مراجعة التصاميم المعمارية وابداء الملاحظات عليها (محدث)

ألحين بعض شركات الرديمكس توفر خرسانة بمواصفات مناسبة تتغلغل بين الحديد وما فيها كنكري كبير .. 40 ملم تعني 4 سم وهذي مناسبة للدفان وحتى ال 50 وال 70 مناسبة للدفان لدن للخرسانة كلما صغرت حبات القابرو كلما كانت مساحة التصاق الإسمنت وتغطيتها للحبيبات هذي أكبر وقوة لصق أكبر وتجانس أفضل للخلطة الخرسانية .. 40 ملم عندنا على كثافة التسليح ما تمر بين الحديد وتستوي تعشيشات قوية

تقدر تطلبها ألحين قابرو وبأحجام صغيرة أو عدسية مع خلطة خرسانية ذاتية الدمك أو المائعة سهلة الدخول لكافة مناطق العناصر الإنشائية وحتى ما تحتاج هزاز .. تسمى Self Settling or Sitting Concrete

https://i.imgur.com/fWpy5Jw.png

هذا كلام صحيح بس يحتاج توضيح آلية التقاضي السريع في هذي الحالة ولازم فيه جهة تحاسب المقاول وتغرمه غرامة رادعة وهذا تكلمت فيه كثير .. إشراف عام من الدولة وتحرك سريع في حال ما واجه مهندس مشرف مثل هذا الوضع أو مالك شك في تجاوز المشرف أو المقاول شيء ملزم ومنصوص عليه في العقد كمواصفة خاصة أو لم ينص عليه وكان مواصفة عامة أو ببساطة أُصول صنعة وتفاصيل لازم يؤديها المقاول صح

https://i.imgur.com/0qgAtBI.png

هذي طريقة حساب ساذجة وفيها شوية غباء .. ليش؟

لأن يستحيل تحط قطع خشبية طولها 3 متر في متر مكعب .. ممكن نقول تجاوزاً الحسبة صحيحة لكن بما إنها بطول 3 متر نقول في الثلاثة متر مكعب عدد مربعات خشبية = 100 قطعة .. حسبتها سريعاً بما ان عندي المتر المكعب يشيل أو بالأدق المتر المربع فيه 10 من عشرات السنتيمتر اللي هو عرض القطاع للخشب اللي طوله 3 متر أو 300 سم وفيه بعد 10 من عشرات السنتيمتر في الإتجاه الثاني يعني 10 في 10 = 100 .. بس بعد يستحيل تحشر مربعات خشبية في متر مربع بعدد 100 بدون ما تزيد شوي عن المتر المربع وبالتالي تستوي الثلاث أمتار المكعبة تشيل شوي بشكل بسيط أقل من 100 حبة من المربعات الخشبية وهم مسمينها اسم دلع مصري ما مر علي قبل .. نفس الشيء ينطبق على الألواح والأصح ناخذ 3 متر مكعب ما ناخذ 1 متر مكعب الا لو طالبينها كلها بأطوال 1 متر بدال 3 متر

https://i.imgur.com/czox98g.png

هذا وضع لازم يصلح قبل صب سقف الدور ولازم المكتب الإستشاري يشرح للمالك كلما يتعلق ببيته خصوصاً التصميم الإنشائي وإحتمالية بروز العمود أو تعارضه مع فتحة معمارية باب أو نافذة وضرورة تعديل المخطط بشكل مسبق حسب رغبة المالك .. يحطون المالك في واقع صعب بعدين هذا شغل أتقنوه المكاتب العربية حتى ما احدد جنسية يزعلون أصحابها

https://i.imgur.com/bcjiynR.png

هذي فائدة كبيرة لفواصل التمدد + فائدتها في منع الشلوخ بسبب التأثيرات الحرارية .. بس شيصير في حال ما عملناها أصلاً وكثير استشاريين في قطر ما يفكرون فيها واحتمال ما يعرفونها حتى وشفت عشرات البيوت مبنية بدون فواصل تمدد لدرجة إني من أشوف مقاول يشتغل وأشوف سور ملطخ بالإصلاحات قبل حتى عمل البلاستر أتأكد انه بدون فواصل تمدد ويكون تأكيدي في محله

في هالحالة ضروري يطلب المالك عمل فواصل تمدد لو ما عملت بقطع الجدار كل 12 أو 9 أو 6 أو 3 متر أو حتى كل خمسة متر كلها أرقام مناسبة وكلما كانت أقل كان السور أقوى من ناحية كونه كتلة واحدة بعيدة عن الشلوخ بسبب الحرارة والبرودة .. القص يكون بعرض 2 سم وينملي بمادة مرنة ربر + سيليكون خاص أو ماستك وتعديل الجدار بعد قصه وهدمه


https://i.imgur.com/0B8cCol.png

هذا سؤال مهم وأهميته تكمن فيما لو إحتاج المالك لضوابط تهمه في سرعة التنفيذ والوقت عنده حرج والأهم الموازنة متوفرة .. لو الموازنة سيولة متقطعة وممكن تكون موسمية سنوية كإستثمارات تدر مدخول مثلاً ممكن يحتاج المالك إيقاف بعض مراحل البناء ايقاف مؤقت .. المهم يعرف حساب كمية وسعر ومواصفات كل مرحلة بشكل مسبق حتى يكون مستعد ومتوقع شالمطلوب منه

https://i.imgur.com/AJkOBnK.png

بعد يفيدنا الجدول الزمني للمراحل اللي بتتم في المشروع الرئيسية والفرعية ويعتبر اعتراف من المقاول بقدرته يخلص هذي المراحل في فترة محددة زمنياً .. للأسف المؤلف بدال ما يحط لنا جدول لأعمال بناء حط جدول لوقت دراسة المشروع وعمل الجدول بواسطة Pmp وهذي إختصار ل Project Management Professional خذت فيه كورس مبدئي ووقفت عن المواصلة واللي يواصل ياخذ شهادة دولية في هذا التخصص الرفيع والصعب وأنصح به كل مهندس ممارس يبغي يطور نفسه .. كانوا يسوون دورات مكلفة في الشيراتون وأعتقد ستاد مختصين بها الآن

https://i.imgur.com/qBu5smC.png

فيه جداول للتصميم ومراحله وفيه جداول للبناء بكافة أنواعه وهذي يعدل عليها المقاول المختص بواسطة مدراء مشاريع .. للبناء البسيط الجداول تكون مبسطة جداً وسهلة لكن كل ما تعقد المشروع يتعقد الجدول .. جدول موافقات المواد يناقش مع الجهة المخولة بالإستلام وبإدارة المشروع بحيث يضمن المقاول عدم تأخير الموافقات لو كان تحديد المواد صعب وشبه مفتوح ما تحددت المواصفات صح مبدئياً

هنا الكلام صحيح في هذي الجزئية فقط لكن فيه تفاصيل كثيرة مفقودة في الرسم من ضمنها إذا فيه جسور جانبية إرساء الحديد في الجسور وربطه والإرساء هذا المحني قليل وبس 90 درجة وطول الضلع للترسية كثير قليل وبيكون تصميم ضعيف جداً .. فيه ارساء بشكل U والطول يكون أكبر يعطي قوة أقوى للحديد وثبات يخلي الحديد يعطي قوته بالكامل ولا ينفصل .. في مكتبي المنزلي مسوينها وجسور عريضة بعرض 35 سم وعمق 35 سم وطالعة للخارج امتداد للسقف المائل حول 60 سم يسوي تظليل لجدران المكتب وبنفس الوقت يعطي منظر حلو خارجي للسقف المائل

مشكلتنا الأكبر مع ضعف المنشأءات الخرسانية هي عدم ترسية الحديد صح وكذلك استخدام حديد يصدي وينفصل عن الخرسانة فيحصل تقوس للجسور والأرضيات يؤثر على الطابوق ويسوي كراكات ويجينا المهندز بعدين يبرر لنا بهبوط الارض

https://i.imgur.com/vTDm65u.png

هذي كلها رؤوس أقلام وكتاب كامل ما يوفي الموضوع حقه

https://i.imgur.com/yCGDAWK.png

وحقيقة يمكن الكثيرين يجهلونها وهي عندنا المشاريع الكبرى أوقات تاخذ 10 أو 15 سنة والمفروض تنجز في سنتين أو حتى سنة لهذي الأسباب واسباب أُخرى كثيرة .. ويبدأ المشروع بتكلفة مليار وينتهي ب 2 مليار .. إذا مشروع بنية تحتية لمنطقة سكنية يكلف أكثر من البناء الفعلي في هذي المنطقة أوقات كثيرة لا وتكون بنية تحتية متهالكة تحتاج تطوير سريع بس نتعايش معاها

بخصوص هذا السؤال عن مخارج الطواريء .. من المشاهد الساذجة اللي شفتها وهي موجودة في كم وزارة وكم مبنى مكتظ بالناس .. في برج التخطيط العمراني ما يبين مخرج الطواريء ومالين ساحة وسطية بين المكاتب عراقيل بارتشن ومكاتب إضافية تسد الطريق وتخفي حتى اللوحة اللي توضح المخرج .. للمدارس نسوا يعملونها وبعد جريق فيلاجيو تداركوا الوضع وعملوها خارجية درج حديد ضيق وباب ألمنيوم مقفول ومفتاحه في مكتب المشرف والمفروض يكون فتحه بضربة سريعة على قطعة معدن والواحد يركض يضربها وينفتح الباب وينزلون وراه وبنفس الوقت يصيح الإنذار لو ما صاح أصلاً في بدايات الحريق

مشهد حبيته وأعجبني هو خروج ودخول الملاعب عبر رامب حلزوني كبير يسهل حتى دخول أصحاب الكرسي المتحرك وخروجهم .. أتمنى أشوف نفس الشيء في مستشفياتنا خصوصاً مدينة حمد الطبية

https://i.imgur.com/UXUGbUa.png

موضوع هبوط الخرسانة في اختبار الهبوط وقت ما قبل صبها موضوع مهم وعلى حسب نوع الخرسانة والمفروض معمل الرديمكس يحدد مقدار الهبوط المسموح لأن تدخل فيه عوامل كثيرة .. منها حجم الكنكري وهذا كلما كبر تصير انسدادات وتكتلات للخرسانة في المناطق اللي الحديد فيها متقارب من بعض فلا تصير تغطية لمحيط الحديد ولا حتى تمر الخرسانة لتحت أو للداخل ويستوي تعشيش

عندنا ألحين الخرسانة ذاتية الدمك وعالية الهبوط هذي غير ولها إختبار ثاني والمفروض حتى ما تحتاج هزاز ضربات بسيطة على الخشب من الخارج .. كل هذي يحددها المعمل بناءً على قوة انضغاط الخرسانة المطلوبة من الإستشاري والمناسبة للصب في العنصر الإنشائي المحدد

من أيام مهندس انشائي مشرف معانا في قروب الوتس أب يتكلم عن الهبوط من 10 الى 15 سم من 100 الى 150 مم وهنا محدد في أماكن معينة وأشوف التحديد هذا خاطيء وخاطيء ليش؟ لأنه ما يضمن لنا مع هبوط 20 سم مثلاً في الخرسانة التقليدية بدون مميعات واضافات تسمح بهذا الهبوط تعتبر فاشلة فشل ذريع حتى 15 سم تعتبر فاشلة تحت 10 مقبولة .. يعني كلام المهندس المشرف خاطيء وكذلك ما جاء في المحددات هنا خطأ للأسباب اللي ذكرتها

https://i.imgur.com/RdXeEha.png

هذي دعوة للجميع للإنضمام معانا في قروب الوتس أب نناقش فيها مواضيع كثيرة ونحط فيديوهات قصيرة ونقاش هندسي مستمر لأي مشكلة أو سؤال وانا واحد من الفريق معاي ما شاء الله شباب أفضل بمراحل في مجالات عدة تكييف وإنارة ومقاولات وخبرات حالية وعملية ومعرفة بالسوق

حياكم وصلنا 464 عضو

https://chat.whatsapp.com/CgdCfGMCFIyK5bpEQAbJOc

هذا يحصل في المواقع اللي فيها فورمن جيد أو لكل شغلة فورمن ودوم الفورمن محتك بالعمال وكذلك عنده خبرة هندسية ويفهم لغة المهندس ولغة العمال فيكون حلقة وصل .. لكن المشكلة في الغالب تحصل من الملاك أو من الشركات الضعيفة اللي ما تهتم بوجود فورمن

https://i.imgur.com/gIrLGSo.png

حلول العرب تضحك .. يعني انت تحفر وطلع منسوب المياه الجوفية مرتفع شلون بتبني والمياه موجودة؟ زين بتسحب المياه بس ليش توقف لين ارتفع البنيان عن منسوب المياه؟ يعني بتخلي المياه تحت وحول اساسات وجدران المبنى وبتكمل وفي هالحالة الماي ما له أمان مهما عزلت بيحصل ثغرات يتسرب منها ويخرب كل شيء وبيرتفع للجدران بخاصية التبلل وارتفاع المياه في الأسطح الناشفة

https://i.imgur.com/uaHqyIk.png

الحل طبعاً هو عمل تصريف مياه مستمر سواء سطحي وتصريف المياه لجزء بعيد أو للخارج أو تصريف مباشر عن طريق بايبات وبعد تنشيف حول المبنى بمنظومة فرنش درينيج حتى تضمن بقاء الأساسات جافة قدر الإمكان .. مع ملاحظة المياه الجوفية متغيرة حسب المواسم وحسب حتى حركة المد والجزر وحسب تنفس الارض وإخراج الرطوبة من باطنها .. موضوعها صعب وصعب نتوقعها وعمرها ما كانت ثابتة عند حد معين والحل الجذري هو الفرنش درينيج وتكلمت عنه كثير وحطيت فيديوهات

أكيد الحديث في الموضوع ذيه طويل ومتشعب .. وتنقصنا أساساً القوانين المنظمة له .. مستحيل كل شغل صيانة بسيط بيجيب له المالك عمال ملتزمين ومقاول مختص وهنا واجب الدولة في ضبط العمال وترخيصهم وضبط العقود مهما تكون بسيطة وتوثيقها وحفظها للرجوع لها بعد اضافة البنود الضرورية اللي تضمن حق المالك وحق المقاول أو العامل الفرد وكذلك تضمن حق الدولة وجودة الأعمال بمواصفات عامة مناسبة

خلوني أعطيكم مثال واقعي لي ألحين .. جاء مقاول تابع للبلدية أو كهرماء وشق الشارع جدام بيتي وكان فيه فاصل بين الرامب الخرسانة والقار عبارة عن قار حفره ومهده وتركه شغل أي كلام وصارت نقعة ماي من المطر أزاحت التربة ورجعت الأرض نزلت .. إستوت السيارات الصالون والسبورت تحك من تحت بسبب هبوط التايرين وراء وارتفاع الرامب استوى زيادة بسبب الحفرة .. أبغي أعدل شغل الحكومة مضطر أجيب بناء يردم بخلطة اسمنتية مناسبة وبعد ما يحفر زيادة شوي ويمهد الرامب مستحيل أتفق مع مقاول على شغلة بسيطة والفورمن اللي كلمته في الشغلة مقاول وبيسويها ودي وبدون اتفاق وبيقول لي كم سعره أوثق فيه في الشغلات البسيطة بس ما احتاج لحماية وقصة والله أعلم ممكن يصير حادث لا قدر الله بسبب قرب الطريق وفي هالحالة يحملون المالك المسؤولية لأنه الحلقة الأضعف


https://i.imgur.com/AVZEriK.png

هنا السؤال واضح والإجابة واضحة بس عندي تعليق على السبب الرابع وهو استعمال ناتج الحفر وفي الغالب ناتج الحفر عندنا في قطر هو الأفضل بس يحتاج غربلة وإزالة للشوائب والأحجار الكبيرة

بالنسبة للمعالجة توجد كذلك عملية الحقن أسفل الصبة وهذي سهلة حتى بمواد بسيطة وباسمنت سائل ينشف ويسد أي فجوات .. لكن السؤال احنا صبينا وخلصنا شبيعرفنا إن فيه فراغ تحت وتطبيل والخرسانات هذي سمكها من 10 الى 15 وأوقات يبالغون يسوونها 20 يستحيل تدري شتحتها وحتى لو استوت فجوات بعد تتحمل ووزنها يتوزع على باقي الدفان .. المشكلة متى تبين؟ لو الدفان تحت صج أي كلام ولا اندك صح والهبوط طال جزء كبير أثر على توازن الصبية الأرضية وهبطت

https://i.imgur.com/8tpFh1E.png

هذي صورة السؤال السابق لو الجن يمشون على هذي الأرضية ما حسوا بأي فراغات تحت أو تطبيل ليكون المؤلف يحسبه بلاط ضعيف

https://i.imgur.com/c1nb2r0.png

معليش بابدأ أناقش مواصفات البناء القطرية العامة شوي وبارجع للكتاب بعدين .. كتغيير جو بس وتحويل لشيء نوعاً ما أهم .. عندي نسخة 2014 والمفروض تكون تجددت وتحدثت كم مرة خلال هذي السنين وتنشر في موقع وزارة البلدية للكل

بابدأ بالمقدمة ولفتت نظري بعض الكلمات كخطوط استرشادية .. المفروض استخدام كلمات أقوى توصل المعنى بأنه واجب الإلتزام بها من جميع من يبني في قطر

https://i.imgur.com/7Qqf3a3.png

في الجملة الثانية كلمة supersedes كلمة قوية تعني تعتمد هذه المواصفات وتلغى السابقة أو لها القوة الطاغية .. بس كلمات مثل requests وهي مهذبة تعني نطلب .. إنت كهيئة منظمة ما تطلب تحدد شروط يجب الإلتزام بها وتعتبر سارية سريان القانون وكلمة technical guidance تعني ارشاد تقني وايد يقولون عارفين ونسوي هذي الطريقة من عمر طويل وأوقات تكون خاطئة أو تتسبب في مشاكل مستقبلية والكود والنظم تحدد مجال ملزم لا يجب النزول عنه

هنا محددين الإصدارات السابقة وتاريخها وإن هذا الإصدار هو الأخير واللي يلغي كل ما سبق

https://i.imgur.com/CF3Dq4r.png

أشوف المفروض موقع الكتروني وفيه تحديث دائم بناءً على ملاحظات الفريق المختص ممكن يكون يومي ومتاح للكل لأنه قانون والقانون ينشر للعلم وللعمل به

الكتاب ضخم 4000 صفحة ++ وفيه أمور كثيرة باخليها ما اشوفها مهمة بس مهم أوضح بعضها مثل تنظيم اللجنة ومهندسيها وأسماؤهم وهذي كذلك تعدل الكترونياً حسب التقاعد والإستقالات أو النقل .. والله أعلم اللجنة كانت تابعة لوزارة البيئة ولا أشوف البيئة صاحبة الإختصاص مثل البلدية ممكن تفيرت هذي الأمور بس اللي في يدنا ومتاح لنا هذا الكود

هذا طلب من مستعملي الكود من المهندسين والمقاولين ردة فعلهم وتوضيح بعض النقاط والإقتراحات وهذا شيء جيد لأن مستحيل الفريق المعد لهذي القوانين يكون صحيح 100% وممكن أمور كثيرة تعدل

https://i.imgur.com/1edBITu.png

هنا شوفوا كم مرجع محددين والمراجع بعضها قبل لا اتخرج وانا عارف العالم ذي تسوي تحديثات دائمة ممكن كل شهر

https://i.imgur.com/KB1soAT.png

لا والنكتة طالبين من المقاول يكون عنده كل هذي النسخ للرجوع لها في الموقع .. والحل بسيط أي تابلت أو تلفون تكون فيه المراجع والقوانين وأي مرجع يكون محدد البند ومنقول بوضوح في الكود القطري يكون كل مهندس وكل مقاول محتفظ بهذا الكود ويشتغل به دوم وبشكل الكتروني ويتحدث دوم الكتروني

https://i.imgur.com/KB1soAT.png

ولي متابعة بإذن الله

معليش بالغلط حطيت نفس الصفحتين فوق .. بدينا ندخل أكثر في الإلزام والتزام الجميع بالكود وأعتقد أسلم للي يجهز عقد بنيان لبيته يذكر إن البنيان حسب مواصفات البناء القطرية اصدار 2014 مع ما استجد من قوانين جديدة بعد هذا الإصدار من بقية الدوائر مثل الصرف الصحي وأشغال والكهرباء والماء

https://i.imgur.com/IYeNYTZ.png

هنا يتكلمون صراحة عن الإلزام وهذا يعني على المقاول وعلى المالك وعلى المهندس الالتزام بهذي الشروط وكان المفروض من البداية الثبات على هذا الشيء ما يكون فيه تناقض .. وركزوا على الفقرة رقم 1.3.1.3 شتقول وانا انقلها هنا

3 The Contractor shall have copies of all referenced standards applicable to the work being
undertaken. Translations of standards not written in English shall be provided where
necessary.

يبغون كل الكتب تكون موجودة في الموقع حسب المطلوب للشغل حتى يلتزم بها المقاول وحددوا من ضمنها الكود هذا اصدار 2014 + قوانين كثيرة في الصفحة الجاية ووبدت اللستة في الصفحة اللي فاتت

https://i.imgur.com/wueiYYd.png

هذا يعني كلامي صحيح بخصوص ضرورة لملمة كل هذي الكودات والقوانين ومضامينها في الكود اللي هم مسوينه وفي حال يبغون يحترمون حقوق الطبع يحطون النقل ويكتبون وراه انه مقتبس من الكود الفلاني والإصدار الفلاني .. بعدين لازم التحول للموقع الإلكتروني ولازم حتى يكون فيه دعم فني لأي سؤال من شخص عادي كفورمن مثلاً يسوي شغلة أو مالك والنسخ الإلكترونية تكون موجودة عند كل المكاتب والمهندسين تحت يدهم دوم ومحدثة أول بأول

فيه تعريفات بعد أشوفها تحتاج تدقيق لغوي وقانوني أكثر .. مثل مذكور في التسميات تسمية Engineer's Representative .. ومعرفينه بأنه شخص يعينه المهندس لمتابعة شغل المالك والمفروض يكون مهندس يحمل صفقة قانونية ومرخص وتابع لمكتب هندسي وبدال ممثل المهندس يفترض يكون ممثل المكتب الهندسي .. صراحة أشياء وايد تمشية حال وثغرات شكثر تحتاج ضبط صحيح .. ولو هم مثلاً راضين إن لكل مهندس عادي يكون ممثل أو مساعد المفروض يذكرون صفته بوضوح ومؤهلاته .. مثلاً فورمن مسح عنده دبلوم مساحي لتأكيد المقاسات المساحية .. أو مساعد مهندس خبرة في تركيب الطابوق عنده خبرة في البناء وطرقه وأدواته .. نفس الشيء للكهرباء ولباقي التخصصات .. هذا يوفر وظايف وشغل للتخصصات الثانوية الأبسط ويسهل ضبط الشغل والجودة

ما بدقق على كل شيء حتى ما نتوه

هنا الكلام عن شرح مبسط للمواقع الموجودة في قطر من حيث الطقس المتوقع أكيد يفترض كان يحطون الدرجات اللي مسموح فيها العمل وكذلك سرعة الرياح لأننا نتكلم عن قوانين تحمي العمال وتحمي المبنى وأموال الملاك

https://i.imgur.com/O1tbnoP.png

نفس الشيء انا ما يهمني أعرف إن الموقع بينزل عليه مطر شكثر في السنة يهمني أعرف الأمطار التاريخية في الساعة شكثر وفي اليوم وفي ال 3 أيام حتى آخذ احتياطاتي وهذي معلومات مهمة ما تسمى ب Gust wind .. هذي تعني تقريباً الرياح العاصفة وهي تكون أقوى لفترة بسيطة هنا محددة ب 3 ثواني و 38 متر في الثانية تفيد المقاول كثير في حساب السقالات وطريقة تثبيتها وايد حوادث مميتة بسبب السقالات الضعيفة .. كذلك سقوط الجدران أو أي شيء مؤقت ما تم تثبيته صح

رقم 6 في آخر الصفحة فوق مشكلة الرطوبة مع الصدأ للحديد .. وقايلينها صريحة وكم مرة مكررها الجو المناسب للبناء من شهر 10 لين 5 وهذا قد ما نقدر نستغله في بناء الهيكل الإنشائي