هذا الشكل بعد تصغير المدخل 1.4 متر وترتيب الدرايش لمقاس معقول ومعتاد
https://i.imgur.com/Hf5dHDM.jpg
هذا الشكل بعد تصغير المدخل 1.4 متر وترتيب الدرايش لمقاس معقول ومعتاد
https://i.imgur.com/Hf5dHDM.jpg
ما حبيت التاج اللي فوق الدرايش مشكلته مكان حق الطيور ويتجمع عليه الغبار ويلطخ والواجهة .. لو بس لاصق مثل اللي في الجوانب اوكي
الممر اللي خلف الدرج بيكون بواجهات زجاجية للنور الطبيعي وبيطل على الحديقة الخلفية وبيكون مرتفع بحيث اللي راكب الدرج للدور الأول يطل عليه وبعدين ينتهي قبل البنتهاوس .. هو ضروري للوصول حق المطبخ بسهولة ومنه للملحق الخارجياقتباس:
المشاركة الأصلية كتبت بواسطة معماري قطري
شغال على البنتهاوس صلت ل 3 غرف مع صالة .. بس يبي لي شوية وقت ويبي لي راحة .. بعد المالك شكله مقتنع بالتصميم السابق وهو طلب نصيحتي وهذي نصيحتي ذكرتها ومواصل فيها
شيء مهم اللي هو تفصيل الحائط الخارجي انا حطيته قبل بس هذا توضيح للبايبات 2 للحمام وبايبات التغذية صغار يبينون وما عندنا جسر في هذا الجزء المفروض الجسر على الطابوق المفرغ 20 سم الداخلي .. والربط بين الحائطين يكون ميكانيكل ولو ضروري نعمل جسر وسطي ممكن يكون جسر الجزء الخارجي اللي وضحته هنا مصمت واتجاهه فوق وهنا بعرض 15 سم ممكن نستخدمه طابوق أبيض سيبوريكس أو الواح سيبوريكس أو أي نوع آخر من الطابوق .. الخط الأسود هو العازل الحراري 5 سم يستحسن الأزرق ويستحسن يستخدم مغلف بكيسه البلاستيكي
فراغ الدكت عبارة عن طابوقة وحدة بس وفيه نقدر نمدد كل هذي البايبات وللماي ضروري معزولة وبعدين نحط قطعة عازل هنا موضحة 3 سم وشبك ربط بين الطايوق الجانبي ثم بلاستر .. نقدر نصب خرسانة لو حبينا وحق بيتي انا صاب خرسانة بس اشوف البلاستر سهل تكسيره للصيانة لو احتجنا
https://i.imgur.com/9slxEfP.jpg
نرجع للدور الأرضي مع الترتيب الأخير وحصلنا على مساحة 356 متر مربع قبل كانت 374 وما فرقت وايد حتى مع الممر الخلفي للمطبخ .. هذا الممر دريشته بتكون مرتفعة 80 سم من تحت ونقدر نسويها بارتفاع عالي أو نوزنها على دريشتين فوق بعض حتى تعطينا اطلالة على الحديقة من تحت ومن جلسات الدرج المرتفع حول 3 متر لحد 5 متر .. دريشة جلسة التلفزيون بتكون باب ينفتح على الحديقة لو حبينا جزئي ودوار والا منزلق وينفتح أكثر والا اوكورديون وينفتح تقريباً كله .. نفس الوضع حق باب المطبخ
https://i.imgur.com/Xepz9Io.jpg
باكبر المناطق وباركز عليها بشرح أوفى
بداية المدخل
نقدر نحرك العمودين الطايرين يمين ويسار 40 سم كل واحد حتى يكونون على خط واحد مع اللي فوقهم .. كذلك ضروري نسوي رامب حتى لو ما نحتاجه في الوقت الحالي ممكن يفيد لنقل الأغراض .. العتبات 3 كل وحدة بارتفاع 15 سم نقدر نزيدهم عتبة رابعة ونوزع 45 سم عليهم تطلع لنا كل وحدة 11.25 سم مريحة ونزيد العرض ل 35 أو 40 سم ما يسمى بالعتبات الشرفية .. وضروري ما ننسى الإضاءة للعتبات
https://i.imgur.com/2FFHFSG.jpg
المجلس .. المفروض له باب للمدخل فتحة 4.2 متر وايد عريضة ولا تعطي شوية خصوصية .. الجلسة الثانية المقابلة يمين افترضتها مكتب أو صالة دراسة وممكن حتى نحط فيها طاولة .. عندي في البيت يصادف عيالي محتلين مجلسين كل مجلس فيه مدرس وشله يدرسون من ربعهم معاهم متقابلين نفس الشيء وممر بينهم بس لكل واحد باب
https://i.imgur.com/34SfyKz.jpg
عندنا الحائط غريض نقدر نسوي فيه رواشن أو فجوات تجميلية مثل اليمين حاط تلفزيون وممكن نحط اضاءة مخفية الدرايش يسار ثنتين وفراغ وثنيتن نقدر نسوي قرب العمود روشنة توازنهم .. صعبة شوي العمود عائق وأسهل لوحة بمقاس الدريشة .. يمين مقابل طاولة الطعام نقدر أما نصغر الباب ونحركه شوي يسار ونحط كبت لمتعلقات الطعام أو نسوي روشنة كبيرة بأرفف زجاج أو نسوي كبت مبني نصه داخل تجويف الحائط ونصه برا .. أظن الكبت عمقه 40 سم أو حولها ممكن 35
الفتحة اللي تطل على المغاسل هذي تجي مقوسة وتبين مراية المغاسل وتكون كبيرة ببرواز حلو وافضل الخشبي المزخرف .. كذلك دورة المياه هي الوحيدة في الطابق الارضي وزين نسوي الفتحة الثانية أو نركب مكانها باب لإستعمال أفراد العائلة وهم تحت
نسيت نقطة لأعمدة المدخل .. المفروض تكون الزاوية المستقيمة مشطوفة بكسرة 45 درجة تنتهي بقوس أو قوس مزدوج من أعلى .. وعندنا إمكانية نعملها 20 أو 25 سم تبين من بعيد وحتى يتم صبغها بلون أبيض مثلاً وباقي البيت رملي مع اضاءة من تحت لإتجاه القوس العلوي تعطي جمال في الليل والنهار
نشوف صالة المدخل او اللي تعتبر ممر وانا سهواً ما عدلت الأرقام وهي 4.6 في 6.4 غير متضمنة ممر المصعد بس الجزء المربع .. لو انا المالك باخلي باب المدخل كله قزاز من عمود لعمود وباخليه شفاف مب عاكس حتى يبين منور طول الوقت خصوصاً مع شمس الشرق .. كسرات العمود الخارجية مب شرط نكررها قرب الباب .. عندنا يمين ويسار مساحة حلوة حق نباتات تحتاج بيئة باردة مثل العنب والكرز ( تجربتي ) والنور اللي يجيها أول الصبح بيكون بإذن الله كافي .. كذلك بالامكان نسوي تجويفات جدارية تجميلية لصور أو للعطور يمين ويسار البابين المتقابلين لو سوينا باب للمجلس .. ممكن لو حابين الانفتاح نسويه باب قزاز فريملس وباب المدخل يو بي في سي حتى يعطينا عزل صوتي وعن الغبار وحراري كذلك
https://i.imgur.com/lHf7XTJ.jpg
منطقة الدرج والمصعد .. الدرج 1.2 متر عرضه وهو كافي بالراحة لمرور شخصين متقابلين ولحمل أغراض كبيرة .. درج بيتي للسطح 90 سم ومسوين الغرفة فوق مخزن .. لكن ممكن نوفر شوي مساحة للدرج لو شفنا متطلبات مساحة المصعد الفعلية واتوقع اقل من 2.4 متر كعرض
صالة التلفزيون يمين لو حبينا نحط التلفزيون يسار الباب ممكن نعمل له تجويف مثل المجلس ونكبر فيه بأرفف للصور والشهادات وأي زينة وتكون الجلسة على شكل حرف اليو والباب للحديقة في الطرف .. وباقي الزجاج نرفعه 80 سم حتى يكون ظهر للكراسي
المكتب وصالة الدراسة تترتب بعدة طرق ممكن تكون مكتبة كبيرة ملاصقة للحائط فيها عدة الدراسة وجلسة بسيطة في الزاوية ومكتبين ظهرهم للدريشة
المطبخ الفتحة اللي له ممكن نكبرها ل 1.7 متر ونلاحظ خليت الجزء المقابل للجزيرة كله كبت كامل بيكون مقسم لثلاجة .. لأني لاحظت عدم وجود مكان للثلاجة ولا مخزن للبيت فالكبت الكبير بيكون كافي نوعا ما للتخزين .. الجزيرة مدمج معاها جلسة طعام صغيرة خصوصاً للريوق بسرعة قبل المدارس ورايي نخلي الباب المطل على الحديقة بدون ستاير نهائياً وقزاز شفاف كذلك
الديل هايت لوبي يمين تحت الدرج يصلح نسكر الجزء بباب حتى يكون غرفة كهرب + تخزين بعض مواد التنظيف للدور الارضي .. الممر هذا نقدر نسوي سقفه منحني لتصريف المطر وممكن حتى يكون قزاز نضمن دخول شمس كفاية وبيكون مكان مكيف للزراعة .. ممر الدخول بيكون يسار مع الخط المتقطع للسكشن واصيصات الزراعة يمين وحتى لو كبيرة تكفي المساحة ولو نبات متسلق يطلع حلو هنيه .. العنب ممكن نسوي له خيوط تتسلق عليها فروعه
وبانتقل للدور الأول قريباً ونتمنى يشاركنا صاحب التصميم الملاحظات على العام أفضل
نسيت اضيف صورة المطبخ في سياق الكلام اللي راح
https://i.imgur.com/2qPr16b.jpg
التحسينات عملتها بسرعة ومثل ما ناقشت قبل .. غرفة الكهرباء تحت الدرج ممكن نفتح منها في بيت المصعد من الخلف لصيانة المصعد .. والمساحة الفاضية من ورا المصعد لهذا الغرض وكذلك تفيدنا في زيادة عدد العتبات للدرج البالغ عددها 34 عتبة كل وحدة 15 سم
https://i.imgur.com/c2KmgJ0.png
فكرة الابواب اللافة افضل من السلايدنغ لأسباب العزل وتكون يو بي في سي وبابين للمطبخ للتهوئة ولفتحها في الأوقات اللي الجو فيها حلو
في وقت لاحق بنشوف التعديلات على الحوش
مبارك علينا وعليكاقتباس:
المشاركة الأصلية كتبت بواسطة معماري قطري
اشوفك مصر على تصغير الدرايش .. انا افضل الدرايش الكبيرة أشرح للبيت و أجمل في الواجهة
صحيح بتكلف أكثر لكن شي يستاهل .. ممكن بس يرفعها عشان يحافظ على الخصوصية
التصميم فعلا يخدعك انه متكامل بس مع التركيز على التفاصيل بتكتشف انه ناقص
الله يوفق المالك ويعينه
هي يا اختي مب بس كبيرة .. إرتفاع 2.6 متر كلش ما يفيدنا في شيء .. مستوى نظر الشخص في الغالب 1.6 متر واقل .. انا احب الدرايش العريضة أما مرتفعة بدون داعي بس حتى توزن الواجهة ما تنقبل .. بعضهم يفكر نسبة وتناسب يقول ارتفاع الدور قريب ال 5 متر لازم اسوي الدريشة 3 متر أو قريب منها .. باقول معليه لو شاليه وواجهة مطلة على البحر الوضع غيراقتباس:
المشاركة الأصلية كتبت بواسطة sweet qatar
بعدين حدها الأعلى 2.4 متر هو نفس ارتفاع الباب يجون على خط واحد .. واحد يبني يقول لي مجلسي مرتفع 6 متر لازم اسوي الباب 4 متر حتى يصير متناسب مع الإرتفاع .. بعدين يقول لي الباب بس كلفني 30 الف .. مجلسه أتوقع بحدود 7 متر كعرض وطول يمكن فوق العشرة بس تخيلي ارتفاع قريب من العرض لو كان 20 في 15 باقول ارتفاع 6 متر مناسب لو بناخذها نسبة وتناسب .. كذلك الباب فيه له حلول نخليه يبين مرتفع وهو عادي .. نقدر حط قزاز ثابت على فريم خشب فوقه أو فريم خشب وداخله خشب مغلق ومفصول عن الباب اللي يتحرك
وايد استوى تعالي في البنيان وزاد الله من زاد وهذي مشكلة وكل شيء مدروس بنسب معقولة يكون مناسب وزين وجيد
درايش تصميم بيتي ولا وحدة زايدة عن 2.4 كارتفاع مع إن عندي مساحات زجاجية كبيرة مطلة على الحديقة والحديقة مغلقة وداخلية ومكيفة والارتفاع عندي لكل دور 4 متر على ما اذكر
في النهاية النقاش لازم يوصلنا لنتيجة حتى لو وسط .. لو هو حاب الدرايش نازلة لأرضية الغرف ممكن يسويها مثل ما هي وللحمام يركب قزاز رملي ولغرفة الملابس بيضطر يركب ستارة وما بيقدر يحط قطعة أثاث جدام الدريشة
بنكمل بكرة بإذن الله وشاكر لج متابعتج وملاحظاتج خصوصاً ملاحظة المطبخ المعزول كانت ضربة معلم
سويت مقترحين للدور الأول مقترح بخمس غرف ومقترح ب 4 وصالة تلفزيون .. خصوصاً إن استوت عندنا 3 غرف وصالة في البنتهاوس بيكون المجموع للبيت سبع غرف أو ثمان حسب احتياج المالك .. بس اشوف الصالة ضرورية
خلونا نشوف الخمس غرف قبل
https://i.imgur.com/0zkqLQm.jpg
المقترح واضح كل غرفة بكبتاتها وبعضهم بغرف ملابس بباب وقواطع داخلية بابلس .. مثل ما يقولون المصريين وزاوتِ باب .. اللي ما عجبني فيه شيئن .. أولهم ما فيه صالة أو صالةلس .. ثانيهم الحمام الرئيسي دريشته شمال واللي تحته مطل على الشرق
المقترح الثاني ألغيت غرفة وسويت صالة تلفزيون وكبرت الحمام الرئيسي لينفتح على الشرق وحركت البانتري لزاوية داخلية وقدرت اسوي منور سقفي شبه هرمي هذا بيجي مايل على ثلاث جهات وممكن يكون مرتفع يبين من الخارج بينور الصالة وبنقدر نشوف تغيرات الجو من غيم ومطر منه .. نفس الوقت توسعة الحمام الرئيسي عطتنا اطلالة على الشرق ودريشة ثانية شمال وممكن نخلي درايش الواجهة نازلة لحدود 50 سم أو حسب ارتفاع الجكوزي بحيث تكون متصلة معاه .. هذا لو حابين الدرايش الطوال في الواجهة .. بيكون طول الدريشة 1.9 متر والباقي نسويهم نفس الشيء اليسار الأخيرة لو نبي التسريحة مكانها بيطلع لازم نسوي الجزء التحتي من الدريشة Dummy أو مزيف
https://i.imgur.com/MtOW40H.jpg
في المقترح الثاني استوت عندنا منطقة الحمام الرطبة معزولة بحاجز زجاج وممكن يكون للسقف وتكون غرفة بخار كذلك مكان الزراعة نقدر نحط غسالة خاصة للملابس اللي تحتاج عناية صاحبة البيت وسعت الدريشة مالت الصالة وممكن لو حبينا نسويها بكامل عرض الحائط 4.1 متر
وننتقل للبنتهاوس بالشكل الجديد .. زاد حول 50 متر مربع بس ترتب والأرضي والأول نقصوا قريب من هذي المساحة .. يعني ما زدت شيء في المساحة الاجمالية ويمكن وفرت شوي
المنطقة فوق الدرج بتنتهي في الدور الأول وسقفها يفترض مايل مثل ما قلت قبل أو زجاج لو نحب .. وعندنا ثلاث غرف وصالة والحمامات فوق بعض ما عدا اللي يمين بيبدأ من التسريحة في الدور الأول وينتهي تقريباً في نص الحمام اللي تحته .. ممكن تكون التمديدات لكل حمام منفصلة بالكامل بتكلفنا شوي أكثر بس بيكون سهل صيانتها بدون ما تنقطع الخدمة من حمامين فوق بعض
https://i.imgur.com/DcZxC7a.jpg
اقتباس:
المشاركة الأصلية كتبت بواسطة معماري قطري
السلام عليكم
كيف حالك بو عبدالله
أعتذر لم أقرأ الموضوع بالكامل وبرجع لقراءته بالتفصيل أن شاء الله.
لا أعرف أذا أخذت موافقة مبدئية على الحوش النازل أو لا.
شخصياً أخذت موافقة من البلدية للحوش النازل بشرط وضع حاجز لمنع الأطفال من السقوط.
حاولت التواصل معك لكني لم أستطيع.
عندي عدة أسئلة بتكون على الخاص.
وممكن تكون بعد انتهاء شهر رمضان الكريم.
بعد دراسة البيت والاتجاهات والجيران استنتجت إن افضل شيء نعكس البيت .. نخلي المجلس يسار ومدخل البيت يمين بس ضروري ننسق مع الجار أو نشوف وين بابه حتى مدخل البيت يكون بعيد عن مدخل بيت الجار .. باوضح قصدي في المشاركة القادمة .. هنا نشوف كيف البيت بعد تقليل عرضه ب 1.4 متر وعلاقته مع الحوش .. قدرت احركه يمين واستوت عندي مسافة بين الملحق والبيت صافية 2.6 متر .. وتوسعت الطبيلة شوي والارتداد من يمين 3.6 متر
https://i.imgur.com/LbfT2Nh.jpg
اللي ما حبيته في التوزيع السابق هو إن الحديقة فوق قرب جارين وكذلك مفتوحة على الشمال وعندنا سكة جهة الجنوب ما استفدنا منها .. المجلس لو كان على السكة بنكون أبعدناه شوي عن الجيران خصوصاً المواقف بتكون شوي أكثر وما نزعج الجار
هذا قصدي موضح بالرسم .. الجلسة الخارجية قرب المطبخ ممكن يكون معاها باربيكيو وتكون شبه مظللة ببرغولا خشبية وممكن عليها البولي كاربونيتد شيتس بأي لون نحب يعطي شوية ظلال ويحمي من المطر
وبالتوفيق للمالك في إختيار الأنسب له واتوقع التصميم تغير شوي بس للأفضل ويستاهل يتعنى في موافقات جديدة .. بالنسبة للإنشائي انا سهل علي أزيد عشرات الأعمدة وبتكون متناسبة مع الوضع الجديد لكن اشوفها فلوس تنحرق بدون فايدة واتمنى صاحب المكتب يطلع ويقرأ ويآمر اللي يشتغلون يسوون شيء مدروس بذمة هندسية مب مزايدة هندسية كل مترين عمود ضخم
https://i.imgur.com/fvoV9bR.jpg
يعطيك ألف عافية اخوي معماري!
بعض الاستشاريين يتعذرون بأنهم خلاص بعد الموافقة المبدئية اللي يسمونها dc1 ما يحق لهم يغيرون وهذا كذب يحاولون يمشون أُمورهم به ويخلصون وياخذون فلوسهم .. التعديل ممكن في أي مرحلة في التصميم بس ظلم للمكتب الاستشاري لو وافقنا عليه وبدينا مع المكتب في الخدمات الثانية لأن أي تعديل يتطلب تعديل كل الخدمات وهنا يستحق الاستشاري مقابل اضافي
الله يعافيك اخوي ساوث كي إنت يسرني مرورك الدائم وتعليقك الطيباقتباس:
المشاركة الأصلية كتبت بواسطة SouthK
تحديد مستوى الصفر مسؤولية الاستشاري المصمم وما ادري ليش بعضهم يقطها على المقاول أو المالك
لازم تكون جملة مكتوبة تقول 0.00 Level shall be taken as ( ) Qatari National Datum أو تكون مأخوذة في الموقع على أساس إرتفاع أعلى نقطة في الشارع المار أمام الملكية .. وتنكتب في الخارج +/- 0.00 وتنكتب ملاحظة على الجنب بأن ناخذها كأعلى نقطة في الشارع والمساح يحددها من البداية ومنها يرتفع مدخل البيت 20 أو 30 سم وبعدين تحدد نقاط مستويات الحوش بسلوب جهة الباب أو حفر صرف المطر الامتصاصية لو الأرض كبيرة وباسوي مثال على توزيع الحوش هذا بإذن الله
اللي يرجع للمخطط يلاحظ الاستشاري حاط المستويات بس بالغلط .. مثال بعد باب المجلس حاط 0.0 وهذا بيدخلنا في مشكلة مع المقاول بأن لو طلبنا يدفن بيدفعنا مبلغ اضافي بيقول ما اتفقنا وهو صادق
الله يجزاك عنا الخير ..اقتباس:
المشاركة الأصلية كتبت بواسطة معماري قطري
كذلك عندنا حاط مستوى سور السقف للملحق 3.5 .. إذا بنسوي ليوان جدام الملحق وبنرفع أرضيته خلوا نقول عتبة أنزل من أرضية البيت + رفعنا الحوش مثلاً 0.25 أو 0.3 عند الملحق حتى نضمن سلوب جيد لتصريف المياه للخارج والنقطة عند الباب تكون 0.25 والفرق في المستوى 5 سم فوق هذا المستوى بنسوي أرضية البيت 45 سم مرتفعة والملحق 30 سم بيعطينا 30 + 30 ارتفاع دفان الحوش كم بيتبقى من ال 3.5 ارتفاع الملحق؟ .. 2.9 نشيل منها 20 سم ارتفاع سور السقف وهو أقل ارتفاع ممكن بتبقى 2.7 وهذي نشيل منها سمك صبية السقف 25 سم أو 30 سم لو بالغ مهندس الانشاء بيبقى لنا ارتفاع داخلي 2.4 .. أكيد بيعورنا راسنا واحنا نفكر بعدين وبنقول للمقاول زيد الارتفاع بيقول هذي فاتورتي وما اتفقنا على كذا قبل وهو صادق
التخطيط عدل ارتفاع الملحق ل 4.5 والاستشاري الشاطر يستغل هذي الفرصة ويحط 4.5 حتى يضمن ارتفاع داخلي 3 متر وارتفاع لسور سقف الملحق مناسب يغطي أجهزة التكييف أقل شيء
حطيت مثال توزيع المستويات المقترحة باقي شوية أجزاء المفروض يرتبها الاستشاري وخليت فراغ بين القوسين لمستوى الصفر هذا يحطون فيه رقم مستوى الشارع من أشغال أو مثل ما ذكرت يعتبرون المستوى صفر أعلى نقطة في الشارع
بالنسبة لواجهة المجلس لازم تتحدد هل نبغي نسوي حديد مشغول وارتفاع الحديد وارتفاع الطوفة تحته أو نبي نخليه حائط كامل .. صغرت بانتري المجلس 30 سم في العرض 1.7 كفاية للثلاث فراغات وحطيت رامب لليوان الملحق ودرج من الصوب الثاني .. ليوان الملحق لازم يتخطط مع الملحق ولا عندي تفصيله ولا اعرف احتياجات المالك وممكن نسكره بباب قزاز وسقف كذلك قزاز عن الغبار وللخصوصية
https://i.imgur.com/yob24O2.jpg
غرفة السايق جدامها ليوان داخلي مفتوح للسماء حتى يقدرون ينشرون ملابسهم حتى الدريشة لغرفتهم نقدر نلغيها ونسوي باب الغرفة زجاج يدخل منه النور لتعقيم الغرفة .. كذلك نقدر نقلب الغرفة نخلي بابها في الطرف فوق والبانتري له باب واحد على الفراغ يستوي الحمام جهة الزاوية اليسرى فوق ونقدر نركب باب لاف حق مدخل السيارات .. بعرض 6 متر كل قطعة 3 متر نحتاج لتواير له والا بيكون ثقيل .. نقدر نقلل عرض الباب ل 5.4 متر زندخل سيارتين بالراحة جنب بعض
هذا قصدي فوق واعتقد تم بحمد الله تغطية كل شيء عن هذا التصميم وبانتظار اللي بعده
https://i.imgur.com/yMobL1y.jpg
من فترة شغال على تحسين تصميم بيتي بعض التحسينات البسيطة للواجهات والمخططات وبعض التفاصيل .. استشارني قريب في تصميم بيته وكان عارض عليه تصميم استشاري انترير ديزاين والتصميم تخيلي مبالغ فيه وسعر التنفيذ فوق ال 20 مليون .. سعر التصميم بس 400000 مع إنه بدون تفاصيل وبدون حتى اتفاق بعقد
قلت احط بيتي على ارضه مع المجلس والملحق وحوض السباحة وأشوف شلون تترتب .. مساحة بيتي بالملحقات ما توصل 1400 متر مربع .. ذاك التصميم اللي شفته تارس الارض ومسوي زحمة على الفاضي
ارض الرجال محاطة يمين ابوه ويسار اخوه ووراه عيال عمه وموقعها في الوسيل ومقابلة جنوب ..أو شرق نسيت بس كل مقومات الموقع الممتاز موجودة فيها .. المساحة 2800 وهذا السكتش اللي طلعت به كتوزيع
https://i.imgur.com/gUmTHCz.jpg
أكيد فيه نواقص كثيرة بس ككونسبت كافي ويقدر يطور عليه
آخر اللي وصلت له بخصوص توزيع المباني وتصميم الحوش .. قلبت شوي اللوحة وخالفت القوانين اللي تقول الشمال لازم فوق .. هنا الشمال يمين والشرق تحت جهة مدخل البيت والمجلس والغرب فوق
https://i.imgur.com/TQuNLmS.jpg
اللي يذكر التصميم قبل تقريباً هو نفسه بس تعديلات طفيفة .. مبين على الارض إنها مرتفعة جهة الغرب ونازلة جهة الشرق حتى لو نزول بسيط بس على مسافة طويلة أكيد باواجه مشكلة ولازم اخلي أما سلوب واحد من جهة الغرب للشرق وجهة الغرب ارض ولدي والأرضين بيكونون مفتوحين في حوش واحد .. طريق السيارات بيكون هو نفسه اللي تنزل عليه بايبات تصريف مطر السطح .. لو باسوي سلوبين جهة كل بوابة .. سيل الماي من الجهة الغربية بيكون مستمر حتى من الشارع خارج البيت .. لو رفعت أرضية البيت من جهة الغرب بتواجهني مشكلة إن جهة الشرق بيطلع مرتفع وايد
هذي لازم لها دراسة مساحية وارقام حتى احدد شالحل الأمثل وأدري كثيرين ما يعرفون شاتكلم عنه
بركز على منطقة المطبخ واتصالها بالحديقة الداخلية والمطبخ الخارجي .. بما اني قررت اسكر الحديقة الوسطية من فوق بقزاز ومن الجنب المفتوح بزجاج كذلك وتكون مكيفة ويدخلها النور كبيت زجاجي داخلي للزراعة اللي تحتاج جو بارد .. بما انها بتكون مغلقة بيكون حلو انفتاح البيت عليها بأبواب منزلقة أو اوكورديون لو حصلت نوع زين حتى تعطينا أكبر انفتاح وقت الحاجة على الحديقة .. انفتاح فعلي والانفتاح بالرؤية مضمون طول الوقت حتى ستاير للصالة والممر والمطبخ ما لها داعي
https://i.imgur.com/aAQN4WI.jpg
الممر بين المطبخ والملحق بيكون مسكر بزجاج كذلك
هذي الصورة اعتقد أوضح وتوضح البيت كله كتوزيع داخلي للدور الارضي مع الدوار تحته .. الخطوط الارضية كلها مقترحات ما اقتنعت بها شبه مقتنع بالقطع الكبيرة للبورسلان الرخامي مع بوردر ونعلات غرانيت في الأطراف .. الغرف بيكون البوردر نفسه ماشي فيها لكن الداخل سجاد مع أندرلي .. المجلس تحت الكراسي بورسلان وفي الوسط سجاد مفصول بنحاس
تم تصغير مجرى الماء المتدرج في أطراف زجاجية تبين حركة الماء فيها وهو ينزل من مستوى لمستوى على شكل شلال صغير وتوسعت الحديقة للزراعة وللجلسة اللي هي أهم .. المساحة استوت 12.1 في 7.3
https://i.imgur.com/qyXr5I3.jpg
حتى الجدار الزجاجي الفاصل بين الجلسة الدائرية النازلة والحديقة بيكون ينفتح بحدود 75%
الدور الأول حصلت عليه بعض التعديلات الطفيفة يمكن من لاحظ السابق والحالي ما يعرف شالفرق .. أهم شيء هو عزل منطقة صالة التفزيون بزجاج عن الصوت مع انفتاح باقي الدور على الحديقة الداخلية أُم سقف مرتفع بحدود 12.4 متر وحاجز زجاجي مطل على بيت الوالد وسقف زجاجي بارتفاع 4.5 متر ذيك الجهة .. أكيد التخطيط مب موافقين على الجزء الأخير الملاصق للسور لكن ممكن اسويه مرحلة ثانية بعد الرخصة كله ألمنيوم وزجاج وجدار فاصل بارتفاع بسيط أو الزجاج يركب على الارضية حتى يكون عندنا دخول أكبر كمية نور طبيعي للحديقة
https://i.imgur.com/QS7xAsZ.jpg
المصعد واجهته بتكون زجاج ومطل على الحديقة وهنا ما وضحت الشلال وجدول الماء تحت مثل ما وضحته في الدور الأرضي
البلكونة قللت عرضها ل 70 سم وبتكون في الغالب مكان لبعض اصيصات الزراعة حتى تكمل جو الحديقة للطابق الأول .. الغرف المطلة بيكون باب بلكونتها يفتح مثل ما هو موضح حتى يمنع الصوت أكثر من المنزلق .. أما الصالة باخليه منزلق حتى تنفتح أكثر على الحديقة
إرتفاع الدور الارضي 4.4 صافي واحتجت ل 32 عتبة لضمان الارتفاع ل 4.7 لو ضفنا سمك السقف بمكوناته اللي بيكون تقريباً 30 سم .. بنحصل ارتفاع لكل عتبة 147 ملم أو 14.7 سم .. شكلي باعدل على عرض كل عتبة بدال 30 سم باخليه 28 وبحاول ازيد عتبتين حتى انزل ارتفاع كل عتبة ل 13.8 سم أو انزل الارتفاع ل 4.1 متر بس بيضيع علي حول 50 سم للدكتات .. بيكون 3.6 صافي .. خطتي أسوي الجدران مقسومة حسب الارتفاع 2.6 أو 2.4 مع خط ارتفاع الباب أو فوق بشوي تكون مفصولة بكورنيش عليه انارة مخفية تنور الجزء العلوي من الحائط اللي بيكون حول متر لكن لو حافظت على 4.4 بيبقى عندي 1.4 متر بتطلع أحلى حتى بصبغ أبيض أو أزرق سماوي مع رسمة غيم تعطي انطباع بالسماء والجزء السفلي بيكون لون غير أو ورق جدران أو اي تشطيب ثاني حتى الخشب غير مستبعد
هذا النمط بيكون خلال البيت كله لكل الجدران .. للحمامات نفس الشيء ال 2.5 متر السفلية بتكون بورسلان القطع الكبيرة بعرض 2.5 متر تركب كاملة لخط الكورنيش وفي الأعلى كلش الجبس سيدة بدون كورنيش بس مفصول بفاصل خفيف عن الجدار وبين السقف والكورنيش صبغ ضد الرطوبة
دور البنتهاوس يعتبر شقة ملمومة لأحد الأبناء وكاملة من كل الاحتياجات نلاحظ فيه سقف المكتب تحت كلش نازل حتى نسوي في الفرق بين سقف المكتب وسقف باقي البيت صفين طوب زجاجي أو ثلاث لإدخال النور الطبيعي وهذا أول منور .. الثاني مكان الزراعة المفتوح للسماء وارضيته ارضية الدور الأول .. الثالث يمين بيكون للحمام الرئيسي سقف بانوراما مكان الشور والجكوزي .. ومقابل شرق يعني شمس الصبح لحد بعد الظهر بشوي بتكون ساطعة فيه الرابع الهرمي على الصالة .. فكرت الغيه بس غيرت رايي لأنه بيكون متنفس للصالة حيث الهواء الحار يرتفع لفوق
الخامس يعتبر الأكبر وهو سقف الحديقة الداخلية والله يعين على بند الزجاج والالمنيوم
السادس هو الممر بين الملحق والمطبخ الداخلي كله سقف زجاج
https://i.imgur.com/Q0jn2QH.jpg
دور البيسمنت خدمي وتشطيبه خرسانات وطابوق بدون صبغ ولا حتى بلاتسر بس للتمديدات ولخطوط الصرف تعلق في السقف وللمياه لسهولة الصيانة والاستبدال وللابتعاد عن عوامل الجو خصوصاً الشمس .. ما ابغي اكرر أشياء ذكرتها في السابق وعندي مساحة كافية حتى لمكينة كهرب ستاند باي أو لمحول على الطاقة الشمسية .. سويت تمديد مباشر لمغسلة المطبخ اللي تغيرت لتكون في الجزيرة الوسطى
https://i.imgur.com/H4fzo92.jpg
الواجهات جاهزة باقي بس انزلها والحمد لله توفقت في تعديلها بطريقة مرضية لي واتقبل أي ملاحظة أكيد
السلام عليكم
كيف حالك بوعبدالله
الشي الطيب أنك وضعت خرائطك للبنيات في الموقع والناس تتطلع عليها وتبدي رأيها فيها، قد يكون شخص مقبل على البنيان ويريد التعلم وتفادي الأخطاء أو قد يكون شخص بنى وانتهى من البنيان ويبدي ملاحظاته في البنيان والأخطاء التي وقع فيها حتى لا تتكرر هذه الأخطاء عند ناس جدد مقبلين على البنيان.
شخصياً أرى خطأ في تصميم الحمامات (أكرمكم الله)، لاحظت أن بعض كراسي الحمامات مقابلة لجهة القبلة والبعض الآخر القبلة تكون خلف الشخص الذي يستخدم كرسي الحمام.
فهذه بتكون متعبة لك أذا حاولت التعديل عليها، وأقصد التعديل عليها وتغيير اتجاه كرسي الحمام للشمال أو الجنوب بتكون متعبة جداً وقد تضطرك الى تغيير خرائط الحمامات بالكامل مع تغيير مداخل الحمامات لتتناسب مع التصميم الجديد.
هذه ملاحظتي وأتمنى أنك تقبلها بصدر رحب.
أتمنى أنك قرأت تعليقي في صفحة 138.
الواجهة الرئيسية كيف ترى من الشارع .. أحس إني وفقت في توجيه البيت في الاتجاه الجنوبي بحيث يكون يمين الشمال ويسار الجنوب كما في هذي الواجهة .. يسار سكة ضيقة وجهة الرؤية هي الشرق وشارع رئيسي يقولون بتكون فيه حديقة كبيرة بس انا اشك انها بتكون سوق تجاري أو محلات ظهرها بيكون صوب بيوتنا وخدماتها وازعاجها .. تعودنا هالشيء .. غير مستبعد بكرة حضانة الكلاب الموجودة في العزيزية تجي وراي هناك
المجلس مغطي الجزء الغير منتظم من الواجهة ذي وحلو بالنسبة لي ما يكون فيه سيمتري أو تناظر
https://i.imgur.com/x8U5ZHS.jpg
التعديلات بسيطة تمت اضافة السقف الزجاجي المائل على الحديقة بيكون بارتفاع عالي ويبين من بعيد أقصى ارتفاعه 12.4 متر ومايل لحد 10 متر يمكن من الطرف
البوابة عدلت عليها كذلك والكسرات اللي فوق