إعـــــــلان

**معماري قطري** · 15-05-2018, 05:11 PM

ما طلع الفيديو ونزلته في اليوتيوب

**معماري قطري** · 15-05-2018, 05:40 PM

المنطقة كلها حلوة ومريحة للمشي وكل شيء قرب الفندق .. فيه مطعم هندي قريب كذلك بس المشكلة أوقاتهم محدودة ويسكرون سرعة إحنا ريوقنا متأخر وغدانا لازم يكون بعد 3 وانا احب الغداء خفيف أي سندويش يمشي الحال معاي .. العشاء غالب المطاعم بالحجز والمسافة للشانزليزيه قصيرة التاكسي يوصلكم بسرعة ولا احتجت لسيارة لباريس ومسوي حجز مسبق من ايفس لسيارة في مطار دوسلدورف

دوم اللي يبي يحصل سيارة جيدة بسعر زين يحجز لفترة طويلة فوق العشر أيام ويحجز سيارة من فئة شوي فوق الاقتصادية .. لين وصلهم يطالب بسيارة أفضل وأوسع لأن عنده شناط وما يبي يغير تأجير السيارة يعطونه ترقية في العادة بدون زيادة سعر ومهم البعد عن العرب والحجز من شركات عالمية ومهم ياخذ تأمين شامل بس مع جزء معين يدفعه لو هو أخطأ حتى التأمين يكون معقول ويحدد التأمين في الحجز المسبق ولا يوافق على تأمين آخر يغير العقد بالكامل ويدفع أكثر بدون داعي

كان في واجهات الفندق وكثير من الغرف شغل صيانة قوي بس الازعاج قليل وفي أوقات النهار كان وهذا فيديو للشغل خارج الفندق .. شغلهم منظم ودقيق

**sara jsm** · 15-05-2018, 07:21 PM

وعليكم السلام ..

الحمدلله عالسلامة اخوي معماري ..
جميله الصورة والفيديو .. نبي صور اكثر الله لايهينك

**معماري قطري** · 16-05-2018, 01:03 AM

المشاركة الأصلية بواسطة sara jsm مشاهدة المشاركة

وعليكم السلام ..

الحمدلله عالسلامة اخوي معماري ..
جميله الصورة والفيديو .. نبي صور اكثر الله لايهينك

إن شاء الله إختي الكريمة

والله يسلمج ويحفظج

منور زجاجي مسطح ومقسم قطع صغيرة موصولة بفريم خاص وأسلاك تثبيت في داخل الفندق

أبواب تفصل بهو الفندق عن منطقة الرسبشن

المنور الهرمي الكبير في وسط بهو الفندق

لحسن الحظ المنور غرفتنا تطل عليه وتم تصويره فيديو من فوق

**معماري قطري** · 16-05-2018, 01:11 AM

اللي يلاحظ التفاصيل الغنية والمعقدة في البناء ويعيش معاملة موظفي وعمال الفندق يعرف إن التكلفة عادلة للسكن فيه .. كان هذا الفندق هو الأغلى بين الفنادق اللي سكناها لكن غرفته عادية .. فندق دوسلدورف جاينه إن شاء الله انا اعتبره الأرقى في كل شيء وكان أرخص فندق .. كنت متخوف منه على إنه جديد علينا كإسم غير معروف وماركة ألمانية لكن طلعوا الألمان عندهم فن وذوق وكرماء للغاية وجايين إن شاء الله للتفاصيل

**معماري قطري** · 16-05-2018, 01:25 AM

المنور الهرمي كبير وماخذ مساحة في وسط تجويف خاص تطل عليه الغرف .. مصنعيته يدوية واضحة وبمواد قديمة مثل النحاس ونوعيات حديد ما يصدي

طاولة دائرية فخمة يسارها الرسبشن وعليه تشكيلة زهور مستحيل حد يدخل ما يلاحظها وكثير يصورونها

فوقها هذي القبة والثريا تكمل المنظر

صالة المصاعد

وما صورت وايد صراحة وكان المفروض اصور الغرفة لكن مستواها مب لين هناك والى هنا تنتهي سفرتنا لباريس وبشوف أُم عبدالله يمكن صورت أكثر وبنكمل للجزء الثاني اللي صوب دوسلدورف

**معماري قطري** · 16-05-2018, 01:30 PM

أحلى ما في اسم فندقنا في دوسلدورف هو هوف وأسهل كلمة الأولى طويلة وهذا الإسم مكتوب على المدخل

وهذي الغرفة الواسعة اللي تفتح النفس والتلفزيون فيه قنوات عربية كثيرة بينها قطر والجزيرة

الستارة تتسكر بالكهرباء والزر باللمس في شاشة صغيرة في درج قرب السرير مع كافة أزرة التحكم من الانارة للتكييف لعدم الازعاج

جهة الثلاجة والثلاجة قبل لتسكنون أثناء الحجز يسئلونكم شنوعية المشروبات اللي تحبونها ويخلونها مليانة دوم ومجاناً لإستخدامكم

السرير اعطيه 10 من 10 في النظافة والرائحة العطرة و 9 من 10 في الراحة

بس هنا شوي معتفس

مدخل الغرفة على اليسار الحمام وعلى اليمين الكبت

الحمام مقسم من داخل وكبير

الباب القزاز ينفتح في الاتجاهين داخل وبرا ومنطقة الكرسي فيها بديه بعد

الإضاءة قوية كفاية

اللفتات والرخام تحفة فنية وفيه لوبي داخلي للضيوف بس فيه جرائد بينهم عربية وفيه كتب وفيه بوفيه خفايف وفواكه وكله مجان ومتوفر للنازلين وكذلك مساعد يخلص أي معاملة تبونها ويجاوب عن أي سؤال .. على مكتب فخم والكراسي اللي حوله وايد فخمين

من اللوبي الخاص بالنزلاء والدخول له يكون بالمفتاح

صورة من مطعم الفطور الراقي وتطل على الشارع بواجهة زجاجية كبيرة .. تعشينا فيه مرة والمطعم راقي وسعره معقول لبعض الأكلات فيه لحم وز شوي غالي وغزال كذلك غالي

ما قدرت اصور أكثر وبشوف باقي الصور بعدين ان شاء الله

**معماري قطري** · 16-05-2018, 01:37 PM

الفندق هذا من تطلعون منه مقابلكم سوق على بعد 15 متر تقريباً .. الكفوف متعدد أدوار فيه كل شيء ومتصل مع محطة قطارات تحت الأرض .. اللي يروح يسار يوصل لشارع مشاة ومحلات ومقاهي ومطاعم من ضمنها تركي ولبناني راقي وكذلك مطعم أسماك

يمين بعد أسواق ومحلات كثيرة منها بري مارك .. يعني لا تحتاجون سيارة ولا تكسي مشي كفاية وورا الكفوف فيه حديقة حلوة صورت فيها كم صورة باحطها ان شاء الله

**معماري قطري** · 16-05-2018, 01:40 PM

فيه ميزة نسيت اقولها .. يتصلون بكم بعد الحجز بكم يوم ويرحبون بكم وانتوا في قطر ويقولون متى بتوصلون .. يوم وصلنا بالتكسي من محطة القطار استقبلوني وشالوا الشناط ورحبوا بي باسم العائلة .. متوقعين وصولي لأني قلت لهم عن الوقت التقريبي .. يحسسونك إنك في بيتك

**sara jsm** · 16-05-2018, 03:05 PM

ماشاءالله عليك اخوي معماري ... اول مرة اشوف صور بعيون مهندس ..

في تفاصيل صورتها وذكرتها مستحيل اني التفت عليها .. وشفت جمالها من خلال صورك ..
:
الله يهنيكم ان شاءالله ومتابعه للموضوع للنهايه

**معماري قطري** · 17-05-2018, 02:01 PM

المشاركة الأصلية بواسطة sara jsm مشاهدة المشاركة

ماشاءالله عليك اخوي معماري ... اول مرة اشوف صور بعيون مهندس ..
في تفاصيل صورتها وذكرتها مستحيل اني التفت عليها .. وشفت جمالها من خلال صورك ..
:
الله يهنيكم ان شاءالله ومتابعه للموضوع للنهايه

ما ادري احس إني منغمس وايد في هذي المهنة

بعدين الحضارة والمدنية كلها معتمدة على الفن المعماري من بداية التمدن وبناء المدن ولازم السياحة والمدن والعمارة تكون أُمور متصلة ببعض .. كانت جامعتنا تسوي زيارات صيفية لروما وبعض المدن في اروروبا وفي البرازيل لكن كنا ننطر الصيف للشردة والعودة لقطر وفوتنا هذي الزيارات العلمية والجماعية واللي أكيد بتفيدنا تحت اشراف معلمين مختصين

اطلالة غرفتنا كانت على حديقة وسطية وفيها خدمات التكييف وميزة الموقع هذا بعده عن الشارع وأي صوت

هنا نلاحظ إن تصميم التكييف مبتعد عن السقف وسهل الصيانة وتمديداته أكيد جانبية

في الشارع التجاري عجبتني واجهة حجرية تركيب ميكانيكل ونشوف الحجر كيف بفجوات حوله مفتوحة بدون مونة وبطريقة معلقة

حتى النوافذ صغيرة حتى تعطي انطباع أكثر للحجر

المدينة فيها روح وحياة وكل شيء في متناول اليد وقريب .. الفنادق متركزة في المنطقة السياحية مع حدائق ومواقف ونظافة صعب نحصلها في دول كثيرة

بانزل دفعة جديدة من الصور وبحافظ على تنسيق التسلسل لهذي المدن ويمكن ارجع لباريس شوي لو حصلت صور ما انتبهت لها .. صراحة حبيت دوسلدورف أكثر من ميونخ لأنها أنظف وأقل عرب وأفارقة .. ميونخ الأفارقة مسوين فيها تكتل غريب ومزعجين وتمت مطاردة الكثير منهم من قبل قوات أمنية جاوا شلوهم في سيارات مجهزة وأكثرهم مهاجرين غير شرعيين

**معماري قطري** · 17-05-2018, 04:15 PM

فيه شبكة آوتلت اسمها designers outlet منها واحد يبعد حول ساعة من دوسلدورف بالسيارة .. فيه مطاعم وشوية ترفيه وكبير فيه ماركات عديدة واحتمال المطر بأي لحظة لذلك الواحد ياخذ مظلة معاه

أول باحط صورة من قوقل ايرث لموقع الفندق ومحيطة وبعدين باصور مسار الرحلة للآوتلت

هذا الفندق أسفل الصورة ومقابله متجر الكفوف ويمين باقي السوق ويسار محلات ومطاعم ومقاهي وفيه سوق مفتوح للأتراك فيه أكلهم وفواكه

وهذا مسار الرحلة للآوتلت وهو داخل أطراف هولندا وزحمة عليه أكثرهم سياح وفيه ماركات كثيرة لمحبي الماركات .. اللي ينزل يستحسن ياخذ تذكرة الموقف حتى يدفع في الجهاز قبل الخروج والموقف حول 4 يورو اعتقد أو بالوقت ما اذكر بالضبط بس ولا شيء وحتى اللي ما يحتاج سيارة يستأجر ليوم لو له نية يروح تكسي أو سيارة بسواق ما تسوى سيارته تحت يده أسهل

صورة الطريق اللي يفتح النفس

وهذي صورة للآوتلت جوية من قوقل ايرث .. واللي بيروح انصحه يودي معاه شنطة يدوية تنسحب للمشتريات لأن المسافة طويلة وكذلك يودي مظلة للمطر

فيه مثله قرب برلين وكذلك للي يروحون ميونخ يوجد مثله قرب سالزبورغ في النمسا يبعد بعد حول ساعة من ميونخ ويتم فاتح لين 8 ويستحسن تشوفون مواعيد الاغلاق على الموقع الالكتروني

وهذا فيديو للطريق

وللأسف ما صورنا هناك أو ما حصلت صور مع إني آذكر اني صورت

**معماري قطري** · 18-05-2018, 05:12 PM

اللي عنده شوية نشاط ويقدر يغير سكنه بالكامل وينتقل لمنطقة قرب الآوتلت أفضل له حتى يحصل فرصة أكبر للتسوق لو يحب يسوي زيارات متعددة .. بالنسبة لي زيارة وحدة تكفي ولو اضطر الشخص لزيارتين بعد مب مشكلة الطريق ولا شيء حتى أقل من ساعة طلع

باتابع بشوية صور من المنطقة حول الفندق في دوسلدورف

فيه شوية شغل تبليط وعجبني تنظيمهم وشغلهم والمواد

مستخدمين قطع مختلفة في تشكيل هندسي منظم وحاطين بين البلاطات بودرة خشنة أو نقدر نقول كسر حجارة بركانية سوداء صغيرة بحدود 2 ملم أو يمكن 1 بحيث تعبي الفجوات حتى يمكن ازالتها وقت الحاجة وازالة البلاطات برفعها ببساطة وعمل أي صيانة للتمديدات تحت .. بنفس الوقت هذي الكسر أثقل من الرمل ولا يطيرها الهواء بسهولة وشكلها حلو

متجر كافوف وفندقنا يساره المائل للأبيض وهذي حديقة طويلة وفيها نهر ذيك الجهة

أفضل الأوقات والأجواء هي الأجواء الربيعية شهر 4 و 5 و 6 وتنشط عندهم السياحة البينية لكن تكون هادئة قبل الصيف وزحمة العرب .. نشوف عرب من وقت لوقت وفي الغالب كبار أو رجل وزوجته

حاولت اصور صورة واضحة للأرضية لتوضيح البودرة أو كسر الحصى الصغيرة وفي رأيي ما تمت معالجة قرب العمود صح .. كان يفترض تركيب طوق من قطع البلاط البيج دائري حوله وملء الفجوات بهذي الكسر الصغيرة بيطلع أحلى .. نشوف كذلك أعقاب سجائر العمال اللي اشتغلوا هذي الأرضيات ما دخلت بين الفجوات بس يبي لهم قانون صارم مثل قانون سنغافورة حتى بلادهم تطلع أنظف

باقي التركيب دقيق وحتى الفواصل وحدة شغل فرق كبير عن شغل ربعنا الله يستر عليهم

هنا الشجرة ومحيطها مرسوم رسم وكان المفروض العمود الصغير يكون حوله طوق من تحت حتى لو معدني واتوقع بيعدلونه مع نهاية الشغل لأنهم للحين شغالين

هذي اعتقد صوب الجهة الثانية

فش هاوس مطعم مليان دوم ومختصين فشوش لين النخاع

جنبه مطعم لبناني ما يبوق فرق عن لبناني في باريس نهبنا الله ينهبه .. وجنبه حلويات لبنانية وكلها على مسافة مشي في الأجواء الجميلة

ومقابله ستيك هاوس مختص بالستيك وعنده نوعيات أمريكية وغيرها بعد لحد يفوته

الليل له جماله والنهار له جماله

فندقنا من داخل حتى الرسبشن شخص واحد وكله هدوء

وراء الطاولة مدخل لوبي واستراحة الساكنين وفيه القهوة والشاي والخفايف والمكان راقي جداً حتى كراسيه فخمة وفيه كتب وجرايد عالمية معاها اعتقد جريدة سعودية ما تنزلنا نقرا سوالفهم

جهة المصور ووراه مدخل الفندق .. وفيه واحد مصري قمة الاحترام الله يحفظه

واحد شافني اصور قال صورني

اسم الشارع اللي فيه الفندق

وبانتقل للقسم الثالث من الرحلة وهو رحلتنا حق فرانكفورت ومبيتنا ليلة فقط في فيها في الطريق لميونخ

**sara jsm** · 18-05-2018, 08:18 PM

ابدعت اخوي بوعبدالله

إعـــــــلان

تقرير وصور عن سفرة باريس - دوسلدورف - فرانكفورت - ميونخ

تقرير وصور عن سفرة باريس - دوسلدورف - فرانكفورت - ميونخ

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق