مراجعة التصاميم المعمارية وابداء الملاحظات عليها (محدث)

صغرت البانتري للمجلس 40 سم والمغاسل 40 سم والمجلس الصغير 20 سم وتوفرت حول متر جهة اليسار

السلام عليكم،

يشرفني اني اقرا هالموضوع الي اكثر من الرائع

كما اوجه شكر خاص للاخ الكبير بوعبدالله
اسجل اعجابي بالموضوع ولك مني افضل التحية

اقتباس:

---

المشاركة الأصلية كتبت بواسطة HMH

السلام عليكم،

يشرفني اني اقرا هالموضوع الي اكثر من الرائع

كما اوجه شكر خاص للاخ الكبير بوعبدالله
اسجل اعجابي بالموضوع ولك مني افضل التحية

---

عليكم السلام ورحمة الله وبركاته

الحمد لله توفيق من رب العالمين واللي يهمني ان نتيجة هذي الدراسات تبين على أرض الواقع والله يوفق كل من يبني صج البنيان عندنا معاناة .. يا ليت الدولة تتدخل بادارة بناء الافراد بضماناتها ومعرفتها بادارة خاصة وقوية تتابع المقاولين والاستشاريين حتى التنفيذ يكون على اصوله لأن البناء استثمار كبير لسنوات طويلة للدولة ككل

خلاص تم الاتفاق على عدم عمل البيسمنت واشوفها فكرة مناسبة لتقليل التكلفة .. بيكون مخزن صغير تحت الدرج مساحته 10 متر مربع وشوي وفيه مساحة اضافية بس بيكون ارتفاع الدرج فوقها قليل لازم ينحني الواحد تحتها

الحوض تم تكبيره ليكون 8 في 4 مع الاوفرفلو الأمامي ينزل الماي يبين للجالس في الصالة .. ممكن نسويه بارتفاع متر و8 سم على حسبة كل عتبة 12 سم للدرج وجزء بسيط تحت ممكن يكون 20 سم يعني بنحتاج نحفر لقاعدة الحدوض حول 40 سم وهذي ممكن انجازها في ساعة عمل أو ساعتين بسهولة حسب طبيعة الأرض

نقدر نسوي الشلال المرتفع لو حبينا ونقدر نسوي الحوض كإضافة مستقبلية بس نخطط له ونمدد لكهربته تحت الارض على الأقل بايب لتمديد الكيبل ويكون 4 إنش بس مهم يحسب كهربته الاستشاري مع تصخين المياه .. غرفة المضخات موضحة جانبية وبابها بيكون يمين تكفي لكل عدة التنقية والتسخين .. وباحط صورة مقربة للحوض ولبقية مكونات الدور الأرضي

https://i.imgur.com/ELsBK7G.png

الحوض وضحت منطقة الجلوس اللي بتكون بارتفاع 42 سم - 45 حسب الرغبة و 42 مرجحة أكثر تكون القدم ملامسة لأرضية الحوض .. العرض من فوق 40 سم ومن قاعدة هذا الكرسي 30 سم حتى نقدر نحني رجلنا تحته وحاط سكشن يوضحه قبل خلال الموضوع .. جدام الحايط النازل 5 سم حتى يكون اتجاه الماي النازل للقناة المغطاة بحديد بفتحات ( غرل ) نفس اللي ينحط للمغاسل وجدام أبواب البيوت

الطابوق الحامل للزجاج اللي بيتحرك عليه ماي الشلال موضح 60 سم في 20 ويكون مقوى بقطعة حديد في فراغاته وخرسانة ما عدا مكان تمرير البايب .. موضحه على اليمين بقطر 10 سم بس ممكن نحتاج لأصغر وهذي تحددها شركة أحواض السباحة .. الطابوق ممكن نشبكه مع طابوق الحائط المايل حتى ما يكون فيه فراغ مزعج .. من فوق نربط بين العمودين بجسر لو حبينا أو تخليه مفتوح بالكامل وتثبيت القزاز أو البولي كاربونيت يكون بفريم المنيوم من جدام يكون تحت القزاز حتى يسمح للماي بالنزول بطريقة شريحة رقيقة .. البايب فوق لازم يتحرك أُفقي وحتى نخفيه لازم نحتاج نسوي جسر وحتى يصب الماي بالتساوي فوق الزجاج لازم نسوي فتحات صغيرة فيه كل 10 سم مثلاً .. نقدر نركب بولي كابونيت أزرق وفيه منه أسماك مختلفة ويكون ثابت ما ينحني أو نركب طبقة بلاستيك فوق .. حطيت له صورة بعد خلال الموضوع يجي فيه فراغات وتحت البلاستيك نركب زجاج يعطيه سطح مستوي

https://i.imgur.com/Pv5piq4.png

حاجة مهمة بخصوص الحوض نسيتها .. نقدر نسوي بديل أو طريق ثانوي للماي ينضخ وراء ظهر الجالس ونقدر نركب محبس يعطينا خيار الشلال العلوي أو الضخ وراء الظهر مثل الجكوزي

على اليسار عزلنا منطقة التانكي وخزان الصرف الصحي بجدار 10 سم وباب وممكن نستعمل المنطقة كمنطقة تخزين مفتوحة لعدة الزراعة ولو حبينا نسوي فيها مخزن مغلق ممكن حسب الرغبة

شور خارجي ممكن في ظهر حمام السايق أو بعد ممكن نسوي حمام صغير ملاصق له لس بيخرب خط البنيان .. وبما إن الغرفة للسايق كبيرة ممكن ندخل حمامها شوي ونسوي حمام خارجي كامل تابع للحوض .. كذلك مب مضمونة موافقة التخطيط على مواقف تنفتح على الشارع جنب المجلس ولو ما وافقوا ترتيب المنطقة بيتغير والغرفة بتنفتح على ليوان المجلس وضروري نسوي باب بعد جهة البيت .. الحلول أكيد موجودة وسهلة لكل احتمال

عندنا منطقة الطبيلة 5.6 في 11 وشوي تكفي لأربع سيارات وراء بعض ممكن نسوي سقفها معلق ومركب على قطع حديد كراسي مثبتة في الحايط بدون أعمدة .. حلو نخلي ارتفاعها 2.4 متر حتى 2 متر ينفع وتكون واجهة الباب مغطية طرفها .. جسر الباب أقصد

https://i.imgur.com/B9H7RK4.png

الملحق يمكن مشكلته الممر بينه وبين البيت 140 سم واتوقع يطلبون 150 وممكن 200 وكلها ممكنة عندنا مساحة 339 جهة اليسار بين البيت والميلس

غرفة الخادمات تكفي لثلاث اسرة صغار 90 في مترين بطاولات جانبية صغار وعندنا مساحة حتى لكبتات لهم .. المطبخ توزيعه واضح وفيه جهة لثلاجتين وفريزر واتصال الملحق بالبيت سهل ولو اغلاق سقف الملحق ممنوع نسويه بعدين بألمنيوم وأتوقع مسموح ألحين عرفوا إن بلادنا يجيها غبار قوي والحشرات تدخل

https://i.imgur.com/ZCt6pHd.png

الجلسة المثمنة بتكون نازلة عتبتين كل عتبة 125 مم وممكن نوصلها ل 150 لو حبينا .. الدرايش شوي مبتعدة عن الكراسي والدائرة بس اللي نازلة هذي تعطينا توزيع دائري للكراسي وقطر الدائرة 5.6 متر واللي حاطه مقاس بعد العين عن التلفزيون تقريباً .. أكيد لو البيت لي باركب ستاير خشبية تنفتح بسهولة مثل المكتبية أو على كهربة قماشية ترتفع لفوق .. وبما ان الجدران عندنا سمكها 30 سم نقدر ندخل الدريشة داخل نخلي تجويف للستارة ولو حبينا نسوي كتف عريض لها حول 40 سم يلامس العمود وبعمق 10 سم .. يعني الستارة تكون داخل تجويف الدريشة وباسوي تفصيل لهذي النقطة

https://i.imgur.com/qocmorL.png

ممكن نسوي دريشة مقوسة مفتوحة بدون شيء بين حيز المدخل والجلسة المثمنة .. ممكن يكون فيها زجاج معشق لو حبينا مثل لوحة مضاءة بتكون مقابلة باب المجلس وممكن نسويها حديد مشغول تطلع عليه نباتات الظل بتعطي المدخل شكل متوازن وبتسوي انفتاح أكثر

هذا المخطط فيه تعديلات بسيطة وسعت البانتري بعمل فتحة بدال البابين للغرفة وسويت الغرف اليسار نفس ترتيب اليمين .. ويعتمد على اختيارنا للبنتهاوس 4 غرف أو غرفتين ممكن في حال ال 4 غرف ينلغي المنور السقفي للصالة .. بعد المالك طلب عمل باب من غرفة التسريحة للغرفة اللي جنبها وهي فكرة جيدة لإستغلالها حتى لو لطفل صغير أو كاستراحة له أو للزوجة في أوقات معينة

https://i.imgur.com/2gY8373.png

بتابع في وقت لاحق بتفاصيل كل جزء وكيف ممكن نحسن عليه والخيارات الممكنة

صاحب التصميم السابق مهتم بالتفاصيل وشكله دقيق وطلب توسعة غرفة الخادمات وسويت له حل بإزالة غرفة الغسيل وتحريكها للجهة الخلفية وتحريك البيت 40 سم جهة الواجهة و 10 سم جهة اليسار ليكون الارتداد 1.5 متر لممر الملحق

شفت ضرورة تعديل الحديقة لتكون مزروعة عشب وشجر وفيها ممر حجر أو بورسلان مثل ما هو موضح وشفت ما فيه ضرورة لموقع الخيمة .. الشجر والحديقة أفضل وشكل دائم


https://i.imgur.com/0VbUrR4.png

الدور الأول تقريباً التغيير فيه كان اضافة منور طويل فوق الجلسة مثل ما هو موضح لأن قلنا بنشيل غرفة التانكي نخليها تحت التاج الوسطي فاستوى عندنا فراغ نقدر نسوي فيه سكايلايت

https://i.imgur.com/PpsaXjx.png

واقتراح اعادة ترتيب الغرفة اليسرى ممكن نسوي نفسه في الغرفة اليمنى فوق

واجهة المكتب أحلى تكون زجاج حتى اللي في المكتب يشوف مكان منفتح جدامه ويوصله كذلك النور من المنور السقفي

وهذا دور السقف يغطي قريب من 70% النسبة المسموحة وارتداد من المقدمة فوق 5 متر المطلوبة .. الغرف الثنتين فوق ممكن يكونون بالضبط نفس ترتيب اللي تحت .. وغرفة الخزان بتكون تحت السقف المايل الوسطي

السكايلايت موضح بيجي تحت الدريشة بشوي ومايل على جهة وحدة لتصريف المياه ومرتفع على قاعدة خرسانية ومرتفع من الجوانب بزجاج بعرض 3 متر في 70 سم

https://i.imgur.com/2hKVprz.png

هذا سكشن أو قطاع طولي شارحه قبل يختلف هنا في واجهة دور السقف ونشوف الدريشة تحتها مباشرة المنور ملامس للحائط وجنب على اليسار الباب

https://i.imgur.com/ZmTAGPW.png

وأخيراً الواجهة

انا افضل الباب الخارجي يكون يو بي في سي لعزل الصوت والحرارة والغبار ولمقاومة عوامل الجو وموضح في المخطط الارضي بس نسيت اوضحه هنا

ألحين الاحظ اني بالغت في رفع السقف اليمين والمفروض يكون قريب من المثمن

https://i.imgur.com/K97rP97.png

عدلت السقف في الواجهة ونسيت اغير الباب ليو بي في سي بس هذا تضمين والا المفروض يكون مكانه يو بي في سي بشكل ثاني والقوس فوق يكون ثابت .. إرتفاع الأبواب اللي تنفتح كلها مع الدرايش 240 سم

https://i.imgur.com/WHaD9Z0.png

هذا السكشن الطولي قاطع البيت بعد المدخل الثاني وهذا الباب لازم يكون خشبي .. الصالة يمين وفي حيز مفتوح والمجلس يسار مغلق بجدران مع غرفة الطعام بس هنا القطع مار فيه يوضح جهة دريشته

https://i.imgur.com/168pthg.png

الصالة السفلية المثمنة بتكون دائرية من داخل نازلة 25 سم عتبتين كل عتبة 125 ملم .. نسيت أوضح العتبات هنا بتكون نفس اللي فوق مكان السرير .. اللي يرجع للفلور بلان أو التوزيع الأرضي بيشوف فيه جزء مرتفع وراء الكراسي متغير العرض حسب الدائرة والمثمن حولها هذا نقدر نستغله لبعض الاصيصات مثل ما هو موضح

https://i.imgur.com/Fyi3svb.png



هنا تكبير حق منطقة المكتب والبلكونة المزروعة وراه .. وفوقه سوينا غرفة التانكي تحت التاج الوسطي والباب فتحة 2.4 متر وبارتفاع مترين تكفي لإدخال التانكي والغرفة للصخانات والبرشر وكان اختيار مكانها فكرة المالك وأشوفها فكرة ممتازة

https://i.imgur.com/dFg3orq.png

الجزء يسار المكتب هو خلف التسريحة وهذا باب غرفة الملابس .. السقف في هذي الجهة المفروض نازل وجهة التسريحة مرتفع قصدي الجبس .. انا وضحت وين بيكون الكورنيش بس المفروض الكورنيش هذا للجزء الثاني هذا ارتفاع الجبس فوق الباب بشوي حتى حاط عليه الساعة .. الفكرة منه الباب ينفتح في تجويف بسقف نازل وعلى جنبيه الكبتين اللي تشوفون وبعدين يدخل لغرفة الملابس بارتفاع سقفها البالغ 5.1 وبالمناور السقفية ( قلاس بلوكس ) اللي بتدخل لنا نور طبيعي من ارتفاع عالي

ملاحظة غرفة الملابس ممكن نقسمها بسقف حديد وخشب ونسويها دورين لو حبينا

هذا سكشن بالطول في البيت .. اللي عنده خبرة في الرسم المعماري بيكتشف فيه عدم تطابق بين المخطط الارضي وذيه .. تذكرون سوينا الدرج معكوس الصعود من جهة اليمين حتى اللي راكب يدخل مواجه الجالسين في صالات الأول والبنتهاوس وهنا السكشن مقطوع في المخزن تحت الدرج المفروض هذا الجزء الصاعد يكون جهة القطع ( شيبنا واستوينا ما نركز سامحوني ) .. بس يمشي للتوضيح وما يكتشفها الا اللي يكون دقيق وايد ولا لها تأثير في البنيان لأن الشغل يكون في البداية على المخطط الأرضي هو الماستر

حتى الكراسي المفروض تكون جهة الرؤية وهنا اوضح التلفزيون والبانتري

https://i.imgur.com/XeD3pQV.png

هنا توضيح للمنور اللي للدور الأول صغرت الصالة شوي اللي فوق حتى اسوي هذي الفتحة الجانبية .. غرفة التانكي بتكون ارضيتها مرتفعة حول 15 سم نسيت اوضحها بس المهندس الإنشائي لازم بيوضحها

https://i.imgur.com/OMBhhcU.png

كنت متمني اسوي السقف منحدر أكثر حتى يبين القرميد ومنظره بس صعبة

القطاع الطولي في البيت كان فيه سوء تقدير في الرسم ولا يتناسب مع المخطط الارضي للبيت وعدلت عليه .. أول ما يدخل الواحد ويلتفت لليسار بيشوف الجلسة المثمنة وفيه فتحة تطل عليها وضحتها اللي جدامها نباتات ظل .. هذي ممكن تكون حوافها فريم خشب ونحط في وسطها حديد مشغول وممكن نخليها مفتوحة بدون شيء وممكن مشربية خشب أو جبس وممكن زجاج معشق من جهتين ووسطه اضاءة مخفية .. هذا الممر وسط المدخل بين البابين الزجاج والخشبي .. يمين بيكون باب المجلس وضحته في رسم ثاني

بعدين نشوف الكرسي شلون طالع مرتفع مع أرضية البيت جزء منه وجزء في الارضية النازلة حق الجلسة المثمنة .. كسرة الحايط اللي ورا الكرسي تكمل بقية الحايط للشكل المثمن وتفصل جزئياً الجلسة الجانبية المفتوحة للطعام للعائلة .. هذي مب شرط تكون للطعام بس ممكن للدراسة وحتى لوضع الأغراض عليها بعد الرجوع من الخارج .. الجلسة المثمنة وجلسة الطعام درايشهم ممكن تكون بستارة خشبية سهلة الفتح وتغلق بس في الليل بتعطي انارة طبيعية واطلالة حلوة على الحديقة وحوض السباحة في المقدمة مع الشلال ماله

https://i.imgur.com/IxEXHjZ.png

هذي صورة مقربة للشرح السابق .. عندنا بداية المدخل وبعدين المدخل وبعدين ندخل على مساحة أوسع وأعمدة مفتوح ما بينها بس جسر رئيسي فوقها .. النافورة ممكن نلغيها أو نخليها جانبية لو حبينا أو وسطية مثل ما هي ما تضر بالعكس تسوي جو

https://i.imgur.com/41lcOZu.png

الدرج المفروض يبتدي مع خط المصعد وصافي الارتفاع تحته عالي بس هذي الجهة بدايته لازم بيكون نازل وممكن نستخدمه للتخزين المفتوح .. عندنا من جهة اليسار كاتب ستور + غسيل يد + تواليت المغسلة فتحتها مطلة على طاولة الطعام العائلية والحمام صاد صوبها والباب هذا للستور الاضافي

https://i.imgur.com/NtIK2Yr.png

الباب الثاني مدخل الغرفة السفلية وملحقاتها

صورة مقربة لبيت الدرج واللفت وممكن نعمل فجوات جدارية في اللفت حق نباتات ظل متسلقة أو صور أو كريستالات ومقبض الدرابزين يتثبت عليه ممكن باضاءة أو حتى محفور داخل بيت اللفت

https://i.imgur.com/SmVqTWd.png

ما وضحت درايش الدرج وهي موضحة على الفلور بلان والمفروض توضح هنا شيء بسيط نتركه للاستشاري

الصالة فوق جهة البانتري ومعاه التلفزيون .. بيكون مكان التلفزيون مفصول بقواطع خشبية .. وكبتات البانتري المفروض تكون أكبر من هشكل انا نقلتها من مخطط ثاني وكل باب عرضه 25 سم والمفروض 35 وحتى أكثر 40 يمشي .. يعني التفاصيل لازم تتم عن طريق المورد .. ممكن نركب باب يعزل البانتري بس انا مسويه مفتوح على الصالة ولا فيه أي شيء مزعج بالعكس مسوي جو والكل يتجه له في اليوم عدة مرات

https://i.imgur.com/LcvTp7i.png

مستغرب الاستشاري تكلم عن إن البيت مرتفع وايد ويمكن سور سقف البنتهاوس يكون نازل ما يغطي المكيفات .. إخوي توه مخلص تصميمه عطوه 14 ونص ارتفاع وارتفاع وحدات التكييف ما تزيد عن 80 سم وهذا ارتفاع سور السقف 95 سم .. بعدين ضروري نخلي التكييف فوق السقف الاول وشيء فوق البنتهاوس ولو قدرنا بعد في الحديقة للدور الأرضي أفضل

القطاع الثاني نشوف بعد ما ندخل يمين ونبدأ بباب المجلس في المدخل اللي محصور بباب قزاز جهة الخارج وبعدين باب خشبي وبعدين يجينا باب يدخلنا على المغاسل للضيوف ومنها على غرفة الطعام .. الباب الأخير قرب الدرج بيكون للمطبخ الداخلي وممكن نلغيه ونخليه قوس باقي التفاصيل اعتقد واضحة

شيء مهم هو عرض الصالة 5.5 متر وعرض المنور فوقها 3 متر مع الباب وكتفه اللي يودي للسطح .. يعني المنور بيجي من الجلسة الموضحة لقبل منطقة البانتري بينقطع

https://i.imgur.com/TfbKLjY.png

بالنسبة لتكييف غرفة النوم الرئيسية ممكن بسهولة نخليه مركزي ولو نخليه VrV أفضل بتحكم لكل حيز عندنا الغرفة والمكتب والحمام والتسريحة وغرفة الملابس وهذا بيكون موقعه

https://i.imgur.com/zOlU7bm.png

وفي السكشن بيبين هشكل

https://i.imgur.com/F4H3Mqe.png

المكيف وحدته موضحها بمقاس 2 متر ارتفاع ومغطيها السقف المايل و 1.4 عرض وهذا لو بغينا يكفي البيت كامل أكيد بنحتاج أصغر بوايد والدكت فوق السقف يمكن سنتيمترات بعدين تدخل في جزء السقف المرتفع وتتوزيع تحت يمين ويسار .. التكييف الباقي في يدنا نسويه دكت سبلت لو نحب أو سبلت ولازم جزء التكييف للمجلس والصالة المثمنة يكون هنا ومكان قواعد التكييف موجود وكافي والأجزاء الباقية تكون فوق البنتهاوس

بالنسبة للارتفاع لو التخطيط قالوا خله 14 متر مثلاً ننزل 45 سم من دور البنتهاوس بيستوي 3.4 ولو قالوا 13 ونص مثل السابق قبل الوزير الجديد وانا استبعدها بعد فيه مجال ننزل البنتهاوس لحدود 2.9 متر وبيكون ارتفاع مريح محد بيضرب راسه السقف

كنت شغال على تصميم تخيلي من الصفر .. فكرة تصميم لأرض صغيرة 860 متر مربع بس تواصل معاي أحد الإخوان بخصوص تصميم حق أرضه .. هو أرضه 1099 متر مربع وناوي يقسمها لنصين ويبيع نص ويبني نص .. الفكرة جيدة حسب احتياجه

هذي حدود الأرض يمين ويسار جار وفوق كذلك جار ما عنده منفذ الا على شارع واحد وعرض الواجهة عنده 15.37 صافي نشيل منها عرض الطابوق من الجهتين 40 سم .. العمق عندنا 34.54 متر وما كان واضح لي من الصورة يمكن يختلف قليل

هذي الحدود اللي اقدر اشتغل فيها وضحتها بالخطوط الحمراء المتقطعة .. الارتداد جدام خليته 7 متر حتى تصير سعة لدخول السيارة وممكن من فوق اخليه ممتد لحدود الارتداد المطلوب 5 متر .. مقاس 9.77 متر للعرض لازم نخليه مقاس ثابت 9.7 وتبقى لنا 7 سم نضيفها لجهة من الحوش .. نفس الشيء الطول 24.54 نزيده الى 25 وتقل بذلك مسافة ال 7 متر جدام الى 6.54 كافية للمرور حول السيارة وهي واقفة وغسيلها أو تنزيل أغراض منها

https://i.imgur.com/e0yFVfo.png

مثل هذي الحالة بنخلي الارتداد اليمين ناقص 3 سم عن القانوني واتوقع يتسامحون فيه وهذا توضيح لسيارة صالون واقفة وممكن لدرجة لكزس فورويل مثلاً وطولها 5متر وحول ستين سم .. صج شوي ضيق بس تمشي

https://i.imgur.com/3r99mMu.png

مسطح الدور بيكون 245 متر مربع وقبل لأبدا وعارف التصميم بيكون محدود بمجلس في المدخل ومطبخ في الأخير ودرج جانبي وممكن صالة .. قبل لا ابدأ حاب اعرف راي المالك هل يكفيه والا يحتاج ملحق ومجلس خارجي وبيسمنت مثلاً

أما التصميم الجديد التخيلي بغيت احط اللي وصلت له بس ما تشجعت للحين ما وضحت أشياء كثيرة يبغي له شغل

التصميم هذا حق أرض 24 في 36 بواجهة شارع وحدة .. تخيلي اشتغلت عليه لقتل الفراغ ينفع أكثر للأراضي الأكبر ولو قدرنا نسوي ملحق حتى لو لغرفة خدم مع غسيل كفاية لأن هذا البنتهاوس يصلح للعائلة أكثر منه للخدم

مساحة الدور الارضي تقريباً 420 بس الجزء اللي صوب حوض السباحة والباربيكيو الخارجي مغطى بالدور الأول بس مفتوح من الجوانب ما يعتبر مساحة مغطاة فعلية المفروض تنحسب في الدور الأول والارضي لا .. في ذي الحالة تطلع المساحة 339 متر مربع

https://i.imgur.com/8BnWeUI.png

ما كملت تفاصيل كثيرة بس المبدأ منتهي منه .. الدرج الدائري بيكون مريح كل عتبة ارتفاعها 13 سم وعرضها 120 سم ومن الوسط حول 30 سم والطرف الصغير 20 صوب الدرابزين الجدار حوله بيكون مثل البرميل ممتد للسطح بس البنتهاوس بيكون وراه وله درج ثاني باكمل شغل عليه بكرة ان شاء الله .. بما إن الأرض ما تكفي لملحق سويت المخازن في بداية المطبخ حتى يكون شبه معزول وممكن لو حبينا نحط له باب ثاني يفصل المخازن الاثنين عن المطبخ ويفصلون المطبخ عن بقية البيت .. كل البيت له اطلالة تقريباً على الحديقة الوسطية وحوض السباحة ومنطقة الباربيكيو .. ومبدأ حوض السباحة نفس اللي شرحته قبل حتى الشلال بيكون معلق في أسفل ارضية الدور الأول فوق .. فوق ارتفاع 4 متر وبيعكس منظر يبين من المجلس لو حبينا أو نسكر الدرايش جهة الميلس بشتر خارجي نتحكم به من الخارج

فكرة وبتابع في التفاصيل الباقية للأدوار الباقية ومعروضة لفايدة من يرغب

الدور الأول شبه مكتمل باقي شوية درايش .. بس مبدئياً هذا اللي وصلت له .. مساحته تقترب من ال 420 متر مربع والدرج الدائري يوصل الى الدور الأول ومنه نركب في الدرج البسيط اللي تحت سقفه المرتفع بيكون مكان التلفزيون والبانتري وبقية التفاصيل ما تحتاج شرح

https://i.imgur.com/O7yEaEr.png

سقف الدرج الدائري عندنا عدة خيارات له .. أما نرفعه مع سقف البنتهاوس ويبين يعطي شكل كتلة خارجية بارزة أو نرفعه قليل ونركب درايش علوية جانبية أو نخليه مع سقف الأول ونسوي فوقه قبة .. خياري لعمل درج ثاني لسبب إن بيكون الارتفاع كبير وبيبين مزعج للي فوق وتوجد مساحة لعمل درج بسيط والترتيب ماشي بهالطريقة

دور البنتهاوس فيه ثلاث غرف ومساحته مسجلة .. المساحة الاجمالية وصلت ل 1090 مع غرفة السايق .. لو ما عندنا مساحة وحدود أرضنا نفس ذي ممكن نسوي بيسمنت جزئي لغرفة الخادمة أو نخلي الغرفتين اللي فوق وحدة للخدم اليسرى مثلاً واليمنى للغسيل مع مخزن مع مساحة فوق السطح مفتوحة مكان الحمام اليمين مثلاً لنشر الملابس وسورها عالي ما يبين وراه بس مفتوح من فوق

https://i.imgur.com/bRqdOk7.png

مخطط الأرض الصغيرة بديت اشتغل عليه وهذا الدور الارضي

https://i.imgur.com/n9a5QSU.png

تحت بسطة الدرج نقدر نسوي مخزن صغير وتحت العتبات المرتفعة نقدر نحط نباتات ظل والتصميم بسيط بسبب صغر المساحة .. الغرفة الموجودة بتكون كافية لخادمتين أو 3 كبرت حمامهم شوي حتى يوسع لغسالة للملابس وفيه سعة لكوي الملابس في الغرفة

الدايننغ ممكن استخدامها للعائلة والضيوف وبنشوف فوق شلون التوزيع

الدور الأول يكفي لثلاث غرف وصالة ولو حبينا نكنسل الصالة نسوي مكانها غرفة بدورة مياه ممكن

https://i.imgur.com/ATVM3kX.png

ممكن نكسب متر أو متر ونص لمقدمة البيت بتحريكه لفوق أو للخلف بس ممنوع نفتح درايش ذيك الجهة ونقدر نفتحها للغرف على جنب وباوضح كيف إن شاء الله

وهذا البنتهاوس بيكون شقة متكاملة من غرفتين وصالة وبانتري بمساحة 166 متر مربع والدورين كل دور 245 متر مربع وبإجمالي مساحة 656 + مساحة غرفة السايق حول 20 - 25 متر مربع

https://i.imgur.com/2h1MMcM.png

هذا توزيع الحوش والدور الارضي لو حركنا البيت جهة الخلف وتركنا ارتداد بس متر ونص وبدون درايش وأشوفه أفضل لهذي الارض

https://i.imgur.com/y3xcvHu.png

وهذا الدور الأول .. الدرايش على جنب السرير في الغرفتين نقدر نسويهم بكامل الارتفاع تعطي منظر أحلى ولا فيه شيء يعيقهم

https://i.imgur.com/ZmlhI2b.png

حبيت اركز على منطقة الدرج .. هي باجمالي عرض صافي 2.2 متر متر لكل عرض عتبة و20 سم للحايط الفاصل الوسطي .. لو حبينا نسوي الحايط الفاصل الوسطي خرسانة 10 سم ممكن بنوفر 5 سم لكل اتجاه ومثل ما قلت هذا بيكون حائط حماية يغنينا عن الدرابزين ولازم تكون فيه فتحات ديكورية وممكن حتى باضاءة مخفية

تحت بتكون أما ارضية مرتفعة عليها نباتات ظل في اصيصات أو نسوي عبارة عن حوض كبير بس في هذي الحالة لازم نعزل عدل ونسوي تصريف للماي .. أشوف الاصيصات أفضل

https://i.imgur.com/monpXix.png

الستور عندنا اللي تحت الدرج بيكون 1.6 في 2.2 مساحة داخلية صافية والدريشة هذي الجانبية قبل الدرج ممكن نسويها بارتفاع كامل .. ولو تلاحظون ما وضحت أي دريشة للدرج وأتوقع بهذي الطريقة أفضل النور يجي من فوق ونسوي سقفه زجاجي لو حبينا .. ويكون مايل يبين من برا يعكس منظر كتلي معماري متغير للبيت

هذي صورة مكبرة للمدخل بالمقاسات مع الميلس .. الأبواب للمداخل 1.8 متر والدريشة المقابلة باب الميلس بتكون نازلة للأرضية والمفروض هي والباب الزجاج يكونون بدون عاكس حتى يدخلون أكبر كمية ضوء ويبين الخارج منهم .. الباب الداخلي لو حبينا نسويه حديد ممكن للأمان

https://i.imgur.com/kKxIJYx.png

أكيد بسبب المساحة المتوفرة مضطرين نخلي الحمام وغرفة الطعام والغسيل مشتركة لكن لو حبينا نفتحها على الميلس ممكن بتغيير الترتيب تغيير بسيط .. بتواجهنا مشكلة فوق حمام الغرفة بيكون على الصالة وهذي مب مشكلة كبيرة ممكن عملها بس تتطلب استشاري شاطر في الحسابات الانشائية يسويها بدون عمدان تحت .. أشوف الحمام اللي تابع للصالة يخدم الميلس كذلك وحتى طاولة الطعام ممكن استخدامها للضيوف

شفت إن من الأفضل نفصل مكان المطبخ بقوس ونسوي مساحة في الممر لكبت للثياب المكوية قبل توزيعها أو لأي مواد ثانية وهذي صورة مقربة كذلك

https://i.imgur.com/xKU6fcN.png

الواجهة للبيت بشكل مبسط .. أكيد فريم الدرايش بيختلف حسب تصميم الجزء اللي ينفتح

https://i.imgur.com/mzHsK0X.png

على اليمين فوق فتحة غرفة الخزان هذي بيغطيها سور السقف ولا تبين للقريب لكن تبين من مسافة بعيدة

الخطوط الحمراء المقطعة توضح مستوى الأرضيات بيكون 3.92 لكل الطوابق كارتفاع لو عملنا كل عتبة مريحة 14 سم ولو حبينا نزيد بنزيد في ارتفاع العتبات ل 15 سم بيستوي لنا ارتفاع كل دور 4.14 ولو حابين أعلى ممكن بس نزيد عدد العتبات وفيه مجال

سويت رسم للواجهة الداخلية ( قطاع طولي ) بس ما كملته ركزت على جهة الدرج حتى توضح .. الدرج موضح بخطوط متقطعة خلف الجدار الفاصل وتحت بسطته المرتفعة يجي الستور الصغير جنب بيت المصعد أقصى اليمين .. تحت جزء الدرج المرتفع مكان نباتات الظل موضح .. ومسوي فتحات دائرية ثنتين اللي بيركب يقدر يشوف الصالة ما يحس إنه معزول عنها

https://i.imgur.com/wpyt76L.png

ما ادري يمكن تركيب درابزين بسيط يعطي انفتاح أكبر .. شرايكم؟