-
صبحكم الله بالخير
على عجالة لأن عندي اجتماع مع استشاري أشغال وزين فيه استجابة لبعض التعديلات على الطريق المار جنب بيتي ولله الحمد واستجابوا على تعديلات مدخل بيت ولدي وتمت الموافقات من البلدية بس فيه أشياء بتتعدل في الموقع كانت بسيطة وتافهة مصرين عليها البلدية .. فيه تفاصيل أشتغل عليها حتى تدخل العقد هذي ما لها علاقة بالموافقات تفاصيل تنفيذية وإن شاء الله يوافقني الإستشاري عليها .. مشكلتي الإستشاري يصحح شيء ويخرب شيء ثاني ولازم أكون دقيق معاه وايد حتى التنفيذ يكون سلس وبدون تغييرات
جدامي 5 شهور إن شاء الله كفاية للبدء في وقت اعتدال الجو
هذا تفصيل زين نفذه المهندس الإنشائي كان يبي الجسر المحيط وما فيه جسور الا في المحيط الخارجي .. كان يبيه بعرض 40 سم كامل الجدار وزين صممه حتى يكون 20 سم حتى أقدر أعزل وراه بنفس التفصيل هذا .. بس حاولت يدخل الأرضية حتى لو 5 سم ونغطيها بعد بفوم وبلاستر وصبغ وبتمسك الواح السيبوريكس وهي أصلاً بتكون مثبتة ميكانيكل حتى بدون البروز هذا بتمشي .. هذي بحاول أتفق مع المقاول عليه ما ابي جسور حرارية حق البيت كلش لبيتي ولبيت ولدي
https://i.imgur.com/70hcJOH.png
-
بديل عن السيبوريكس هو الطابوق 10 سم العادي حسب التكلفة لكن أفضل السيبوريكس والله ييسر ونتابع البناء وتفاصيله في هذا الموضوع بمقاطع أفلام وشرح وافي للفائدة العامة
-
لله الحمد كان إجتماع طيب جهزنا كتاب لأشغال لتعديل المواقف قليلاً .. صار خطأ بسيط مشوا على التصميم القديم وعملوا مدخل للبيت من جهة اليسار + مدخل ثاني من جهة اليمين .. جهة اليسار بيكون المجلس وهذا ما له باب ومدخل ومواقف داخلية صغير ومواقفه جنب الشارع ومحتاج للمواقف والتشجير بدال رصيف نازل ومدخل للسيارة
https://i.imgur.com/yBmtKUu.png
مثل الصورة إن شاء الله وسووا شارعنا كله مواقف زاوية قبل كانت موازية وباقي الفريج موازية بعض المجالس صعب نحصل موقف الا في الأراضي اللي مخصصة بالكامل حق مجلس .. يقول الإستشاري من وافقت أشغال على طلبك السابق جات طلبات وايد .. قلت صج المواقف ضرورية عيل مسوين رصيف وزراعة وبعدين تحصلون سيارات موقفة على الرصيف شالفايدة .. ألحين فيه بعد أحواض زراعية مع المواقف جدامها بشوي مكان الخط الداكن بالحبر وبعناية البلدية وشبكة ري يعني فكوني من الزراعة الخارجية
-
مجموع 18 موقف بإذن الله + المواقف الطولية جهة الشارع الثانية بطول الشارع وخلف الشارع يقال بتكون حديقة للمشي والله ييسر وما قصرت الحكومة بهذا التنظيم الطيب
-
بخصوص هذا القطاع في الحايط يحتوي على 3 مكونات هنا كتحليل عزل حراري
https://i.imgur.com/70hcJOH.png
https://www.ahfc.us/iceimages/manual...anual_ap_1.pdf
أول مكون عندنا البروز بسمك 20 سم وبمحيط المبنى كامل هذا بروز الأرضية .. هذا عزله سيء جداً نسميه R1 هذا نسبته من ارتفاع الحايط على فرض جهة البنتهاوس عندنا 3 أسقف وأرضية وحدة مجموعهم 80 سم من ارتفاع 15 سم واجهات غالبها معزولة الا هذي ال 80 سم .. نشيل سور السقف لأنه طابوق عادي بدون عزل وما فيه داعي للعزل بارتفاع 40 سم لسقف البنتهاوس وارتفاع 1.2 متر لسقف باقي البيت .. كحسبة مبسطة بيكون عندنا 80 سم من ارتفاع 9 متر تقريباً لبقية البيت أو هنا 60 سم من 9 متر لأن في الأجزاء اللي ما فيها بنتهاوس وجهة البنتهاوس بتكون 80 سم من 14.6 نسبة آر 1 فيها تعادل 0.8 ÷ 14.6 = 5.5% تقريباً هذي تأثير الآر 1 فيها يساوي تقريباً 0.5 للخرسانة + الآر الإضافية للبلاستر والصبغ حول 0.1 ومحموعهم 0.6 ومعكوسهم 1 ÷ 0.6 = 1.666 هذي اللي هي U1 value اللي هي معامل العزل لهذي الأجزاء من واجهات البيت وتعتبر كبيرة يعني العزل تعبان هنا .. لتحسين العزل لو دخلنا البروز 5 سم بس وحطينا 5 سم فوم وشبك وبلاستر ال 5 سم فوم تعطينا آر حول 10 يعني مجموع الآر بيستوي عندنا 10.6 وتطلع يو 1 اللي نبغي نحسنها 1 ÷ 10.6 = 0.094 وهذا رقم مناسب جداً لعزل هذي المنطقة بتفصيل بسيط
زين القسم اللي فيه الجسر المعزول هذا قلنا الىر فاليو للخرسانة 40 سم = 0.5 وللخرسانة سمك 20 سم = 0.25 نصها + للسيبوريكس 3.9 حق ال 25 ملم وهنا عندنا 100 يعني ضرب 4 تطلع 15.6 .. وللفوم 25 ملم 5 الآر فاليوم ولل 100 ملم تطلع 20 يستوي مجموع الآر فاليو 15.6 + 20 + 0.25 + للبلاستر داخلي وخارجي قليل هذا المهم = تقريباً 35.85 وتعطينا يو = 0.027 وهذا رقم خرافي ويمثل غالبية الحائط
يعني من فوق لو حسنا عزل البروز ال 20 سم بيكون عزله أقل من بقية الجدار بمقدار تقريباً 400% يعني الجدار يسرب طاقة حرارية 1 والجزء البارز يسرب 4 .. ولو بدون تحسين من حساباتنا قبل طلعت اليو فاليو = 1.666 هذي نفسمها على اليو لبقية الجدار 0.027 تعطينا 61.7 ضعف يعني بندخل 1 وات من الطاقة الحرارية عبر مقطع الجدار بندخل قدها 61.7 وات من الطاقة عبر الجزء البارز فقط وهذا ما يسمى بمفهوم الجسر الحراري
نجي للجزء تحت الجسر هذا مكوناته طابوق داخلي 20 سم مفرغ الآر فاليو له 1 + الفوم قلنا 20 + السيبوريكس 15.6 ومنها اليو فاليو تطلع 0.0273 قريبة من اللي معاها الجسر خلوا نقول 0.03 هذا رقم خرافي وكمعدل أكيد بيخربه الجزء اللي فيه البروز نفترض لو عالجناه لين 0.09 بيكون عندنا كمعدل حول 0.05 وبعد يبقى هذا الرقم خرافي كعزل لأن كلما نزل كلما كان افضل
ما خلصنا عندنا فتحات النوافذ وكم نسبتها من الواجهات هذي لها تأثير كبير .. كذلك طبقات عزلها ومكوناتها + الأبواب وطبيعي ما عليها ستاير أو شترات هذي بعد تنحسب ولو طلعنا بمعدل يو يساوي 0.2 إحنا محظوظين .. الدولة ما أذكر الرقم اللي طالبته ممكن 0.35 أو حوله لكن مهندسينا الفذين يصورون صورة الطابوق المعزول ويقولون العزل زين بيكون وبدون حساب المونة وانفصال العازل حول الطابوق وبدون حساب الجسور
https://i.imgur.com/drgCOhO.png
شغل تدليس وسامحوني على الإطالة بس لتوضيح مبدأ العزل بصورة أشمل
-
اليوم نتكلم عن المناور السقفية في قروب البناء والتصميم .. حتى تسمية القروب المفروض التصميم يجي قبل البناء بس أحلى الإسم بناء وتصميم
البعض كان يستصعب القبب والمناور السقفية حتى اللي تجي شبه مسطحة وهي ما تكلف ولها طرق كثيرة شرحت أحد الطرق في هذي القبة تصوير فيديو وسجلت رسالة صوتية توضح شلون تم الشغل
https://www.youtube.com/shorts/PP0G63B2XTY
شلون سوينا الفريم مخفي؟
أول شيء أسسنا للقبة جسور مقلوبة لأن السقف عندي هنا بدون جبس وبيكون نازل على مدخل الدرج .. حاولت أوازن سويت هذا السقف دبل هايت وبنفس الوقت نازل حول 80 سم عن سقف الدور الأول وجاي فوق الدرج اللي لاف من جهتين .. في الجدار بين سقف القبة وسقف الدور الأول قدرت أسوي خط طوب زجاجي بعد يدخل نور إضافي .. بعد تأسيس القبة طلعنا أسياخ بسيطة من الجسور المقلوبة يمكن 8 ملم ما اذكر بالضبط على الداير وركبنا الخشب وشبكنا مع الحديد حديد مرتفع شوي عن الفريم الخشبي بعد عمل تشكيل الدرايش أول رسم على الخشب وبعدين قصينا فوم بنفس الشكل سمك 5 سم الفوم اللاصق أول شيء كان شوي كبير زود 6 سم من كل صوب من الأطراف وداخله فوم أصغر بشوي حتى يستوي كرسي للفريم الألمنيوم يثبت فيه من جهتين على شكل حرف L وينملي سيليكون من الجهتين يكون ما يسرب وبنفس الوقت من داخل الفريم ما يبين وركبت بولي كاربونيت لسهولة حنيه مع الفريم مع جسم القبة .. آخر شيء ركبت غطاء ألمنيوم قطع تثبتت فوق الفاصل بين الفريم وخرسانة القبة لحماية السيليكون حماية مضاعفة من أشعة الشمس وتركيب الفريم كان ببراغي في خرسانة كرسي الفريم اللي على شكل ال ومن جهتين .. طلع التركيب محكم وجيد .. خلال ال 18 سنة الماضية صار تسريب بسيط انفك طرف فريم واحد وصلحناه بسيليكون وله من تصلح حول 7 سنين ما يسرب السيليكون كلف يمكن 10 ريالات بس وركبه البطل دريولي وهو اللي كشف التسريب بعد ما راح تفكيري بعيد وسويت عازل مياه اضافي للسقف هذا كلف حول 6000 ريال .. المهم القبة تكلفة بنائها ما اتفقت عليها من الأساس مع المقاول نفذناها انا والفورمن ارتجالي حتى بدون تصميم مفصل وعلى الخشب تم الرسم ودققته انا وشفت تمديد الحديد بين فتحات الدرايش وصب الخرسانة كانت ناشفة صبينا السقف وصبينا الجسور المقلوبة بعدين جات صبية القبة منفصلة وبقت فراغات في الجسور المقلوبة مثل التجويف مليناها رمل وعملنا سكريد سميك فوقها بسلوب للخارج لجهة الصرف مال المطر .. التكلفة الفعلية كانت 4000 ريال هي تكلفة النوافذ أما القبة مشت ما حسبها المقاول وتكلفة الغلطة اللي سويتها بعدين 6000 ريال بعزل السقف النازل هذا كامل وكان الخلل يحتاج سيليكون ب 10 ريال
-
اليوتيوب هذا قصير نص دقيقة ما يصير الا من موقع اليوتيوب
وهذا فيديو ثاني لتصوير النور اليوم الساعة سبع ونص وتأثيره تحت
https://www.youtube.com/watch?v=XUZzlgebVmE
-
بالنسبة للتصميم في الفيديو السابق كان مكان العمود اللي ذكرته زاوية الدرايش ومنه لطرف الباب المؤدي لحوض السباحة الداخلي كان الجدار جاي بزاوية مشطورة وواجهة غالبيتها زجاجية .. تم تعديلها أثناء البناء لزاوية 90 درجة حتى تكبر المساحة تحت والزاوية عملناها بالطابوق وعلى هذا الإرتفاع بدون عمود طرفي مددنا الجسر الأرضي فقط وجسر وسطي على شكل حرف l من العمود للعمود اللي جاي جهة التصوير في زاوية الباب يعني الزاوية هذي عمودلس والأصح بلا عمود خربنا العربية
-
هذا فيديو لشرح تفصيل التركيب للقبة وللمنور الهرمي بسكتش مبسط ( خرابيط )
https://www.youtube.com/watch?v=rXTpVh4-kF4
-
لحد يضحك على الخط وعلى التعليق والله يفكني من سين جيم بس