مراجعة التصاميم المعمارية وابداء الملاحظات عليها (محدث)

من أبسط مباديء التصميم على الكمبيوتر وأسهلها هو اضافة الأثاث لأنها تجي وحدات جاهزة حتى بعض شركات الأثاث تسوي مخططات لقطعها حتى يسهل وضعها في الرسم المعماري .. اللي احطها انا وحدات جاهزة مثل السرير 2 في 2 الكنغ سايز وممكن في الواقع الواحد ياخذ أصغر بس نادر اللي ياخذ أكبر ويكون السوبر كنغ سايز ولا يفرق كثير حول 10 سم في اتجاه و 15 في الثاني .. الكراسي ذي نوعية وثيرة وكبيرة وممكن الواحد ياخذ أصغر بشوي والا أكبر بشوي ولا يتغير الشيء الكثير

الكبتات بعضها اسويها بعمق فوق الستاندرد بشوي 70 سم وتكون مناسبة للنوع الثابت الأمريكي وحتى ممكن 75 سم لكن الستاندرد والمتعارف عليه 60 سم وبعضهم يصنعون 50 و 55 .. بالنسبة لغرف الملابس المغلقة نقدر نسوي قواطع تخزين مفتوحة بدون ابواب وهذي نخلي عمقها 35 سم .. أوفر للتركيب والتجهيز وأأمن مغلقة بباب خاص ينقفل

الستور اللي فوق في المخطط السابق 50 سم عرض الكبتات وممكن نسوي مكان خلاله حق غسالة ملابس للملابس الخاصة قريبة من الحمام الموجود والتمديدات مشتركة سواء للتصريف والا للتغذية

بين الغرفتين فوق ممكن نسوي قوس جدام وانا بينته بجدارين صغار طابوق 10 سم يقابله على الحايط قوس محفور 10 سم بعد كروشنة .. الحاجز الزجاجي والباب بيعطينا خصوصية للصالة ما يزعج التلفزيون النايمين

نتجه للبنتهاوس كما صممه الاستشاري

https://i.imgur.com/8sP7gy7.png

أشوف فيه إمكانيات كثيرة بدون تغيير كبير

https://i.imgur.com/FS9955A.png

ممكن نعمل للغرفة اليمنى فوق غرفة ملابس خاصة وراء السرير الثاني اللي وضحته جدام .. حتى ما فيه داعي للكرسي الطويل جدام السرير وممكن نحط كاونتر أدراج وعليه تلفزيون ويكون عندنا ممر مناسب

الغرفة الثانية أفضل نفصل غرفة الملابس عن الحمام ويكونون عندنا بابين مقابلين السرير

كانت عندنا مساحة فوق الدرج النازل غير مستفاد منها نقدر نسوي مخزن فيها كما هو موضح وما وضحت الباب بس معروف مكانه

الاستشاري هذا جيد وانا محظوظ قدرت اطلع كل هذي التحسينات وأفضل الواحد يمشي على خطة من البداية توفر له استغلال مثالي للمساحات وأتمنى للمالك التوفيق ولا يتردد هذا يمكن رابع مقترح يرسله وشكله بعد مب مقتنع

يمين الجلسة فوق نقدر نسوي برغولا ونفتح باب عليها من الجلسة يكون زجاج بعد وتكون عندنا جلسة خارجية

مساحة البنيان 800 متر الا متر والبيت ما شاء الله نموذج متطور للبيوت الصغيرة الإقتصادية أو نقول المتوسطة

الإرتفاع تحت الستور بيكون 2.4 متر يعني كأنه باب مرتفع يمر من تحته الواحد

توضيح أكثر للغرفة فوق وتوزيعها مع تحريك الباب جهة الوسط .. غرفة الملابس نقدر نركب فيها كبت كامل بعمق 60 سم وكبت ثاني 40 سم وعندنا مساحة وراء الباب لتجوري ولو حبينا نفصل منطقة السرير بقوس ممكن وحتى ستارة ولو حبينا وضعية السرير مقابل الباب نقدر نخلي التلفزيون مقابل السرير وكذلك نقدر نسوي كاونتر أدراج وعليه التلفزيون أو نخلي كبت مقابل التلفزيون

https://i.imgur.com/cKIBlw9.png

توضيح للمدخل بين الغرفتين في الدور الأول والقوسين وراء بعض

https://i.imgur.com/2YVDI7k.png

كذلك نقدر نسوي قوس فاصل للممر في دور البنتهاوس ويكون كتف حق كبت أو ممكن نحط جهاز جري للتمرين

https://i.imgur.com/2S3hdc2.png

أمس قمت بزيارة لمشروع يختلف مع إني في السابق صممت مشروع مشابه بس على مستوى صغير كان ورشة اصلاح آليات ومخزن قطع غيار ويعتبر بدائي مقارنة بهذا

صاحب المشروع زميل دراسة وصديق قديم وعنده أرض قديمة في الصناعية طورها لتكون كراج سيارات متطور في الغالب بيكون لإصلاح السيارات الفارهة والله يعوضه تعبه وخسايره في الإنشاء التكلفة بتوصل فوق العشرة مليون بسبب المعدات المتطورة

خذلوه الدفاع المدني بطلباتهم المستحيلة حتى كان مسوي استراحة ومقهى مطل على الكراج بواجهة زجاجية رفضوا الا يجيب زجاج ضد الحريق وهذا أول مرة أسمع عنه ولا أعتقد يوجد وهو حصل نوع مقارب بس تكلفته كانت 350000 ريال .. توني مقترح عليه يركب كيمرات وتلفزيونات تنقل الصورة فوق في القهوة للعملاء بعد ما سكر الفتحة الزجاجية كلها بطابوق

هذي الصورة من تقريباً وسط الكراج وهو ركب بورسلان 40 في 40 خارجي كبديل للايبوكسي حيث كان بيكلف 120 ريال للمتر والبورسلان قيمته 35 ريال + التركيب ما وصل نص المبلغ كإجمالي

https://i.imgur.com/vgnZuGa.jpg

الجيكات كلها حديثة وتحتها إنارة موجهة قوية مغطاة في هذي الصورة

https://i.imgur.com/wDnE5n7.jpg

التصريف للمياه موجود في كل مكان للتنظيف حتى في حفرة هذا الجيك

https://i.imgur.com/7tVdp8K.jpg

فيه 4 مناطق للصبغ الخاص وبتجهيزات حتى شفط للهواء عن رذاذ الصبغ والكيماويات

https://i.imgur.com/SJjhuSp.jpg

المقابل باب غرفة تحضير الصبغ وتخزينه واليمين باب غرفة الصبغ المغلقة

https://i.imgur.com/21pX0TT.jpg

وفوق هذي المنطقة بتكون مكاتب الإدارة

يمين في الخارج غرف سكنية من دورين ومطبخ ودورات مياه للعمالة المدربة وعددهم بيكون بحدود 100 عامل .. ما صورت هذي المنطقة

غرف الصبغ كلها قابلة للإغلاق والفصل وفي حالة الحاجة لفتح غرفتين على بعض ممكن

https://i.imgur.com/8PbUssS.jpg

التكييف متطور وفيه نظام تجديد الهواء وسحبه وكذلك هوزات خاصة لعوادم السيارات سهلة السحب لموقع السيارة

https://i.imgur.com/fH6kEAP.jpg

هذا الحديد الحامل لمجرى هوزات شفط دخان العوادم

https://i.imgur.com/knowlMp.jpg

فوق المدخل يوجد المقهى والإستراحة وهنا كانت نية فتح نافذة تطل على الكراج وتم رفضها من الدفاع المدني كتعقيد ما له داعي لأن وقت الحريق الناس اللي فوق لهم مهرب طواريء بابه ينفتح للخارج والنار لو ابتدت في الإشتعال تعطي وقت للتحرك والمهم هو وجود طفايات وإنذار .. عيل شنقول لمحطات وقود اللي مقابلها محلات بعضها من كل الجهات وواجهاتها زجاجية؟

بعض المعدات الخاصة بغرف الصبغ وراءها

https://i.imgur.com/A66EMDD.jpg

https://i.imgur.com/Z2hN0Sd.jpg

فكرة الصبغ الأسود فوق فكرة موفقة لكن ممكن نسويه أزرق أو نيلي بعد بيطلع أكثر بهجة

https://i.imgur.com/1uHzyA7.jpg

https://i.imgur.com/DBT3ce4.jpg

الإستراحة فوق وهنا قسم سيكون للرسبشن والمحاسبة

https://i.imgur.com/rzdgMf9.jpg

الجدران تأثرت من الرطوبة التي تتكثف على الحديد ولازم إعادة صبغها بعد تغطية السقف بسقف مستعار حتى ما تتكثف الرطوبة

https://i.imgur.com/7Nb53rq.jpg

https://i.imgur.com/ZDXZ9sR.jpg

https://i.imgur.com/GudUjtw.jpg

https://i.imgur.com/fqUWKgg.jpg

هذا درج قاعة الاستراحة فوق وبابه خارجي وكان ناوي يفتح باب يمين من مدخل الكراج داخل بحيث العميل يدخل سيارته وينزل ومن الباب لفوق مباشرة بس الدفاع المدني شروطهم مجنونة ولا شفتها تطبق حتى في أعتى الدول صرامة في الدفاع المدني

https://i.imgur.com/l09V34m.jpg

ماشاءالله ماشاءالله والله شغل مرتب حده ..
اول مرة اشوف كراج يلق بهالشكل لا اله الا الله :o
الله يفتح له ابواب الرزق في كل سيارة كشخة :happy:
:
بس بصراحة زجاج ضد الحريق هذا جديد
لازم نقرا عنه ونشوف مكوناته شنهي .. ;)

اقتباس:

---

المشاركة الأصلية كتبت بواسطة sara jsm

ماشاءالله ماشاءالله والله شغل مرتب حده ..
اول مرة اشوف كراج يلق بهالشكل لا اله الا الله :o
الله يفتح له ابواب الرزق في كل سيارة كشخة :happy:
:
بس بصراحة زجاج ضد الحريق هذا جديد
لازم نقرا عنه ونشوف مكوناته شنهي .. ;)

---

شروطهم تعجيزية يا اختي حتى يبي يفتح باب جهة غرف سكن العمال رفضوا يتخيلون الكراج قنبلة ممكن تنفجر أي وقت ويتخيلون الطابوق بيحمي العالم .. الله يعينه صج كان يبي يفتح ويجيب عمال ألحين صابر بسبب كورونا والتكلفة عليه كبيرة حتى مخلص تصميم بيته وللحين ما بنى من فترة فوق الخمس سنوات بسبب هذا المشروع .. عندنا إجراءات تشيب العقل ويقول صارت تعديلات وايد من ضمنها هذي الجهة اللي سكرها بالكامل وكان مدخل من داخل للدرج فوق وشال الزجاج استبدله بحايط قوي حسب طلبهم

https://i.imgur.com/e0pdCB3.jpg

ودي يسوون مقارنة لمحطات وقود اللي فيها بترول والمحلات مفتوحة عليها وبعضها بزجاج عادي وواجهات كبيرة

مشكلته اشتغل مع استشاري ضعيف تعبه قبل في تصميم بيته وغير لغيره وما ادري ليش رجع له مرة ثانية

أما إنه يلق لا فيه شوية غبار بس كل الأبواب مؤقتة وجاية أبواب ثانية خاصة تمنع الغبار بس مشكلة الابواب بتبقى مفتوحة أوقات كثيرة بس صحيح بسبب التكييف تنفتح لدخول سيارات وتغلق وأعتقد لو سوى منطقة وسطية باب وبعده باب بتكون أفضل لحجز الهواء البارد

اقتباس:

---

المشاركة الأصلية كتبت بواسطة معماري قطري

أما إنه يلق لا فيه شوية غبار بس كل الأبواب مؤقتة وجاية أبواب ثانية خاصة تمنع الغبار بس مشكلة الابواب بتبقى مفتوحة أوقات كثيرة بس صحيح بسبب التكييف تنفتح لدخول سيارات وتغلق وأعتقد لو سوى منطقة وسطية باب وبعده باب بتكون أفضل لحجز الهواء البارد

---

الله يعينه المسكين .. الاشتراطات كثيرة ..
بس لو يحطون قانون وفيه بنود توضيحيه ( بدون ماتتغير في يوم وليله ) كان الشخص فهم عدل وسوا المخطط حسب المطلوب سواء لل البلديه او الدفاع المدني او كهرماء ... الخ

اقتباس:

---

المشاركة الأصلية كتبت بواسطة sara jsm

الله يعينه المسكين .. الاشتراطات كثيرة ..
بس لو يحطون قانون وفيه بنود توضيحيه ( بدون ماتتغير في يوم وليله ) كان الشخص فهم عدل وسوا المخطط حسب المطلوب سواء لل البلديه او الدفاع المدني او كهرماء ... الخ

---

شغلهم مزاجي ويختلف من مهندس الى مهندس وعادي يقولون للواحد كسر والا يطلبون طلب تعجيزي

أهم شيء للحريق الإنذار ومخارج الطواريء ولو كان فيه إطفاء ذاتي يكفينا كل هذي التعقيدات خصوصاً للمناطق التخصصية مخازن كيماويات أو مواد خطرة وسريعة الإشتعال .. أما يخربون فكرة معمارية مناسبة ويطلبون زجاج غالي فوق الإحتياطات الموجودة ليش؟

الإنذار بيخلي الناس تشرد بأسرع وقت الحريق ما يبدأ كبير .. بالنسبة لمدخل خاص للعمال من جهة سكنهم المفروض يكون باب مقاوم للحريق وكيمرات أمنية تسجل أي تجاوز والا فعل معادي من العمال ويتحاسب المتسبب لكن التسهيل ضروري وأتحدى الدفاع المدني يسيطرون على كل مكان قائم وفيه حالات مشابهة موجودة نشوفها شوف العين في وكالات وكراجات لها سنين تشتغل بدون هالسوالف .. أذكر وكالة التيوتا الكراج بينه وبين المكاتب واجهة زجاجية عادية ورقيقة ما تعرضت لمشاكل طول هالسنين وغيره وغيره كثيرين

عندي ملاحظة مهمة وبابديها للمالك واللي هي التبليط على مساحة كبيرة ما فيه ولا فاصل تمدد وهذا بيتقشع بعد فترة من الضغوط الحرارية بعد كم سنة من دورات تغير الجو بين حرارة وبرودة وتمدد وانكماش .. يقدر يسويها ألحين بقص البلاط في خطوط طولية وعرضية متعامدة كل 10 متر أو للأمان التام كل 6 متر .. القص يكون بحدود 1 سم وبعمق مناسب في الخرسانة تحت البلاط ونعبيه بمادة مرنة ماستك أو سيليكون خاص مع حبل مطاطي لتقليل التكلفة ومادة التعبئة وممكن يحتاج للطلب من المكتب الإستشاري إعادة تصميم هذي النقطة حسب سمك البلاط المستخدم وممكن يركب فاصل معدني حسب اختياره بس أشوف هذا ضروري

من يومين إخوي قدم لي مقترح لمجلس ناوي يبنيه وكان شوي غير عن هذا هذا طبق فيه تعديلات بسيطة الإستشاري بس بعد ما راجعته طلعت لي تحسينات أكثر

https://i.imgur.com/3PW05VD.png

https://i.imgur.com/URETCUq.png

باحط اقتراحاتي الليلة إن شاء الله

هذا مقترحي الأخير وزدت عرض المجلس فقط متر والمساحة متوفرة

سويت رواشن مكانها يبين بالأحمر المتقطع

https://i.imgur.com/ijyrSNk.png

المربعات اللي جنب بعض فوق هذي طوب زجاجي للإنارة من أعلى

https://i.imgur.com/6NOAH2P.png

مقترح ثاني مقارب بس بفتحة باب زجاجي أوسع

https://i.imgur.com/29wsCox.png

وهنا توضيح لو استعملنا كراسي كلاسيك

يزيد العدد أكثر

https://i.imgur.com/IBvWBKp.png

يعطيك العافية بو عبدالله، تعديلك في محلة بداية من زيادة العرض.

اقتباس:

---

المشاركة الأصلية كتبت بواسطة سالم الزهران

يعطيك العافية بو عبدالله، تعديلك في محلة بداية من زيادة العرض.

---

الله يعافيك ويبقيك

انا فكرت ليش مبعد المجلس عن السور ثلاث أمتار ونص ومخرب المساحة في بيته قال يبغي يخلي جلسة مسدسة مظللة ألحين في الزاوية ذي بانيها .. التخطيط يسمح بمتر ونص وحق بعضهم مباشر على الشارع وإخوي يبغي يستفيد من بيته بتأجيره لأن شارعنا خدمي وما اشوف الجلسة السداسية أو المثمنة لها معنى يمين مدخل المجلس .. قلت له ليش ما تفتح السور وتركب حديد قال ابغي خصوصية .. في النهاية التعديلات اللي تستوي هي الممكنة وحسب اللي يبغيه المالك

من نكت التخطيط عندنا .. تذكرون التصميم اللي زاويته فيها درج من الحوش نازل جهة البيسمنت وخططنا نسوي حديقة نازلة ملاصقة للسور؟ هذا عرضت جزء منها خلال الموضوع وألحين وصل الإستشاري للموافقات والتخطيط قالوا له لازم تخلي متر تصغر المكان المحفور مع البيسمنت .. شتبريرهم للمتر هذا؟

قالوا لو لا قدر الله وصار حادث وسيارة ضربت السور وكسرته ما يطيح سايقها في الحفرة بها .. كنا متخوفين من الجهة الخلفية بسبب وجود عمارة ملاصقة للأرض قالوا من الخلف عادي لكن من الجنب مشكلة وهذا سببهم .. ما ادري ليش يفكرون في سيناريو مستحيل

سؤال للنقاش .. ما هي الأُمور التكميلية اللي نطلبها في المنزل؟

وقصدي هنا كتوزيع مساحات داخلية وتحديد وظيفة كل مساحة حتى نبني عليها الإضاءة والكهرباء والتكييف .. وحتى يكون التصميم في البداية عملي ومريح ومكتمل العناصر تقريباً

https://a.top4top.io/m_1855ozg3l0.mov

:shy:

اهم شي عدم المبالغة في الامور الي ذكرتها

مثال : عندي الصالات تحت مركب 7 مكيفات ( جنرال ) بستن في عز الصيف او الرطوبه 3 بالكثير تبرد الصالات مع ان المساحات تقريبآ شبة مفتوحه .

الاتهمام بصاله العلويه الدور الاول مكان الجلسه ومكان ال tv لان الاغلب تكون الجلسه اليوميه فيه .

اقتباس:

---

المشاركة الأصلية كتبت بواسطة سعود.

https://a.top4top.io/m_1855ozg3l0.mov

:shy:

---

عجيب الرد اخوي سعود يالله جاوب

من ملاحظاتي انا على البعض إنهم ما يقتنعون براي المهندس في تصميم المساحات وبعضهم يختارون مدخل واسع للبيت يضيق مساحة مجلس مثلاً أو صالة وهي اللي في الغالب تكون في المقدمة

بعضهم يبغي غرفة كبيرة بدون تقسيمها لمساحات وظيفية .. مثلاً الغرفة تجيك فيها منطقة السرير والكبتات وممكن ممر وممكن تسريحة أو طاولة مكياج وممكن مدخل خاص ومرتب لدورة المياه .. بعضهم يرتب غرف العيال غرفتين بينهم دورة مياه للبنات وكذلك غيرهم للأولاد .. المشكلة الخيارات كلها جيدة وفيها جوانب سالبة وجوانب ايجابية مثل مثال الغرفتين اللي بينهم دورة مياه بس يكبرون شوي العيال تحصل الوضع ما يكون مريح لهم حتى لو الغرفة كبيرة

التخزين مشكلة مؤرقة للجميع ودوم نلاحظها في بيوتنا مع مرور الزمن ولازم نعمل حسابنا لها من البداية .. ومساحات التخزين لو وفرناها ما يكلفنا تشطيبها الشيء الكثير .. في تصميم أخير اشتغلت فيه مع أحد الإخوان إقترحت مخزن مقسوم لقسم عام للخدامة تفتح الباب وتحط الملابس المكوية ومنه ياخذون أفراد العائلة لغرفهم وفيها غرف ملابس مقفولة وخاصة أو فيه بعد جزء من المخزن خاص أما بقفل بصمة أو رقم سري أو ينقفل بمفتاح وهذا للأغراض الثمينة والخاصة ومنها حتى الملابس

https://i.imgur.com/zeU1wq0.png

اقتباس:

---

المشاركة الأصلية كتبت بواسطة سعود.

اهم شي عدم المبالغة في الامور الي ذكرتها

مثال : عندي الصالات تحت مركب 7 مكيفات ( جنرال ) بستن في عز الصيف او الرطوبه 3 بالكثير تبرد الصالات مع ان المساحات تقريبآ شبة مفتوحه .

الاتهمام بصاله العلويه الدور الاول مكان الجلسه ومكان ال tv لان الاغلب تكون الجلسه اليوميه فيه .

---

كلامك صحيح ولاحظته التكييف يحاولون يبيعونك أكثر ما يمكن وانا انتبهت وقللت منه ومن أيام زاير بيت ممدد حق 3 مكيفات للغرفة الرئيسية واثنين بيكونون كافيين وزود بس احتياط ولتوزيع الهواء أفضل

أوقات تكون من ضمن الأخطاء عمل درج عريض وواسع بدون داعي حتى يضيق الحوش وأفضل تصغيره وعمل أحواض زراعية جنبه تطلع أحلى وحماية للدرج بدال الدرابزين

أوقات صالة صغيرة أو مطبخ صغير وله باب ضرفتين بدون داعي والأفضل يكون باب واحد وبعرض متر كفاية بدون مبالغات

وأوقات نعمل حوايط كثيرة ممكن نستغني عنها بانفتاح أو واجهة زجاجية تعطينا امتداد بصري وبنفس الوقت خصوصية وعدم انتقال للصوت مثل صالات التلفزيون أو الدراسة أو اللعب أو حاجز تقسيم دورة المياه

ابا عبدالله

فيه جزئية يمكن كثير يختلف معاي فيها . وانا مقتنع بها الي هي الدرس روم :waiting: انا اشوفه يصلح فقط لزوج والزوجه فقط . اما غرفه الابناء فياخذ مساحه ع الفاضي خصوصا اذا كان النظام كل واحد بغرفه لوحده اشوف نحط كبة ملابس تغني عن الدرس ؟؟؟؟ ابي ردك بدون مجامله :app2:

اقتباس:

---

المشاركة الأصلية كتبت بواسطة سعود.

ابا عبدالله

فيه جزئية يمكن كثير يختلف معاي فيها . وانا مقتنع بها الي هي الدرس روم :waiting: انا اشوفه يصلح فقط لزوج والزوجه فقط . اما غرفه الابناء فياخذ مساحه ع الفاضي خصوصا اذا كان النظام كل واحد بغرفه لوحده اشوف نحط كبة ملابس تغني عن الدرس ؟؟؟؟ ابي ردك بدون مجامله :app2:

---

حق الأولاد نقدر نقول كلامك صحيح بس للبنات انسى وعن تجربة

عندي بنتين الله يحفظهم كل وحدة تخزن خارج غرفتها والتخزين للأغراض الغالية في غرفة ملابسنا .. حولنا صالة فوق في البنتهاوس كانت رياضية للتخزين العام وحطينا كبتات فيها للثياب والشناط .. غرفة بنتي كبتها عرضه 4.6 متر من حايط لحايط وكنت متخيل مستحيل ينترس ومسويه عميق بعمق 75 سم حتى لتخزين شناط واقفين وراء الثياب ممكن لكن ألحين فيها كم علاق كبير اللي بتواير يتحرك فيه ملابس تخزين مفتوح

بعدين غرف الملابس تقدر تحط فيها رف عريض فوق مكان تعليق الثياب للكراتين والشناط وكل اللي تحتاجه درج صغير حتى تقدر تطال فوق

إذا عندك غرفة 5 في 7 في الغالب تكون زايدة عن حاجتك حتى 5 في 4 بتكفيك للنوم تبقى 3 في 5 تقدر تقسمها لغرفة ملابس محترمة لدرجة تقدر تحط طاولة وسطية لزيادة التخزين وتكون استفدت من المساحة أكثر

احترم رايك*

اقتباس:

---

المشاركة الأصلية كتبت بواسطة سعود.

احترم رايك*

---

حاجتك إخوي سعود لمساحة صغيرة عرض متر و 80 سم كافي حتى أقل ما عندك مشكلة وأوقات تكون عندك مساحة كبيرة كطول مثل 6 متر لكن عمق أو عرض عندك متر و 40 سم مثلاً .. هذي تكفي لأن الباب بيجيك على الحايط الطويل اللي 6 متر وتفتحه حتى لو كان بعرض متر للداخل تبقى عندك 40 سم هذي كافية للقواطع بالضبط 35 سم مثالية وحتى 30 تمشي .. بايب تعليق الملابس يكون في طرف القاطع الخشبي اللي بعرض 30 ياخذ جهة الداخل حول 2 سم بتيكون عندك عمق 28 سم الثياب داخلين فيه داخل .. وعلاقات الملابس مقاسها معروف شوي أقل من 40 سم نصها 20 وعندنا 28 يعني بتزيد 8 سم و20 سم بتبقى بارزة لسهولة الفرز منها ناقص 2 سم اللي فعلاً بتكون بارزة بحدود 18 سم .. 18 + 28 = 46 سم ومن الصوبين تعطينا 92 سم والباقي عندنا حول 48 سم للمرور بين الملابس .. للأحذية ما نحتاج أكثر من عرض 30 سم وشوي أقل بعد ممكن وهذي بتكون في صفة الملابس وشوي داخلة مب بارزة .. نفس الشيء لأرفف صغيرة للملابس المطوية والمجوهرات وأي غرض ثاني

الي اقصده ان كل المساحات الي ذكرتها بخليها داخل الغرفه .

بناءً على المثال السابق فرضاً بتسوي قواطع من جهة 30 وبتستهلك 46 سم من العرض 18 منها ثياب تحتك فيها عادي .. وفرضاً بتقول الجهة الثانية باخليها تعليق بشكل عرضي لبعض الملابس وبعمق بس 20 سم ولا شيء منها بارز .. يعني بنحصل 46 + 20 = 66 سم والباقي للمرور والإختيار بيبقى عندنا 74 سم كفاية للإنسان السمين يمشي براحته .. حتى بعض الارفف بعمق 20 سم كافية لبعض الحاجات ومنها الثياب المطوية لو طويناها أكثر وفيه علاقات تنسحب تاخذ الممر وتختار منها وتغلقها تستوي بعمق بسيط ما يزيد عن 20 سم

اقتباس:

---

المشاركة الأصلية كتبت بواسطة سعود.

الي اقصده ان كل المساحات الي ذكرتها بخليها داخل الغرفه .

---

فاهم قصدك الوسع زين بس التوزيع الوظيفي أفضل بعد

بنفس المبدأ ممكن تسوي حايط دورة المياه زجاج يعطيك انفتاح أكبر وسعة بس اللي انت تحتاجه للنوم مساحة محددة 2 في 2 للسرير وعلى الجنب لكبتات السرير على حسب 60 ممكن العرض وممكن 80 وهذي حتى كافية كمساحة مرور جدام للمرور لو عندك مترين بتقدر تحط كبت 60 سم أو طاولة عليها تلفزيون وتبقى عندك متر و40 للمرور .. انت بهشكل تستفيد من المساحة وتوزعها صح وغرفة الملابس اللي بباب ومغلقة بتوفر لك مكان خاص وتأمن فيه على كل أغراضك

زين نفترض إنسان باني ومخلص ويبي يسوي هذي القواطع .. العملية سهلة جداً وتنعمل ببارتشن خشب أو جبس أو طابوق سيبوريكس للخفة و 10 سم .. والكهرباء تنقل للحائط الجديد بتمديد جديد تحت الارض أو في السقف حتى لو مكشوف هذي الغرفة ما بتركز كله فوق ودخولها قليل وقت الحاجة

اقتباس:

---

المشاركة الأصلية كتبت بواسطة سعود.

ابا عبدالله

فيه جزئية يمكن كثير يختلف معاي فيها . وانا مقتنع بها الي هي الدرس روم :waiting: انا اشوفه يصلح فقط لزوج والزوجه فقط . اما غرفه الابناء فياخذ مساحه ع الفاضي خصوصا اذا كان النظام كل واحد بغرفه لوحده اشوف نحط كبة ملابس تغني عن الدرس ؟؟؟؟ ابي ردك بدون مجامله :app2:

---

تدري سعود ( احنا الحريم او البنات ) كل مالقينا سعة للتخزين شرينا اغراض زيادة هههههههه
مايصير يتم الكبت فاضي .. :taunt: عشان جذي لغيت فكرة غرفه الملابس في اكثر من غرفه ..
يا غرفه ملابس او كبت مايصير شيئين .. :victory:

اقتباس:

---

المشاركة الأصلية كتبت بواسطة sara jsm

تدري سعود ( احنا الحريم او البنات ) كل مالقينا سعة للتخزين شرينا اغراض زيادة هههههههه
مايصير يتم الكبت فاضي .. :taunt: عشان جذي لغيت فكرة غرفه الملابس في اكثر من غرفه ..
يا غرفه ملابس او كبت مايصير شيئين .. :victory:

---

مجرمات شوي عليكم

انا مسكين خذت لي زاوية صغيرة في غرفة الملابس وأول ما بنيت قلت هنيه كبت كامل ماخذ واجهة حائط كاملة وفوق فيه تخزين بعد ومسكر للسقف .. قلت مستحيل ينملي .. ألحين أشوف كل شوي رايحين ايكيا وجايبين كبت جديد بعد ما استهلكنا كل مكان ممكن يركب فيه كبت حائط ثابت

المشكلة حتى زاويتي استوى عليها تعدي

:happy: :happy: :happy: الله يعينك يااخي ..

اقتباس:

---

المشاركة الأصلية كتبت بواسطة sara jsm

:happy: :happy: :happy: الله يعينك يااخي ..

---

واياج والجميع

بتسوين نفس الشيء بعدين عارفج

أحد الإخوان ارسل لي هذي الصورة ويسأل عن الحل

https://i.imgur.com/hO3EHP5.jpg

نقلتها هنا بعد إذنه لتوضيح مسألة مهمة وهي مسألة فاصل التمدد أو الفاصل الإنشائي في الجدران والمباني .. خصوصاً أسوار الحوش تكون طويلة وضعيفة وسهل تنكسر كسر طولي لذلك نعمل الفاصل ويستحسن يكون مستمر مع الأرضية حتى الضغوط الحرارية تحصل لها منفذ وقابلية للتمدد قليلاً أو الإنكماش

الفاصل ببساطة قطع طولي يفصل السور مثلاً بالكامل من الأساس وتحت يوضع فيه ما يسمى بالفلر بورد أو كومبرسبل بورد أو حبل مطاطي قابل للإنضغاط وفوق ممكن نفس الشيء وممكن مواد ثانية مثل الماستك ونوعيات السيليكون المقاوم للجو وللشمس وبعضهم يتجهون لنوع معدني أو بلاستيكي يدخل في بعض ويخفي الفجوة

لاحظت كثير في قطر ما يسوونه وبيوت كشخة ومكلفة ويمكن لعدم تعيين استشاري جيد أو لثقة المالك فيما يعمله المقاول وفي خبرته

المشكلة لو ما عملناه ونشأ كسر مثل هذا يكون غير مستقيم ومتعرج وشكله مزعج ولو عملنا له تغطية أو تعبئة بالفوم أو بالفوم وحطينا فوقه سيليكون حتى نقلل كمية السيليكون ويكون فيه شيء يمسك السيليكون بعد بيبقى يبين حتى لو السيليكون نفس اللون بالضبط بس بيكون حل معقول وممكن ما توصل تكلفته ل 100 ريال

الشلخ اللي تشوفونه من الجهتين من هنا ومن وراء وهذا يعني لي إن كان فيه فاصل تمدد أساساً في الجدار وفني الحجر غطى عليه بالحجر بدون احترام الفاصل ومواصلته في الحجر والضغوط الحرارية تفجر بايبات النحاس وتكسر الخرسانة القوية فما بالكم بحجر جيري سهل الكسر والتشكيل

ممكن قص الفاصل في الحجر حتى يتواصل بحدود 2 سم من جانبي الحجر بشكل عمودي ونخلي الجزء المتعرج المبتعد عن العمودي ونسوي له الفوم وفوقه السيليكون الخاص أو حبل الماستك وفوقه ماستك قوي ومناسب وبنفس لون الحجر أو قريب .. يبقى الجزء المتعرج والمبتعد عن العمودي هذا تنعمل له روبة خاصة يعرفونها فنيي الحجر تغطيه تخليه قطعة وحدة من الحجر وأعتقد هذا الحل الأنسب

قصدي توسيع الشق هذا في الجهتين مقدار 2 سم على مسار الخط العمودي هذا حتى من الجهة الخلفية .. وهذا أكيد بيكلف والمفروض يعمله اللي ركب الحجر كصيانة وتعديل .. نلاحظ القطعة أسفل الصورة شوي بادية تنفك في مسار فاصل التمدد واللي انكسرت في الجنب هذي تنعمل لها مونة مناسبة بعد عمل الفاصل في الحجر

المواد ممكن نحصلها عند مابي من مونة صلبة أو سيليكون مقارب للون الحجر وأكيد شغل جديد وبهالطريقة بيكلف أكثر ممكن 500 ريال وحتى 1000 ريال

https://i.imgur.com/8JMA8g4.jpg

فواصل التمدد تنعمل كل 3 متر أو 4 متر أو حتى 6 متر وبتفيد هنا في ثبات الحجر وعدم انكساره أو إنفكاكه من مكانه .. ممكن تتبع فواصل التمدد عن طريق المقاول اللي بنى أو الخرايط لو موجودة أو الإستشاري وضروري نفصل كل مكان مغطيه الحجر بنفس الطريقة

الحين المعلم اللي سوى الشغل هذا تجده مسوي نفس الشغلة مع غير ناس،، يعني اكثر من انسان خسران مواد و فلوس؟