مراجعة التصاميم المعمارية وابداء الملاحظات عليها (محدث)

حسب نوعية التأسيس وعقلية المهندس وتمكنه .. شفت فلم قبل حق شركة تأسس في الاراضي المغتصبة للفلسطينيين يحفرون حفرة عادية ويحطون قطع حديد رفيعة وعدد بسيط والحفرة تحفر بدريل هيدروليكي كبير في دقايق ويركبون الحديد ويصبون خرسانة كل التأسيس ما ياخذ ساعة وبدون حفر الأرض كلش

https://i.imgur.com/nVLp89c.png

كذاك لو بنسوي رافت فاونديشن مدروس ممكن نحفر لعمق 40 سم أو 30 ونسوي التأسيس كجسور مقلوبة بارتفاع معقول يعتبر هو ارتفاع أرضية البيت يتشطب فوقه والبايبات ممددة تحت الصبية هذي ومخترفة الجسور المقلوبة تكون مأسسين لها فتحات أثناء الصب بس ضروري الأرض تحت ممهدة وصلبة ومدكوكة

أكيد هنا تعتمد على الدراسة الإنشائية وأوقات ما نحتاج لهذا الراس للعمود وأوقات معينة نحتاج

بس دوم نتوقعها كتصميم مبالغات عندنا ومهندسين ضعاف عادي بنحصله بعد كبير وايد يضيق الحيز فوق ويعيق الدكتات بدال الجسور النازلة

https://i.imgur.com/knhODlt.png

أتابع معاكم مع الكتاب هذا وفيه الكثير والنقاش حوله مفيد بإذن الله للإطلاع أقل شيء

في هذا المثال اللي تطرق له المؤلف مشكلة وانا أعتبرها كبيرة ولا تجوز بالنسبة لي اقل شيء .. هو أعطى مثالين واحد صح وآخر غلط وانا أشوف العكس .. دورات المياه العامة تختلف وحتى دورات المياه العامة في بعض الدول قاموا يسوونها واسعة شوي ومعاها مغسلة داخلية صغيرة .. فيه مغاسل صغيرة ومناسبة وتؤدي غرض غسيل اليد .. ما أشوفها حلوة الواحد يطلع يده تقطر ماي يغسل وينشف ويطلع خصوصاً في المغاسل المنزلية وأشوف هذا منتشر كثير في بعض البيوت الحديثة لقصور في رؤية المصمم

شيء ثاني لو المساحة محدودة وسوينا الجدران 10 سم مثل ما هو موضح وهذي يسوونها دوم في مصر والاردن والدول العربية غير الخليج وحتى يمددون فيها ويمشي الحال .. بس ليش ما سوى الباب 10 سم بعد ووفر مساحة

لو انا مكانه وعندي حيز خارجي باسوي مغسلة خارجية وداخلية ثنتين

https://i.imgur.com/ZP8L8As.png

هذا الوضع ما يحصل عندنا لكن حصل لواحد من الإخوان فرق 3 متر نزول من الشارع ونزول متدرج وصمم بيسمنت جهة النزول ومدخل للسيارات في نص البيسمنت وبعدين ارتفاع بسيط لصالة تطل على الحوش الخلفي وفيه حوض سباحة .. كان تصميمه خرافي وحلو وراجعته معاه من 4 سنين وتم يعاني مع استشاريين اثنين واحد كان من فيصلة بص وتعبه وايد وخسره وخسر حول 500000 على التصميم ودخل مهندسة ديكور أجنبية فيه وللحين ما بدأ يبني الله يعينه ويوفقه

هذا المثال اللي حطه المؤلف لعمق كبير .. أول شيء انا أشوف الدفان والدك لهذا العمق غلط وغلط كبير وأكيد حسب حاجة المالك لو محتاج يبني مستويات سفلية للمعيشة وفي بعض الدول الدخول يكون من أعلى والبنيان على سفح تل أو جبل بدون وجود مدخل من أسفل وبعضها يسوون مدخل وطريق من اسفل ويستوي مدخلين للبيت وممكن مواقف تحت وشفنا أمثلة كثيرة

زين لو فرضنا المالك ما يبي يستغل الجزء التحتي بيكون ما فيه داعي يدفن ويدك نهائياً .. يبني أعمدة وشدادات مثل ما يقول وهي عبارة عن جسور رابطة وبدون دفان كلش بينها يخليها بارزة تبين ولا تتأذى من الدفان بالعكس تكون أرخص وأسهل وتبين لو فيها شيء للصيانة .. وممكن يسوي جسور قطرية تعطي الأعمدة تماسك وقوة أعلى وثبات وفوق يصب ارضية البيت ويبني حسب المستوى اللي يبيه .. ولو احتاج يطور الأجزاء السفلية أي وقت موضوعها سهل

https://i.imgur.com/Php8t6V.png

هذا موضوع غريب علي وجديد وأشوفه صعب الا يكون مقسم أقسام صغيرة أو يكون بريكاست في معمل وينقل كل جزء للموقع ويركب حسب الأصول

https://i.imgur.com/6GWgFDU.png

https://i.imgur.com/Z9BpiRQ.png

سؤال حول ما العمل في حال استمرار المياه الجوفية مع السحب ولم يجب عليه المؤلف .. هذي الظاهرة بدت تكثر في قطر وسمعت عن أراضي بين العمران حفروها أصحابها وانملت ماي والماي يزيد كلما سحبوا وتركوها .. الحل في رأيي هو إعادة التصميم والمفروض يكون فيه شركات مخصصة للأساسات العميقة أو ما يسمى بالأوتاد المضروبة .. عمليتها سهلة جداً خصوصاً للمباني الخفيفة لين ست أدوار والبيوت أسهل واسهل واقتصادية وتعطي حماية للتأسيس تفوق أي تأسيس آخر حتى توصل ل 100 سنة .. عيبها غالية ليس لأنها بالفعل غالية لأن نادر اللي يسوونها والا المفروض تطلع أرخص من العادية بمراحل

https://i.imgur.com/QpgzjDJ.png

كلام صحيح 100% ونفس الحال في البلاستر وأمور كثيرة ونحصل بعض الفنيين يلعبون على الملاك بأنه مكتشف شيء خطير .. بعضهم يخلط الصبغ الأبيض بالبودرة ويطلع رخيص وسريع ومن أفضل ما يمكن لكن يمتص رطوبة ويعفن ويبقع بقع سوداء بعد فترة وهذا لعب البنغال

https://i.imgur.com/d6MOmEY.png

هذا بعد مهم لكشف الاعيب البعض .. أصلاً من تحصل يالمالك كيس جبس في الموقع اعرف إن الغش بيوصلك بتشوفه بعدين وقت تركيب الجبس الوضع غير

فعلاََ تجمعات المياة الجوفية صارت ظاهرة والحقيقة فيها لها جريان جوفي و لو البلدية انتبهت لنقاط التجميع حتى البعيدة عن الموقع و سوت لها ربط مع شبكة الستورم ووتر،، مع جسات متفرقة و نزح للمياة كان نفعوا الناس.. يبه خل يشغلون هالمهندسين ولا انا مب متخصص ولا بنافعهم

اقتباس:

---

المشاركة الأصلية كتبت بواسطة سالم الزهران

فعلاََ تجمعات المياة الجوفية صارت ظاهرة والحقيقة فيها لها جريان جوفي و لو البلدية انتبهت لنقاط التجميع حتى البعيدة عن الموقع و سوت لها ربط مع شبكة الستورم ووتر،، مع جسات متفرقة و نزح للمياة كان نفعوا الناس.. يبه خل يشغلون هالمهندسين ولا انا مب متخصص ولا بنافعهم

---

صادق فيه عروق للمياه وتجمعات تحت الارض وفجوات وأرض قطر ضعيفة ويمكن أضعف أراضي الخليج .. ترتفع عن البحر بالتدريج للوسط في حدود ال 14 متر فقط محدبة الشكل وتنزل جهة السواحل .. الغريب يوجد بعض الكائنات البحرية مثل القواقع في وسط قطر كما يوجد بعض الحصى البركاني الصغير كسر صغيرة جداً تنمسك باليد

الحل في رأيي تكثيف الزراعة وعمل تصريف سطحي للمياه لكل منطقة وترك أرض هابطة وترتيبها لتصريف المياه السطحية عليها وزراعتها بطريقة تكون متنفس لكل منطقة .. دبي شغلهم زين مع تدوير المياه سمعت 95% من المياه الثقيلة يعاد استعالها وتضخ للزراعة وللبحيرات وللاستعمال الصناعي .. إحنا اسباير عندنا يصرف عليه ميزانية تشغيل تصل ل 400 مليون سنوياً وفي دبي حتى الزراعة اللي في الشوارع يغسلونها في آخر الليل حتى تطلع نظيفة وخضراء

المسامحة على التأخير والبطء في إكمال الكتاب وهنا سؤال عن قصة تكثيف الكانات وذكر المؤلف كما في الصورة .. وزيادة في التوضيح أول شيء وشي الكانات ( Stirrups ) هي قطع حديد 8 ملم أو 6 ملم تنعمل بمقاس معين يضمن لنا غطاء خرساني كافي للحديد الطولي في العمود أو في الجسر .. في الجسر تكون طولية من فوق لين تحت وفي العمود أفقية من يمين لين يسار والحديد الطولي يكون من فوق لين تحت .. هي لها عدة مهام وأهم مهمة انها تقاوم قوى القطع الرأسية على العنصر الخرساني وتكون أشد في الأطراف لذلك تكثيفها في الأطراف ولها حسبة هندسية خاصة ويتحدد على أساسها عددها في المتر

شيء ثاني مهم تفصيل هذا الحديد يكون الإغلاق بثني الحديد 135 درجة حتى يسكر صح وتغطيه الخرسانة وتثبته فلا ينفك .. كذلك القفل أو مكان النهايات بعبارة أدق يكون متغير مرة أمام ومرة خلف .. كذلك كما في الصورة يلاحظ تمديد الحديد الطولي معقوف بزاوية 90 درجة في الأخير والمفروض الحديد العلوي في الجسر يدخل في العمود لعمق معين ومحسوب والحديد السفلي في الجسر يكون ملفوف على شكل حرف U حتى يعطي ربط أقوى وترسية أقوى للجسر فلا ينفصل في الشد .. تفصيل مهم ناقص من هذي الرسمة

https://i.imgur.com/2934Pum.png

بالنسبة للغطاء الخرساني يختلف بإختلاف موقع العنصر الخرساني فاللي تحت الأرض نكبره شوي حتى نحصل على غطاء خرساني أكبر .. بدال 2 سم مثلاً نسويه 4 أو 5 ما يضر .. مثال جسر السقف 20 سم عرضه والحديد داخل 16 سم شامل الكانات 2 سم من كل صوب غطاء خرساني .. لو سوينا الجسر 30 استفدنا أكثر بيكون عندنا 5 سم زود من كل صوب ويعطينا غطاء خرساني مضمون وأكبر وتحت الحال ضروري أكثر قصدي في الجسور تحت التربة أو الملامسة لها

هذا السؤال مر علينا قبل وألحين شكله معاد

https://i.imgur.com/Ire8uox.png

مثل ما هو واضح في الصورة وظيفة الكرسي تثبيت الحديد السفلي والعلوي مع بعض أو السفلي يجي على البسكوتات الإسمنتية والعلوي يتركب على الكراسي

https://i.imgur.com/vy6XeKZ.png

حيرني هالسؤال لفترة شيقصد به ولا فهمت الصورة في البداية ولا فهمت الكلمات المكتوبة أعرف ترآست تعني يثق وتعني ثقة .. وسويت بحث عنها في قوقل طلع الأخ ملخبط بين Trust and Truss والثانية تعني دعامة .. هذي لتدعيم جسر مؤقت يكون خرساني لو بنتركه في مكانه لحماية أطراف الأرض وينبني فوق الجدار الساند اللي في العادة يكون حديد مغروس في الأرض وأوقات مجوف وداخله خرسانة جتى بدعم أطراف الأرض وأوقات يكون فيها جار وبنيان قائم .. الدعامة هذي جاية قطرية حتى تعطي مقاومة لأي إنحناء ممكن يصيب الجسر فوق الدعامات المغروسة أو الحائط الإستنادي .. هذي ممكن تبقى في مكانها وينبني الأساس تحتها وفي حالات ممكن تزال بس لو بقت مكانها أكيد أفضل

https://i.imgur.com/HOc8qBb.png

الكلمة المكتوبة على الصورة strut هذي ما اظن لها وجود .. لا طلعت المقطع العرضي والكلمتين والصورة وكلمة الثقة فيها لخبطوا المفاهيم كان يقدر يعتمد Truss وبس والكلمة معروفة ودقيقة ولو يبي يوضحها على الصورة Diagonal Truss وتعني الدعامة القُطرية