المشاركة الأصلية كتبت بواسطة معماري قطري
الله يعافيك ويبارك فيك
أوقات كثيرة تحتد على النماذج المجربة والمعتادة بس بترتيبات خاصة تسوي فرق حتى لو بسيط والمهم يناسبك ويناسب ميزانيتك .. مشكلة الغالبية تجي من إنهم يعتبرون أنفسهم مصممين لا وتحصلهم خياليين خيال صعب وبعيد عن الواقع وانا مريت في خيالات غريبة سواء في عملي الحكومي وفي مباني تخصصية لو أقول لك شكثر ربعنا ساذجين ما تتخيل .. مرة جهة طالبين مبنى تعليمي مع مرور الوقت طلبوا فيه أربع كفيتريات وحدة للطلاب ل 150 شخص ووحدة للفي آي بي طلبوها شبيهة وفي مساحة مقاربة حق الصالة الأميرية في المطار قبل وهذا طلب خاص بعد ما بدينا تصميم المشروع ولا رضى المسؤول يعطيني اياه كتابة قلت عيل انا برسله لك كتابي للتأكيد بأن حسب مقابلتنا تم كذا وكذا وباذكرها حرفياً مثل ما قلت لي قام وانسحب .. المهم بقت صالة استقبال وكفتيريا للفي اي بي ووحدة للمدرسين والعدد كان 35 وانا أعرف ان المدرسين يجيبونهم من الجامعة في سيارتين كروزر ويردونهم وحدهم محاضراتهم وبس .. يعني حول 6 مدرسين شنقزهم لين 35 .. ووحدة أخيرة للموظفين هذي ما اذكر كم .. خيال بعض الملاك واحد يبي يوفر ويبي يبني رخيص بس مبالغ وايد لين درجة جايب لي تصميم ما يركب على أرضه والتصميم حق وزير في الإمارات بس معدل عليه عن طريق استشاري تركي وسحب عليه ولا كمل معاه ولا عطاه فلوسه .. كان بيبني في ارض 60 في 60 مساحتها 3600 وبعدين طلعت له أرض 2000 متر مع هله وغير رايه بيبني هناك ويبي نفس التصميم .. قلت له تدري لازم نعدله تصميمك يطلع خارج حدود الأرض وبوايد .. وتدري كم بيكلفك؟ قال 3 ملايين قلت انسى عظم بس لو وصل 10 زين وللحين يدور بيت يشتريه وفي منطقة زينة مع إن منطقتهم الجديدة وايد زينة وهله حوله أعتقد وصل السبعين ولا بنى للحين حتى أرضه الكبيرة كان بيسوي فيها مجمع فلل للتأجير ولا بناها والموضوع له عمر
بيت ولدي الأخير اللي أحط صور بنيانه هذا هو إختاره ومناسب حق أرضه لأنها زاوية وانا خذته من نموذج عدلت عليه كثير وتدخلوا فيه ناس ثانيين من ضمنهم معمارية عراقية اقترحت بعض اللمسات ونفذناها وأحد الإخوان كذلك اقترح شوية توسيعات للمجلس الداخلي والخارجي ونفذناه وإن شاء الله خيرة .. دوم تعدد الآراء يخدم بس تاخذه من ناس فاهمين
