اقتباس:
المشاركة الأصلية كتبت بواسطة 7aayaahh1
تقدرين،، سهلة جداً بتابع معاج ستب باي ستب على طريقة تسريبات قضية خاشقجي ..
وبتكونين راضية وعد مني :o
عرض للطباعة
اقتباس:
المشاركة الأصلية كتبت بواسطة 7aayaahh1
تقدرين،، سهلة جداً بتابع معاج ستب باي ستب على طريقة تسريبات قضية خاشقجي ..
وبتكونين راضية وعد مني :o
..
حبيت الموضوع ومن زمان ودي وما ودي اشارك فيه:cool:،، يعطيكم العافيه
ودي اشارك بذاك الموضوع وانظفه من (الكركبه) الي فيه ونحط شي يسر الناظرين.!
مشاركاتك اخت مهرة لها كل الترحيب وكذلك الاخت حياة وكل الاخوات والاخوة ونرجو ان نقدم ما يفيد ويسلي ويقربنا اكثر من نفوسنا اللي اصبحت تخشى الظهور للناس على حقيقتها ...فلنعمم التجارب ونتحدث بصدق ونطلب الله الستر والعافية وهدوء البال .. ودمتم
ههههههههههه راضية بس ابعدينا عن خاشقجي رحمة الله عليهاقتباس:
المشاركة الأصلية كتبت بواسطة مهرة
033
ليس من باب الخوض في مشاكل الناس لكن للعبرة.. ولمحاولة الفهم.. ومعرفة الشخصية وأسرارها.
أحد الزملاء المتزوجين حديثاً رأى زوجته تتابع في وسائل التواصل حسابات لرجال مع حسابات غالبها نسائي.. لكن عريس بو سنة ولا زال يبي يرسم خط الحياة ماله.. لذلك زهم على الزوجة وقال لها ( تابعي حسابات حريم على كيفك لكن إياني وياك أجوفك متابعة لج واحد من هذيلا.. الخ).. قالت (تمام.. ونت مثلي تطبق على نفسك هالشيء) قال بكل ثقة (عيل أشلون! أصلاََ أنا جذي وا... باا.. تااا.. الخ).. طيب طيب... انتهت الحيثية.
يوم خوينا.. لقته الزوجه يتفرج فنانه على قولته.. عطته تنبيه! .. مرت أيام و رد رفيجنا من استراحة الربع ورقد وجواله كله مفتوح على فنانات و سفاهات و أشياء.. مالها سنع! الرجل يقول.. قعدت صبح السبت والمره لابس عبايتها واغراضها وقالت.. قم ودني لاهلي.. انت ما تستعدل ونت تنشب لنا وتسوي لنا مشاكل من اتفه شيء ومعدني متحملتك.. يالله ودني ولا اتصل في بوي!
يقول اتذكر الجوال واجوفه الا كلش خربان ولاعاد عندي شيء اقوله و بصراحة مستسلم وحاس بالذنب. قلت لها يهديج يرضيج تكفين لا تبدينها.. قالت ( انطرك في الصالة لا تكثر هرج).. قام الرجل لبس وقال.. زين بطلع اغير ايل السيارة واجيك ثلث ساعة..
يقول فعلاً ماكان عندي أي شيء الا اقول لها سمع وطاعة.. لاني في حاله صفاء وشايف نفسي وتاريخي يمر قدامي.. المهم يقول رجعت البيت.. ونويت وحنا خارجين اكسر الجوال قدامها كنوع من معاقبة النفس..
الا اني تذكرت جوالي لول نفس اللي عندي الحين وخربان في درج السيارة.. قلت بس بكسر هذا بما أنه خربان.. يقول دشيت البيت ونا ماسك الجوال الخربان بيد.. وقلت لها يالله توكلنا على الله ونا مأيس منها.. ومقتنع أني أبتديت في طريق البهدلة والاحراج من الحين.
قامت وقلت لها... مصرة.. قالت نعم.. قلت طيب ونا الع الجوال في الجدار الا هو منكسر.. قلت لا بارك الله فيك جوال وفي اليوم اللي شريتك فيه.. يقول انا خرجت وهي وراي وثنينا ساكتين...
ركبت السيارة وحركت وهي تقول لي.. ليش تكسر الجوال.. السبب مب هو انت اللي استخدمته غلط! ليش ما تقر بذنبك؟ يقول ( قلت لها يا فلانه والله انا مقر وندمان بس شسوي طلعت حرتي ف الجوال ونتي مصرة تطكبرين المشكلة و.. الخ) قالت : يعني توبة ما عاد تطلب اشياء وتسوي عكسها؟ ولا تقعد تفلسف... ( قلت لها توبة).
قالت.. اجل سامحتك والله المرة الجاية ما تدري الا انا رايحة ولا عاد اعيش معك في التناقض والتنمر حقك اللي قاعد تسويه... تعلمنا ع الصح قبلناه منك.. تقوم انت تبيح لنفسك الغلط وتحسب محد بيحاسبك.. لا يا طيب.
انتهت مشكلته و انا معجبني موقف البنت و متعجب من حركة تكسير الجوال.. اللي مشت... واللي يمكن كانت (دليل صدق التوبة في نظر الزوجه)... وآآه لو بس عرفت انه جواله القديم...
بس المهم مثلما قلنا لخوينا (استوعب الدرس والحياة ما تنبني على المحاسبة الدقيقة وعلى القيادة المطلقة مثلما احنا فاهمين.. الحياة تعاون ونتعلم فيها كل يوم شيء جديد).
034
الصديق بوعبدالله متقاعد توه من الديوان.. باع ثلاث قطع أراضي كله عشان يشتري في حينا لأن أراضي بوعبدالله جته من الديوان وفي مناطق بعيدة شوي.. عاد بوعبدالله مب محبة في الحي بقدر ماهي محبة في قربه من نسابته وأقرباءه.. تعب جداً وبني عمارة أربعة أدوار.. وذاك اليوم يقول لي والله يعلم ويشهد ( يقول: ياخي أنا بعت ثلاث قطع وشريت الأرض هذي جنبكم بمليون فقط عشان أقرب من عيال عمنا ونسايبنا والحين شف وين وصلت في العمار ومحد جا شاف ولا وقف ولا قال لي سو جذي ولا ما قصرت شغلك زين) نهائي كأن محد جا عشانهم ولاهم يحزنون.
قلت له ياخي توكل على الله كمل شغلك ون ما طاب لك اعرض للبيع منت خسران ان شاء الله.
مرة أخرى قابلت بوعبدالله في مجلسنا والا هو يقولي ترى فلان وفلان جوني العمارة عقب ما سكنت.. وكله ينتقدون ويقولون ليش سويت كذا وليش...وليش!
يقول استغربت منهم.. وفوق هذا يقولون لي رح شف عمارة فلان (واحد بعد من الجماعة)..!
قلت له بوعبدالله... انت كنت مندفع وتبي القرب من الربع.. هذيلا هم على حقيقتهم... عيونهم مفتحة ع القريب وعلى انجازاته..بشر يحبون يحبطونك ويحبون يشككونك في نفسك وفي قراراتك... الحاصل خوينا بو عبدالله لا زال ساكن وأظنهم لليوم ما زاروه غير مرة وحدة في مناسبة البيت.. مسكين بو عبدالله.. حسن الظن غلب عليه.. وحسن الظن هو الأصل لكن مع اللي يستاهله.. مع الناس اللي ما نشيل همّهم و همّ نفسياتهم.. مع البسطاء والطاهرين.. ليس مع المتربصين وأعداء النجاح.
يقع الإنسان بين ما يريد وبين ما لا يريد وربما كان هذا بسبب ما يود القلب وما لا يود العقل .. فالقلب يبقيك صغيراً مراهقاً ويعطل عمل العقل لذلك كلما أخرست القلب نضج العقل ولكن تبقى العاطفة الإيجابية في التعامل مع الأبناء والآباء والضعفاء أحياناً
035
مدرستنا كان فيها مدرس فني اسمه محمد حسن (مصري) ومدرس تربية رياضية اسمه (عوض) سوداني.. ومدرس رياضيات مصري والعربستان مغير مدير المدرسة ووكيله واثنين شباب كانوا يداومون بسيارة واحدة كاتبين على جامتها الخلفية (حسيبك للزمن). كان طبيعي ان يدرسك نفس المدرسين اللي درسوا خوالك أو عمامك قبل عشرين سنة لأن المدرسين في بعض التخصصات كانوا يطولون قبل لا يحل محلهم مواطنين.
مدرسة البنات كان فيها ثلاث مدرسات (ثنين فلسطينيات خوات هم جميلة و وداد) ومعهم وحدة معلمة سودانية ويادار ما دخلك شر.
كنا نستغرب من المدرس اذا قال لا تاكلون أكل مكشوف لا تشربون حليب مب مغلي أو لابد من غسل الفاكهة؟:unsure:
اذا بدا لك الكلام ذا غريب أو قديم جداً فلأنك درست في عاصمة أو ضواحي عاصمة فيها طبقة مثقفة وعندهم مدارسهم ومسارحهم وفعالياتهم.. بينما أنا احدثك عن قرية نائية ومجتمع زراعي مغلق وحتى اهل المدن ما يسمعون فيه.
من ميزات مدرستنا أن شيخ القبيلة كان يشيك على دفاتر تحضير المعلمين رغم انه ما يقرأ ولا يكتب الله يرحمه و بعين وحدة بعد. و الأمور ماشية لووز.
مديرنا كان معه ولد يدرس معنا لكن الولد مسكين لدرجة أن ولد عمي ورفيجه (نسيبنا لاحقاً) كانوا ياكلون فسحة ولد المدير.. مدري شمعجبهم في فسحة ولد المدير.. مغير نكبونا مع المدير.
سوالف المدرسة فيها براءة وسذاجة وجلد ع الأصووول.. أيام ما تنسى للجميع.. لكن نحن بصراحة كنا في الصعيد الجواني ولايمكن أحد يفكك من المدرس لأن أهلك والمدرسين ومعهم شيخ القبيلة ورجاله كلهم يتشاركون نفس الأساليب والغايات وما قد شفناهم مختلفين أبداً.. العجيب دفعتنا طلع منها الأطباء و المهندسين بالذات، لدرجة أن من أطباء الأطفال المتميزين وصاحب تقنية انعاش معروفه كان من دفعتنا وكذلك أحد المهندسين ورجال الأعمال بعد من دفعتنا.. ولا أدري هل يعرف من علمونا عن المستوى الذي وصل له بعض تلاميذهم.. بجهودهم بعد مشيئة الله.
مدرسة البنات كان التخرج فيها صف سادس... وعقبها ترتب شنطتها لي يجيها طير شلوى اللي مراح يبطي خصوصاً انها صارت راعية قلم.. وكذا تكون انتهت حلقة الليلة ودمتم بخير.
بوزيد سوالفك حلوة واللي يقراها يحسبك من جيل الستين ...
يمكن لانك في دولة كبيرة بالمساحة .. فالعلوم والتطور يوصل بطيء ..
واصل اخوي :) مستمتعه ..
جزاك الله خير اخت سارة.. احياناً يصلني صور قديمة على الواتسب لضيوف أو مثلهم ويسألوني.. من فلان اللي في الصورة؟ اخطي واصيب في التخمين.. لكن اللي يرسلون لي يعرفون أن اكثر هذيلاك الناس عرفتهم او تعاملنا معهم او زارونا أو زرناهم ورهاني كله على الذاكرة القديمة.. ومرحبا بك في الستينيات :yu:
036 (التعدد)
سالفة ما تنتهي.. ما كانت تخطر لي على بال حتى تطلقت احدى خواتي.. جلست أفكر انها الوحيدة اللي عارضنا بوي في زواجها لكنه أصر وقال تخالفوني قلنا اسمح لنا نخالفك هالمرّة بس.. لكن البنت حبت تتفادى خلافنا وقالت موافقة رغم انها كانت معنا با الاول.
نزين صار عندنا مطلقة.. كل شيء تحت أمرها بس نبي لهابن حلال! فاذا انا ما تقدمت لاختك او بنتك المطلقة... وانت يا فلان ما تقدمت لاختي او بنتي المطلقة! من تنتظر يتقدم؟ هذيلا الشباب! هذيلا يدورون بنات! وشلون تلومونهم إذا المطلقين صاروا يتزوجون ويعيدون التجربة مع بنات؟
لذلك التعدد مب لازم أنه نابع من عدم راحة مع أم العيال أو من زيادة بطر وتباهي! قد يكون له أسباب وجيهة ودوافع طيبة فالمفروض أنك كمسلمة ما تمانعين دامك تعرفين أن زوجك ما يبدي عنك أحد حتى لو تزوج ثلاث غيرك.. وتعالي (من العلو) فوق طبايع البشر الأنانية.. لأنك لو بنتك مطلقة ما راح تمانعين تدخل على وحدة قبلها.. الا اذا تنطرين يجيك واحد بروحه فهذا غير متوفر... والمغامرة معه أحياناً أكثر خطورة مع اللي ناجح في زواجه الأول ومحترم في طريقته.
تظل سالفة.. نطالب من الزوجات والأخوات تفهمها.. بقدر ما نطالبهم أنهم يضبون أزواجهم اذا عرفوا أنهم مب وجه تعدد ولا قد مسؤولية.. فأنا اتحدث هنا عن فعل خير داخل أسر ومجتمعات معروفه.. محد طلب منك تتبرع لمطلقات الخليج أو المغرب.. الأقربون أولى بالمعروف.. وللعلم هناك من يدعي وصلاً بليلى (مثلي) ومع ذلك لا نقدر نعدد ولا نبي زود عيال لأن اللي بين يدينا محتارين فيه... لكن هذا كله ما يمنع أنا نقول خير وندعم الخير... وندعو الى ستر خواتنا المطلقات بدل زيجات التعدد اللي مالها سنع.. فالمتزوج المفروض ما يتزوج (يتعدد) الا من مطلقة.. ولو كنت أمير عشرة انفار لحكمت بهذا الأمر ولا بنخالف كتاب الله.. بل بالعكس بنصل للغاية وللحكمة اللي أمر بها الله.. وهي عمل الخير المتعدي أوجب من الخير القاصر.
والله أعلم..
037
مات أبونا و أمنا يلست دهر ما جالها خطاب
الواحد منا يشيل أكبر حجر ويطق راس الثاني
من هو المينون يتزوج مرة ذيلا عيالها
ثم عشنا دهر لا حنا نفكر في الزواج ولا هي
لين جانا بو علي متلبس(ن) مشلح وراكب خيل :fight:
بعضنا قال ارفضوه وبعضنا سلم بالأمر الواقع
ثم من يقدر يرد الفاس الى منه وقع في الراس
واثر يدي كان مليونير تاجر واثر محد(ن) داري
وأمنا صارت وريثة مال ابوها عقب ابوها مات
واثر عمي بو علي ما صدق أرسل في علي واخوانه
كوش على البيعه وسمى البيت كله بيت بو علي:vampire:
والله يا عم أبو علي يا بعضنا أنه ميت(ن) من جوعه
يشحذ الجبريت من جاره ويدَّيَّن ريال بخوه
ما دامك عايش على مال أمنا واحنا نقول لك يا عم :waiting:
يا تنادينا نجي، ناكل معك ! يا طلّق أمنا ؟ :court:
038
(حارتنا محيرتنا)
سواء ف الليل أو النهار ؛ قلة الحركة في حينا / فريجنا يخلي الواحد يمل لكن مع السنين تعودنا لدرجة انا اذا رحنا للأماكن المزدحمة نتوتر ..هناك فيه روابط اجتماعية وحركة وهنا موت وخلا خالي و وقتك كله لك .
وكل مكان له ايجابياته وسلبياته..
https://d.top4top.net/m_1077qtyas0.mov
039
محمد عبدالحليم الطاهر.. الطالب السوداني والأجنبي الوحيد اللي درس معنا صف أول ابتدائي.. الزول الصغير هذا كان الوحيد اللي يجيب معه كافي.. والعيون عليه.. لكن الزول حريص والطلاب يطلبونه كسرة بسكوت ما يرضى.. يحاولون ما ينفع معه.. ذاك اليوم شافوا معه كافي بو جوز هند.. شكله عجيب وقرروا يفرهدونه.. فاخذوه بالقوة وفتحوا واكلوا وعبالهم اللي داخله كريمه طلع جوز هند وماعجبهم والسوداني يصيح.. ويشوفهم يطشون الكافي ويمسحون افواههم بتقزز من طعم جوز الهند.. والسوداني يصيح أكثر.. الله يخلف :pعليك يا محمد عبدالحليم والله اعلم بأي ارض انت وشنو كافيك المفضل اليوم
040
(عبدان)
هذا اسم شايب كان بقريتنا وهو رجل أعمى وأبكم ومن أسرة معروفة وحصل له العمى من فترة شبابه وحنا يالصغار ما عرفناه الا على حالته ..والغريب في قصته أن عنده قدرات عجيبه فهو يعرف الناس بمجرد لمس اياديهم ومسح رؤوسهم ولا يمكن يعدي مناسبة أو اجتماع دون أن يلتف الناس حوله لاجل يسوي لهم هذا الاختبار العجيب..فيه ناس كثير ما يعرفهم او ما يقدر يتعرف عليهم وهذيلا اسرع ناس يفكهم ..اما اذا مسك فيك وتم يقلب كف بكف ويمسك جبهتك فاعرف انك دشيت الجهاز.
يقولون لنا الكبار إنْ عبدان كان شاب سوي ما يشكي من شيئ هذا متفق عليه، لكن اسباب اعاقته ناس تقول عين جته أو من هالقبيل وناس يقولون أكله داب ومرض وتم محموم اسبوع ولا عاد شاف ولا نطق عقبها. لكن اهو كان دائماً يشير الى صبع رجله اللي اكله فيه الداب ..والعلم عند الله أنه هو سببه.
مرة في مناسبة اجتمعنا حوله ..تقدم واحد من العيال سلم عليه قال له اللي يالس حذاه هذا ولد من ؟ فمسك يد الولد وفكها ورجع جمع يدينه مثل اللي يدعي ؟ فضحك الرجال اللي حذاه (اللي سأله عن الولد)! قلنا شفيك تضحك يا عم ..قال يقول لكم هذا ولد المطوع (واشارته بيديه كنه يدعي يقصد بها مطوعكم بو ناصر)!
تقدمت أنا وصافحته مسكني ومسح راسي وفكني ،،ورجع يسوي علي عيونه مثل حركة النظارات (يحلق اصابعه)..هااه عرفني ..قال نعم : انت ولد اللي عيونه كبار ؟ بل (فضحنا) هههه
نختم سالفة عبدان الله يرحمه ..بانه كان يروح عبري مع الجماعة عند اخته في قرية محاذية لنا... فلو نسى السايق وما وقف عند مفرق القرية اللي يبيها عبدان ..يضرب على جنب السيارة ينبهه .
بعض الشباب اذا حصلوا عبدان يحاولون يتوهونه.. يمشون ببطء زيادة او يسرعون لانهم يعتقدون انه مؤقت للمشوار.. مع هذا ما يخبط على باب الموتر ويبعبع الا اذا وصل مفرق قرية اخته...سواء اسرعت او هديت ماراح تقدر تغالطه وكان يقوم قبل الاذان بدقيقتين ثلاث تقريباً ويوجه للمسيد بسكات وسبحان من نور بصيرته وهداه.
041
(الذين هم عن صلاتهم ساهون)
كنا كلنا ننام مع الوالد هو على سرير حديد ونحن كل واحد على سرير.. الحريم لهم غرف ينامون فيها الام وبناتها او البنات لحال على حسب.. لكن اللي ابي اقوله اننا نحن الاولاد ننام مع الوالد مثل بقية الجماعة والناس في قريتنا. النوم يكون بصالة كبيرة ف البيت لها بلكونه تفتح ع الحوش او الساحة بالأحرى وهذا له سبب.. وهو لسماع المنادي اللي يزهم في ليل او نهار من برع البيت.. هذي اشياء تعودنا عليها.. وعليك كولد او شاب ان تتعود على مناداة ابوك لك في الليل.. ممكن يطلب منك اي شغله أو على الاقل يقول لك سوي رجل اخوك نشبت في السرير.. ( مثال فقط).
وحنا نفطر الصباح يعلمنا الوالد أن فلان كان يسولف وهو راقد.. وفلان يضحك أو يصرخ.. وفلان ناداه ولا سمع أو ما قام.. (اي والله هذي حياتنا).
طبعاً اذا كبرت انت وصرت تناهز ال12.. 13 تحاول انك ترضى تطلعات الوالد خصوصاً.. وبسرد بعض الأمثلة (اولاً لازم تبين له انك عارف اهتمامات ابوك ومهتم بها وبالامكان تسد بمكانه لو غاب.. وبأمكانك تشغل ماطور الكهرب بو هندل(اذا كان عندكم) .. ولو تعلمت سواقه بعد ازين.. ومن الأمور المهمة أنك تعرف تتحدث وتقابل الناس وتعرف اهميتهم بالنسبة لوالدك (من المقرب ومن غيره). هناك بعد أمور ومواصفات ما نقدر نقول للولد أنه نشمي الا اذا توفرت فيه! عموماً كان سرير الوالد حديد مثلما ذكرت لكم.. واذا قام الوالد لصلاة الفجر بمجرد ما يقعد على السرير وتكون رجوله بالارض.. السرير الحديد يطلع صوت.. ( صوت السرير بس كان يقومنا).. وكل واحد يروح يتوضى.. وعلى الدرج الشرقي وعند الباب كل واحد تارك له عصا وكشاف بو حجر (بطاريات جافة).. ناخذها ونروح المسجد.. في الطريق للمسيد يتوقف الوالد مرة مرتين يشوف النجوم ويحسبون الوقت.. ثريا ولا جوزاء ولا وسم.. الخ.. كونها مهمة لنا بالذات كمزارعين. نصلي الفجر ويشهد الله ان امام المسجد مب يسأل عن الكبار.. بل ينشد عن الاولاد.. عسى فلان ماهو تعبان ماشوفه... أيام عندما اتذكرها أشعر بالفارق الفلكي بين اليوم والأمس.. بين الوالد ذاك اليوم والوالد اليوم.. وبين الابن والزوجة ذاك اليوم وهذي الأيام.. اعرف اني درست وتعلمت واعرف اني متمكن في أمور معينة واعرف جيداً تاريخ مؤسس البلاد أكثر من معرفة بعض اولاده أو احفاده لتاريخه، وتاريخ البلد عموماً وممكن نقط خيط بكل شغله؛ لكن والله وبالله كل هذي الأمور ما اعتز بها بقدر ما اعتز بكوني مزارع ابن مزارع من ذيج الديرة ولا انسى جماعتي رجالهم ونساؤهم كل ابوهم وكل الحياة اللي عشناها في ظلهم كأطفال.. حياة البساطة والشغل والثواب والعقاب والسنع الزين.
وكل اللي دفعني لكتابة هذه الحلقة مثلما تشوفون في الموضوع هو أني اليوم صرت داير على ثلاث غرف اقعدهم للصلاة ولا حياة لمن تنادي؛ والله يصلح احوالنا ويبريء ذمتنا من عيالنا، ويصلح شأن المسلمين أجمعين.
042
https://c.top4top.net/p_1083kizj70.jpg
القلب فيه هم.. و اخشى يطول الوقت ولا حد يهتم
اسم الله على قلبك من الهم اخوي بوزيد ..
الله يفرجها عليك ان شاءالله ..
وصح الله لسانك على هالابيات الجميلة ..
جزاك الله خير اخت سارة وبارك فيكم
على ضمان ولد العرباقتباس:
المشاركة الأصلية كتبت بواسطة sara jsm
هذا قلبه عامر بالايمان
مايجيه هم ولا غم
الجنه بين عينه وهو من اهلها دام قووله الحق بقلبه وواجدانه
واللهم امين احشرني معه بالجنه وسارا وبصمه وكل من قراء يارب
اخوي ولد العرب.. جعل والديك في الجنة
ظلمتني واذنبت.. استغفر
الجنة كرامة من الله.. الانبياء والصالحين احتقروا اعمالهم عن الجنة.. لكن ما اقول الا عفى الله عنا جميع.. و لو تكرمت عدل مشاركتك.. الله يسامحك ع ها الدفشه خيو :shy:
ههههههههههههه والله الخوف عيونك حارةاقتباس:
المشاركة الأصلية كتبت بواسطة ولد العرب
قول الله يثبته ويهدينا ويهديه ويحسن خاتمتنا جميع يارب ..*
043
(لو كان لك قلب)
المسافة من بيتنا بالجبيل الى الدوحة 250 كلم خط مستقيم..
المسافة بالسيارة حوالي 450 كلم.. في الصورة تحت دخلني الدليلة جوجل للهفوف.. المفروض سيده مع الساحلي..
الصورة الأخيرة ممكن الحلم الخليجي اللي كان بيربط قطر بالبحرين بجسر بحري وكان بيختصر نصف المسافة.. طبعاً.. يبقى حلم.. جميل... حلم... للي عنده قلب ينبض بالأخوة..
القياس ماخذه من المديور اللي قدام البيت الى شمال الدوحة تقريباً.. والخريطة الأخيرة سويت فيها شرطات على المكان اللي كان ممكن يربط جسر قطر بجسر البحرين.. لا احد يلوم.. احلامنا الوردية.. :/
CC معماري
https://f.top4top.net/p_10934i57z0.jpg
https://e.top4top.net/p_1093dhb6g0.jpg
ارجع سوي الخريطة لين الخور مب الدوحة ^_* اظن اقرب اذا بالجسر ..
الحمدلله ان مافي جسر وعساه مايكون ... :(
حياك يا استاذة سارة.. الخليج العربي قسمته بريطانيا ولا بيقدر يلعب فيه لا مبس ولا اي وغد.. لكن اللي يقدرون عليه هو بذر الفرقة والكراهية والتوجس.. واظنهم بيوصلون لها.. لكن ثقي محد بينصفكم الا شيئين أثنين (عملكم وانجازكم) و (اهل الضمير الحي من الخليج والمنطقة).
044
(الظلم ظلمات)
أعتب كثيراً على العم وأحمله مسؤلية اللعب اللي قاعد يسويه ولده.. كل سنة خطبة وزواج وطلاق.. لا مرة ولا مرتين ولا ثلاث.. هاي الرابعة.. ونت يا العم تدري ان ولدك ما يسوى بصلة؛ الناس ترحب فيك أنت لوجاهتك وأنت تغشهم بولدك! من المسؤول عن الزيجات الفاشلة السابقة؟ للأسف حتى هذي الرابعة الله العالم حتى متى بتحمل.. لأن الحياة تفاهم ومسؤولية وتضحية وهذي لا تتوفر في ولدك البهيم.. يا خسارة الأصايل لا قادوهم الرخوم ويا غبنتها ويجي في الأخير يعيب على المره.. ولهذا السبب عرفت العرب هذه المشكلة وأنصفت الأصايل فقالت (الخيل من خيالها).. وياليت المجتمع يتريث في هذه الأمور ولا يزوج فلان لأن أبوه فلان ومن أسرة فلان.. لأن الخلف مب مثل السلف. فتورعوا وتريثوا رحمكم الله.
045
يا محمل(ن) فوق موج البحر ينتع به
والحمدلله ما قلب(ن) بلا تعْبَه
هذا البيت من شعر النساء اللي يحيون به احتفالاتهن ف الماضي المصحوبة طبعاً بدق الدفوف. راعية البيت هي قريبتي أم صالح رحمها الله وقد قالته في جمعة حريم قبل حوالي ثلاثين سنة. الشاعرة تشبه مسير المحمل وما يلاقيه من لطم الأمواج التي تنتعه بقوه بعيشة الانسان وما يحصله في حياته من منغصات... مفردة (تَعْبَه) معناها نغصة.. وتعني رحمها الله أن حياة الناس ما تخلى من المنغصات.. والحمدلله على كل حال.
من هذه المقدمة الطويلة أحب أن الفت الانتباه الى أن الهموم والمنغصات ما يسلم منها أحد ولا يخلى منها قلب.. وعلينا أن نتقبل مرورها ونقابلها بحسن التوكل على الله والتفاؤل.. ولنا في نبينا عليه الصلاة والسلام أسوةٌ حسنه فقد كان (يفزع الى الصلاة إذا حَزَبَهُ أمر)
وهذا شأن المؤمن في السراء والضراء بين شُكر وصبر.. وما الذي يدريكم فقد تثابون على صبركم أعظم الأجور وبلا حساب وفوق ما تتوقعون وتنالون من الجنة ما لا تبلغونه بأعمالكم...
046
أمنا خديجة رضي الله عنه سعت الى الزواج من النبي صلى الله عليه وسلم عندما عرفت أمانته وخلقه العظيم.. ورغم أن الزواج حق للرجل وللمرأة الا أننا تعارفنا على أن الرجل هو من يبدأ هذا الطريق. وان زهد فيه تبقى المرأة تنتظر؟
لا...... ويقولون (اخطب لبنتك قبل ولدك)؟
هذا المثل يبقى شعاراََ يتردد بلا معنى ولا تطبيق وتبقى الفتاة تنتظر... والله ييسر ويعين ويصلح شباب المسلمين.
اللهم صل وسلم على محمد ورضي الله عن خديجة وارضاها
خطوتها هذي دليل قوة شخصيتها .. وعلى الرغم من اقتدائي بها في كل جوانب حياتي الا اني ما اتخيل اني اختار الرجل
لست بقوة شخصيتها ولا املك ثقتها
الله يسعدك اخوي مثل ما توسع خاطري كتاباتك ..وتحفزني على التفكير بعمق
جزاك الله خير اختي الفاضلة ورفع قدرك وأشكرك على الإضافة.. هذا موضوع من مواضيع اجتماعية كثيرة نحتاج فيها الى وقفة صادقة مع النفس.. لأن كبار السن ودهم يشترون أيام الشباب بالغالي والنفيس وفي نفس الوقت نشوف شبابنا لاهين ورى السفر بحجة الدراسة ويأجلون موضوع الزواج حتى يدشون بالثلاثين وهذا خطأ ومفروض يقنن ونا لو (استشاروني) ما ابتعث الا المتزوجين.
047
(أ)
اليوم خرجت من العمل وسويت لي كم شغله في أكثر من محل منها زيارة عيادة ومنها محل نظارات رغم اني ما استخدمها الا للسواقة. ناخذ في البال اني متعب جسدياََ وفيه نادي رياضي اشتركت فيه وكل يوم يطقونا باسم التدريب وحاله. المحصلة زينة الواحد يسترجع أيام بذل المجهود وتشعر فعلاََ انك يالس تخرج طاقه بعد ما كنت تظن أنك تحولت الى عنصر خامل مثل العنصر شسمه اللي في الجدول الدوري. فالتعب والمجهود وضغط العمل وتعامل الكادر الطبي الزيم معك في العيادة ومزحك مع السيكيورتي و الدعاء المتبادل بين الناس بالخير رغم عدم المعرفة.. كل هذه الأمور تحتاجها كأنسان يلحقك تعب ويلحقك تفكير و واجبات.
الله رحمنا أن فيه ناس ما يحبون الرسمية ويميلون للمزاح وفيهم ذكاء.. يستوي بيننا معرفة سطحية تكفي ليمنحك ترحيب وابتسامه اذا قابلك وهو يحصل منك على مثلها.. ليس من باب المقابله أو المكافئة بل هو اندفاع طبيعي للنفس لكي تدخل في مود هي تبيه.
047
(ب)
هناك بعض الزملاء في إدارات أخرى ما عرفناهم الا بالتحية أثناء الدخول.. أحياناََ اسمع أحدهم يسلم بصوت جهوري من خلفي.. أقول ( هذا فلان) في القسم الفلاني.. غيره يدخل بصمت يكاد رجل الأمن أن لا يرفع اليه بصره لأنه لم يشعر به. هناك من يسلم بابتسامة فيها شيءٌ من الرسمية.. وهناك الرسمي جداََ.
جميل جداََ ان اختلط بالمجتمع اختلاط اكسب منه ابتساماتهم وسلامهم ودعاءهم ونبقى في هذه الحدود لأن الناس اذا اقتربوا كثيراََ خبت فيهم حرارة اللقاء ( سأشرح هذا المعنى.. هو ذلك الشعور أو الاستقبال المختلف لزميل مقرب لك قدم من أجازة) او ( لهفتك لدخول بيتك عقب السفر).
تسللت الرسمية الينا بشكل وصلت للبيت فالزوج وعياله لا تدري أين اختفى الدفء والحاجة للحديث فقط الحديث مع الزوج واين ولت أيام لول! عجيب والله نحتاج نحن المسلمين الى إعادة ترتيب شاملة.. ولا تستغرب أن يعجبك تعامل انسان في محيط العمل وهو مملٌ الى درجة التجمد في بيته وربما المتحدث أو كاتب هذه الكلمات منهم.. عافانا الله وإياكم. اخوتي نحن المسلمون لسنا أجانب على بعضنا فاخلاصنا ومودتنا ونصحنا لبعضنا دين و قربة.. وتحريك المشاعر والتسامح ونشر المودة والاخاء والتصالح واجب يومي وأمان مجتمعي وأخلاقي واعتذر ان أطلت و الله يحفظكم ويشرح صدوركم ويرزقكم السعادة... آمين
049
https://a.top4top.net/p_11256bpv30.jpg
ولو انها قلبت خواطر لكن نهديها للجميع و عساها تصل للغايبين الحاضرين بانغ بو فيصل و مختلف جداََ ابو صالح
050
قل للحبيب أن لا يخاف.. وللصغير أن لا يجزع! فحبنا باقٍ الى الأبد بحول الله.. لأننا قمنا بحق الله في أنفسنا وفي أحبابنا وإن جَرَت علينا السنين وفرقنا النوى الذي لا مفر منه.. فلن تبرح أرواحنا متلذذة بحياتكم وصلواتكم وصدقاتكم..
لاحزن يلحقنا ونحن مسلمين طائعين.. ينتظر الأول منا الآخر في ظل عرش الرحمن وعلى نهر الكوثر وفي الجنان في رحاب الكريم المنان..
قد تنمحي صورنا ولكن ستجدوننا في صورٍ سماويةٍ نورانيةٍ هي أجمل وأبهى؟ كيف لا وقد كسانا ربنا من حلل السندس والحرير! وجوهنا مشرقةٌ لاستقبالكم ولمواصلة الحياة معكم (أحبتي)..
هذه المرة حياة بمعنى الكلمة.. لا فيها كدرٌ ولا ضجرٌ..
قال تعالى (الا إن أولياء الله لاخوف عليهم ولاهم يحزنون / الذين آمنوا وكانوا يتقون/ لهم البشرى في الحياة الدنيا وفي الآخرة لا تبديل لكلمات الله ذلك هو الفوز العظيم) سورة يونس.
051
قالت عزيزة وهي تنظر الى زوجها راشد.
أخبرني الآن وبسرعة مالذي تفكر فيه ولا تغير الموضوع.
قال لها راشد،، مهلاََ.. مالذي يدفعك لقول هذا!
فأجابته ، لأنك كثير السرحان هذه الأيام.
انت تشرد حتى وانت تنظر في وجهي!
قال راشد؛ لا مانع عندي من اخبارك لكني أخشى عليك!
قالت عزيزة بنبرة أوثق من سابقتها وأعمق وبأسلوب شعبي.
اقول لك ( لا يكون بتزوج علي؟) :anger1:
قال راشد.. استغفري يبنت الحلال.. شله تقولين جذي
قالت عزيزة (وهي في حيره)....عيل شلي يخاف الريال على مرته انها تعرفه.. مب سوالف الزواج. :confused:
قال راشد : يا عزوزتي.. انا أخاف عليك من حبي لج.. أخاف تتعالين وتشوفين نفسج لأني رجعت معج مغرم.. احس اني مريض أحياناََ.. ودي أروح اكشف. :cry:
فبادرت عزيزة بقول ( بسم الله عليك.. عليك ذكر الله.. لا تواخذني.. الحين منت بيوعان ولا نفسك تشتهي شهي. بسوي لك عصيدة بالتمر.. اللي تحبها). :ok:
فرد عليها راشد : آآه عساني معدمج يالغالية.. اللي يجي منج زين بس لا تعبين روحج.. ونتهت السالفة.
:looking::looking::looking:اقتباس:
المشاركة الأصلية كتبت بواسطة سالم الزهران
بعض القصص الخياليه جميلة وعميقة بالمعنى :funny::funny:
حتى ولد العرب انصدم المسكين :taunt:
بل بل هذا ولد العرب مغيره.. الا هو اللي شاب في التواير :yu:اقتباس:
المشاركة الأصلية كتبت بواسطة ولد العرب
عموماََ هذي كتابات ناخذ المفيد منها
واذا تبي توصل للصفاء.. اطلع شوف القمر وشف اش كاتب لك عليه :funny:..
اهلاََ بسارة جاسم.. يا أم جاسم.. وجودكم كخوات يخلينا نضبط كتاباتنا أكثر.. لكن نحن مسلمين ولا حياء في الدين.. يحتاج نخرج من مفهوم ان اللي بين الزوج وزوجته حقوق و واجبات بس.. نبغي نتجاوزها لنكون امثلة جيدة لعيالنا...ومثل ما يقولون العلم بالتعلم والحلم بالتحلم وزيدي عليها الود بالتودد ... وعلى قولتك لو السالفة خيال.. يبقى لها هدف وجيه.اقتباس:
المشاركة الأصلية كتبت بواسطة sara jsm