مراجعة التصاميم المعمارية وابداء الملاحظات عليها (محدث)

هذا سكشن واليفيشن ( مقطع أوقطاع طولي وواجهة ) خلفية جهة الحديقة الخلفية وحوض السباحة والحديقة وتدرجاتها

يبين لنا الحوض وحطيت رجال جالس فيه والماي بيكون يصب من الجزء النازل من الحائط الأمامي مثل الشلال في قناة مفتوحة من جدام تتجمع فيها الأوراق وتزال بالسلة بسهولة .. ممكن هذي القناة نسويها مجرى متعرج مفتوح ينسحب منه الماي بمضخة ويكون دائم الحركة ويتفلتر ويندفع في ظهر الجالسين في كرسي الحوض مثل الجكوزي .. يعني يكون الحوض والزراعة حوله مكان جمالي .. وعندنا مدخل غرفة الخدم والغسيل يبينون مواجههم الليوان المغلق اللي يستوي ستور مفتوح .. ولو حبينا نكنسل الدرج الحلزوني ونخلي هذا الدرج الطويل متجه لجهة باب الغرفة يعني نسوي بسطة درج واتجاهين اتجاه لمنطقة الحوض واتجاه لغرفة الخدم ممكن ونفتك من الدرج الحلزوني ونقدر نسوي مخزن ونعدل باب غرفة الغسيل لداخل الغرفة ويكون عندنا مخزن مغلق ودرج واحد ينفصل لإتجاهين .. ودريشة غرفة الخدم نعمل لها لوفر المنيوم يوجه النظر لفوق بس لايصال أشعة الشمس لها

https://i.imgur.com/FNh1M36.png

وضحت ارتفاع السور من أرضية البيسمنت 5.85 وارتفاع الأرض خارج البيسمنت بيوصل 2.45 وهو ارتفاع معقول ومب خطر وبإذن الله مسموح من قبل التخطيط

بانزل صورة بإذن الله لشلال ورسم وراه .. شفته في بيت خالي بو غانم الله يحفظه وصورته باستئذان وهنا بتكون هذي الحديقة حقيقية مب رسم وممكن الرسم وراء الحوض لو حبينا حتى يكمل الحديقة الحقيقية

ماقصرت بو عبدالله ,شرح وافي وكافي

اسمح لي ماتابعت معاك هالفترة انشغلنا بالشهر الفضيل . في أفكار جديدة اعجبتني . شفت في بيت أهلنا غرفة الميكنكال تحت الأرض. وافكر اعمل مثلها عشان توفير المساحة .

الجزء اليمين للبيسمنت قلت بخليه خدمي والجزء اليسار للعايله, مع احتمالية نقل المطبخ الخارجي لليمين ( للحين ماقررت ) انتظر التعديلات من المهندس .

يعطيك العافيه

الله يعافيج ويوفقج

وصلنا لوضع مناسب وحلو وممكن نبني عليه أما فكرة نقل المطبخ الخارجي تحت ما انصح بها ولا التخطيط يوافقون وألحين ما له تأثير كلش .. حتى لو بننزل أغراض ثقيلة من السيارة عملت حساب ممر يمشي فيه تروللي ويوصل للمطبخ من ورا البيت .. ممكن الدرج هناك يكون رامب .. في بيتنا مسوي نفس الطريقة حتى النفايات المنزلة أعزكم الله يشيلونها في ترولي

انا اشتغلت على مقترح للبيسمنت بحيث نفصل الجزئين ببابين ينفتحون على منطقة الدرج والمصعد .. فكرت لو عندنا صوت عالي تحت نعزله عن باقي البيت

غرفة الميكانيكل حلو نخليها تحت بيت الدرج لأن في أطراف الدرج تقريباً بتكون دكتات رئيسية في الحائط الخارجي ال 40 سم رايحة للحمامات على ثلاث مستويات فوق .. إخفاء بايب الصرف الخارجي يحتاج نرفع درايش الدرج التحتية شوي ونسوي قاعدة خرسانية طالعة من الجدار وفوقها تغطية باسمنت بميلان حتى ما يزعجونا الطيور وحتى يكون شكلها مقبول

بالنسبة لغرفة الميكانيكل نقدر نركب خزان ماء المقسم وهذا نطلبه خاص ويجي على شكل قطع ممكن تدخل من الباب العادي وتجمع تحت .. ولو اختربت قطعة بسهولة تستبدل هي فقط وفي الغالب يعيش عشرات السنين بدون خراب .. نحسب حساب تصريف الفلتر ونسوي قاعدة على جنب طابوق ثابت مثل الحائط ببلاستر للصخانات والفلتر وبيطلع لنا سلوب مناسب نعمل دكت لمنطقة صرف البيسمنت

حلو تشوفين فكر جديد متحرر مع فكر مضغوط حتى يخلص ويسوي اللي تبين .. في الحالتين فرق واحد شغله ينفذ وانتي المسؤولة وواحد يبدي الرأي الهندسي ويحاول ينفذ لو فيه مجال ولو ممكن هندسياً .. عاد التخطيط الله يعين عليهم وانا مستعد وناقشت كل الحلول معاهم واحتمال يكون حل نقل بيسمنت الملحق تحت البيت وعمل الخلفية حديقة عادية وذكرت إن هذا ممكن وسهل وبيطلع كذلك جميل

بحاول اسويه قريب بإذن الله وما اصدق كلام الاستشاري بأن لو رجعوا المعاملة مرتين يخالفونه لأن كثيرين يحنون على مواضيع مخالفة ويراجعون مرات ومرات .. لكن لو قوانين التخطيط تمنع حفر الحوش وعمل بيسمنت بحوش نازل كان سمعناها من زمان .. تذكرت بيت أحد أعضاء المنتدى جاء وراواني خرائط مشتغلينها شغل نظيف ونسيت اسم الاستشاري بس عامل له زاوية حوش البيسمنت نازلة ومفتوحة للسماء من سور لسور وزاوية البيست مشطوفة 3 متر محمولة على عمودين يطلع منها حوض السباحة جزء تحت البيسمنت وجزء في الحوش النازل وكان لقاؤنا سريع وملاحظاتي بسيطة ما درست موضوعه بتمعن وكان شبه منتهي وواصل للتفاصيل الدقيقة وبالصدفة طلع ولد صديق قديم لي درست معاه طب في بداية حياتي الدراسية قبل لا ارفع راية الاستسلام واحول هندسة

إحتياط لو التخطيط خرب سالفة الحوش النازل للبيسمنت ممكن نعمل مناور محدودة للدرايش بس ونعمل حوش صغير ينزل على غرفة الخادمة أو نلغيه ونسوي منور نازل مثل البقية ونخلي دخول الخادمة عن طريق باب ينفتح على لوبي درج البيسمنت وبنكون حمينا غرفتها من الانفتاح على الحوش مباشرة وبنفس الوقت سهلنا خروجها للبيت وللمطبخ .. بنفس الوقت سوينا بيسمنت تقليدي يميزه فقط المناور النازلة والدرايش اللي تنفتح عليها كاملة ومستوى أرضية الدور الأرضي اللي نازل مب مرتفع ارتفاع مزعج كل يوم نعاني منه

https://i.imgur.com/yp1JBAn.png

ابدأ من المنطقة الخلفية .. أرضية الحوش حول حوض السباحة بتكون نفس أرضية المطبخ الخارجي والليوان جدامه وعتبة وحدة أنزل من أرضية البيت .. بعدين تجينا أرضية الحديقة عتبتين أنزل ونفس مستوى الحوش الباقي .. طبعاً تصريف مياه المطر ذكرته في السابق ونفس الشيء

الحوض بيكون حول متر مرتفع عن أرضية ليوان المطبخ والماي يبين من البلكونة المفتوحة عليه من المطبخ وممكن لو حبينا نسكر منطقة حوض السباحة والليوان ببولي كاربونيت أزرق أو نستعمل للحوض أزرق يخفف وطأة الشمس وللممر أبيض محبب ونكون كذلك ظللنا بين باب المطبخ وباب المطبخ الخارجي وحتى نقدر نركب باب قزاز يعزل المنطقة بالكامل عن الخارج وتكون مكيفة لو حبينا أو شبه مكيفة للجلوس في الخارج

الدرج اليسار جنب الحوض للركوب لحافته المرتفعة والنزول فيه وبيكون بعمق 1.2 متر ومستوى واحد ومن جدام يصب الماي في القناة المفتوحة وأفضل تكون قطعة رخام منحنية تنزل الماي على شكل ستار مستقيم رقيق .. بعدين مستوى الأرض يمين نازل يمر بيب تحت عتبات الدرج الصاعد للحوض والدرج النازل لغرفة الفلتر ويصب في جدول يتجمع في الزاوية مثل خزان الاوفرفلو العادي المعروف بس بشكل مفتوح وعمق بسيط ومنه ينشفط الماي عبر بايب تحت الأحواض الزراعية لغرفة الفلتر والصخان

الباربيكيو يكون متحرك وعندنا مساحة كبيرة له ونقدر نغطيه أو ننقله للمخزن بسهولة

مقدمة البيت لو ما احتجنا لخزان الصرف الصحي نقدر نوسع الباب قليل ويكون عندنا مجال لوقوف سيارتين ورا بعض داخل ممكن زوار أو مواقف اضافية

كبرت منطقة الحوض حتى تبين الكتابة ومستويات الارض .. المنور النازل حوله جدار بارتفاع 1.3 وممكن نزله شوي والا نركب درابزين ألمنيوم يقاوم عوامل الجو ورخيص مقارنة بالحديد المشغول أو درابزين حجر أو جي ار سي أو رخام .. حل ثاني نركب شبك حديد خاص يغلق الفتحة بحيث ممكن نمشي فوقها وبنفس الوقت يدخل النور والهواء للبيسمنت

https://i.imgur.com/JoGNcyg.png

هنا اوضح زاوية الرؤية لشخص داخل المطبخ ولشخص في البلكونة حسب التصميم السابق .. وانتبهت لحاجة مهمة إننا ممكن لو وافقوا على البيسمنت وحتى غرفة الخادمات تحت المطبخ الخارجي نقدر نخلي مستوى حديقة حوض السباحة مرتفع شوي بيطلع ارتفاع غرفة الخادمات أقل من 3.3 نفس ارتفاع بيسمنت البيت .. نقدر نخليه مثلاً 2.4 ونوفر ست عتبات من الدرج النازل وبنفس الوقت نكون رفعنا الحوض يبين من فوق أقرب وأحلى .. بنفس الوقت البيسمنت مال البيت منه نشوف الحوض مرتفع حول 90 سم أو في مستوى نظر الجالس .. طبعاً بنحتاج ست عتبات للمستوى النازل من الحديقة للمستوى المرتفع يعني نطلع من بيسمنت البيت نركب ست درجات نكون قرب الحوض ونركب كم درجة بعد نكون داخله

https://i.imgur.com/XYlkwPN.png

هذا دور البنتهاوس وانا ما كملته قبل .. ألحين متماشي مع الأدوار تحته ومطابق لشروط التخطيط من حيث المساحة والارتداد الأمامي .. فيه درايش على الجار لازم لها لوفر عازل للرؤية والغرفة اليمين حركت دريشتها جهة سطح البيت وهي جهة الشرق بتكون أحلى .. وقرب غرفة الطعام باب قزاز ودريشة متصلين ممكن نسوي عريش مقابلهم أو برغولا بالعربي للجلوس خارج .. لازم نرتب المكيفات صح ونبعدها عن منطقة الجلوس

سويت مقترح لمنورين سقفيين بيكونون مرتفعين يبينون من بعيد يعطون منظر للبيت وكذلك يدخلون نور ونقدر نشوف الغيم وتغيرات الجو من داخل .. اللي قرب الطوفة قربته لأن بيكون فوق جلسة الدور الأول وممكن نسويه ملاصق للطوفة ونسويه بثلاث سلوبات جهة الطوفة ما فيه سلوب .. المنور الثاني بيكون في صالة الدبل هايت واثنينهم في الواقع فوق دبل هايت يعني النور بيوصل للدور الارضي

https://i.imgur.com/uig1Vum.png

وهذا الدور الأول ومكان المنورين يبينون واضحين والانفتاح على الدور الأرضي واضح

تغيرت الغرفة الرئيسية للأفضل عن قبل وقدرت اوفر قليل من المساحة يمكن الأهم تعديل الواجهة والتخلص من الكسرات ومن القوس المكلف أكثر

https://i.imgur.com/4XRykNP.png

دريشة الغرفة الرئيسية حلو نخليها أرضيتها مرتفعة عتبة ونخلي سقفها نازل وتبين من الخارج كأنها ملصوقة في الجدار .. وبدون قرميد .. لو نبغي قرميد بيكون بوايد أسهل من الدائري وينضبط على هذا الشكل

إشتغلت شوي على توضيح الصورة ورا مع رفع منطقة الحوض قليل .. جربت 75 سم ما عجبتني ورجعت ل 30 والسبب ابي الخروج من الباب الكبير للبيسمنت سهل لحوض السباحة وبنفس الوقت تقليل عتبات الدرج الطويل عتبتين يعطينا انفتاح أكبر على الحوض .. بكرة وقت الجو حلو وعزيمة بوفيه داخلي وخارجي بنفس الوقت بيكون المكان واسع ويكفي أعداد كبيرة سواء جاوا من المجلس الخارجي أو الداخلي أو الإثنين وقت المناسبات

https://i.imgur.com/ACGgdOc.png

في الصورة الثانية طبقت تغطية بايبات الصرف الصحي بخرسانة

هذا التوزيع الأرضي للدور الأرضي واشتغلت على تعديل المدخل سحبته 20 سم لأعلى حتى يكون عندي محور دخول 45 درجة متطابق مع الزاوية اللي يلتقون فيها الممرين .. بحيث يكون العمود كبير 50 سم من تحت وبعد ثلث الارتفاع يتدرج ل 35 من فوق أو 30 تنحسب ذي حسب الواجهة الداخلية اللي باسويها إن شاء الله كقطاع طولي .. كذلك العمود بيكون واحد بدال 2 ما اقتنعت بفكرة ال 2 وبيكون ورا النافورة وبيكون تجميلي بسبب وجود أقواس عريضة شايلة البنيان فوقه

https://i.imgur.com/Yv0j1Ma.png

انا عجبني التصميم مع إنه صعب والمساحات كبيرة .. وولدي عجبه في السابق البيت الزاوية مثل ذيه ( اللي ناقشناه قبل ) لأن أرضه على زاوية بس ذيه كبير ومكلف .. يمكن الغي البيسمنت والبنتهاوس اخليه مستقبلي واصغر شوي فيه له ويمكن اخذ التصميم الأسهل

سهواً ما وضحت المنور السقفي الثاني اللي على الصالة اليمين وباوضحة لاحقاً بإذن الله بس اللي على المدخل موضح فوق الرجال اللي داخل وفوق النافورة وعلى محور ال 45 درجة المستمر لزاوية التقاء الممرين وقصدي بالتصميم الأسهل اللي سيدة ومساحات صغيرة لأن بيكون في حدود المليونين

مبدع كالعادة ( ابا عبدالله )

اقتباس:

---

المشاركة الأصلية كتبت بواسطة سعود.

مبدع كالعادة ( ابا عبدالله )

---

مطلوب منك نقد وملاحظات اخوي سعود

اقتباس:

---

المشاركة الأصلية كتبت بواسطة معماري قطري

مطلوب منك نقد وملاحظات اخوي سعود

---

نتعلم منك طال عمرك :pilot:

اقتباس:

---

المشاركة الأصلية كتبت بواسطة سعود.

نتعلم منك طال عمرك :pilot:

---

بنفسي كل ما زدت في متابعة التصميم كلما غيرت شوي

مساحة 1500 متر وبيسمنت أكيد يبغي لها راسمال كبير .. إذا متوفر مب مشكلة كل شيء يصير بس المفروض يصير بأُصول .. دوم قبل لنقرر نبني نقرر المساحة حسب ميزانيتنا بعدين نظور النموذج ليناسب احتياجنا بعدين تجي مرحلة الالغاءات والاضافات وهذي اتوقع الكل يسويها .. وكذلك التأجيلات .. يعني مثل نأجل البنتهاوس أو نسويه بتشطيب خارجي وبدون تشطيب داخلي .. شبه جاهز بتمديداته بدون تسليك وبدون تركيب قطع صحية كل شيء مغطى ومتى ما فضينا له نقدر نكمل عليه والشغل الباقي يحتاج فنيين مهرة ما يحتاج تكسير واليات وشغل ثقيل

مثال ثاني حوض السباحة نجهز تمديداته وناخذ الموافقة عليه وسهل ينعمل أي وقت

المجلس الخارجي كذلك ممكن حتى نسويه مع مقاول ثاني أو بتشطيب غير مبالغ فيه

الحجر ممكن ننساه بالكامل بسبب رداءة مقاولي الحجر وغشهم وعدم اكمالهم أو تأخرهم في العمل

أُمور كثيرة ممكن نعدل فيها ونخفف التكلفة والعناء وطول المدة .. الخشب أفضل نتفق مع منجرة مشهورة وبتصاميم بسيطة وخشب متوفر ما نختار خشب غالي ونادر وتصميم معقد

الاساسيات لا بد منها وتكلفتها للمتر المربع من 2500 الى 3000 لكن الكماليات ما لها سقف

تصاميم الفلل اذواق
كلن له ذوقه وحاجته من الفيلا ( وراس ماله ) .

يعني الله يعينك ويعين كل من يبني وكل مقبل على البناء

اقتباس:

---

المشاركة الأصلية كتبت بواسطة سعود.

تصاميم الفلل اذواق
كلن له ذوقه وحاجته من الفيلا ( وراس ماله ) .

يعني الله يعينك ويعين كل من يبني وكل مقبل على البناء

---

شيء أكيد

بس انا دوم الاحظ قصور في تفكير المهندسين وفي شرحهم للملاك ويخلون كل شيء للحظ بعدين .. وأوقات يتفاجأ المالك بوجود عمود يستحيل إنه يتغير .. تدري على التصميم السابق كان مكان العمود غلط واشك ان اللي اشتغل على التصميم سنة هذا مهندس ويعرف أبجديات الهندسة .. رمى العمود بس في مكان وينتظر مهندس السترآكجر يعدل مكانه واحتمال يضيف عليه لأن التصميم المعماري السابق يحتاج 3 أعمدة .. انا استغليت الجدران لإخفاء الأعمدة وعملت العمود وسطي في التقاء جسرين رئيسيين يشيلون حائط وأرضية خرسانية ثقيلة

حسيت إن كل هم المكتب الهندسي يخلص التصميم المبدئي وياخذ عليه الموافقة .. بعدين يقنع المالك بأن مستحيل شيء يتغير ولازم يشتغل على أساس الموافقة الأولية وهو نوعاً ما صحيح .. عاد غالبية المكاتب تسوي شغلها وتخلص التفاصيل بدون حتى ما يشوف المالك وما له الا يستلم الموافقات النهائية والرخصة ويبدأ يبني وهنيه ينصدم وينصدم وينصدم

نصيحتي لكل من يصمم ويشاركنا تصميمه يتابع كذلك بالتصاميم النهائية .. لأني بسهولة اركب تصميم فوق تصميم واشوف المسارات وانسق بين الانشائي والمعماري واوقات تطلع بلاوي

لازم الكل يعرف إن التصميم عملية متواصلة حتى الانتهاء من البنيان وممكن الصيانة وكذلك أي توسعة أو تغيير مستقبلي والمكاتب الجيدة تعرف هذا الشيء ولذلك يستحسن ان يكون المشرف نفس المكتب المصمم

وصلني تصميم جديد لأحد الأعضاء وهو شبه منتهي من المعماري والانشائي فيه ملاحظات بسيطة فقط يعدلها الاستشاري

في هالحالة ما نقدر نقترح تحريك مبنى أو تصغير أو تكبير أو تغيير معتبر .. كل اللي نقدر نسويه بعض التحسينات وممكن إضافة سكايلايت مثلاً ولو اني افضل لو المالك يركز على العزل الحراري للجدران ويعملها 40 سم بطبقتين من الطابوق بينهم عازل فوم .. الاستشاري مقترح الطابوق اللي فيه العازل بمقاس 20 سم وهذا ضعيف ما ينفع للتمديد داخله ويتكسر ولا ينفع للعزل لأن العازل مقطوع بين كل طابوقة وطابوقة بالمونة ويدخل حرارة على مساحات كبيرة من خلال المونة كجسور حرارية .. وفوق هذا سعره غالي والعازل ما يغطي الجسور اللي تدخل منها حرارة كبيرة .. بخمس ريالات للطابوفة انا اقدر اركب طابوقة عادية بريالين وعازل اللوح اعتقد بعشرين للطابوقة تطلع التكلفة بحدود نص ريال وطابوقة ثانية 10 سم أو 15 أو سيبوريكس يطلع لنا المجموع أقل من طابوقة وحدة ب 5 ريالات

اللي يصير إنها تنحط في الغالب في المواصفات وبعدين يوضحون للمالك ضعفها ويغيرونها لطابوقة عادية .. الفرق في السعر حول 3 ريالات للطابوقة لكن التسعير اجمالي ولا ياخذ المالك الفرقية وتروح الفرقية في بطن المقاول لذلك أما نحط سيستم عزل مناسب أو من البداية نقرر نستعمل طابوق عادي ونفتك من تسعير ظالم

بانزل المخططات مثل ما هي وبعدين نناقش التعديلات الممكنة في هذي المرحلة

صبحكم الله بالخير

نبدأ بمخطط توزيع المباني .. هنا يفترض عندنا مستويات الحوش بالنسبة لمستوى الصفر وضروري مستوى الصفر يتم ربطه بأعلى نقطة في الشارع المقابل ومن ثم يعمل رامب للسيارة وارتفاع معين للحوش وسلوبات موضحة تجاه الباب .. قد تكون شروط التخطيط تعقيدية هم يرفضون عمل رامب لأنه يعتبر تعدي على أراضي الدولة بس كيف يتم التحول من أرضية مرتفعة قليلاً لأرضية واطية بدون رامب والمفروض التخطيط يتدخلون في الارتفاع بحيث ما يكون ارتفاع الحوش أكثر من 30 سم لأنه بيكون أولا مكلف وثانياً مزعج لدخول السيارات.. والمفروض يكون عند التخطيط مستوى الشارع ولا ينطلب من المقاول أو المالك السعي عند أشغال للحصول على هذا الرقم السحري وأوقات ياخذ شهور وأوقات يعطى بالغلط ويكتشف المالك إن بيته أما مرتفع وايد أو نازل

https://i.imgur.com/vOb619f.png

نلاحظ البيت بيكون مقابل شرق ويساره سكة جنوب ويمينه جار شمال ووراه غرب وجار .. المظلة كافية وشوي زود حق 4 سيارات بس يفترض يوضح إنها مظلة ويستحسن تكون كاملة تغطي من الباب الى الملحق ومن سور البيت لغرفة السايق لحائط الفيلا .. يقدر يسويها مثبتة على الحوائط بدون عمدان وبواجهات خرسانية

الأحواض الزراعية تحتاج ترتيب أفضل وحفر مع الأساسات أفضل ومع تنسيق الخدمات الثانية مثل خط الكهرباء وخط الصرف الصحي وخط كيوتل

الحديقة ورا ما فهمت تفاصيلها ولو يكون فيها حوض سباحة بتكون برفكتو .. وفي المجمل التصميم زين والله يوفق راعيه

المجلس ما ادري ليش سقفه مقسوم مع إن تفاصيله ولا تفاصيل غرفة السايق ولا الملحق مب موجودين حتى نحكم .. بعدين اتوقع تصريف الماي جهة الشارع مسموح ليش ما نخلي ماي المطر ينزل ببايب جهة الشارع؟

الله المستعان كل ما غزرت كلما طلعت ملاحظات أكثر

الدور الأرضي وانا مب متكلم عن المساحات بس مثل هذي الدكتات الثلاث الداخلية وشكل المكتب أو التخطيط حاط ملاحظة حولها ممكن تضمينها في الحايط لو سويناه 40 سم وخلينا الجسور فقط 20 سم على الجزء الداخلي من الجدار يبقى تمرير أي بايبات في ال 15 سم الباقية وقبلها يجي العازل ياخذ 5 سم بتصير الدكت جزء من الحائط الخارجي للبيت

عندنا الدرج مخطط مفصول عن بيت المصعد ما ادري ليش .. لو متصل افتكينا من الدرابزين وربطنا خرسانات الدرج بخرسانة بيت المصعد .. الصورة ما بينت واضحة وبحاول اشوف شالحل مع الستنغ حق الفايل هذا حتى توضح بي دي اف وصورة .. قبل سهلة العملية ألحين مع الاصدار الجديد للحين ما عرفت خفاياه

https://i.imgur.com/YK6rKly.png

الواجهة خطوطها وايد متقاربة وتحتاج تفاصيل .. أتوقعها حفر بسيط في البلاستر بس حتى هذا الحفر له تفاصيل فيه ينعمل سيدة بزوايا قائمة وفيه ينعمل على شكل v وفيه مزدوج بين الاثنين .. كم العرض والعمق وفي الأخير لو سويناها شوي متباعدة أفضل وللأعمدة تكون متباعدة أكثر .. ذيك تعطي عرض للبيت وللأعمدة تعطي طول

الدرايش ذي في الواجهة لو نطالع وين بتكون بيكون قريب منها كرسي سادها يعني نزولها لهالدرجة ما يفيدنا الجزء اللي ينفتح يبين بالأحمر والتحتي بس خسارة على الفاضي ولا يجمل الواجهة مثل ما نتخيل .. الوضع للمطبخ غير يختلف لأنه مطل على حديقة داخلية ونقدر نخلي الدريشة نازلة وبدون أثاث يغطيها وكذلك بدون ستاير

الكورنيش فوق حلو وموزون وما اتوقع بيكون شغله مكلف كثير .. ضروري ننتبه وقت تنفيذه بأن نستخدم حديد قليل ومغلف ونسوي تغطية خرسانية كافية حتى ما يتشلخ في المستقبل بسبب صدأ الحديد .. كذلك ضروري نسوي سلوب خفيف من فوق جهة السطح حتى الغبار المتجمع ينزل ذيك الجهة وقت المطر ولا يلطخ الواجهة

عندنا صالتين جلوس وحدة تطل على الحديقة الخلفية ووحدة أمامية ممكن نستغل وحدة مكتب أو غرفة اضافية مثل الأمامية والثانية تكون جلسة تلفزيون مطلة على الحديقة وهذي ممكن تترتب بدريشة نازلة أو باب قزاز كبير .. ما ننسى شمس الغرب مزعجة وقوية والعازل بيكون مهم والا نركب شتر لو حبينا خصوصاً مع الحائط العريض تركيبه سهل وكأنه قطعة وحدة

أتوقع لو قدرنا نقلل عرض الدرج وندمجه مع المصعد بنقدر نقلل مساحة اللوبي مال المدخل كلها حول 80 سم بس بتوسع شوي في الحوش وبترتب المساحات أو نستغلها لتوسيع المجلس لو حبينا .. المطبخ يحتاج ترتيب وكذلك مدخل المغاسل لو مفتوح على الطعام اللي مع المجلس بيكون أسهل ويبين والفتحة اللي تطل على المطبخ ينحط فيها باب للخدمة ولعزل المكانين

نخش قامد على الدور الأول والقطاع الطولي A - A ونشوف كيف مسوي الدرايش بارتفاع عالي .. ملاحظة أي ارتفاع فوق مستوى نظر الإنسان ما يفيد وزين نتقيد بالارتفاع الطبيعي للباب 2.2 متر .. هنا نشوف الباب الطبيعي في الوسط محترم وبارتفاع معقول لكن الدرايش يسار وايد مرتفعة مع العلم ارتفاع الغرفة قريب 5 متر .. اللوبي والمطبخ ممكن يكونون للارض باب ودريشة بنفس الوقت بس بعد الارتفاع يكون 2.2

https://i.imgur.com/Dhv2UMi.png

الغرف كلها تترتب مع توزيع الأثاث وكذلك الحمامات وغرف الملابس ممكن نفصلها بالكامل بحيث تكون walk in closets بدال ما هي كبتات مفتوحة الغرفة تنقفل بباب ونخزن فيها اللي نبي .. حتى بعض الغرف اللي بيشغلها واحد ممكن نخلي واجهة حمامها قزاز وهذي تعديلات داخلية سهلة ما تؤثر في التصميم حتى الدرايش ووزنها .. يمكن اللي يأثر قليل لو صغرنا الممر الداخلي من باب الصالة واتوقع التخطيط ما عندهم مشكلة بالعكس شيء مطلوب

البنتهاوس نقدر نستفيد منه أكثر بتكبير الغرفة اليمين نخليها غرفة بحمام لأن تعدلت القوانين .. وعندنا المنور تحت عجبني هذا مطل على صالة الدور الأول الصغيرة وينور المكان بس درايشه جانبية وصغيرة والمفروض تكون نفس اللي على داخل .. تبين واضحة في القطاع اي اي الفوقي .. المفروض تكون الدرايش طويلة لأنها ترتفع الحرارة في الفراغ المربع ذيه ويستوي تبادل حراري مع الخارج والهواء البارد ينزل تحت ونستفيد من النور

https://i.imgur.com/zofA5RF.png

وإن شاء الله باواصل باقتراحاتي على الاوتوكاد والله يوفق المالك وكل من يبني

السلام عليكم

قواك الله بوعبدالله

تصميم جميل و مرتب ماشالله

لكني اقترح نقل اللفت و الدرج معاه لجهة اليمين وبالتالي الحصول على مساحة ممتدة تعطي شراحة و للاستفادة من منظر الحديقة

المطبخ فيه شي غريب

مرتبط بمجلس معناه مفصول تماما عن الاجزاء الحيوية

اما اذا كان المالك بيستخدم مساحة المجلس استخدام يومي ولاهل البيت مو بس الضيوف .. بيكون الموقع تمام

والله يسهل على كل من يبني .. ويلقى ما يتمنى

هلا ومرحبا اختي سويت ومبارك عليج الشهر

مشكلة التصميم إنه خالص من الموافقات المبدئية ونقدر نعدل فيه أقل ما يمكن .. انا استغربت من كثرة الأعمدة وأحجام بعضها .. مبين لي إن ما فيه حسابات انشائية أو الزيادة ما تضر ماشيين على هذا المبدأ

في البداية حسيت إن المكتب مسوي شغل جبار بس بعد ما انتبهت لهذي الخربطة صادني احباط من مكاتب قطر

هذي صورة جزئية زين قدرت اوضحها وانا شغال من كمبيوتر ثاني ما عليه فوتو اديتور مثل الثاني ومتورط شوي وهنا يبين لنا مكان الدرج والأعمدة الضخمة حوله

https://i.imgur.com/6MU4JIV.jpg

كل مترين عمود والمتباعدين 4 متر مسويهم 40 في 40 .. صراحة اجرام والمسافات مب ذاك الزود 6 و 7 متر وحتى 8 بالراحة تستوي بدون عمود وسطي

اللفت كله زجاج وحديد حامل .. ممكن بس انا اشوف الهدف منه حمل الناس للأدوار العليا ولو الباب بس قزاز كفاية وممكن نسوي الباب والخلف جهة الدرج والحديقة ونوزن الدرايش بحيث تطل على الحديقة من مستويات سفلى فوق بيكون البيت مكشوف للخارج .. تكلفة هذي النوعية توصل ل 500 الف بالراحة

بعدين عندنا على اليسار فتحة للمجلس وراها باب سلايدنغ ما اعرف شالحكمة .. الفتحة كبيرة كذلك

هذي للدور الارضي كامل مع الواجهة بشكل أوضح عن قبل .. ممكن نقلل عرض الصالة الممر الوسطية الى 5 متر وهي ألحين 6 متر مثل ما هو واضح .. المصعد نحل مشكلته بأننا نختاره قبل ونصمم على اساسه وإختيار كله زجاجي أشوفه بيكون مكلف كثير وقليل اللي يسوونه ولا اشوفه مناسب ليكون بين الدرج .. ممكن في صالتين فوق بعض ويكون طالع بدون درج حوله

https://i.imgur.com/sP34cMu.jpg

صدقوني نص الأعمدة الموجودة في بيتي بالكامل أقل منها وبيتي فيه بنتهاوس وتصميم مقارب من ذيه بس الأعمدة الخارجية 40 في 40 لأن الحايط الخارجي سمكه 40 سم .. بيتي مساحته 1070 شوي أقل من ذيه

تضبيط الانشائي بيخلصنا من مشاكل كثيرة ولو حابين الأعمدة العريضة ممكن بس مب بهذا القرب .. يبين لي اللي صممهم مراهق هندسة واظن الدكتات اللي بارزة داخل البيت تبين واضحة وهي ثلاث .. الأعمدة حتى بعضها بتعترض الدكتات مالت التكييف خصوصاً إن البيت كله بيكون دكت سبلت

ملاحظتج في محلها اختي سويت بخصوص المطبخ .. اللي بيروح له وفيه حد في المجلس مشكلة فاتتني هذي حلها ممكن نسوي ممر خلفي ورا الدرج متصل بالصالة بعرض 1.6 متر وغالبيته زجاج حتى يطل على الحديقة وبنفس الوقت يكون مرتفع تنفتح عليه جزئية الدرج اللي جاية بالعرض وتكون رؤية الحديقة من الدرج ومن جزء البانوراما الخلفي في المصعد ممكنة .. جزء البانوراما نخليه قزاز بس بارتفاع بسيط للخصوصية والباقي خرسانة

فكرت شوي في التصميم وعلاقة الأدوار ببعض والمساحات .. كان المفروض يوصلني التصميم المبدئي قبل ليروح للتخطيط ويتوافق عليه موافقة مبدئية بس لو يحب المالك ممكن يعدل قليل وبيكون أفضل له .. عنده وقت حول 5 شهور أو 4 يكمل التصميم وشهر لتخليص المناقصة والتقرير من يبني له ويكون مع بداية تحسن الجو شهر 9 أو 10

سويت حل مقترح للوصول للمطبخ من خلال ممر وراء بيت الدرج .. عندنا ارتفاع يوصل لثلاثة متر تحت جزء الدرج اليسار أو اليمين لو نحب نغيره شوي لكن اليسار أسهل للوصول للمطبخ وأقصر مسافة .. بنفس الوقت الجزء النازل يكون غرفة للكهرباء + مخزن لمواد التنظيف

تركيزي في البداية حل مشكلة الدكتات وعزل الحائط الخارجي وصغرت البيت من الوسط قدرت اوفر 1.4 متر من عرض البيت الكلي من 20.4 الى 19 متر وهذا بينفعنا في جزء الحوش الشمالي أو الجنوبي نوسع صوب الملحق والسيارات لو حبينا .. ممكن تكون الطبيلات 8 متر وتسمح بوقوف 3 سيارات جنب بعض بس بضيق .. لو قدرنا نوفر متر زيادة وهي سهلة بتستوي المواقف بعرض 9 متر كا فية لست سيارات بسعة وراحة كبيرة

الانشائي الأعمدة بديت فيها وهذا التصميم ممكن بكل سهولة وبيكون أفضل بوايد من التصميم الارتجالي السابق وللحين ماكملت باقي أجزاء باسويها ركزت على الجهة الخلفية فقط .. الجلسة اليمنى قرب الدرج تستوي صالة تلفزيون ومطلة على الحديقة .. بنحتاج نركب ستارة سميكة لعزل الشمس والدرايش المفردة بتكون بارتفاع فوق ظهر الكرسي حول 90 سم وهي مفتوحة على الشمال عرض 1.5 متر كما هي أو 1.4 أو حتى 1.2 كفاية

المطبخ المفروض له باب ينفتح على الحديقة وبنشوف شلون دراسة مستويات الأرض يمكن نحتاج عتبة للنزول أو نخلي الحديقة الخلفية نازلة شوي بانسيابية من طرف البيت لوسط الحديقة

https://i.imgur.com/FwVCcz0.jpg

خلصت تنسيق الدور الارضي مع الأول باقي شوية تنظيف للرسمة وازالة الأشياء اللي ما لها داعي وتوضيح بعض الخطوط انتبهت لها الحين بعد ما سويت الصورة

التصميم الانشائي يبي له مهندس فاهم ومتمرس والا بيكون صعب حسب ملاحظتي على المكتب الحالي .. بالنسبة للربط بين الجسور المتصلة بأعمدة والجسور الوسطية المتصلة بجسور رئيسية العملية سهلة بس الرسام العادي ما يستوعبها ولا حتى المهندس المعماري لازم انشائي فاهم وبيمشي موضوع الأعمدة مثل ما هو موضح

https://i.imgur.com/di8qQUR.jpg

أبرز التعديلات المعمارية كانت إضافة بانتري فوق وللأسف ما عندنا مكان لصالة جلوس فوق .. وأشوف المنور فوق البانتري ممكن تصغيره أو الغاؤه .. باشوف كيف وضعه مع البنتهاوس

الأخ مسوي دريشة الحمام نازلة حتى يوزن الواجهة بأربع درايش كبار .. حتى غرفة الملابس اليمنى دريشتها نفس الشيء وحاط جدامها كبت .. رايي نخلي دريشة الحمام أقصى اليمين في الواجهة نفس عرض اللي تحتها بس مرتفعة حتى ما تكشف الحمام .. نفس الشيء اللي اقصى اليسار وبنكون وزننا الواجهة صح .. مب شرط كل الدرايش نفس الحجم .. ممكن نسوي الباقي كسرة في الحائط والا نخليها دريشة صغيرة ما تأثر

حتى تكون الصورة واضحة هذا اللي اقصده .. الدريشة أقصى اليمين فوق تابعة لحمام ومسويها نازلة 20 سم من الارض ومرتفعة 2.6 متر وكذلك اللي في اليسار .. عارف ممكن نسوي دريشة مزيفة وراها طابوق بس ما فيه داعي نكون مركزين على التناظر لهذي الدرجة .. بالعكس نكسر التناظر أفضل

https://i.imgur.com/NobqjlD.png

اقتباس:

---

المشاركة الأصلية كتبت بواسطة معماري قطري

حتى تكون الصورة واضحة هذا اللي اقصده .. الدريشة أقصى اليمين فوق تابعة لحمام ومسويها نازلة 20 سم من الارض ومرتفعة 2.6 متر وكذلك اللي في اليسار .. عارف ممكن نسوي دريشة مزيفة وراها طابوق بس ما فيه داعي نكون مركزين على التناظر لهذي الدرجة .. بالعكس نكسر التناظر أفضل

https://i.imgur.com/NobqjlD.png

---

شغل عدل مدل

تقدر مثل ماقلت دريشة مزيفه والاصليه تكون على اليمين من جهة الاتداد اليمين ونخلي باب الشور قدام والدريشة في الخلف مكان الشور

اقتباس:

---

المشاركة الأصلية كتبت بواسطة سعود.

شغل عدل مدل

تقدر مثل ماقلت دريشة مزيفه والاصليه تكون على اليمين من جهة الاتداد اليمين ونخلي باب الشور قدام والدريشة في الخلف مكان الشور

---

ممكن إخوي سعود .. لكن هذي جهة الشرق وحلاتها الدريشة تكون هنيه فعلية بس مب شرط بهذا المقاس .. أقل دريشة سعر المتر 400 ريال وهذي تقترب من 4 متر مربع لو يو بي في سي سعر الوحدة 3200 ألمنيوم عادي يمكن توصل 1600 ولو سويتها بمقاس 1.6 في 1.5 تكون 2.4 متر مربع وأحسن نوع ما بيوصل 2000 ريال للوحدة بعدين ما ننسى كمية الحرارة اللي تدخل وشكثر نحتاج ستاير .. شوف اللي على اليسار المقاس الطبيعي للدرايش بارتفاع 80 سم من أرضية الغرفة وأظن هو ناوي يسوي حجر من هشكل رسم الخطوط متباعدة 25 سم .. انا خليتها 50 سم

https://i.imgur.com/kTXsOIn.jpg