الجديد في عالم المطابخ والحمامات وتصميماتها

حياك الله إِخوي بو عيسى

ما ادري شظروف المساحة اللي عندك ووين الباب وشسويت من تمديدات .. كنت بسوي لك مقترح يتناسب مع ما وصلت اليه من شغل على أَرض الواقع

المساحة اللي عندك حلوه وتنفع لكل هذي القطع وحتى تقدر تضيف عليها بديه لو حبيت .. عندك الضلع 3 متر يكفي حق بانيو ومعاه شاور مثل الصورة المعروضة لو حبيت .. المقاس بالنسبة للدش الجاهز 80 في 80 وفيه 90 في 90 وفيه أَنواع شوي مستطيلة .. لكن اللي بتسويه تحتاج يكون واسع وحسب المساحة عندك لو تسمح المساحة 110 عرض وطول 110 + عرض الكرسي اللي يكون 45 وممكن جدامه 15 أَو 20 سم كمسافة فاصلة يعني اجمالي 110 في 170

هذا للشكل المستطيل السيدة .. عندك الشكل خماسي الأَضلاع مثل اللي في الصورة فوق .. ما كملتها تقدر تشوفها واضحة في الكتاب لو نزلته يقل عندك الطول وممكن تكتفي ب 120 سم طول والباب يكون في الضلع اللي جاي بزاوية 45 درجة وعرض 60 سم كافي للباب.

عندك عدة خيارات لطريقة تنفيذ الشاور .. ممكن ارتفاع 80 سم طابوق وفوقه القزاز والباب طبعاً يجي على طول وفيه ناس يشونه بدون فريم مع القزاز ويطلع أحلى .. عندك حل ثاني اللي هو الطوب الزجاجي .. وعني انا احب الزجاج حتى لو بفريم بسيط ويكون الجزء السفلي طابوق 10 سم بارتفاع 80 الى 100 سم ويكون ملبس بالبلاط ويكون الجزء السفلي قطعة غرانيت مخشنة شوي حتى ما تزحلق وجاية بسلوب مناسب للصرف والصرف يكون على طول في الطرف حتى يصرف الماي سرعة.

لو عندك تقاصيل الحمام باسوي لك مقترح للتوزيع المناسب.

بالنسبة لنوعية البلاط هذي تحتاج تنسيق وصحيح الأَسهل هو النوع الواحد .. وبالنسبة للفنادق بعضها يستخدم أَلوان متداخلة وبلاط مختلف حسب التصميم ويدخل فيها تصميم مطور داخلي .. وصدقني غالبيتها البلاط والغريانيت مركب على بورد خشب ولا جبس وبعضها بصبغ مضاد للرطوبة وبدون بلاط الا في مكان الحوض والشاور.

هلا اخوي معماري

الله يسلمك ضلع ال 4 متر بيكون مقسم بين الشاور والبانيو اخترت البانيو يكون مقاسه 1.80*80 وقلت بخلي الشاور 1.50* 1.20
وبخصوص الطابوق كم عرضه اذا كان ارتفاعه 1 متر
والطوب الزجاجي هل يحل محل الطابوق ؟؟ وهل ممكن اعمل كرسي منه حق اشاور ؟؟
وهل تنصح فيه ؟؟
وين اماكن الي يبيعونها

شاكر لك ومقدر ردودك والله يردك سالم ويشفي مريضكم

اقتباس:

---

المشاركة الأصلية كتبت بواسطة Bo3essa

هلا اخوي معماري

الله يسلمك ضلع ال 4 متر بيكون مقسم بين الشاور والبانيو اخترت البانيو يكون مقاسه 1.80*80 وقلت بخلي الشاور 1.50* 1.20
وبخصوص الطابوق كم عرضه اذا كان ارتفاعه 1 متر
والطوب الزجاجي هل يحل محل الطابوق ؟؟ وهل ممكن اعمل كرسي منه حق اشاور ؟؟
وهل تنصح فيه ؟؟
وين اماكن الي يبيعونها

شاكر لك ومقدر ردودك والله يردك سالم ويشفي مريضكم

---

هلا فيك اخوي والله يرحم والديك ويسمع منك ولا تنسانا بالدعاء انت وباقي الاخوان .. التنويم بعد شوي وبكرة أَو بعد بكرة العملية

انت شفت الصور والمقاسات اللي اخترتها معقولة لو كان عندك البانيو جكوزي أَو عادي مهم تعرف كيف توجهه مع الشاور .. يعني أَحلى لو كان مواجه الشاور وقزاز الشاور يجيك على طرف البانيو حتى اللي في البانيو يحس باتساع المكان .. ولو قدرت تسوي الشاور مسكر من فوق بقزاز خاص أَو بلاستيك شفاف ويكون فوقه سبوت لايت قوي ينور الشاور .. وتسوي الشاور مغلق وتحط فيه جهاز بخار يستوي لك حمام بخار .. وجهاز البخار تقدر تحطه في جهة ثانية خارج الحمام وتوصل له ماي وكهرب .. سعره حول 8000 ريال في النزيه وممكن تحصله في محلات تجهيز أَحواض السباحة .. الكنترول يخلونه لك داخلي.

لو بتركب على طابوق خل عرضه 10 سم حتى توفر مساحة .. وتقدر تركب على سلابات قرانيت أَو رخام ( قطع كبيرة ) بحيث يكون الشاور متميز بلون خاص ومادة خاصة .. حتى من داخل مبطن برخام .. ولا تنسى تسوي كسرات في الحائط للصابون والشامبو .. عمق 10 سم كافي وتتبطن حتى ممكن بلون ثاني من الرخام أَو السيراميك وتقدر تسوي اضاءَة مخفية فيها لو حبيت.

الكرسي صورته مره انا بس الصور اختفت من موقع غلف اب ولا عندي الحين في اللاب توب .. سهل يسونه من الطابوق ويلبسونه بالرخام .. ارتفاعه من 42 سم الى 45 ولا يزيد عن 45 .. 42 مقاس مثالي للجميع .. والعرض 45 بس لا تسويه سيدة بزاوية 90 درجة .. خل قاعدته داخلة داخل حتى تنحني القدم لتحت وتكون جالس مرتاح .. بسوي لك بعد شوي رسمة بمقطع توضح شلون الكرسي

لا تنسى 150 + 180 = 330 وباقي 70 سم فاضية .. مهم في التصميم تكون الصورة شاملة .. يعني هل بيكون بس فراغ ورا الشاور مثلاً ولا نستغل الفراغ هذا ونضيفه للشاور فيكون 2.2 وهو واسع ومريح ما تخسر شيء.

الوقت ما يسعفني والرسمة باسويها الليل بس لهذي الجزئية الشاور والحوض لكن لو عطيتني شرح لحدود الحمام وبابه وين ودريشته وين ولأَي مرحلة وصلت من البنيان باسوي لك مقترح لكل القطع وعلاقتها ببعض

هذا مقترح مفترض على أَساس ترتيب الحوض والشاور على الحايط والطويل ( 4 متر ) .. انا افترضت موقع الباب وطريقة فتحه والدريشة ممكن تكون مقابلة الباب أَو في الطرف .. بعد ما عندي فكرة .. المهم هذي توزيعة مثالية ومساحة 3 في 4 كثير مناسبة لهذي القطع.

على أَساس يكون البانيو أَو الجكوزي اللي 180 في 80 في الطرف وعلى خط واحد مع الشاور اللي بعرض 120 نسوي ما يسمى بحائط مزيف أَو false wall وهذا ممكن نسويه من بارتشن بالجبس المضاد للرطوبة وتركب عليه بلاط أَو ببلايودد من النوع المقاوم للماء marine plywood ونسوي فيه تجويف مثل ما وضحته بعمق 30 سم وعرض متر .. وهذا التجويف من أَعلى وصوب الطرف الداخلي نحط في سبوتات ال أي دي أَو نسوي فتحة بسيطة وانارة مخفية ال أي دي بس على شكل تيوب وممكن تتلون ولا بلون معين .. هذي الكسرة تكون متناسبة مع كسرة المراية بعمق 10 سم وداخلها المراية مثبتة بارزة شوي عن الحائط وخلفها انارة ال أي دي أَيضاً .. نقدر نخلي التبليط كله بلون معين مثلاً بيج وحتى لو نختار قطع بديكور يبقى لنا في الكسرات ديكور متغير ويعطي شكل مميز .. نركب مثلاً خلفية غير بلاط مزخرف مثلاً وأَرفف قزاز للصابون والشامبو والليف .. نفس الكسرة متكررة صوب الشاور بعمق 10 سم وصوب البديه.

http://i.imgur.com/XYmXQCW.png

وهذا مقطع طولي يوضح داخل الشاور والحوض .. الحايط بيكون بارتفاع ما يزيد عن ارتفاع البانيو بحيث يكون فيه اتصال وبعدين يجينا البارتشن القزاز وحوض الشاور يكون معمول من قطعتين من بورسلان قطع كبيرة وخشن شوي أَو غرانيت أَو رخام بطبقة حماية ومانعة للزحلقة .. قطعة طولية لفتحة الصرف مغطاه بقطعة ستانلس ستيل قابلة للفك والتنظيف تحتها ومثل ما هي موضحة طولية وسلوب قطع القرانيت صوبها حتى الماي يتصرف بسرعة وعمق الحوض 2 سم ويزيد مع السلوب لعمق 3 سم.

http://i.imgur.com/stqE5UA.png

أَتمنى كل شيء واضح ومناسب

بالنسبة للشاور ممكن نركب نوع اللي مسمى rain sower وهو العريض ويكون معلق في العادة من السقف لكن تم انتاجه ليكون في الحائط ويناسب هنا وشاور التلفون اضافي .. وللبخار لو حبينا نركبه لازم نسكر سقف بوكس الشاور بفايبر غلاس وهو يسونه تفصيل في قطر وحتى بشكل منحني حتى ما ينقط الماي بعد ما يتكثف فوق وينزل على راس اللي يسبح .. عند المفتاح وغيرهم ويسون فيه فتحات خاصة للسبوتات .. لذلك لازم نعتمد تصميم معين ونسوي تمداداتنا على أَساسه وحتى فتحات الباب والنوافذ تعدل على هذا الأَساس.

جزاك الله خير

شرح وافي وكافي والله ماقصرت

المخطط تقريبا نفس الي عندي الا ان الباب بيكون مكان الباديه والمرحاض بيكون مكان الباب والشباك فوق البانيو والمغاسل اقرب للباب

بعمل 1.80 متر حق البانيو و2 متر الشاور نفس فكرتك بخليهم جنب بعض

الله يرحم والديك ويشفي والدتك ويردها سالمه يارب

الله يوفقك ويرحم والديك ويشفي جميع مرضى المسلمين

لو فيه امكانية تخلي الباب بعيد عن الزاوية 70 سم ( كتف 70 سم ) وينفتح جهة الشاور أَو البانيو بيكون عندك نفس الترتيب ولو الباب في الزاوية وصعب تحركه بتضطر تسوي المغاسل قبل بعد فتحة الباب وبعدها البديه والكرسي بدون حائط فاصل .. باسوي لك هالترتيب لو رجعت لازم اروح المستشفى الحين

بالنسبة للفاصل بين البانيو والشاور يكون بنفس ارتفاع البانيو مع التشطيب سواءً تبليط أَو رخام .. بس تقدر تسويه لو تحب 20 سم بحيث يكون شوي عريض جدام مقدمة البانيو بما انك عندك مساحة كافية .. اللي على الجنب خله بسمك 10 سم ولو طابوق مفرغ ينملأ خرسانة يكون أَقوى

الله يزاك خير يالغالي
والله يسهل امركم

رفعت لك خريطه الحمام بس التغيير الوحيد تبديل الشاور مكان البانيو

http://store2.up-00.com/2015-05/1430731698641.png