من أصعب المراحل على اللي بيبني إنه يقرر وينهي كل شيء خصوصاً التفاصيل الصغيرة وخصوصاً لو التصميم له وبتترتب عليه دفعات وتكاليف وصعوبات والبعض يغامر ويدفع ولا يهتم يسوي كل اللي خاطره فيه .. البعض لا يفكر وايد ويقارن عدة حلول حتى يطلع بشيء زين وبنفس الوقت ممكن ينعمل بدون مشاكل ولا يدخل في مشاكل صيانة
انا من النوع الثاني وألحين افكر في التفاصيل .. الدائرة النازلة في الوسط في الصالة السفلية حلوة والجلسة فيها ملمومة لكن بتكون فيها صعوبة في التشطيب وكذلك صعوبة في البناء .. أكيد باحتاج لإطار على حوافها من الرخام أو اسوي الأرضية تحت رخام وإحتمال فاصل معدني في زاوية التقاء الأرضية بجدار الدائرة ينفع وتكون الأرضية بورسلان حجم كبير للصالة وللجلسة الدائرية سجاد حتى الجوانب سجاد .. بيكون فيه شغل قص وشغل تركيب احترافي .. سويت مقترح ثاني لجلسة مربعة بعدد أقل من الكراسي 7 والدائرية 10 وباحطها وأكيد المربعة بتكون أسهل بكثير للتنفيذ
جلسة المجلس تفرق بأن الجزء المرتفع حولها بارتفاع بسيط وممكن بأي مادة تشطيب غير عن الارضية الوسطى حتى الباركيه ينفع والحجر والرخام .. 5 سم بيكون فرق الارتفاع فقط لتحديد مكان الكراسي
بالنسبة للتشجير الخارجي ومواقف المجلس فالمساحة بحمد الله تكفي لأن الشارع بعيد وأحد الجيران رتب الأرض أمام مجلسه وعمل مواقف وتشجير .. انا خطتي بتكون أشجار واشنطونيا للمدخل قبل الباب قريبة من بعض تعزل مواقف المجلس عن مدخل البيت .. الدوار بتكون الأشجار فيه رويال بالم تريز وهذي تختلف عن الواشنطونيا وعن النخل .. الباقي نخل وسدر وغيره من أشجار كثيرة في بالي .. زارع شجر كرز ووحدة استوت بطول متر وتطول بسرعة بس داخل البيت المكان مكيف وتحت المنور السقفي .. وزرعت بذر لشجر من ألمانيا وحدة برا طلعت اللي داخل للحين
9 سيارات للمجلس وممكن يصفون 9 وراهم وان شاء الله الصورة واضحة تبين عندي باهتة .. الزاوية السفلية الخارجية قرب غرفة الدريول ناوي اسوي فيها برج للعصافير والطيور الصغيرة .. قريب من اللي في كتارا ( تقليد )
في الداخل حركت موقف السيارات اليسار جهة الداخل حتى يكون مخفي وراء البيت وفي خط واحد مع البيت .. وهذا الموقف بيكون نازل بارتفاع مترين وبواجهة طابوقية وخرسانية وجوانب كذلك .. زين بيكون مجابل شمال والحمد لله وضعية المواقف عندي كلها في اتجاه الشمال وقت الشمس التظليل يغطي السيارات طول اليوم
https://i.imgur.com/Vs4KVZv.png
