الجديد في عالم المطابخ والحمامات وتصميماتها

ما شاء الله بسهولة تقدر تمدد حق جهاز البخار وكهربه حق الجكوزي لو حبيت .. عيب هذي التوزيعة اللي مسويها لك الاستشاري مب مدروسة صح ومكان كرسي الحمام غلط .. ولو الباب ينفتح من ذيك الجهة مثل ما سويت قبل تقدر تحط بديه لو حبيت وتقدر الحين بعد بس لازم تضحي بمغسلة.

سويت ثلاث مقترحات متقاربة لتوزيع أَفضل كبرت الشاور شوي من اليسار بحيث يكون 1.4 متر في مترين من داخل خصوصاً لو ركبت بخار تحتاج شوي سعة للنفس .. تم تعريض قاعدة المغاسل ل 30 سم وتقليل العرض ل 1.85 متر وتقدر تسوي مغسلتين أَو مغسلة وطاولة مكياج وزينة .. والكسرة الصغيرة حق الكرسي ورا المغاسل عرضها 95 سم وعرضها في أَول وحدة يمين 80 سم وكل العرضين كافيين خصوصاً إِن الكرسي في مكان مفتوح .. وفي حمامات المولات والمطارات يجي كامل بعرض 80 سم وأَحياناً أَقل.

حوض الشاور متر في متر وتقدر تزيده ل 110 في 110 سم والدريشة عرضها متر وتبدأَ بعد 1.2 متر من زاوية الحوض .. لو تحب نور طبيعي أَكثر تقدر تسوي صفين أَو ثلاثة من الطوب الزجاجي مباشرة تحت مستوى السقف المستعار .. أَو تكبر الدريشة وتركب زجاج مخشن ما يبين شيء وراه.

لاحظت التكييف عندك سبلت وممكن تحتاج فتحة تهوئة بين حايط غرفة الملابس والحمام فوق مراية المغاسل .. وقت تشغيل مروحة الشفط يدخل الهواء البارد من غرفة الملابس المكيفة ويلطف هواء الحمام .. وهذي الطريقة مسويها في بيتي الحالي .. يمكن تحتاج لنوافذ بارتفاع عالي بعد في غرفة الملابس النور الطبيعي دوم حلو .. وتقدر تسويها طوب زجاجي أَو بفريم المنيوم أَو يو بي في سي ثابتة ما تنفتح


http://i.imgur.com/AqxQeWl.png

ركزت على التصميم الأَخير وضفت له طريقة ترتيب بلاط الأَرضية بمقاس 30 في 30 وقطع ديكور بمقاس 10 في 10 مثل ما هو موضح

http://i.imgur.com/Xikxscj.png

في فتحة الباب لازم نحط نعلة رخام يصك الباب عليها وتكون بشوي أَعلى من حد الباب وحافتها محفوفة حتى ما تنكسر أَو بطريقة دائرية .. بحيث تكون بارتفاع 2 سم أَرفع من أَرضية الحمام .. أَولاً تكون حاجز بسيط للماي لو حصل تسريب وثانياً تعطي شكل جمالي وانتقالي بين أَرضية الغرفة وأَرضية الحمام

هذي صورة توضح منطقة الباب والفريم ومكان الحاجز اللي يتركب من الرخام .. بحيث لو صك الباب يكون من تحت ملاصق لهذا الحاجز المرتفع قليلاً .. بس بيكون الباب تقريباً غير منفذ للهواء لذلك نسوي فتحة تهوئة لتعويض الهواء المسحوب بواسطة مروحة الشفط .. الفتحة أَما في الحائط من أَعلى أَو في الباب.

http://i.imgur.com/DQujgTm.png

ماشالله عليك معماري

عملاق في مجال الهندسة والتخطيط

وعندك وحلول وافكار حلوه

الله يوفقك

حاضر لك اخوي بو سعود ولكل الأَعضاء

تدري يا اخوي التصميم مجموعة خيارات واتجاهات وكل ما فكرت أَكثر وزدت على التصميم كل ما سهلت الاختيار للمالك

كنت من شوي افكر اسوي بوردر حق بلاط الحمام .. بس البوردر ممكن يكون جاهز وممكن ينعمل بقطع البلاط تشكيلة فرساتشي مثلاً .. وتدري التفصيل لازم يطال السقف والاضاءَة و كل حايط وواجهته من وشو تتكون وحتى البلاط يفترض يسويه ويوضحه الاستشاري حسب مقاسه وأَلوانه والعملية سهلة ما تاخذ دقايق.

انا قبل كنت اشتغل ثري دي بس وقفت بسبب اعتمادي على الاوتوكاد فقط وتغييره كل مرة ولا فرغت اتابع كل تطوير ووقفت على التصور ثنائي الأَبعاد .. أَلحين ما شاء الله طلعت برامج قوية وسهلة لكن خلاص هرمنا ونتمنى حد من الشباب الحديثين المتمكنين من هذي البرامج يسوي تصاميم أَحلى

معليش عندي وقت فراغ شوي وواصلت على توضيح فكرة التصميم هذا .. سويت قطاع طولي يوضح منطقة ما قبل المغسلة ومنطقة الشاور وأَكيد فيه شوية نواقص سامحوني عليها.

هو لمعرفة الفكرة الأَساسية للتصميم وتوضيح مكان تركيب الكورنيشات والجبس وقطع البلاط الخاصة .. لباقي الحائط ينفع بلاط سادة أَبيض سواءً 20 في 20 أَو أَكبر.

مستوى البلاط المنقوش التحتي يبدأَ من 85 سم وبارتفاع 10 سم وعرض 30 سم وما شاء الله المقاس مناسب للقطع بدون قص بلاطة .. العلوي 15 في 15 وممكن الحصول على نقوشات مقاربة لهذي المقاسات وأَحلى .. وارتفاع البلاط العلوي 2.4 متر وهو يمر من فوق كورنيش الباب.

http://i.imgur.com/i9tIoHx.png

وباكمل بعض الصور المكبرة حتى تبين تفاصيل أَكثر .. يمكن تلاحظون انحناء المراية بحيث تبين الواقف جدامها أَكثر .. فقط ميلان 2 سم عن الرأَسي.

جزاك الله خير ماقصرت
والله يردكم سالمين معافيين

اقتباس:

---

المشاركة الأصلية كتبت بواسطة Bo3essa

جزاك الله خير ماقصرت
والله يردكم سالمين معافيين

---

الله يعافيك ويجزيك كل خير

حاولت اوضح الصورة أَكثر بس من احولها لبي دي اف تطلع بلون واحد وبدون وضوح ومن احاول احولها صورة بعد كذلك

أَي جزئية تحتاج توضيح قول لي عنها وباوضحها .. المهم المبدأَ يكون مفهوم والتفاصيل سهلة وحتى تتغير شوي في الواقع

حاولت اوضح الجزء الفوقي شوي بتكبيره لتوضيح مبدأَ تصميم السقف والانارة.

الانارة باللون الأَصفر والسقف طبقتين جبس بكورنيش بسيط وانارة مخفية - ال أي دي .. وهذي ممكن تكون بلون هاديء أَو متغيرة الأَلوان وممكن نضيف عليها سبوتات كبيرة في الوسط أَو إنارة نيون مربعة داخل الجبس .. السبوتات الصغيرة موضحة كذلك باللون الأَصفر وممكن نضيف سبوتات كبيرة فوق الشاور والبانيو وفوق مكان وقوف المستحم قرب المغسلة .. هناك كذلك الانارة المخفية ورا المراية واللي جاية غايرة في تجويف بعمق 10 سم في الحائط ومايلة 2 سم عن المستوى الرأَسي مثل ما هو ملاحظ.

http://i.imgur.com/ABYn7n7.png

اليمين يوضح حدود فريم زجاج الشاور بالأَزرق الفاتح والأَرفف المحفور لها بعمق 10 سم كذلك في الحائط وفي أَعلى الفتحة تشكيلة تراثية قطرية من الجبس المقاوم للماء ( قمرية وسميت بالقمرية لتداخل الهلالات والبدر فيها ) وخلفها تخفي عنصر اضاءَة أَما سبوت لايت أَو تيوب ال أي دي.

ممكن داخل المناطق الغائرة نضع نوعية مزخرفة من السيراميك أَو قطعة رخام بعروق متداخلة.