موضوع متكامل للحجوزات والاستفسارات وتنظيم رحلات السفر

اقتباس:

---

المشاركة الأصلية كتبت بواسطة فانفير

السلام عليكم
جزاك الله خير الجزاء على الشرح المفيد
اخوي ان شاء الله بنروح مكه بتاريخ 22-7 والرجعه بتاريخ 27-7 وادور حجوزات على فندق زمزم او فندق داد التوحيد بغيت جناح رئاسي بس ما لقيت في بوكنك حجز اذا تعرف موقع ثاني أو شخص من السعودية يقدر يحجز لي

وبغيت اعرف اي طيران يروح لطائف لان القطريه مافيها رحلات يوم الثلاثاء للأسف

---

عليكم السلام ورحمه الله وبركاته

ويجزاك بمثله يااااارب

اخوي بالنسبه لفندق دار التوحيد مستحيل تحصل فيه
احنا مكلمين واحد من 3 شهور مسؤول هناك بالفندق
قال بحصلكم غرفتين بس وبعدها نحولكم جناح لان الحجوزات مليانه

فما بالك في هالوقت صعبه جدا اخوي
وانا دورت في كل المواقع الي اعرفها مافي حجوزات حتى الغرف العاديه


وبعد بنحاول لك اخوي
وجاري الاتصال بمديرهم على الجوال :telephone:

لما يعطينا خبر راح اخبرك ان شاء الله

فندق زمزم

بالنسبه لفندق زمزم بولمان هذي انواع الغرف المتوفره بنفس التاريخ

http://www.hotelscombined.ae/Searche..._Zamzam_Makkah


عندك فندق فيرمونت برج الساعه في مكه
وهو اعلى مبني في برج الساعه مكه
وهو الي عليه الساعه

يوجد عندهم جناح كبير بسرير ملكي
مساحه الجناح 172 متر مربع
حق عدد 3 اشخاص كبار وطفل
يعني المجموع اربعه

عندهم اجحنه مميزه مطله على الحرم
واجنحه مميزه مطله على الكعبه الشريفه


فندق فيرمونت برج الساعه اضغط هنا


بالنسبه اخوي للطيران
دخلت على موقع يشيك كل خطوط الطيران الي تروح الطايف دايركت بتاريخ 22 يوليو
مافي ولا خطوط تروح دايركت

القطريه اليوم الوحيد الي ماتروح الطايف هو يوم الثلاثاء
ماتقدر تقدم او تأخر يوم
لان القطريه تروح تاريخ 21 و تاريخ 22 يوليو دايركت الى الطايف

كل خطوط الطيران الي تروح الطايف بتاريخ 22 يوليو

http://www.skyscanner.net/transport/...014.html?rtn=1

بتلاحظ في فلاي دبي تروح دايركت
لكن هي مب دايركت بس شكلها بغلط :rolleyes2:

لكن ليش ماتروح على جده
الخطوط القطريه والخطوط السعوديه تروح بتاريخ 22 يوليو


وأي استفسار انا حاضر الله يسلمك


وبالتوفيق ان شاء الله

اقتباس:

---

المشاركة الأصلية كتبت بواسطة silver stone

جزاك الله خير اخوي غير البشر وما قصرت
الصراحه مبدع كالعاده


بانتظار مخطط باريس

---

ويجزاك بمثله يارب اخوي سلفر ستون
تسلم على الكلام الطيب
ابشر من عيوني بحاول اليوم ان شاء الله انزل لك باريس


ام جاسم مخليها لين عقب حسابها معاي ههههههههههه
السموحه ام جاسم راجع لج ان شاء الله :shy:

اخوي فانفير
بخصوص فندق دار التوحيد
كلمنا مديرهم وحصلنا سويت كبير
من ثلاث غرف نوم ومطل على الحرم
بس مادري هو الرئاسي او لا
وبنفس التاريخ الي تبغيه

طلعنا منه بالموت ههههههههه
لان بموقعهم وجميع المواقع مافيه حجوزات مليان

وبعد هم مايحسبون من تاريخ 22 الى 27
هم يحسبون العشر الاواخر يعني تدفع تكلفه عشر ايام
سواء سكنت يوم واحد او سكنت عشر ايام نفس السعر

والسعر الاجمالي 350.000 ريال

اذا يناسبك بعطيك رقم تلفون مديرهم واسمه على الخاص

وبالتوفيق ان شاء الله :nice:

اخوي فانفير رسايلك مليانه
اتمنى تفضي بعض رسايلك

جهد تشكر عليه اخوي والله يكثر من امثالك

اقتباس:

---

المشاركة الأصلية كتبت بواسطة قانوني

جهد تشكر عليه اخوي والله يكثر من امثالك

---

ياهلا ومرحبا بك اخوي قانوني
شارك لك مرورك وتعليقك الجميل

جزاك الله خير وامثالك ان شاء الله :nice:

اخوي سلفر ستون
بالنسبه لباريس

الاماكن الي تروح لها

1- الشانز + قوس النصر وتقدر تركب فوق القوس لو حبيت تصور
2- وانت بقوس النصر بأتجاه الشانز تكمل اخر الشارع تمشي تقريبا ربع ساعه بتحصل ساحه اسمها ساحه الكونكورد وفيها المسله
وهذي المسله مسروقه من الاثار الفرعونيه بمصر
3- با الاتجاه الثاني من الساحه بتحصل مدخل حق حديقه في بحيره صغيره وبط ومنطقه جلوس
التجول بالقارب وهي منطقه قريبه من الشانز ممكن اي تاكسي ياخذك عليها
وتتجول بالنهر في البدايه يروح جهه كنسيه روتردام وجسر العشاق :shy: هههههه
وبعدها يرجع مره ثانيه ويروح صوب برج ايفل وبعدها ينزلكم من مكان ماخذكم

4- متحف اللوفر ( لوحه الموناليزا الاصليه )
وهذا المتحف بتحصله نهايه نفس الحديقه الي فوق

5- ساحه الاوبرا منطقه حلوه للتمشي وفيها حركه
وفيها مجمع حلو وصغير اسمه جاليري لافاييت
وفي هذا المجمع اذا شريت اي اغراض وعندك تاكس فري
تقدر تاخذه من المجمع مافي داعي تاخذ التاكس فري من المطار

ملاحظه :

اذا شريت ببطاقه الاي تي ام العاديه تنجبر تاخذ التاكس فري من المطار
اما اذا شريت من بطاقه الفيزا فتدق تاخذ التاكس فري من المجمع نفسه كاش

ملاحظه ثانيه :

احترس احترس في منطقه الاوبرا بتحصل تجمع لأربع او خمس بنات مع بعض بشكل مجموعات
يقربون من الحريم وياخذون شكلي دائري عليهم ويسوون حركات للفت الانتباه على شي
وواحده منهم تسرق الشنط وهذا منتشر في منطقه الاوبرا بشكل خاص

6- برج ايفل وحديقه ايفل والمنطقه الي حولها

7- حديقه بولونيا
وهي قريبه من فندق كونكورد لافاييت
وهي عباره عن حديقه + منطقه العاب الكترونيه ( غاليه ) + وانت بكرامه حيونات اليفه منزليه

8- اللاديفانس ( باريس الجديده )
وهي منطقه جديده وراقيه جدا ومبانيها كلها جديده عباره عن ابراج
في بدايه منطقه اللاديفانس يوجد مجمع اسمه temps (الفصول الاربعه )
انصح بزيارته

9- مرتفع مونتمارتر Montmartre
هو مرتفع يجي بعد ساحه الاوبرا تقدر تشوف باريس من فوق

10- متحف الشمع Grevin Wax Museum
يوجد في منطقه الاوبرا وقريب من ساحه الاوبرا
تقدرون تروحون له بنفس اليوم مع الساحه

11- مجمع اسمه Centre commercial Créteil Soleil
مجمع كبير وحلو

12- مجمع جاليري لافاييت جنب اطول برج في اوروبا
اسمه La Tour Montparnasse
وداخل يوجد مطعم ايطالي فوق بالمجمع يطل على باريس كلها

13- حديقه لوكسمبورغ Jardin Luxembourg
وهي قريبه من مجمع جاليري لافاييت رقم (12)

14- مطعم نوره اللبناني
مطعم جيد انصحك بزيارته
المطعم الرئيسي خلف فندق فور سيزن

عنوان المطعم 27 Avenue Marceau, 75116 Paris, فرنسا

وعنده فرع ثاني في منطقه الاوبرا قريب من ساحه الاوبرا

اذا انت من عشاق الكرك بدليك مكان للكرك بعد بس خبرني هههههه :shy:


15- دزني لاند
بالنسبه لدزني لاند
الالعاب كلها زحمه وطابور طويل عليه
يعني تصف طابور نص ساعه الى ساعه يادوب تلعب لعبه وحده
اذا تبي الراحه وتلعبون اكثر انصحك تطلب قايد
والقايد يكون متوفر عند الكاشير بحيث هذا القايد هو شخص يرافقكم لمده 6 ساعات داخل الحديقه
وميزته يدخلكم كل لعبه بدون طابور من باب اخر يسمى VIP
وسعر 6 ساعات 500 يورو
بس مرات يكون في ضغط على القايد وماتحصلون اذا تبغونه حاولو تحجزونه من بدري
او ان في شارع الشانز في محل دزني لاند هناك
تقدرون تشترون التذاكر من عندهم
ويمكن يكون عن طريقهم تقدر تحجز قايد

16- اوت لت لافيلج

يفضل دزني والاوت لت بنفس اليوم ممكن يكون عليكم تعب
بس لانه بنفس المكان بينهم خمس دقايق بس


بس ها الاماكن الي ممكن تزورها هناك اخوي

السموحه مانزلت لك بالخارطه اذا تحتاجها خبرني وانزل لك الاماكن بالخارطه

وبخصوص بعض الاماكن تقدر تروح لها بالمترو
اذا بغيت تعرف محطات المترو خبرني ومايصير خاطرك الاطيب


وبالتوفيق ان شاء الله والسموحه على القصور :nice:

انا احب اسكن في نيويورك
وخاطري اجرب الماريوت
او فنادق قريبه من الفال دي يورب
شنو تقتررح
؟؟
وفندق نيوبورت ابد ماعجبني

السلام عليكم

جزاك الله خير اخوي فضيت الرسايل

اخوي غير البشر
ممكن تحط لي خريطه لشلالات شافهاوزن والمسافه بينها وبين زيورخ
وكم المسافه
ماعرفت اطلعها بجوجل