سامحوني على عدم الوضوح في بعض المخططات بسبب التصوير من شاشة الكمبيوتر أو بسبب التصوير من التلفون .. فيه برامج توضح التصوير من الشاشة مع التعليق بس هذي ما أعرف لها .. أمس كان عندنا إجتماع مطول فوق الساعتين ويمكن 3 مع شركة الفيتري مع مهندس ميكانيكل مختص بخدمات المياه ما شاء الله عليه فاهم ومقنع أقنعني بنظام البايبات المعلق وهي عليها ضمان 50 سنة وتعتبر الأخيرة اللي تستعمل في العالم ولا تتفاعل مع الكلور وتتحمل ضغط ل 100 بار وهو ضغط مستحيل كل اللي نحتاجه 5 ووايد قوي يكون
تكلمنا عن صرف المطر وبيكون موصل تحت الأرض لمناطق الزراعة وحدة فيها حفرة امتصاصية حسب طلب البلدية .. حاول يقنعني بتانك تجميع مياه تحت الأرض ونظام فلترة وضخ للزراعة بس المياه بتكون قليلة والقصد هو التخلص منها بعيد عن البيت .. نظام الري بيكون أوتوماتيكي موصل من غرفة الخزانات الأرضية مع فلترة للمياه الحكومية قبل الخزان ومع فصل الخزان الى 2 كما ذكرت في السابق تحت وفوق .. يعني بيكون عندنا مياه التكييف مباشرة للزراعة + مياه المطر لو حصلت مرات معدودة في السنة + شبكة الري القابلة للتحكم فيها بشكل يدوي أو الكتروني عن بعد
هذا مخطط توزيع الطبيلات اللي بتكون بعمق 6.7 متر بس اليمين ثنتين بيقل العمق ل 6.2 متر بسبب وجود الأرفف وهذي بتكون لتخزين المواد الخاصة بالسيارات وحتى بالزراعة .. منطقة الخزانات بتكون مسورة مع باب أو فتحة للدخول للصيانة ومظللة من فوق مع بقية المنطقة والطبيلة بحاول أسويها بعمودين من الطرف وحديد للواجهة جسر يحمل الشينكو فوق بدون أعمدة وسطية لسهولة الدخول والخروج مع إمكانية تركيب أبواب ترتفع فوق لو احتجنا لها .. منطقة الخزانات بتكون لها بايبات مرتفعة قرب السور لتعبئة المياه وقت الحاجة والسيارات الثلاث يسار بيكون فيه قناة تصريف لمياه الغسيل على صوب الزراعة وكذلك السيارات اليمين بيكون فيه سلوب بسيط يودي المياه بمحاذاة قاعدة الكبت لين القناة .. الكبت بيكون مبني له تحت قاعدة 10 سم وفوق يتثبت عليه ألمنيوم الرف التحتي بيكون ارتفاعه كبير لتخزين أشياء كبيرة والأرفف العلوية بتكون بإرتفاع أقل لبعض الأغراض اللي حجمها أصغر .. هذي فكرة التنظيم والتخزين أعاني منها في بيتي الحالي وضرورية لأسمدة الزراعة وأدواتها مع حتى درج أو مكانس
https://i.imgur.com/62PXcYf.png
