الحوض الأول الأرضية حوله مرتفعة وهو غاطس والثاني لا الأرضية نازلة وهو معمول مثل البركة مرتفع والنوعين سهلين لكن الثاني بانوراما أكثر ولاحتفالات العيال أو البنات فوق بيحبونه وخصوصاً عندهم الجلسة والصالة الرياضية
الحوض الأول الأرضية حوله مرتفعة وهو غاطس والثاني لا الأرضية نازلة وهو معمول مثل البركة مرتفع والنوعين سهلين لكن الثاني بانوراما أكثر ولاحتفالات العيال أو البنات فوق بيحبونه وخصوصاً عندهم الجلسة والصالة الرياضية
نصيحة لمن يخطط للبناء
نصيحتي هي أهم شيء الموازنة بين إحتياجنا الفعلي للفعاليات ونبتعد عن التدخل في المساحات ومقدرتنا المادية لهذي الفعاليات .. بعبارة ثانية إذا انا أحتاج 3 غرف نوم في الأول وصالة وممر بسيط وأحتاج مجلس تحت وغرفة طعام لازم قد ما اقدر احدد لكم شخص .. ونبتعد عن مصطلحات لا يقل عن لأن هذا يعطي انطباع للي بيصمم بالسعة بلا حدود
نقدر نحكم المصمم باحتياجات محدودة بحيث نقول مثلاً المجلس لعدد 14 شخص أو طقمين كراسي أو طقم أو ثلاثة .. أو نقول نحتاج تصميم لكراسي مفردة كلاسيك وهذي عرضها بحدود 60 سم غير عن الوثيرة اللي تجي بعرض 80 - 90 سم وتاخذ مساحة أكبر .. نقدر نفترض عدد معين للمفردة لأنها تجي حسب الطلب وبالعدد اللي نبغيه
معدل جيد لمجلس البيت 14 شخص مع إمكانية فتح الصالة على المجلس وعلى غرفة الطعام لو فيه مناسبة وضيوف عددهم أكبر أو حتى بوفيه على حوض السباحة وباقي الصالة وممكن جزء من الحوش .. هذا ما قصدته بالفعاليات
أحتاج مكتب صغير لشخصين مثلاً هذي اذكرها ومخزن للمواد الغذائية تابع للمطبخ .. مغاسل قرب طاولة الطعام .. وأحتاج بيت الدرج شبه معزول عن الضيوف .. وأحتاج مصعد وسطي يوصلني للصالات وقريب من المدخل .. وأذكر كم عدد الأشخاص للمصعد بس دوم اكون واقعي .. للبيت 4 أشخاص كفاية ولو نوزنها ونحصل ال 6 أشخاص بفرق 5 أو 10% ومساحة شوي أكبر ومميزات مساوية نرتب احتياجنا صح وممكن نضحي بمبلغ زيادة لمصعد أوسع وأفضل .. مع ملاحظة أي خيار في المراحل الأُولى بيكون مبدئي جداً وبنقدر نزيد فيه مع تطوير التصميم
هنالك أُمور نتركها للمصمم كرأيه في مكان حوض سباحة مثلاً والمساحات المتوفرة له ونطلب عدة اقتراحات مثل تحت الأرض أو نص تحت الأرض ونص خارج أرضية المبنى أو في حيز في الحوش أو فوق السطح
كم موقف سيارة نحتاج وأي احتياجات للحوش من مخزن أو مواقف مظللة أو مواقف مغلقة مدمجة مع مكان تخزين أو حتى متصلة بالبيت وبالحوش من جهة والبعض يسوون طبيلة السيارات بينها وبين الصالة قزاز حق السيارات الخاصة جداً والمحببة لصاحب البيت أو حتى المكتب .. شنحتاج للملحق وهل نحتاج لغرفة سائق شبه خارجية .. ببساطة كل احتياجاتنا نحددها على الورق وبالمعقول بدون مبالغات وبدون مساحات .. لأن المساحة يفرضها الاحتياج والتصميم وبعدين ممكن نتدخل فيها بحدود خلال مناقشة التصميمات الأولية
المساحات الزراعية والنقاط التجميلية مثل نافورة أو شلال أو جدول مياه هذي كذلك نركز عليها من بداية التصميم ببساطة اللاندسكيبنغ
من رأيي الغرف نطلبها بخدمات مثل دورة المياه وغرفة الملابس ونذكر مكونات كل منهم .. يعني انا ابي غرفة ملابس فيها مساحات كبتات 20 متر طولي بس أكون متخيل كم باخزن ملابس في المتر الطولي وأقرر ( انا متر ونص يكفيني ) .. وأفضل تصميم لغرف الملابس ال Walk-in-closet .. هذي غرفة بباب وبدون أبواب للكبتات بحيث تحصل قواطع داخلية وأرفف مفتوحة ومكان لتعليق الثياب وفرزها بسهولة .. دورة المياه يستحسن نذكر كم قطعة نبغي فيها ونوعية كل قطعة ولو نقدر نجيب كتلوج لقطع حابينها ونخلي المصمم يوزعها توزيع مبدئي
صحيح القطع الصحية متقاربة في معضمها .. بس انا ابي مغسلة عريضة وبارزة وحولها تجويف في الحائط وإنارة حول المراية مخفية وسبوتات فوق المغسلة .. أو ابي كبتات تخزين ورا المراية بعرض بسيط مثلاً متر واحد .. للغرفة الرئيسية غير وشوي بابالغ
والله اتمنى من يحب نشاركه متطلباته المبدئية وممكن ننصحه بشيء غافل عنه يشاركنا ويستفيد بإذن الله
السلام عليكماقتباس:
المشاركة الأصلية كتبت بواسطة معماري قطري
طرشتلك تصميم فيلا علي الايميل اذا ممكن تساعدني برأيك
عليكم السلام ورحمة الله وبركاتهاقتباس:
المشاركة الأصلية كتبت بواسطة koketa
إن شاء الله بشوفه والليلة بعد ما ارجع بارد على الايميل
مبدئياً البيت تصميمه شرح وجريء وفيه لمحات معمارية حلوة .. الصورة مب واضحة كفاية وكل ما كبرت قلت التفاصيل
اللي استويت ما احبه وعن تجربه هو فتح الصالة التحتية على الطابق العلوي والصوت يوصل للنايمين لكن بإذن الله توجد حلول لو حابين التصميم وناويين تطبيقه .. بدون فايل الاوتوكاد باخذ وقت طويل في نقل الصورة ومحاولة رسمها على البرنامج وباضيع في المقاسات لأنها غير واضحة .. فايل الاوتوكاد التعديل عليه سهل واخذ المقاسات بالماوس بسهولة
ولو ترسلين صورة بي دي اف بحجم أكبر ممكن نحطها هنا ونناقشها بدون تعديل
باحط الصور اللي أرسلتها الإخت كوكيتا وهي مب واضحة بس يمكن ناخذ فكرة مبسطة
هذي للدور الأرضي وعلاقته بالحوش
http://i.imgur.com/rn4N9oB.jpg
البيت يبين لي كبير ومواقف السيارات قليلة جداً لبيت بهذا الحجم .. وأكيد المواقف بتكون ضيقة وتنفع حق سيارات صغار ( عارف استشاريينا )
المطبخ بابه مب مقابل لباب مطبخ الملحق لسهولة التواصل
توزيع المساحات تحت شوي غريب .. المجلس يبين لي صغير وباقي المساحات أهم منه وأشوف ثلاث صالات مفتوحة على بعض .. يمكن الميزة فيه سهولة الحركة والتواصل مع الغرف فوق
المجلس الخارجي لو نعدل وضعيته بيكون مدخل البيت واضح بروحه مب مثل المغطى ورا المجلس وبتكون سعة الحوش أكبر وممكن نضيف موقفين للسيارات بدون تظليل أو بتظليل + تشجير أكثر
لو البروز المسدس كان سيدة بيكون استغلالنا للمكان أفضل وما نحتاجه هنا ولا حتى فوق
يحتاج دراسة أكثر وتطوير وإن شاء الله يطلع مميز خصوصاً فيه التجويف مزدوج الارتفاع مع المدخل مع إني ما افضل التجويف الثاني ورا لأنه ما خلى عندي مساحة لصالة جلوس بسيطة علوية
وهذا الدور الأول واتوقع فيه بنتهاوس
http://i.imgur.com/S1SFmvu.jpg
واين الناس؟؟؟
اكثر موضوع استفدت منه لحد الحين
الحمد لله والله يزيدك فائدة ويزيد الجميعاقتباس:
المشاركة الأصلية كتبت بواسطة الهديل
الناس موجودين بس انا بانتظار الرد على تساؤلاتي سواء على الإيميل أو خاص أو هنا في الموضوع
الأخ العتوي حاولت أرد عليك خاص بريدك مليان والإيميل موجود فوق أرسل المخطط وباشوف شيناسب له بإذن الله
بوعبدالله ولا عليك امر , مدري يجوز انك سبق وتكلمت على ما اظن على ال Slump Test ولا ادري يوم تكلمت عن وقت الصبية واختبار القمع ..الخ هو نفس الشيء ولا يختلف؟ لان هالمصطلح مرّ علي و لا ادري اذا كان انكماش الخرسانة له اختبارات ثانية ولا ادري اذا من أثارة التصدعات اللي تظهر عقب مده؟
جزاك الله خير اذا هو نفس اللي ذكرت في مشاركاتك عن الصبية فبرجع لها واذا جديد فعطنا مما اعطاك الله لاهنت يا معمارينا المتفاني.
ايه نفس المعنى اخوي سالم حاولت اقرب الترجمة العربية بس .. وقت الصب مهم نسوي هذا الإختبار ومهم تكون عدته موجودة في سيارة الصب ويوفرها الاستشاري أو المقاول حتى يحكم على الخلطة .. بالنظر مستحيل حد يحدد المحتوى المائياقتباس:
المشاركة الأصلية كتبت بواسطة سالم الزهران
وأكيد هو أكبر مسبب لزيادة التصدعات والانكماش في الخرسانة لأنه مؤشر على كمية المياه .. باقي مكونات الخرسانة الحجارة والرمل تبين بالعين المجردة ولو زايدة بتكون أكيد ضعيفة وهذي يكشفها المختبر وشهادة الردي مكس اللي تطلع مع السيارة المفروض محددين نسب المحتويات ونسبة الماء ودرجة حرارة الخلطة والدرجة المتوقعة لين توصل الموقع ( لاحظ حرارة الخرسانة تزيد بالتدريج بسبب تفاعل الاسمنت ) ما اذكر كم درجة حرارة الحرارة وقت الصب بس هو عامل مهم .. ولو خفضناها بالثلج سببنا زيادة الميوعة وهذي مشكلة ثانية
رايي المفروض ما نصب نهائياً مع بداية شهر 5 و 6 و 7 و8 وحتى 9 الا لو نزلت الحرارة في المنطقة اللي بنصب فيها عن 35 درجة وهذي بلادنا وعارفين حرارتها .. عندكم مناطق في السعودية ال 35 درجة صعب توصلها ما ينطبق عليها هذا الكلام .. بهالطريقة نصفي على 7 أشهر ممكن نسوي فيها الخرسانات لكن المستفيدين ضد كلامي ويجملون الوضع للناس أكيد لازم شركات الردي مكس تشتغل
الصب للخرسانات الجاهزة داخل معامل مضبوطة حرارتها غير وألحين حتى الأساسات يسوونها جاهزة والأعمدة والجسور والأرضيات وتركيبها سهل وشغل بناؤها كله سهل صيف وشتاء
يعطيك العافية اتضحت الصورة لاني كنت متوقع انه يتم بعد الصبية , احس الخبرة لها دور بل اظن بعض المتخصصين يعرف الخلطة من قوامها ولونها والله اعلم
صدقني صعبة واللي يقول يعرفها من لونها يخطي أوقات .. من القوام صحيح المتماسكة أكثر وقليلة الماء تكون قوية .. الماء على ما اذكر يكون 45% من الاسمنت والمكونات الثانية تدخل بعديناقتباس:
المشاركة الأصلية كتبت بواسطة سالم الزهران
الإختبارات اللي بعدين اختبار كسر المكعب اللي ياخذونه ويحافظون عليه في الموقع ويرشونه ماء ويخلونه قد ما يقدرون يكون معرض لظروف مثل ظروف الخرسانة المصبوبة .. بعدها يودونه المختبر يسوون فحص الكسر عليه ويسوون كذلك فحص المحتوى الكيميائي وهذا مهم لأن فيه خرسانات مقاومة للاملاح والمفروض تبين .. طبعاً يكون موثق وعليه ورقة ملصوقة عدل عليها توقيع المقاول والاستشاري ومتى أُخذت العينة ويروح معاها تقرير معمل الردي مكس .. حتى ما يصير تلاعب
المكعب ياخذون ثلاث مكعبات كل ضلع 15 سم ووقت الكسر يشوف المختبر المعدل
من أيام اطلع على تصميم لأحد الإخوان فيه تلطيخ صراحة في الواجهات .. هو مقتنع بالتوزيع الداخلي وانا أُمور كثيرة ما بينت لي مثل المقاسات والصور كانت مب واضحة
الواجهة اللي ما حبيته فيها وجود الأعمدة أغلبها دائرية وبارزة من الجدار جي آر سي .. بس قاعدتها مرتفعة عن الأرض وتبين كأنها طائرة ولا تحمل جسر فوقها كأنها ملصوقة في الواجهة .. هذا إخواني مب تصميم ولا فيه لمحات فنية لسبب أساسي وهو العمود لازم نظهره كعمود ويرمز للوتد اللي مرتفع من الأرض لسقف البناء في الغالب أو حامل لجسر حتى لو تجميلي .. العيب الثاني كرانيش كثيرة بارزة ومكونة سطح جيد لوقوف الطيور وتلطيخ الواجهة لاحقاً بمخلفاتها وكذلك بالغبار اللي يتجمع فوق هذي الأسطح وينزل مع رشة المطر على الواجهة
بعدين عمود الزاوية لو حبينا نسويه تجميلي يستحسن يكون مربع وبزوايا قائمة وقاعدة بادية من الأرض وما يكون بارز كثير ولا يكون له تاج حاد وبارز يحتاج تصميم متقن .. هناك كثير من مصممين وفنيين الحجر يصممونه صح وبعضهم للأسف يصممونه غلط .. الأعمدة الداخلية ممكن تكون دائرية وكذلك الواقفة بروحها غير متصلة بشيء مثل المداخل
بعضهم يسوون عمدان حول النوافذ وبعد تكون ملصوقة وغير متصلة بالأرض كأنها طائرة ومحمولة وليست حاملة والمفروض العكس والمفروض تكون فيه نسبة وتناسب مب دفاشة وحجم كبير
لذلك حبيت انصح نصيحة عامة والأمثلة حولنا كثيرة في تصاميم ناجحة بكل المفاييس وفاشلة وتعتبر تلطيخ
أقرأ كتاب عن المواصفات القياسية للرسم المعماري والتصميم .. والكتاب يعتبر عريق وله جذور قديمة من 1932 مع الطبعة الأُولى وله عدة تحديثات والمؤلف يشتغل عليها لين سنة 1999 بعد 67 سنة من أول اصدار
إصدار 1999 وصل فوق 1000 صفحة
الكتاب للي مهتم يقدر يطلع عليه حتى كثقافة عامة وانا باحط منه مقتطفات اللي مهمة في التصميم
تكلمت في السابق عن المقياس الإنساني وهو تقريباً أساس جميع المقاييس في الدنيا .. كان الإنش بدايته عبارة عن الطول التقريبي لإبهام اليد .. والقدم معروف هو القدم والياردة عبارة عن طول الخطوة .. وهي مسميات لكن تعكس قياسات دقيقة وتختلف لو قسنا بأجزاء جسمنا من شخص لشخص
عندنا الشبر والذراع والباع والخطوة والقدم كانت تستخدم قديماً قبل القياسات المضبوطة والحديثة
الكتاب للي يبي ينزله موجود في موقع فورشيرد بإسم Architectural Graphic Standards
وهذي مقتطفات من القياس الإنساني للي يحب يطلع
المقاسات في البوكس هي بالمليمتر وهي اللي تهمنا
http://i.imgur.com/AtRHAkY.png
هنا ندخل في مقاسات الأطفال وحسب السن .. نلاحظ حتى ارتفاع الكرسي متغير يكون .. وهذا مهم لتصميم الأثاث واختياره لمراحل سنية معينة
http://i.imgur.com/vL88uQ2.png
وهنا مقاسات أكثر لأسطح العمل .. والبعض ممكن يحتاج شيء بمقاس خاص لدرجة إن الملمتر حسب طول الشخص يفرق .. المتعارف عليه شيء والخاص شيء ثاني
انا قليل اللي استعين بهذي الجداول وهذا خطأ لأنها مهمة للقياس المضبوط للشخص اللي بيستعمل المكان
http://i.imgur.com/Oiwg5X3.png
القصد من شرح المقاس الإنساني هو مدخل لتثقيف القاريء عن أهمية الاقتناع برؤية المهندس المصمم للمساحات أو للتصميم الداخلي ولا نسوي شيء شاذ بمقاس غير واقعي ولا ينفعنا
نفس الشيء التوزيع على مجال أكبر مثل المطبخ نحتاج لسهولة الحركة بين سطح عمل 1 وسطح عمل 2 والمغسلة والثلاجة والفرن .. وفيه كذلك عدة ثانية مثل فرامة الأكل وغسالة الصحون والشواية والميكروويف أو أي فرن ثاني .. هذي كلها نرتبها بطريقة تضمن سهولة الوصول ولا تكون بعيدة وايد ويستوي المطبخ واسع ومرهق .. حلو يكون ملموم وكافي وبس
هنا نلاحظ فروقات بسيطة بين المرأة والرجل في إرتفاع الطاولة والكرسي .. الكراسي سهل التحكم فيها بس الكاونترات والطاولات ثابتة والمقاسات هذي قابلة للتعديل بحدود بسيطة حسب رؤية المهندس المختص بالتصميم
http://i.imgur.com/O3j1wSZ.png
الكتاب فيه الكثير من التوضيحات ولكل شيء وانا أركز على بعض المقتطفات فقط مثل ما ذكرت اللي تعطينا فكرة عن المساحة
هنا بعض المساحات الداخلية والأبعاد بين محتوياتها ومكان المرور ونشوف كيف الممر المفتوح لشخصين وللبيوت العادية المفضل 1370 ملم للعرض يعني متر و 40 سم كافية وزود خصوصاً لو كانت ممر داخلي وممكن نقللها لحدود المتر لو حبينا
http://i.imgur.com/TGX4wlW.png
وهذي بعض التفاصيل المهمة للدرج
http://i.imgur.com/YrpcDS8.png
هذا عرض لبعض العناصر الإنشائية وتسميتها فقط للاطلاع ويفيدنا في معرفة وجود أنظمة خفيفة واقتصادية غير عن التقليدية المتعودين عليها
http://i.imgur.com/V5zT6wq.png
من أهم الاحتياطات اللي ناخذها حق مبنانا هو نظام العزل الحراري ولازم نفرضها على الاستشاري من الأساس
البعض من الاستشاريين ويمكن غالبيتهم ما عندهم فكرة ومنتشرة عندهم مفاهيم خاطئة عن العزل وينشرونها للعامة وحتى لبقية من هم في هذا المجال .. العزل باختصار هو تغليف المبنى بالكامل سقف وجدران ونوافذ وبيبان وحتى أرضية لو نبغي عزل حراري مسكت .. إستشاري يسوي لي تفاصيل عزل ويخلي الجسور الخرسانية الجانبية مب معزولة هذا خطأ
هذا جدول لكم نظام وآخر اليمين فيه النفاذية الحرارية وهذي كلما قلت كلما صار العزل أفضل
http://i.imgur.com/sHCllxE.png
شيء مهم كذلك تفصيل التربيط بين الخرسانات والطابوق
قاعدة بسيطة أي سطح خرساني يلامسه طابوق لازم نسوي تربيط بينهم بروابط خاصة وفي الغالب حديد ما يصدي ومسامير خرسانة وصوب الطابوق نخليها في المونة وهي ما نشفت أو نستعمل براغي
هذي تفاصيل التربيط لمقاومة الزلازل وهي عالية ونقدر نخففها حتى نوفر وتكون كافية للضغوط الحرارية والجانبية من الهواء
http://i.imgur.com/D8fACt6.png
كلها مقتطفات أشوفها مهمة من كتاب التفاصيل التصميمية اللي ذكرته سابقاً واللي بيرجع له بيستفيد كثير
موضوع الإنارة الطبيعية مهم جداً للمباني بمختلف أنواعها .. والحمد لله النور متوفر عندنا في كامل السنة ولازم نستغله صح
شيء مهم إننا نركب نوافذ معزولة ومتطورة لتقليل الحرارة وكذلك للحصول على نور شمس بدون حرارة نحتاج لحقن التجويف المحصور بين طبقتي زجاج بغاز الأرغون أو غيره من الغازات الخاملة والعازلة
النور له تأثير نفسي واللي يجينا من السقف غير ويكون دوم مفتوح .. حتى نشوف منه الغيم وتغيرات الجو وحركة ضوء الشمس واتجاهه .. في الليالي المقمرة نور القمر يتسلل للداخل .. والمفروض يكون متوفر في المكاتب والمطابخ وتكرمون الحمامات والصالات بكثرة والمجالس فقط غرف النوم نعمل سيطرة عليه ونسوي نوافذ عادية بدال المناور السقفية وبحيث نقدر نتحكم في مقدار الضوء الى قريب الظلام الدامس وكذلك وقت التنظيف نقدر نشمس الغرفة
هذي كذلك مقتطفات من الكتاب السابق
http://i.imgur.com/BEjt6ED.png
شيء مهم لازم نلاحظه هو استخدام أسطح عاكسة للفتحات الضيقة والعميقة حتى ينعكس منها النور للداخل .. حتى كسر المرايا المركبة مثل السيراميك بطريقة عشوائية أو بنقشة فنية تنفع
http://i.imgur.com/Vi34RWU.png
ثم ينتقل بنا الكتاب لاحتياطات التصميم ضد انتقال الصوت أو امتصاص الصوت وهذا تفصيل بسيط وهناك شرح طويل وحسابات لهذا الموضوع
http://i.imgur.com/pj12xLX.png
نقطع شوي المتابعة مع الكتاب وتفاصيل التصميم ونرجع لتصميم البيت اللي العضو الأخ الدوحة قطر يتسائل عنه في موضوع خاص .. وهو مساحة أرضه 30 في 30 والمناسب له هذا التصميم لأن موقعه على زاوية
ما عندنا مساحة للملحق وممكن نخليه تحت البيت في البيسمنت بعمل الحوش لحد سور البيت محفور بعمق البيسمنت وعمل رامب للنزول من الحوش
ممكن نلغي فكرة الدرج الدائري ونروح للدرج اللي حول المصعد وينزل نفس الوقت للبيسمنت .. ونخلي الصالة الكبيرة اليسرى عبارة عن مطبخ تحضير مفتوح وطاولة طعام وصالة جلوس .. المطبخ الكبير بيكون تحت المطبخ التحضيري وجنبه مخزن وغرفة الخادمات والمطبخ الحالي في المخطط نحوله الى جلسة ونشطر الزاوية شوي مع دريشة تطل على الحوش الخلفي النازل .. في الزاوية تحت نقدر نسوي حديقة نازلة أو حوض سباحة صغير مع جلسة خارجية والنزول لها أما من خلال المصعد أو الدرج داخل البيت أو الرامب اللي في الحوش قريب من مواقف السيارات وممكن ننزل عليه الأغراض للتخزين بسهولة
http://i.imgur.com/wAyoOuh.png
ما اشغل الاوتوكاد الا قليل ومن اشغله اندمج في التصميم وهو يستهلك ذاكرة كبيرة ويخلي الكمبيوتر بطيء ويعلق أوقات
تابعت شوي مع فكرة التصميم حتى اوضحها للجميع والمفروض البيسمنت مسموح وحديقة البيسمنت النازلة تفيد ولا تضر وتسوي تهوئة للبيسمنت وانارة طبيعية ومخرج طواريء للبيت كله .. ولا اعتقد ما يسمح بها التخطيط
هنا وضحت نزول الدرج للبيسمنت وارتفاعه للأول وتم الغاء الدرج الحلزوني الوسطي .. غرفة الخدم بتكون تحت المخزن ولها دريشة تطل على الحديقة النازلة والمطبخ جنبها تحت المطبخ المفتوح والستور بيكون كبير وبدون منور تحت الصالة العائلية .. الزاوية موضح فيها جزء حوض السباحة الخارجي وممكن يكون جزء داخلي ومفصولين بباب قزاز ممكن ينفتح الداخل على الخارج
http://i.imgur.com/wAyoOuh.png
العذر والسموحة بالغلط نقلت الرسمة السابقة
http://i.imgur.com/RNvwy31.png
كملت مقترح البيسمنت وأعرضه لفايدة الجميع .. بتكون الجدران حول الحوض بارتفاع 6 متر وتسوي تغطية كاملة للمنطقة ولو حبينا نحط بس شبك منع الحشرات نقدر نحطه في طرف أعلى سور البيت ومتصل مع جدار البيت ونازل لتحت .. والحوض طوله 7 متر على الوضع الحالي ونقدر نسويه مستطيل بنظام الاوفرفلو المرتفع عن الأرض ونرجع للزاوية القائمة بدال المشطورة ونسوي الحوض أكبر لو حبينا ومستطيل
ممكن كذلك نلغي البارتشن الزجاج ونعتبر منطقة الحوض منطقة خارجية شبه مظللة ومهواة طبيعياً ونحتاج تدفئة للماي وقت الشتاء .. مكان المضخة والفلتر وصخان الماء ممكن يكون تحت بسطة الدرج وقريب جداً من الحوض
المطبخ معاه مخزنين كبار وممكن نحتاج لغرفة غسيل صغيرة نخليها مقابلة لباب غرفة الخدم
http://i.imgur.com/AdygwkD.png
عدلت بعض التعديلات البسيطة للدور الأول ليتماشى مع التصميم هذا ومساحته موضحة 341 ومساحة الأرضي تقارب 320 بمجموع 661 + 140 للبنتهاوس وبعدد غرف وحدة في الأرضي و 4 كلهم ماستر مع غرف ملابس بباب وواسعة مع حمام خاص وكل غرفة بتصميم غير وغرفة رئيسية فوق مع مكتب أو صالة تلفزيون لو نحب
السكايلايت فوق مقسوم واحد هرمي وواحد على شكل بادقير بس نوافذ جانبية ولنا الخيار نسوي سقفه زجاج أو بلاستيك أو خرسانة
بتطلع المساحة الاجمالية للبيت بحدود 1000 وشوي مع البيسمنت والبيسمنت ضروري لهذي الأرض لأن المساحة محدودة غير عن مساحة المجلس وغرفة السايق اللي بحدود 150 متر مربع تقريباً
http://i.imgur.com/VQ0EdQW.png
دور البنتهاوس
http://i.imgur.com/Z8ZHu5u.png
الصالة العلوية عبارة عن ممر وفيها جلسة التلفزيون مسكرة بباب قزاز للهدوء
لو حبينا نقدر نسوي فتحة دائرية تحت السكايلايت تطل على الصالة السفلية ونخلي النافورة في وسط الصالة السفلية تحت الفتحة حتى النور من فوق بيوصلها ولو حبينا نقدر نحط طاولة دائرية عليها نباتات حتى لو عادية تنبت بسهولة لتوفر النور من أعلى
هذي نظرة سريعة على مراجعات كثيرة تمت خلال هذا الموضوع وهنا نشوف الأفكار تتشابه .. الشرح أوضح بفيديو لبعض التوزيعات المثالية .. رأي خاص بالنسبة لدورة المياه المستطيلة بثلاث قطع نوسع شوي في منطقة الشاور 110 سم أو 120 أفضل ال 90 تكون ضيقة خصوصاً في وجود حاجز زجاجي جانبي وممكن نصغر في المساحة المخصصة للقطعتين الباقيتين
الزجاج حلو ويعطي سعة للبارتشن المطل على الغرفة .. وفي حال استخدام الغرفة من قبل 2 نقدر نركب الزجاج اللي يتعتم الكترونياً أو نركب ستارة بلاستيك داخلية .. حلاة الزجاج يكون شفاف لكن بعد المعتم ينور المكان
https://www.youtube.com/watch?v=h6oIdu_hoqg
هنا أعارض المهندسة الرأي في مسئلة الروائح .. لو التصريف معمول صح وبالتحكم بإغلاق البايبات اللي للصرف بالرداد اللي تكلمت عنه مرات في السابق ما بتكون عندنا روائح نهائياً .. والتهوية ضرورية سواء طبيعية أو ميكانيكية
https://www.youtube.com/watch?v=aZ2nteverEk
بارك الله في وقتك اللي تبذله يبو عبدالله
من ناحية الحرارة والعزل عموماً لان منطقتنا حارة في الخليج
نبغي اعادة على المواضيع اللي فاتتنا ،، متى ما تبسر لك حفظك الله
إن شاء الله أكتب واحط ايضاحات في موضوع العقود لأن العزل مهم نخطط له من التصميم والتصميم يكون فيه اعتبارات ومواصفات وتفاصيل للعزلاقتباس:
المشاركة الأصلية كتبت بواسطة سالم الزهران
بس باختصار العزل لازم نتخيله كتغليف وطبقة وسطية تغلف الجدران الداخلية والخرسانات ونفس الوقت الطبقة هذي تحتاج طبقة حماية صلبة لو كانت من مواد خفيفة وتتأثر من الشمس ومن المطر والعوامل الجوية لذلك تغلفها بحجر أو طوب أو طابوق أو ألواح معدنية خاصة أو بلاستر قوي وغير منفذ للماء
بالنسبة لبيتي كلفني العزل الحراري حول 1.5% من قيمة البناء زيادة .. 35000 على قيمة اجمالية قريب 3 مليون لكن استفدت استفادة كبيرة منه
السلام عليكماقتباس:
المشاركة الأصلية كتبت بواسطة سعود.
ممكن الشركة ولاتهون.
السلام عليكم اخوي معماري قطراقتباس:
المشاركة الأصلية كتبت بواسطة معماري قطري
أرسلت لك إيميل ممكن تشوف ايميلك معاليك امر
جزاك الله خير
لاحظت بيوت جديدة مركبة حجر لكن للأسف تشوف كم قطعه طايحة ومشوها المنظر، وآخر شي راعي البيت قطر انه يصبغ.اقتباس:
المشاركة الأصلية كتبت بواسطة معماري قطري
شخصيا انا مافضل يكون البيت كله حجر او واجهة البيت كلها حجر.. افضل يكون جزء منها حجر والباقي صبغ، جذي يعطينا منظر جمالي ومايكون دفش.
مادري هذا رأي ويمكن أكون غلطان.
عليكم السلام ورحمة الله وبركاتهاقتباس:
المشاركة الأصلية كتبت بواسطة بوجاسم_قطر
سعود له طلات في الشهر مرة شكله تزوج الثانية وانشغل
عن الشركات ما شاء الله كثيرة في قطر .. أعرف عائلات تحصل 3 إخوان عندهم ثلاث شركات تقول تحدي بينهم .. بس تعال لموقع الشركة تحصله يقول لك احنا بنوصلك ولو تلح ما تحصل عندهم مكان
لو تحب وللجميع كذلك ركز على الشركات المؤسسة صح واللي شغالة بموظفين واداريين وتقدر أقل شيء تحصلهم لأن التنسيق والزيارات بتكون شبه دائمة
أحد الإخوان الله فتح عليه بشركة وتعب فيها وألحين بنى سكن للعمال لعدد كبير نسيت كم بس بالمئات والحكومة ما قصرت بمساهمتها .. لكن بعد قوانين العمل الجديدة اضطر يسرح كثيرين بسبب قلة الشغل وبعضهم أجرهم لشركات ثانية عندها ضغط
زمان الشركة تاخذ مشاريع فوق طاقتها تقريباً انتهى وأصبح غالبية المقاولين يدورون شغل بس يدورون شغل يسوى والكبار يبتعدون عن المشاريع الصغيرة الا مضطرين لو السوق واقف أو الحصة الكبيرة كلتها شركات معينة .. وهنا يشتغل الواحد على الفرص هذي ويفاوض ويتعب في المفاوضة حتى يحصل شركة جيدة وبتخلص بنيانه بجودة مطلوبة .. أما بتقول بابني عظم وبعدين باكمل بتتعب ولا بتحصل الجودة المطلوبة وبيصير الإشراف متقطع وبتتعرض لخساير لو تحسبها بيكون الطريق الأول أسهل وهو طريق المقاول الرئيسي الواحد .. عندك تركيب رخام خل في عقدك الرخام وشغله عن طريق مقاول ثاني بس حدد دور المقاول الأول من حماية الموقع والتنسيق في الشغل مع المقاول الثاني .. كذلك الأعمال الخشبية والنوافذ أو الألمنيوم أو اليو بي في سي .. كذلك أي شغل خاص تبي مقاول ثاني يسويه بس الأفضل الأعمال الرئيسية حتى الكهرباء والمياه يسويها مقاول واحد .. حتى لو بتورد بعض المواد حدد مسؤولية المقاول في العقد في التركيب حسب الأُصول أو المواصفات المحددة مسبقاً بواسطة الاستشاري وحدد طريقة ونوعية مواد التركيب .. كل هذي أكيد تتم عن طريق استشاري بس انتبه لها
خل مناقصتك ووثائقك وحدة للجميع مع قابلية التعديل قليل أثناء التفاوض وشوف عدد مقاولين بحدود العشرة .. والمقاولين مثل ما قلت لازم مقاول فعلي وعنده امكانية
مثال شركة تدمر شركة قوية وعندها عدة أفرع .. تكيف - مياه - عزل - وتقريباً كل شيء .. شركة سريع عندهم حتى الردي مكس وغيرهم كثيرين .. وحاول تطلب تسعير مفصل أكثر سواء عن طريقك أو طريق الاستشاري حتى يحددون امكانية التفاوض على بعض البنود .. مثلاً بند العزل المائي للأسقف وللحمامات يسعره المقاول بتفاصيل معينة ولو تركته إنت بدون تفاصيل يفترض المقاول الحقاني والجيد يحدد لك التفاصيل والشركة اللي بتسويه في العقد وقيمته .. القيمة طبيعي يضيف عليها المقاول نسبة معينة للتنسيق ولبعض الشغلات اللي بيسويها .. وانت لو بتتفاوض وتتواصل مع شركات ثانية للعزل ممكن تحصل سعر أفضل وتاخذ هذا البند تسويه انت بواسطة آخرين لكن تحدد بعد مسؤولية المقاول الرئيسي
المقاولين اللي اعرفهم عندك كونسيرف .. هذا بنى لنا 3 بيوت غير عن كان باني لمدراء سابقين لي في الشغل ومتعاملين معاه من زمان في مباني كثيرة حكومية وشغله ممتاز وشوي غالي .. مقرهم فوق بوكيه في السد
سريع الكعبي - وتدمر - وحمد بن خالد بن حمد .. غنيين عن التعريف وانا بنوا لي الأخيرين وكانوا متعاونين وشغلهم حسب المواصفات والاشراف
لو تبي أعلى اتش بي كي حمد بن خالد بن أحمد .. وهذي الشركة غالية ولا اعتقد تاخذ مشاريع صغيرة بس خذوا الكهرباء والتكييف لصديق لي ويمدح في شغلهم .. كذلك مدماك من الشركات العريقة
كثيرة اللي انولدت كبيرة مثل الدرة ومثل عدة شركات نسيتهم
شركة صديق لي وهو قطري يتابع فيها جربتهم في شغلة بسيطة وما قصروا اسمها مافا ومقرها في شارع السلام
شركة بنت مسجد منطقتنا حق النعمة وتعرفت على مالكها طلع مهندس مدني خريج جامعة ميامي بس أقدم مني بحول 10 سنين .. شركة محمد بن علي النعمة ومقرها قرب شركة المرسدس في ميشرب .. تحية له وأكيد بيزعل علي لأنه قال لي ما ابني خاص بس الكل لو جاه مشروع زين بيفكر فيه
شركة تابعة لهندسة البناء القطرية ومشاركين مع شركة أمريكية وبعدد عمال يزيد عن 1700 نسيت اسمها السابق كان جي ال سي بس تغيرت للاسم الأمريكي لكن رقم مديرها عندي لو تبيه ومقرهم فوق فوشون ومدخله من ورا وعندهم مقر في الأبراج .. ميزتهم يسعرون بسرعة وتسعيرهم مفصل عن طريق مكتب حساب كميات واستعدوا للبناء بعدد كبير من العمال ولازم يشغلون عمالهم لذلك ياخذون أي مشروع