-
وهذا الجزء الثالث لعملية الصب وهو أهم جزء لأنه يوضح عملية بناء الحوض الزراعي وراء أو شمالي البيت وهذا نبنيه ثاني مرة بسبب إن أول مرة بعد البناء مباشرة تم الدفان حوله وأتوقع ضرب البوكلين الجدار وانهار .. ألحين جهزنا الدفان الزراعي بيتموس + رمل وبندفن النص أقل شيء وبعدين بنكمل دفان الحوش وراء برمل فقط حتى يتم تمديد البايبات وقبل ليمددون البايبات يحتاجون يبنون طابوق لضبط وزنية اللفل وكذلك ثبات البايبات .. المقاول أفغاني وخذناه عن طريق رفيجنا اسحق الفورمن اللي شغال في الموقع جاب واحد غالي الطابوقة شغل يده بس بريال و 80 درهم هذا بريال و 20 درهم ولو شفناه زين بنتعامل معاه في باقي الطابوق لاحقاً .. باقي نشتري حديد من الحراج لكل متر في الحوض الزراعي قطعتين أي قطر مب مشكلة وحسبتها نحتاج شاحنة 8 متر مكعب حق خرسانة أو سكريد مناسب لفجوات الطابوق .. طول المحيط للطابوق 44 متر ونحتاج قطعتين للمتر يعني نحتاج 92 قطعة حديد
https://www.youtube.com/watch?v=UA0CRlR5mLg
-
-
ما فيه تطور يذكر في بيت عبدالله غير متابعة رش الجسور الأرضية بالماء والناطور مجتهد ويصور ونقوم بزيارات مفاجئة نحصل الخيش رطب وهالمرة عبدالله اللي يزور انا اووف أكثر وقتي .. لكن بديت أركز على تعديل المخططات للواجهات حتى تتناسب مع التصميم الداخلي لأن الإستشاري خربط لي وايد في مقاسات الدرايش وارتفاع المناور والخطوط العرضية كلش ما لها معنى ولو بنسوي بنسوي بس على مستوى الدرايش فوقها على الأقل بتطلع حلوة تعطي اتجاه افقي وسعة للبيت
هذا فيديو أولي يوضح التعديلات
https://youtu.be/e5dETLPfhvc
-
شبه انتهيت من تعديل الواجهة اللي بنرسي عليها بإذن الله
حطيت مقترح القروفات تكون طولية من الدرايش العلوية للسقف .. طبعاً الدرايش السفلية ما تبين من الخارج .. الخط الأصفر يسار يوضح ولو كانت لكل الدرايش ممكن لأنها منتظمة فوق بعض .. الإشكالية اللي بتصير في هذي الحالة ما أقدر أحط براويز ديكورية حول الدرايش لكن ممكن أسويها خارج البراويز بعد .. البروزات الديكورية الغرض منها شيئين جمالية ووظيفية حيث بتكون فوم وبتعزل الخرسانات حول الدريشة
https://i.imgur.com/BS3AdVo.png
طبعاً شلت مقترحات الإستشاري بعمل قروفات عرضية شكثر وشلت الخرسانات فوق والقرميد
هذا تقريباً التفصيل بيكون لكل الدرايش .. الكسرة فوق بهبوط 40 سم وداخل الحائط ممكن نخليها 5 سم وممكن 10 سم وبتكون منارة انارة مخفية والدرايش مخفية محيطية .. كتبت عن تفاصيلها قبل
https://i.imgur.com/zum8uXw.png
هذا الشكل التقريبي ككل
https://i.imgur.com/dfwiRnY.png
ستضاف ديكورات نفس الشيء حول الدرايش تحت
-
عندي مشكلة هذي الدريشة وايد أحلى لو كانت طولية ويمين مكان المتر وثلاثين سم بس هنا عندي عمود وأشوف ما له داعي فوق غابة أعمدة لغرفة صغيرة خلونا نرجع لها
https://i.imgur.com/bNOFhU1.png
هذي الدريشة هنا بتطل على سطح سقف الدور الأول ولو حركتها يمين وطولية باقدر أسويها 90 سم بين العمودين .. صحيح محتاج كتف للستارة لكن ممكن تترتب هنا 90 وطولية للأرض أحلى ومطلة على الباب للبيت ومقابلة جنوب وحتى ممكن أطبق نفس الشيء للغرفة اللي تحت
https://i.imgur.com/JDL3hDu.png
تحت بيكون عندي الكبت عائق لكن ممكن أنقله فوق قرب باب الحمام جتى وظيفياً أفضل بيكون
-
بتكون تقريباً هشكل مع الديكور حولها لكن فكرت عدل بالغي القروفات بتسوي ربكة الكسرات اللي فوق في مستوى سقف الدور الأول باسويها لكن للبنتهاوس لا
https://i.imgur.com/ntESZ1a.png
شرايكم؟ رايكم يهمني بعد
-
تم بناء الحوض الزراعي في الخلف مرة ثانية وهالمرة بتتعبى الفراغات سكريد وبيتعبى داخل بالبيتموس والرمل الموجود يسار الصورة
https://i.imgur.com/moSQbqm.jpeg
هالمرة بنوه أشاوس أفغان وبينصب سكريد في الفجوات وبعدين بيتم الدفان بالرمل والبيتموس الموجود يسار فوق وتحت بيتصرف الماي الزايد في الأرض هذا لو زاد وخطتي تصريف مياه بعض التكييف عليه وكذلك تصريف مطر السقف للملحق ولملحق حوض السباحة لكن باقي المطر بيتصرف للحوض الكبير والسوك أواي
-
الكيوزنغ تونا خلصنا منه للجسور الأرضية وتحتاج عزل ونحتاج بناء طابوق بعد تأسيس حق الارضية المرتفعة بحدود 13 سم جهة المكتب والصالة المطلة على حوض الزراعة وبتكون هذي أول عتبة من عتبات الدرج
-
أشتغل على تضبيط الواجهات ومقاسات الدرايش اللي خربها رسام الإستشاري لأن لازم ناخذ عليها موافقات ثانية وتكون تنفيذية صغرت بعضها شوي في العرض
هذي واجهة الغرب جهة الجار والمناور سويتها مكان رسم الإستشاري وانتبهت إن الوسطي غير بيكون مكانه يمين شوي تقريباً بين درايش الطوب الزجاجي بس مب مهم هنا هو ثابت في مخططات الأسقف الإنشائية
https://i.imgur.com/2Swfemc.png
مناور الطوب الزجاجي كلها مرتفعة لأنها بتكون في غرف الملابس وفوق مستوى الكبت وما تنفتح إنارة فقط .. اللي تحت المنور اللي فوقه مباشرة هذا بيكون في الحمام الرئيسي وألحين جاتني فكرة أسويه مكرر باصور لكم شلون بيكون
سحبت مكونات دورة المياه بالرصاصي حتى تتضح الصورة وين أماكن الدرايش والطوب الزجاجي وجات الصفة التحتية مكان الشور ما تصير هشكل لأن بيكون اللي بارز من الحائط ولو باسوي اللي من السقف بيكون شكله غريب بايبه وايد طويل بسبب الإرتفاع وبعدين نبغي نسوي سقف زجاجي لمنطقة الشور والجاكوزي ثاني بس حق عزل البخار لأن بيكون بعد حمام بخار
https://i.imgur.com/VHnIE3T.png
الحل الثاني ننسى الشكل هذا ونسوي شوي غير مثل ذيه
https://i.imgur.com/QIumapC.png
صغرت الفتحة شوي حتى اتفادى مكان الشور ونزلتها أكثر حتى تكون قريبة من راس الواقف
https://i.imgur.com/QIumapC.png
-
تقريباً بيكون هذا الشكل من الخارج وما ننسى عندي تغطية بسقف بولي كاربونيت من اليسار وراء دريشة المطبخ لين يمين وراء بداية الرامب قليل وفي هالأماكن بتكون فيه بيبان .. يعني بيكون خط التغطية حول 5 متر من الأرض ونازل بسلوب جهة الملحق
https://i.imgur.com/CezGOnr.png
