عرض للطباعة
صورة لحمام وأوبن كتشن عجبوني ..
الحمام تقسيمه مرتب والألوان حيادية ومتناسقة .. عجبني توزيع و حركة المغاسل ..
صاير شكله يعتمد على التناظر ..
والمطبخ مودرن .. بس أعتقد حركة الطاولة مو عملية ..
حسيتها تنفع زحلاقية لليهال هههههه
ولا الكراسي المرتفعة .. أحسها مو عملية وخطرة بعد !
http://im57.gulfup.com/hGB1i.jpg
http://im57.gulfup.com/Qin5Q.jpg
المطبخ بالعكس الطاولة مرتفعة بارتفاع 110 سم وهو إِرتفاع جيد للكراسي .. بين 110 - 115 وبعدين سطح عمل الطبخ يجي من 85 - 90 وممكن يزيد إلى 92 حسب نوعية الفرن .. بس أَحس شكل الطاولة مرتفع أَكثر والزحلاقية زينه حق ياهل عمره سنة لين صاح تخليه امه يلعب شوي .. وشوي الا زالق في الفرن هههههه.اقتباس:
المشاركة الأصلية كتبت بواسطة نور الحور
^
شرير صاير معماري هههههههههه
على فكرة معماري .. دايماً بسألك وأنسى ..
اللحين المعروف عن الرخام أنه بسرعة يتشرب السوائل ..
وما ينحط لهلسبب في أسطح المطابخ ..
سؤالي .. ليش يحطونه بالحمامات الله يكرمك عيل ؟
ومعروف إنها منطقة رطبة طول الوقت تقريباً .. :con2:
,
,
مرحبا
الله يعطيكم العافيه على الموضوع والمشاركات القيمه
كلها فائده وذوق عالي
يسمح لي اخوي معماري اجاوب على سؤال نور الحور
هذا مو رخام الي في الارضيه هذا ( جرانيت )
والمعروف عن الجرانيت انه اقوى واقسى من الرخام بمراحل
وسعره ( اغلى )
ويوجد منه تشكيله واسعه من الالوان الطبيعيه
وما يتشرب الرطوبه ولا يتغير لونه مهما تعرض للعوامل القويه الا بعد عشرات السنوات
لذلك ينحط في الاماكن المكشوفه لمداخل البيوت والدرج الخارجي واسطح المغاسل والمطابخ
وخاصه الاماكن المتعرضه للشمس والرطوبه والماء
وهناك بعض انواع الرخام الي تتحمل الرطوبه بدرجه معينه
مثل الماء يتحملها ولكن ما يتحمل ( الدهون ) والالوان مثل البيبسي والعصاير الي تترك بقع واضحه مع مرور الوقت
اما الجرانيت يتحمل ( كل شي ) بما فيها من دهون وشحوم وعصاير
وهو ممتاز جدا للمطابخ والحمامات ومداخل البيوت
وننصح دائما ( بالجرانيت ) لهذه الاماكن افضل من الرخام
ويصعب على الانسان العادي انه يفرق بين الرخام والجرانيت لتشابه الشكل الخارجي
على سبيل المثال يوجد رخام اسود
ويوجد جرانيت اسود
الخصائص مختلفه اختلاف كلي
الجرانيت هو ( صخر ناري جوفي تكون تحت درجات حرارة عالية )
ونوع الرخام هو ( صخر رسوبي ) ومنه ( صخر كلسي )
,
,
اخوك
شموخ دائم
الله يديم مساكم بالصحة والعافية
إِخت نور الحور تساؤلج في محله ورد الأَخ شموخ دائم واضح وشامل وفي محله بعد .. إِضافتي بسيطة وهي إِن سعر الرخام وبعض أَنواع الحجر يفرق كثير عن الغرانيت وخصوصاً الغالي منه والنادر .. شفت انا نوع بسعر 7 آلاف وشوي ومؤكد فيه أَغلى.
نشوف في كثير من الفنادق والحمامات الراقية استخدام حتى أَنواع رخيصة من الرخام، ومن الحجر القاسي اللي ما يوصل لدرجة الرخام .. والبعض يستخدمون طبقة حماية، وتجدد كل فترة حتى لا يتأَثر الرخام بالمنظفات ويكون محمي .. والمهم في خيارهم هو دفء الحجر الطبيعي وغناه كمادة طبيعية متجانسة وشكلها حلو بالعروق المتصلة خصوصاً لو كانت قطعة وحدة .. ودوم مستخدم هذي المواد الغالية أَما يكون متوقع مردود قوي يغطي تكلفتها بسرعة مثل الفنادق وتتعامل بشراء كميات كبيرة وبأُسس ومواصفات خاصة تضمن حقها، وكذلك بالحماية والصيانة المستمرة اللي لها أَوقات فريق خاص .. أَو يجينا المستخدم ما يهمه تشطيب حمامات ومطباخ يكون حتى أَغلى من تشطيب البيت أَو القصر مرات.
في الوقت الحالي لو شفتي صورة الحمام اللي حطيتيه إِنتي في السابق، هذا ممكن عمله بسهولة بقطع بورسلان شبيه للرخام ويعطي الإِحساس نفسه وحتى النقوشات ممكن تجي مصنعة وجاهزة وبسعر مناسب جداً، وعملي إِن تركب صح ولا يحتاج صيانة .. حتى الشقوق والخطوط اللي في الرخام يتم تقليدها بالبورسلان الحديث حسب تصنيعه ومصنعيته، وبسعر يصل أَحياناً لجزء بسيط من الرخام أَو الغرانيت.
بالنسبة للغرانيت توجد نوعيات بورسلان حسب ما وجدت في الدوحة نوع سعر متره 7 الاف ريال وشوي ما اذكر بالضبط كم، وحصلت نفس النوع يجي مقطوع شريحة رقيقة في حدود 1 ملم ويمكن أَقل، وهي من نفس الغرانيت الغالي ومن ثم توضع على عجينة بورسلان وتعالج ضد الخدوش والأَحماض معالجة مدى العمر بتصنيع خاص بتكنولوجيا ايطالية حديثة .. هذا النوع من البورسلان يأَتي الفرز الأَول منه بسعر 700 ريال للمتر .. أَي بأَقل من 10% من سعر الغرانيت الطبيعي، وسعر الفرز الثاني 270 ريال والفرز الثالث 200 ريال، وصعب التفريق بين الأَصناف الثلاثة الا باختبارات خاصة في المصنع والفرز الثاني والثالث يتم فرزهم بسبب بعض الشوائب في اللون وبعض التغير في الحجم فلا تنفع للزيرو جوينت .. أَما الصنف الأَول فهو ينفع زيرو جوينت ويبين بعد التركيب كأَنه غرانيت طبيعي خصوصاً إِن تم تركيبه بعناية وباتصال للخطوط البيضاء ناصعة البياض في هذا الصنف مع الخلفية السوداء.
إِضافة بسيطة لو المستخدم بيعتني بالتنظيف بدون منظفات تخرب الرخام ولو راضي ببعض الخدوش والخشونة فاستخدام نوع رديء ولو يمتص الماء ما له تأَثير كبير .. إِمتصاص الماء قد يؤثر في الشكل قليلاً لكن لا يؤدي الى تسريب إِذا عندنا تصريف وسلوب مناسب .. وبعض الرخام يبين مبقع ومزيت من أَقل رطوبة ويعتمد على قناعة المستخدم هل هو راضٍ به أَو حساس جداً لأَي تغير.
وفي النهاية استخدام أَلواح بسيطة كتحديد للمراية والنوافذ وكتلبيس لحوائط الشاور وكحامل للمغسلة من الغرانيت لا يؤثر كثيراً مادياً لو تم دمجه مع بلاط عادي رخيص ويعطي منظر جميل جداً.
اقتباس:
المشاركة الأصلية كتبت بواسطة شموخ دائم
شكراً وتسلم شموخ على ذوقك والمعلومات الوافية .. والإجابة المقنعة ..
أنا هذا اللي خابرته بصراحة .. إن الرخام أقل تحمل وصلابة من الجرانيت ..
بس دايما المنتشر والشائع إنهم يستخدمون الرخام للداخل والجرانيت للخارج ولأسطح المطابخ ..
حتى الدرج الداخلي في العادة ينحط رخام ..
لكن مشكلة الرخام امتصاص السوائل والبقع والخدوش بعد ..
بس اللي استغربته في ردك إن فيه أنواع من الجرانيت ما نقدر نفرقها عن الرخام !
حسب معرفتي المتواضعة إن الجرانيت يجي منقط .. والرخام له عروق ..
بس هل ممكن نلقى جرانيت له عروق أو مشابه للرخام لهدرجة ؟
أنا اللي شفته (الجرانيت الجلاكسي) وايد حلو لسطح المغاسل او المطبخ ..
بس منقط مثل باقي أشكال الجرانيت ..
صراحة الموضوع يسوى الواحد يحطه بالمناطق الرطبة ..
لأني من زمان مو مقتنعة بالرخام في الحمامات اكرمك الله ..
وكل اللي أسألهم هالسؤال يقولون لأ عادي .. الرخام يستحمل !
لو تكرمت شموخ إذا فيه عندك صور توضيحية ..
أو حتى أماكن تعرفها أروح أشوف فيها عينات ياليت تدلني عليها ..
اقتباس:
المشاركة الأصلية كتبت بواسطة معماري قطري
شكراً معماري على شرحك الوافي .. تسلم والله ..
بالنسبة للمنظفات .. العملية سهلة ممكن تجنبها بسهولة ..
وأصلاً هي خطرة حتى على الصحة ..
والبديل الطبيعي موجود وبمستوى أكبر من التعقيم
بس الإشكالية في البقع والخدوش ..
الحجر الطبيعي عموماً يبهت ويحتاج لجلي كل فترة ..
وأعتقد إن أهم نقطة هي دقة التركيب والفنشنغ ..
أنا لما ألاحظ ديكورات وحمامات الفنادق الله يكرمك أشوف إن التأثير الكبير
من ناحية الاستخدام وحتى الناحية الجمالية هي دقة التركيب ..
وبالفعل حالياً قاموا يستعيضون بالرخام قطع بورسلان كأنها رخام طبق الأصل ..
لكن مادري أحس الحمام الماستر بالذات يبيلة لمسة من الطبيعة ههههههه حجر طبيعي أصلي ..
وعلى فكرة مرة شفت ببرنامج دكتورز إن بعض أحجار الجرانيت المستخدمة في أسطح المطابخ بها نسبة عالية من
السميات (اعتقد مادة الرصاص) .. وكانوا يوصون بعدم تقطيع الأكل على الأسطح أو حتى العجن ..
عاد أنا خوافة .. قمت أحط فرشة نايلون على الأسطح قبل الاستخدام ..
وطبعاً الأكل يتقطع على أسطح زجاج أنظف وأسلم ..
وأسهل في التعقيم .. بدل أسطح الخشب أو البلاستيك ..
وهالشي خلاني أبحث ولقيت أسطح مطابخ كاملة من الزجاج ..
بس ما أعتقد إنها عملية .. وخطرة في نفس الوقت !
مثلاً نفترض الرخام أَو الغرانيت بنحطه للشاور .. وعندنا أَنواع من الشامبو والصابون تنزل عليه يومياً لو ما يتأَثر وفيه أَنواع ممكن ما يبين التأَثير فيها ولو ممكن نحط مادة حماية معينة هذا المهم وبينفعنا .. وبعدين تغيير هذي المنطقة بيكون سهل لأَنها جزئية بسيطة .. ودوم عندنا بدائل وخيارات ثانية .. حتى الخشب أَحدها ومنه نوعيات معالجة وتستحمل الرطوبة وتعطي راحة ودفء ومنظر حلو .. وهذا اللي يخلي التصميم متميز استخدام المواد بتنسيق جيد وحسب ميزانية محددة ومقدور عليها .. والأَهم ذوق الشخص واختياره.اقتباس:
المشاركة الأصلية كتبت بواسطة نور الحور
وأَكيد أَصحاب الخبرة في هذي المواد بيفيدونا أَكثر .. وهذي بعض الصور لحجر ورخام مستخدم في بعض الحمامات
هذي لحمام بحوائط رخامية، وأَرضية كذلك يفرق عنها الحائط الوسطي المجاور للبانيو وهو من البلاط الأَسود.
http://im53.gulfup.com/M9bdJ.jpg
وهذي لحمام وحوض مغلف بالغرانيت على ما اعتقد.
http://im81.gulfup.com/L0Ah0.jpg
وهذا حمام بأرضية وجدران خشبية معالجة، أَو محتمل تكون بورسلان راقي وبشكل الخشب حتى عروقه متغيرة من قطعة لقطعة .. انا كبرتها ودققت فيها واحساسي انها خشب.
http://im88.gulfup.com/dOEli.jpg
وهذي لحوض فيه قطعة حجر صلب كبيرة.
http://im66.gulfup.com/L6io7.jpg
وهذي لشاور في جزء منه جدار حجري كبير.
http://im46.gulfup.com/HfSRP.jpg
نستنتج حتى الحجر العادي والممتص للماء ينفع للأَماكن الرطبة حسب التصميم ويعطي شكل جميل ومغاير للشكل العادي النظيف للبلاط والبورسلان.