مراجعة التصاميم المعمارية وابداء الملاحظات عليها (محدث)

حامل الهزاز أو عامل الهزاز لازم يكون فيه قوة وصبور وجيد وسالفة متر الى نص متر وايد ولكل عنصر انشائي مسافته .. مثلاً أهم مكانين العمدان والجسور وأماكن انحشار الحديد وكثافته .. هذي يعرفها الفورمن اللي وجوده ضروري والحلو إن الجسور تنملي أول شيء وضروري واحد تحت بعد يتابع وينتبه لأي تسريب أو خلل في الفورمات الخشبية .. بعدين العملية تكون أسهل لبقية السقف أو الأرضية وانا هنا أشوف مب شرط يكون الهزاز عمودي المهم وجوده ما يزيد عن 30 ثانية .. حتى يغطي مسافة أكبر ولأن عمق الارضية قليل قطري ينفع وعمودي ينفع المهم ما يبقى أكثر من 30 ثانية

https://i.imgur.com/hsOkPJ6.png

نقطة 9 يقصدون في حالة عدم وجود هزاز نضرب بالحديد 20 مرة هذا عمل مرهق ويحتاج وقت طويل وفي بعض مشاريعنا اللي ما فيها اشراف فعلي لا يستعملون الهزاز ولا يستعملون الحديدة ومال عمك لا يهمك .. لا وبعد فك الخشب يعالجون أي تعشيش معالجة سطحية ويخلون الفراغات الداخل

أول شيء شالمقصود بوصلات الحديد؟

هو إذا عندنا قطعة حديد انتهت في مكان معين ولازم نركب قطعة ثانية تتمتد للصوب الثاني وتتداخل في جسر أو عمود أو تنحني إنحناء على شكل يو لتثبت في حال الشد في طرف الخرسانة فالتداخل هذا أو الإشتراك يجب أن يكون بطول متر أو يزيد .. مثلاً قطر 24 ملم هذي نضربها في 50 في حال الضغط كغالبية الأعمدة وتطلع لنا متر و 20 سم طول الترابط أو في حالة الشد في الجسور نضرب 24 في 65 ويطلع الطول 1.56 متر

هذي الشخص العادي يلاحظ تركيب الحديد لو ما فيه اشتراك بطول مناسب يعرف إن فيه شيء غلط

https://i.imgur.com/AMX03ea.png

أما وصل الحديد من 32 مم وأكبر يحتاج ما يسمى بالكوبلر Coplar ,وهي وصلات توصل قطع الحديد مثل ما هو موضح هنا

https://i.imgur.com/a6seg9l.png

وهذا نوع يعتمد على ضغط الحديد ببراغي خاصة وأسهل للإستعمال وفيه نوع ثاني ربط راس براس وهذا يحتاج عمل الراس مسنن بشكل برغي والوصلة بشكل برغي يتداخل معاه ويحتاج لف وشغل أزيد

هنا السؤال مختصر والإجابة مختصرة كثير مع إنه سؤال مهم ويتكرر دوم .. باعطيكم رايي في الموضوع وبحاول أختصر وباحط السؤول وجوابه بعدين .. بالنسبة للعقد المنفصل عظم وبعدين تشطيب هذا يعتمد دوم على موجز الأعمال المطلوبة لكل بند ومرحلة وبنفس الوقت وشي متطلبات المالك وخطة تنفيذها الهندسية .. العظم بنفس الوقت ينقسم الى قسمين رئيسيين أعمال الخرسانات وأعمال الطابوق وممكن تتداخل في بعض .. على فرض انتهينا منها أهم عمل ممكن يكون معاها ومن التأسيس لأن فيه حفر وتمديد وممكن بناء حمايات خرسانة أو طابوق هو الصرف الصحي خلو نقول الأساسي .. ولو محتاجين باقي الأرض لدخول شاحنات وتحميل وخايفين البايبات تتكسر نمدد في جوانب البنيان ونترك الباقي لبعدين .. بس بند الصرف الصحي أساسي وما ذكره المؤلف ولازم حتى مع إنه بسيط وتكلفته بسيطة لكن ضروري ينذكر ويتحدد والشغل فيه ممكن ما ينتهي الا على دفعات ومن بداية المشروع لقريب نهايته

بعدين تجي باقي البنود مثل ما ذكر بس بتفصيل كبير وتوضيح بالرسم وبالمواصفات نتكلم عن فريم باب شيء سهل بس نتكلم عن سب فريم أو فريم أساسي يتركب عليه الفريم اللي نبغيه وبنتفق عليه مع مقاول نجارة حتى مع الباب وبعد الصبغ وبعد الارضيات ممكن تكون هذي الخطوة قبل التنظيف والتأثيث .. ببساطة يجي الباب بمقاسات ماخوذة من السب فريم اللي يحدد أبعاد الباب ويحدد البلاستر وين ويكون مقاسه ثابت من فوق لتحت ويسهل عليه تركيب الباب مع الفريم مصبوغين وجاهزين في المنجرة بدون إزعاج وأذية .. الباقي كل شيء نحط تفاصيله مثل ما نحب يركب عندنا الدرايش بلاط كل مكان وعدة كل مكان

https://i.imgur.com/oI5Dy2m.png

شيء بديهي وللتوضيح البؤج هي علامات لوزنية البلاسنر يمشون عليها وبعبون ما بينها بالبلاستر ويستحسن نوزنها بالليزر أسهل وأضمن بدال الطرق البدائية خيط وقصة .. الليزر يعطينا تعامد واستواء حائطين ولو بنركب جهازين يعطونا الأربع حوائط ولأي مسافة حتى ما نحتاج للبؤج لو حبينا نعتمد الليزر ونخليه شغال وقت الشغل ونوزن عليه وأعتقد الموضوع مفهوم للجميع

https://i.imgur.com/QNw8BQ7.png

هذا السؤال بعد يحتاج إسهاب كبير

توزيع الكهرباء عندنا كم نوع منها الخطوط الرئيسية هذي تتم في بناء العظم ومن التأسيس لأن فيها دكتات خارجية تحت الأرض .. وفي بناء الهيكل نسوي بايبات الكهرباء واللي بيركب جبس يقدر يمددها تحت الأسقف مع انذار الحريق وهو ضروري ويكون مربوط ببعض مع أي تمديدات كاميرات يعني تقريباً تكون الخرسانات خالية من أي تمديد الا في الأطراف عندنا بايبات الصرف والمطر لو ما نبي نسوي دكت

https://i.imgur.com/uQqSKkQ.png

بعدين مهم وضع علامات لإرتفاع السويشات والسوكتات حسب التصميم والتوزيع الداخلي للأثاث .. الليتات موضوعها سهل لو صممنا كم نوع وكم سويش لكل مكان حتى نغير تشغيل الإضاءات حسب حاجتنا والتكييف يحتاج كهرباء أقوى و3 فيز حسب تصميم التكييف وكذلك بنحتاج دي بي لو عندنا حوض سباحة خارجي معاه ملحقات أو بدون حتى التسخين والفلترة تحتاج توزيع .. وللمصعد بعد

سؤال بخصوص مفاتيح الإنارة في جهتين هذي ألحين سهلة بنظام البيت الذكي بس ضروري نخلي مفتاح عادي أو ذكي قرب الأبواب والمداخل إحتياط لكن أنظمة البيت الذكي ضرورية

هذا سؤال بخصوص الهوردي .. وانا أشوف الفوم ينفع لكل السماكات ويعتبر الأفضل بعد كرات الهواء اللي شفناها قبل .. أول شيء خفيف وايد حتى 16 كجم كثافة في المتر المكعب ولا شيء .. مقارنة بالرمل وزنة حول 1800 كجم بالمتر المكعب .. عندنا متوفر 35 و 40 كجم وهو أفضل ما ينزل أو ينضغط

https://i.imgur.com/lKCQ0mY.png

https://i.imgur.com/XFCD7gJ.png

في حالة الصب على مراحل لو عندنا سقف كبير وبنصب جزء وبنكمل الباقي بعدين لازم نستخدم هذا النسيج البلاستيكي القوي المسمى Water Stop هذي حالة مهمة وكذلك بناء الأحواض وللبيسمنت أهمية كبرى بين القاعدة والجدار لأن مهما يكون مستحيل نصب على مرحلة وحدة .. في حالة الأحواض أوقات كثيرة ممكن صب القاعدة مع الجدران في نفس الوقت وبالخرسانة المقذوفة أو حتى بالفورمات التقليدية أو الالمنيوم وما نحتاج للوتر ستوب

الكاتب ما ذكر فايدة الوتر ستوب لكن من إسمه واضحة للغالبية وهي وقف التسريب من الفاصل الضعيف ووصلة الخرسانة مع خرسانة ثانية .. هذي مقاساته

https://i.imgur.com/eq9yQkI.png

وهذي صور لنوعياته وأكيد فيه نوعيات ثانية هذي المواد لا يتوقف تطويرها وانتاج الجديد منها

https://i.imgur.com/tEzkXFA.png

الكتاب ممتع وفيه الكثير وصحيح قراءتي فيه بطيئة بس بسبب الكتابة والنقاش والتعليق والإضافات .. باقي قريب ال 2000 صفحة كنت حاسبها غلط 1000 سؤال قلت في 1000 ورقة

مستغرب بعض الأسباب المذكورة مثل الغطاء الخرساني وزيادته هو ممكن يقصد نقصه أو ضعفه كلهم يوصلون لنفس المشكلة التكسر بسهولة .. درسنا إنه من أهم الأمور وبعض الأكواد تحدد 40 ملم و 50 ملم للخرسانات تحت الأرض لأهميتها وأهمية المحافظة عليها قوية + العزل والعزل للحديد بتغليفه بالايبوكسي من الأساس هو الحماية المهمة من الصدأ ومن مشاكله كفاية زيادة كاتبها ذيادة الله يهداه .. كلها عيوب البلاستر وعدم العناية بالصبغ وطبقاته تؤدي لوصول الرطوبة لداخل الخرسانة وصدأ الحديد وإضعاف الخرسانة وذكرت مرات المياه ومحتواها من كلور حتى مياه الخلط وأملاح سبب مباشر

https://i.imgur.com/CfzM8qJ.png

عاد المعالجة لو تسويها من الأساس بدال ما تنطر الخرسانات تتكسر وتروح تدهن ايبوكسي نص الصيخ اللي طالع والنص الثاني مصدي وغارق في الصدأ ركب حديد ايبوكسي وركبه صح من البداية أفضل

الصورة رعب والمبنى مب قديم لين ذيك الدرجة وحتى بعد المعالجة ما بتكثر حده 10 سنين وبترجع المشاكل

https://i.imgur.com/QXECNdb.png

بالنسبة للعزل المائي والحراري ليش إحنا نبدأ بالمائي وعلى أرضية ناعمة ولا فيها نتؤات ولا بقايا حادة؟ السبب ضمان بقاء العازل أطول فترة ولذلك بعض تفاصيل العازل ينعمل سكريد ناعم بسلوبات مدروسة للتصريف وبسمك مناسب حتى ما تتكسر أطرافه .. ثم يجي الرول العازل وطبقات الحمايات والعزل الباقي ومنها الحراري وبعدين سكريد حماية أو كنكري وبعضهم يحطون بلاط فوق يعطي عزل اضافي مائي وحراري

https://i.imgur.com/50bfsFX.png

متى ممكن يجي العازل المائي فوق؟ في حالة صار تسريب بدال ما نسوي شغلة كبيرة ونشيل كل شيء ونعدل نركب مباشرة على السكريد الأخير ونركب نوع يكون مقاوم للشمس بكسر كنكري صغيرة مضافة له وهذا النوع ضمانه أقل وشغله أرخص من الشغل كله إزالة وتركيب جديد مع إن مادة العازل أغلى من الرول العادي .. ممكن بعد نستخدم الأصباغ الايبوكسية العازلة فوق السكريد أو البلاط لو ركبنا بلاط