شوف تراني بجاوب عليك للمرة الثانية على التوالي و انت للحين ما رديت على سؤالي..اقتباس:
المشاركة الأصلية كتبت بواسطة R 7 A L
بالنسبة لسؤالك
من قال لك ان البلا بس في طلاب قطر؟
فلا الكويت و لا الامارات و لا البحرين و السعودية اعلى منا في مخرجات التعليم الحكومي.
قد تكون لهم أسباب ما اقدر ادعي معرفتها.. لكن عندنا في قطر
راح اذكر لك امثلة
كانت عندنا المدارس النموذجية ماشية مثل الفل قياسا مع مخرجات المدارس المستقلة
اقلها الطالب محصوله في اللغة العربية و الشرعية اكبر و افضل كأقل تقدير لمخرجات التعليم في كل المواد.
من طبقوا فكرة المدارس العلمية على الطلاب المتفوقين في قطر في المرحلة الثانوية
افتحو لهم مدارس للابتدائية و الاعداداية..
و الفكرة كانت جذب واختيار المتفوقين او أصحاب القدرات العالية..
اشويات الا الناس يطالبون ان عيالهم يدخلون هالمدارس فليش ولد فلان دخل و علان دخل و ولدي ما دخل
وليش يسوون اختبارات .. هذي مدارس حكومية و من حق عيالنا يدخلون و... و.... و...
راحوا ايامها و طبقوا نظام المدارس المستقلة.. و سجلوا الطلاب حسب التوزيع الجغرافي
يعني حتى مدارس البيان و عمر صاروا ياخذون الأطفال و الطلاب جيران المدرسة
يعني ما في شي اسمه مدارس للمتفوقين بمناهج قوية..
بل اللي صار الى المعايير نزلوها علشان اللي مستواهم ضعيف يقدرون عليها.
و فوقه رضخوا تحت طلبات أولياء الأمور اللي ما يبون واجبات كثيرة حق عيالهم
و اشوي و اشوي و اشوي في مدارس مستقلة بعض الطلبة وصلوا 4 ابتدائي و انصدموا انهم
ما يعرفون يكتبون كلمة مثل الناس.
و الغوا تقريبا كل ما يتبع نظام المدارس المستقلة و ردوا على الكتب .. و ما بين كل فترة و فترة يطلع لنا واحد
يشتكي على درس من الدروس او كتاب من الكتاب و يقولون ما نعرف نحله..
او صعب.. و عيالنا ما يقدرون و عيالنا اتعبوا.. و احنا نعاني و ... و....
و هالسنة العالم زعلانين ليش عيالنا يداومون بعد العيد و المفروض يأجزون!!
و نسمع دعاوي وتحسب على الوزارة :omen2:
اذا بتقول لي لو كنتي وزيرة اشبتسوين؟
بقول لك الحل ان الدولة تخصص مدارس ب 3 مستويات
مدارس النخبة
مدارس المتفوقين
المدارس العادية
المدارس العادية لاولياء الأمور اللي يبحثون عن دوامات مخففة و منهج مخفف و يحنون ويزنون في كل سنة.
مدارس المتفوقين للطلاب اللي دواماتهم و مناهجهم تكون كما هي الحين في الوزارة مع تعديلات فيها.
اما مدارس النخبة هذه للطلاب اللي قدراتهم عالية و بحاجة الى تعليم يحترم قدراتهم فمناهجهم تكون على قدر
المناهج الدولية و اطور منها ..
مع فتح الباب للانتقال ما بين هالمدارس عند تفوق المستويات الدنيا او تعثر المستويات العليا..
اعتقد بالطريقة هذه وايد ناس بيخجلون من وجود عيالهم في مدارس مستوياتها نازلة
و بيفهمون ليش الوزارة كانت تحاول اتطور عيالهم بس هم كانوا يبون المنهج و الدوام على كيفهم.
وأخيرا
ممكن ترد على سؤالي اللي تتجاوزه:(؟
