بصمة ...
أنا دايماً أشوف وظيفة "ربة بيت" وظيفة ملكية .. لأن عوايدها المعنوية ما توفيها وظايف الدنيا ولا رواتبها
وأهمها إن العيال يتخرجون ويمشون في حياتهم ناجحين ومستقيمين .. ومتوفقين في دراستهم وأشغالهم.
ما راح اشور عليج بشي معين .. بس بقول نقاط عامة إنتي قيسي عليها وضعج .. وإنتي قرري ..
- الوظيفة صج حلوة .. وتصقل الشخصية وأحلى مافيها صراحة انج تلتقين ببنات من كل مكان ..
واذا كنتي محظوظة بيجون على جوج ومزاجج ..
لكن مرات يكون الشغل نقمة تنغص عليج حياتج ليل ونهار.
- لما تقولين العيال في المدرسة .. ترا صج هم في المدرسة لكن يمرون بمراحل نمو اتغيرون فيها
فهم بحاجتج ومحتاجين تكون عينج عليهم أكثر من أول..
إذا الوظيفة شغلها خفيف .. ما راح اتاثر على اهتمامج فيهم ..
لكن اذا الوظيفة متعبة .. بتعيشين في دوامة الدوام والارهاق وطبيعي راح تغفلين عنهم شوي... يعتمد عليج.
اذا انتي مب محتاجة للمادة .. أو الموجود مكفي ..
انصحج نصيحة ... حطي حيلج في القرآن ولاتحطينه بوظيفة علشان وقت الفراغ أو غيره
حطيه في حفظ وتدبر وقراءة وترتيل وتفسير ... اذا اشغلتي نفسج به ماراح يكون عندج وقت فراغ
أغبط كل وحده حافظة لكتاب الله كامل ..
اذا تخافين الملل انتي جددي نشاطاتج واللي مثلج وبمثل شخصيتج الواضحة لنا ..
تحتاجج الأعمال التطوعية .. راح تكونين إضافة وبصمة مميزة لهم...
وفيه بعد أندية القراءة ... جداولهم روعة .
اذا في خاطرج تجربين الوظيفة قدمي وشوفي التساهيل ..
وأحلى وظيفة أنصحج بها .. الطباعة .. أوالبريد
لا تعورين راسج وايد ... خلي طاقتج للعيال والبيت
والنصيحة: من تطلعين من الدوام تخلين كل شي يخصها في المكتب .. ماتاخذين مشاكلها واياج للبيت
... والله يوفقج ويكتب لج الخير وين ما يكون.