المشاركة الأصلية كتبت بواسطة سالم الزهران
صباح الخير
بغيت أشتري أرض وراح معي شخص جنت احسبه صديق، المكتب العقاري كان فيه سوداني و قيمة الأرض بعد الشفاعات والتلفونات وقفت على ثلاثمية وثمانين، المهم كنت ابغيهم ينزلونها شوي وكلمت أحد المعارف يمون على صاحب المكتب وجابها لي بسعر أقل اظنهم طيحوا 20 الف، رحت أجيب شيك مصدق ولقيت الأرض انباعت. لكن صاحب المكتب دلني على غيرها وبسعر أقل.. لأنها داخلية على شارع صغير.
راحت الأيام واكتشفت أن شرى اللي الأرض هو الصديق اللي راح معي للمكتب! بعدما عرف قيمة الأرض النهائية جاب الكاش وشرى الأرض ومعطي السوداني الفين ريال تسكيته.
هذا التصرف هو سرقة لمجهود انسان جلس يتوسط عند راعي المكتب ويطيح على الناس اللي تربطه فيهم صلة قرابة او صداقة قوية ولهم في المجال هذا.. ويجي واحد انتهازي ويلف هالمجهود ويحطه بمخباه. الى اليوم ما قلت للرجل اني عرفت لعبته ويكفي اننا نحذر منه، واللي يوقعك في هالعينات مع الاسف هو معرفتك بأبوه أو أخوه الخ.
تعلمت من هذي الموقف التكتم على مواضيع البيع والشراء والرزق عموماََ ومنت ماخذ الا نصيبك لكن على الأقل محد يسقط عليك.