط لكبت وسط بين الحمامين لمواد التنظيف والفوط

https://i.imgur.com/OVbSwWg.png