مراجعة التصاميم المعمارية وابداء الملاحظات عليها (محدث)

تم بحمد الله اصدار رخصة البناء من أمس والنكتة تنتهي في 8/ 11 يعني يوم الجمعة الجاي والسبب هو الحصول على الموافقات من سنة تقريباً .. مر وقت وكان المفروض نبدأ في شهر 9 أو 10 بالكثير وتعطلنا لأسباب كثيرة منها عدم مقدرة الإستشاري إتمام بقية التعديلات والمواصفات وعدم حصولنا على سعر مرضي من مقاول جيد ولا حتى تحت الجيد .. مضطرين للخطة بي واتفقنا مع شركة كضامن على الورق وشركة صغرى كمنفذ للهيكل الخرساني بقيمة 85000 وعلى دفعات صغيرة .. الحديد تجهيزه بيكون عن طريق شركة التيسير وهم مختصين تجهيز حديد وتركيبه في الموقع بمبلغ بين 90000 و 95000 غير قيمة الحديد اللي بتكون حول 360000 .. يعني الهيكل الخرساني مع الحفر ممكن يوصل 600000 شامل كل الخرسانات حتى السور وتأسيس حوض السباحة.

بعدها الخطوة الثانية بتكون عمل الطابوق وهذا إتفاق ثاني ومخطط له .. المهم في أول مرحلة نخلص شغل الهيكل الأساسي والتأسيس لكل المباني في فترة اعتدال الجو قبل نهاية شهر 3 القادم.

ميزة هذا النوع من العقود والبناء هي إننا إحنا نشتري كل شيء بجودة عالية أو حسب الرغبة فنتحكم في جودة المواد والفورمن وفريقه مجربين في بيت كبير 3000 متر مربع تم بناؤه بهذي الطريقة .. مساحة البناء بتوصل ل 1400 متر تقريباً وأسعار المقاولين للعظم عالية فوق المليون و 600 ألف وتصل ل 4.5 مليون للتشطيب وبدون مواصفات واضحة وايد في العقد لف ودوران فشفت هذي الطريقة أضمن للبناء بجودة عالية وسعر معقول

ما تم دفعه للآن 37000 للمقاول والرخصة + 46000 دفعة أولى لعقد التكييف مع البدء في تصميم التكييف بقيمة 20% من العقد كامل

الآن سنبدأ المرحلة التمهيدية وهي التسوير + غرفة الحارس + لوحة المشروع .. ثم نبدأ الحفر والحفر بيكون على دفعتين لأن الموقع بيكون مشغول هشكل

وهذا المخطط يوضح حدود الحفر والعمق بيكون للمباني من متر لين متر ونص حسب قوة التربة والوصول لأرضية صلبة .. الكتابة أكيد صغيرة وما تبين وباقي تفاصيل بس لله الحمد كلها معروفة نحتاج المساح يحطها في الموقع يحدد حدودها بقطع حديدية للبدء

https://i.imgur.com/i2V0LbM.png

موقع كبينة الحارس بيكون مكان المواقف أسفل المخطط ويسار الباب اللي بيكون 4 متر من المربع السفلي يمين .. بيتم حفر التأسيس لمكان الخطوط العريضة فقط

الله يسهل ويكمل لكم على خير ..

اقتباس:

---

المشاركة الأصلية كتبت بواسطة sara jsm

الله يسهل ويكمل لكم على خير ..

---

آمين وكل من يبني يا رب

أمس تمت زيارة ورشة لبيع قطع المواد السكراب أو المستعملة لشراء شينكو السور .. المطلوب 128 متر طولي لتسوير الموقع من ثلاث جهات والجزء الرابع مسور وجاهز لأرض ولد إخوي وفيها كهرباء وماء وغرفة بوابة .. حبة الشينكو المستعمل استعمال نظيف ب 10 ريالات وتغطي متر طولي واحد + نحتاج حديد تثبيت أعمدة وعوارض وكل هذا قابل للبيع بعد الإنتهاء منه سكراب .. الملاحظ إن المقاول يحاول قد ما يقدر يجيب كل هذي الأغراض وينفذها وياخذ كمشنات في الغالب تكون أغلى من سعرها بكثير .. يعني ممكن نحتاج 150 لوح بسعر 1500 + بعض القطع وأشخاص يركبون ما بتوصل 5000 ريال عادي المقاول يطلعها 10000 .. واللوحة تم الإتفاق عليها ب 700 ريال

أول مرة أدخل العالم الخفي مال المواد هذي .. بنحتاج طابوق بعد لتثبيت السور المؤقت وبنبدأ الحفر قبل التسوير وبنبدأ بناء غرفة مؤقتة من الطابوق والشينكو للحارس + دورة مياه مناسبة ومؤقتة للجميع وانا أفضل كبينة لكن مع ولدي مدير مشروع هو الخبير بهذي الطريقة وهو باني بيته بهذي الطريقة وبأفضل المواد وهو اقترح الغرفة الطابوقية .. حتى المقاول اللي بنى هيكل بيته هو اللي بيبني لنا الهيكل .. بتكلفة شغل يد 85000 مقسمة على دفعات هو مسؤول عن تركيب الخشب والصب وسعره معقول في الحديد بس فضلنا التيسير لأنها شركة قوية وشغلهم في ورشة ومضمون .. بنشوف وبإذن الله بنتابع ومع صور وتوضيح كل خطوة ولأول مرة بنستعمل خرسانة بلورية وعزل بالرول للأساسات والجسور الأرضية .. أول مرة بالنسبة لي .. طلبنا بعض هذي المواصفات من مقاول قال بيطلع عليكم وايد غالي كان سعره المبدئي للعظم 1.6 مليون وثاني بعد بحدود نفس السعر

عندي ولد عم بدأ مقاول على قده وكان يسألني أسئله كثيرة بعضها ساذج ويضحك وشوي شوي تطور استوى يعرف الشغلة زين ويتابع ما شاء الله عليه من فجر يومياً .. يتكلم عن الهدم وناتج الهدم كيف يستغلونه المقاولين .. هم يهدمون ب 30000 تقريباً ويطلعون 300000 من ناتج الهدم .. وهو اشتغل هذي الشغلة في بيوت وايد .. المفروض يسوون الهدم بمقابل هم يعطون الملاك مقابل لأنهم يكسبون كثير .. أبسط مثال الحديد نشتريه جديد الطن ب 4000 ريال وهم يبيعونه خردة ومقصوص ممكن يعيدون صناعته وصهره على الأقل بربع السعر وبعض البيوت فيها 100 طن حديد وبعضها وايد أقل وبعضها أكثر لو نفترض 100 بيطلع من الحديد 100000 والألمنيوم غير والنحاس غير وباقي ناتج الهدم يروح للكسارة يصنعون منه البودرة اللي يموتون عليها مقاولين بو كلش ويسوقون لها

من ضمن القصص اللي مرت علي معاه استشاري سعر له صيانة بيسمنت بناية متضرر وفيه كراكات والبيسمنت حق مواقف بسعر 2 مليون وشغل وموافقات بلدية ومن تدخل البلدية خشمها في الموضوع يعني تقارير وتصوير وزيارات وموافقات وشغلة ما تخلص والبناية مسكونة .. هو قال لي السالفة بدون صور ولا حتى شفت .. قلت له لتتورط في شغل طويل عطته رقم مهندس محترم وقلت له خله يشوف شصاير وخل عمالك يسوون شيقول لهم وبتنحل المشكلة وسواها يقول كلفته الشغلة 70000 بس

لحد ألحين الوضع ماشي وإتفقنا على الحفر بمبلغ 19000 وكنا نتفاوض على حدود ال 37000 وبيتم توزيع الناتج على منطقتين أرض ولدي الثاني اللي جنب اللي بنبنيها يفصلهم شارع وفي مساحة حددناها للدفان ناتج الحفر .. طبعاً الدفع بعدين والمسح تم وتم تحديد النقاط .. والمساح بيحضر بعدين لتحديد أماكن الأعمدة والأساسات

هذا فيديو توضيحي عملته لمناطق الحفر وراح عن بالي تحديد عمق بيت المصعد بس معروف ولازم يتنفذ والإستشاري وولدي والمقاول متابعين مقاول الهيكل الخرساني

https://youtu.be/LXV2GdZRRsw

وهذي المقاسات

https://i.imgur.com/90KMBGv.jpeg

حطيت القواعد على مكان الحفر وحددت مكان نقاط صرف المطر أو السوك أواي هم طالبين وحدة وانا أضفت ثانية أسهل لتوزيع بايبات صرف السطح عليهم

https://i.imgur.com/2zTp34g.png

وطلعت الأرض الشمالية حق ولد عمي وبنستأذنه نستعمل جزء منها لتجميع الدفان قبل نستعمله في اعادة الدفن ولازم تسور بناخذ عمق 20 متر أفضل

الحمد لله وافق ولد العم وكنت موجه بعمق 20 متر لكن اكتفوا ب 15 وأعتقد بتكون غير كافية .. الدفعة الأولى للنجار 5000 بس ما شاء الله عليه مهتم وهو اللي ركب الحديد للسور المؤقت وبدوا الحفر أول بأول دفعنا أعتقد 3000 دفعة أولى لمقاول الحفر .. ما ادري يمكن ذكر الأسعار لمصداقية أكثر وللمهتمين بالبناء وطبعاً أهم شيء السعر .. خذنا 700 طابوقة بسعر 1.8 ريال للطابوقة لعمل غرفة الحارس وتدعيم حديد السور وشامل التوصيل بس وصيت ولدي بتحري جودة الطابوق وبأنه يكون ناشف ومعمول له كيورنغ صح لفترة مناسبة

على طاري الكيورنغ اللي تعني بالعربي الإدامة وهي الرش بالماء بطريقة متواصلة بحيث ما تبقى الخرسانة مرطبة للطابوق يستحسن اسبوع وأكثر لو اسبوعين أفضل وللخرسانة اسبوعين وفوق البعض يخليها 3 أيام وهذا خطر ويضعف الخرسانة وسواء في الصيف أو الشتاء مع إن المفروض في درجات حرارة فوق 35 ما نصب نهائياً وفوق 35 المقصود بها من بداية الصب لين انتهاء 14 يوم

عندي فيديوهات وصور للعمل بس أشوف ما لها أهمية كبيرة

ولو تحبون أفتح موضوع جديد لبناء البيت ذيه عادي بس فكرت حتى ما يصير تشتيت نواصل أفضل وأي سؤال أو مراجعة مخطط ثاني تدخل ما عندي مشكلة