عرض للطباعة
اختي التخصص قوي ومطلوب ومرغوب وموجود في جامعة فرجينيا بس قوي ومتعب والفرص للعمل كثيرة سواء حكومي أو خاص
عن الاوتوكاد انا سويت دورة هنا في المنتدى قبل بس محد كان مهتم يتابع بالتجريب وصراحة الاوتوكاد بحر غزير يحتاج لممارسة دايمة وكذلك يحتاج لخبرة في التصميم .. انا درسته بروحي سنة 1995 اعتقد مع اصدار 12 وقريت كتاب كامل وتابعت فيه للمؤلف المشهور اومورا في هذا المجال .. الكتاب كان من 1200 صفحة وبعدها نزلوا اصدارات كثيرة آخرها عندي 2018
درست في الاردن في دورة اوتوكاد 2 دي و 3 دي بس صراحة كنت اعرف أشياء أكثر من المدرس وكنت اجرب طرق ثانية وهو يشرح طريقة مطولة حق مسئلة وانا اتدخل واشرح الطريقة الأقصر .. مرة قال لي لو كلامك طلع صح بتكون علمتني شيء ما عرفته من قبل وكنت واثق من نفسي لأني مجرب من دقايق وطلع صح
هذي نصيحتي استثمري في نفسج وفي قراءتج لكتاب والمتابعة مع البرنامج ولازم تكون عندج مباديء التصميم ولو تبين تسئلين عن شيء معين انا حاضر الامور سهالات .. الكتب بتحصلينها في موقع 4shared.com سوي بحث باسم الاوتوكاد بتطلع عشرات الكتب
شكرا اخوي بس دراسته عربي او انجليزي انا ماحب اقرا انجليزي واهني اللي يعلمون كلهم بالانجليزي في المراكز اقصد وشكلي باخذ دورة بنفسي اونلاين مع انها انجليزي بعد بس يكون افضل 😔 وبالنسبة للجامعة انا ما اقدر لاني موظفة والدراسة هناك بعد انجليزي ..ولا حابة اتخصص فيه عشان الخامات لاني صراحة ماعرف شي فيها لكن حابة التخصص لانه قليل بالبلاد
هذي البرامج والدراسات ما تنفع عربي لو لج نية وعندج عزيمة طوري نفسج وابدي بدراسة الانجليزي بتعمق أو تعلمي هذي البرامج كهواية بالانجليزي بعد .. فيه كتب بالعربي بس غش وما افضلها حسب تجربتي اللي نقلتها
ميزة هذي الدراسة ودراسة العمارة وهي فرع من العمارة إنها دراسة تنحب وتنعاش وتحتكين بها دوم وفيها فن وذوق وعلم وتراكم خبرات .. حتى الشغل الخاص أو البزنس انا اشوفه بعد الخبرة أو عشر سنين في الشغلة زين لكن من بعد التخرج غلط وغلط كبير
عفوا اخوي اذا تعليقي ظهر مخلوط بين المعماري و الداخلي
ما اعتقد فهمت قصدي
المصمم الداخلي ليس فقط الفرش و الاناره و هالامور
ايضا يصمم بارتشنات و توزيع المكاتب بالابراج لافضل استخدام و مساحه
وهذا يتطلب درايه بأمور الدفاع المدني من حيث توزيع المكاتب بحسب كفائه مرشات الماء للاطفاء و التهويه و ضغط الهواء بين المكاتب و الابواب و الممرات
هناك تفتيش مخصص لضغط الهواء بأي برج فأذا المصمم الداخلي خطط المكاتب و توزيعها و ابوابها بطريقه خطأ فسيفشل اخبتار ضغط الهواء
هالامور انا مطلع عليها و عارف ان المعماري يصمم مع امور الدفاع المدني لكن البارتشنات و تغييرها و المساحات تكون مع المصمم الداخلي و مكاتب تاخذ 75 الف ريال بس عشان تختم لاي شركه تحط بارتشنات بحسب حاجتها
يمكن انت تفهم اكثر مني بالمجال لكن انا امشي رخص الدفاع المدني لجهه عملي و الموافقات من الدفاع المدني و البلديه وكلن له متطلباته
تصميم البارتشن يتطلب تصميم داخلي للمبنى و للممرات و ارتفاع الحواجز بالتناسب مع مرشات الماء و حساسات الدخان و لوحات المخارج المضيئه و البانل لوحه تجمع اسلاك انظمه السلامه. و كلها تتغير مع التصميم الداخلي للمبنى بحسب حاجه الشركات المستأجره للادوار
طيب اخوي معماري قطر الأخت sweet Qatar كتبت موقع امريكي شفته لكن هالدراسة اتكفي مدة تقريبا سنة ونص لأن اللي
شفته بالجامعات كدبلوم 5 سنوات والبكالريوس 6 سنوات فهل يا ترا هالمدة كافية لانها تعطي عضوية RIDQC بالإضافة ل DSA ومن أمريكا اعتقد ولا ابدل للجامعة البريطانية تقريبا 3 سنوات للدراسة اعتقد كدبلوم فما اعرف .. وهل الأفضل ادرس
اوتوكاد و 3D Max وعقب اكمل التصميم ولا كلهم مع بعض
يا بو عبدالله اللي شفته في برج التخطيط العمراني بعيد كل البعد عن موافقات الدفاع المدني وعن حتى الاحساس بمخاطر الحريق .. دخلت دور فيه مكاتب وفيه بارتشنات وفيه ساحة وسطية تمر منها لمخرج الطواريء ومنه للدرج .. لكن مع استمرار الشغل سكروا هذا الممر ببارتشنات اضافية تبين من تركيبها إنها إضافة عشوائية وأجهزة تصوير وطابعات كبار .. المخرج بصعوبة تقدر تشوفه والمبنى يزورونه مئات الغرب عنه
من جانب ثاني الروضة اللي جنب بيتي حوشها كله صفوف من ورا الا من جدام فيها حوش مستغرب شلون الدفاع المدني ما يفتش تفتيش دوري ويطلب تصليح هذي الأُمور
من النكت اللي صارت معاي في شغلي طلبت جهة عمل مخزن رحت لهم ووديت معاي مخطط المباني والطرق وزين كنت دارسه سريع وعارف تفاصيله .. يوم وصلت سئلت عن المكان الا يوجهني المسؤول لمهبط هيليكوبتر قال نبيه هنا .. قلت له هذا مهبط هيليكوبتر قال عمرها ما نزلت هنا .. قلت حتى ولو بعدين انتوا لازم تخلون المكان نظيف وخالي من أي شيء ممكن يطير ويضرب حد والا الطيارة لو نزلت .. كانت فيه أخشاب وتواير .. الناس عايشين على البركة والله عندنا
قلت تجربتي الله يسلمك وانا ما تعمقت وايد وصراحة مليت من تغيير كل اصدار .. قبل حتى الثري دي تمكنت منه وسويت تشبيه للظل واتجاهه على مدار اليوم وتأثير الشمس على المبنى وهذا قليل يعرفون هذي الميزة في الاوتوكاد .. وكذلك وضعه في أي مكان في الكرة الأرضية وتشوف تأثير الشمس في أوقات مختلفة من السنة
والله يا اختي ما عندي فكرة .. طول الفترة في الدراسة خصوصاً في أمريكا بسبب إن البرنامج الدراسي طويل أصلاً .. السنة ونص قد تكون للبرنامجين فقط وهذي فترة معقولة وأكيد ما بتكونين ملمة بكل خبايا البرنامج
بعدين هذي البرامج أدوات للتصميم لكن مهم تكون عندج أبجديات التصميم وأساسياته .. والأفضل لو لج نية تدرسين التصميم سواء تصميم معماري أو داخلي بعدين تتجهين لهذي البرامج أو بالتزامن مع دراستج .. إحنا جامعتنا كانت جامعة ميامي ودرست فيها هندسة مدنية وهندسة معمارية ووقتها كان الكورس الوحيد للكمبيوتر كورس الفورتران وهي لغة برمجة للكمبيوتر للاستخدام الهندسي وكورس غبي وصعب ما له داعي في تطور البرامج ووجود برامج جاهزة ما نحتاج نبتكرها ألحين
في سنة 1990 الى 1993 كان الاوتوكاد قليل مشتهر وكورسات الرسم كلها يدوية في الجامعات وألحين الوضع يختلف أتوقع يدرسون اوتوكاد أول بأول