مراجعة التصاميم المعمارية وابداء الملاحظات عليها (محدث)

هذا مقارب للتعديل اللي سويته قبل .. الأسود السميك بيكون حديد مشغول .. ويما إن ارتفاع الدور الأرضي قريب ال 5.3 نقدر نخلي هذا المدخل بدون سقف مستعار نقدر نركب خشب فوق مثل البرغولا أو خيوط بلاستيكية سميكة شوي للنباتات المتسلقة تطلع على الحديد المشغول أو حتى نسوي بداله مشربية خشبية أو جبس وبعدين تتعلق على هذي الخيوط .. ممكن كذلك زراعة العنب بيكون شبه داخلي وخارجي .. وفيه بروزات على الواجهة تظلل لو انا مكان المالك كنت شلتها لأن المدخل محمي من الشمس والعتبات استوت مريحة ونازلة ولا بيأثر فيها المطر بتكون مزحلقة مثلاً لو خذناها خشنة مثل البورسلان الحجري السميك .. وبتكون كل عتبة بارزة 6 سم مع إضاءة مخفية وعندنا اضاءة الزراعة بعد بتعطي ديكور حلو للمدخل

https://i.imgur.com/z2Affui.png

نروح للدور الأول وفيه صارت تعديلات كثيرة باترككم مع التوزيع اللي اشوفه مناسب

https://i.imgur.com/CT8v4ss.png

فيه منور سقفي فوق الفتحة المطلة على الدور الأرضي والمكتب فيه درج حلزوني يودي حق مكتبة فوق ومنطقة تخزين للكتب .. الغرفة الصغيرة أظن حق التخزين مثل الخزنة وأشوف ممكن نكبرها شوي جهة الدرج الحلزوني المنطقة هذي ميتة

بالنسبة لتوزيع دورة المياه الرئيسية انا افضل هذا التوزيع .. حتى في منطقة الشور والجكوزي نقدر نحط كرسي بلاستيكي وهي معزولة عن بقية الحمام بزجاج وممكن نركب مضخة بخار ويكون حمام بخار بنفس الوقت مع شور وجكوزي .. الجكوزي الفري ستاند موضح في الرسمة السابقة

https://i.imgur.com/e93EkFL.png

دور البنتهاوس لاحظت فيه مسوي دورة المياه مب فوق السفلية وسحبت اللي حق بيت ولدي حطيتها فوق مكان جدار الحمام السفلي يمين والجدار الثاني مكان الخط اللي جدام السرير بس هذي غرفة إضافية ممكن يصغر الحمام مثل اللي مسويه انا ويفصل غرفة الملابس الى غرفة بباب ولو احتياجه لغرفة بدال المخزن ممكن يحوله لغرفة من الآن ويستعملها كمخزن .. بعدين تفضيتها لإستعمالها كغرفة بيكون سهل

https://i.imgur.com/C4SYNdj.png

مثل هذا الشكل قصدي .. وهنا تلاحظون الخطوط المتقطعة تحت .. هذي مظلة خرسانية بارزة حتى تعطي شكل معماري ممكن نستغني عنها نخفض التكلفة شوي وتكون واجهة البيت أكثر انفتاح مع رفع المنور السقفي ويستوي يبين من بعيد

https://i.imgur.com/EfERGwR.png

رتبت شوي منطقة الغرفتين فوق .. ومثل ما ذكرت الغرفة اليسرى أو حتى الثنتين ممكن نستخدمهم أي استخدام مؤقت لين الحاجة للتحويل لغرفة واستغلالها تكون سهلة وممكنة بدون شغل صيانة قوي

https://i.imgur.com/tMTwcew.png

كبرت الغرفة اليمنى مع دورة المياه وممكن نحط حتى كاونتر تلفزيون بعرض 60 سم وأدراج لو حبينا بين الباب مال الحمام وباب غرفة الملابس وتفاصيل الحمام واضحة .. 3 في 1.6 متر .. إقتصادي وصغير مب شرط كل الغرف نسوي فيها حمام واسع

https://i.imgur.com/a4RyV8K.png

دريشة الحمام اليمين بتكون وراء الباب وطولية ممكن أو عادية مرتفعة نسويها حسب الرغبة الدكت العريضة مخربة وانا ما تدخلت في نظام الدكتات المالك عارف وقال بيسوي حائط مزدوج والدكت مدمجة فيه وفي هالحال ممكن ترتيب الدرايش ترتيب ثاني حسب الواجهات وما أعتقد تأثر الواجهات مودرن وفي المودرن سهل نسوي فتحات على كيفنا نوعاً ما

عرض الشور هنا بيكون متر و10 سم وحيز الكرسي بعرض 85 سم والمغسلة متر و5 سم

لازم في تفصيل دورات المياه ننتبه لكسرات الحايط وين بتكون .. الرواشن لترتيب الصابون والشامبو واستوت تعطي شكل جميل مع الإنارة المخفية ولو كانت بعد متغيرة الألوان تعطي جو مزاجي متغير لو نحب .. وضروري نسويها بعرض واجهة الحايط حتى يكون كل شيء قريب منا

https://i.imgur.com/xVurq1A.png

في الرسمة السابقة ممكن نكتفي باللي على يمين الرجال الجالس وهو بمقياس أكبر شوي من الواقعي وفي الواقع المفروض أصغر كمتوسط للإنسان العادي .. بارتفاع 60 سم مناسبة حتى 40 تكفي وعمق في الحايط 10 سم ونخليها مرتفعة عن أرضية الشور 60 أو 70 سم بحيث تكون جنبنا واحنا جالسين وسهلة التناول واحنا واقفين

شيء مهم للحمامين ذيلا وضحته في الرسم بدون شرح المفروض يتوضح في رسمة ثانية وتفصيل غير اللي هو الدرايش فيه فكرة اننا نسويها من طوب زجاجي تحت يدخل النور ويعزل الرؤية وبعضهم يجون عازلين ما يبين شيء الا النور وفيهم فقاعات فضية تعكس النور داخل في المكان كله .. فوق نركب دريشة تنفتح يو بي في سي يفضل .. باسوي لها هي بس تفصيل مكبر بالرسم

هذا قصدي في المشاركة السابقة .. هذا الدور بيكون صافي ارتفاعه يقارب ال 3.2 متر حسب تصميم الإستشاري وهو دور البنتهاوس وعندنا دورة المياه اليسرى وضحت الباب مفتوح بيسد شوي من الدريشة حول 8 سم وهو مفتوح بالكامل شكل ما هو موضح .. والرجال 182 سم يعني أي حد أقصر ما بيبين من الدريشة بس وضحت الطوب الزجاجي قد ما اقدر وفوقه الدريشة العادية

https://i.imgur.com/vkxbdCW.png

المغسلة المعلقة على حايط جزئي بارتفاع 85 سم لازم يكون مبلط ومثل هذا الحمام 3 في 1.6 متر ممكن نبلط أرضيته بقطعة بلاط وحدة يوجد هذا المقاس وأكبر شوي 3.2 في 1.6 .. يحتاج نقص 1.1 متر من الجزء الطويل حق الشور ونسوي سلوب بسيط جهة الصفاية .. ما سويت مقترح السقف والجبس اللي يجي سيدة حلو بيطلع ومودرن مع إنارة مخفية من جهة المغسلة والكرسي ومكان الشور في الكسرة بعد فتحة شفط الهواء وتكون الفتحة الثانية للدخول قرب الباب .. باسوي فكرته الشغلة سهلة ومأسس لها

ميزة المغسلة اللي هشكل تكون قريبة من الشخص والمراية فوقها ممكن نعمل بوكس وراها بعمق 20 سم جزء منه محفور له في الحايط أو معمولة فتحة من الأساس بعمق 5 سم و 15 سم بارزة وباب الخزانة ذي يكون بارز من أطراف البوكس خلفه ليكون مسكة للفتح وكذلك يخفي شريط الإنارة المحيط بأطراف البوكس أو لو نحب نخليها تحت بس

عملت تصميم للسقف وهذي صورة توضح انعكاس السقف .. الخطوط الحمراء المتقطعة بتكون للإنارة المخفية وهي يفترض لها مفتاحين واحد للخط الطويل المخفي العام وهذا ممكن يكون قوي .. والثاني للمزاجية الخفيفة اللي حول بوكس المراية وفي الرواشن الثنتين ولو حابين نسوي روشنة ثالثة طولية مقابلة الكرسي ممكن تكون كسرة بعمق 5 سم وفيها مراية طولية وبوردر سيراميك أو خشب لو نحب أو خشب معالج ونقدر نركب في المراية انارة نقطية جانبية على الجنبين سواء لصق فوق المراية وبيكون سهل التغيير أو وحدات منفصلة في فتحات في المراية .. نفس الشيء ممكن لباب البوكس مال المغسلة واللي عليه المراية .. الأخيرين بيكون ظاهرين وبنحتاج مفتاح خاص بهم .. بعدين عندنا السبوتات اللي على القطع 2 في الشور وواحد وسط الكرسي وواحد وسط المغسلة موضحين كدوائر حمراء بقطر 7 سم وممكن ناخذ المقاس اللي نحبه ويعطينا اضاءة مناسبة .. وصلنا 4 مفاتيح والخامس بيكون للسبوتات الكبار 20 سم موضحين وفيه 15 و 10 ومقاسات ثانية لو نحب

الخط الرصاصي المتقطع هذا للدكت حق المروحة وحق مدخل الهواء في أعلى الجدار ومن خلال الجبس من الغرفة للحمام

https://i.imgur.com/VY0AvSV.png

معكوس السقف نسويه لتوضيح توزيع الإنارة وتشكيلة الجبس ودكتات التهوئة مسارها وفتحاتها حتى نعمل حسابنا نسويها في الجسور الساقطة لو نبيها مخفية ومن خلال دكت فوق الجبس وما نبي نضيع*من*الإرتفاع وقليل من الاستشاريين يسوونه الا لو طلبه العميل وأكيد بمقابل كبير أوقات

هذا القطاع الطولي يوضح فتحة الجبس في الطرف

https://i.imgur.com/JnIpgUP.png

عمل المقاطع الطولية للغرف والأدوار يعطينا فكرة أكثر للي ممكن نسويه للسقف ولتفصيل الجدران وممكن نرجع للتوزيع الأرضي نعدل عليه لو احتجنا .. انا بديت أسوي قطاع طولي جزئي للدور الأول وباكمل عليه بعد للأرضي تحته وللبنتهاوس والبيسمنت .. أكيد يوضح لنا مقياس الإرتفاع وشلون نوظف الحجم وليس فقط المساحة .. وهذا قليل من الاستشاريين يسوونه مصممين الانترير يشتغلون عليه .. وإخونا صاحب التصميم سوى تصميم داخلي لكن استغربت التصميم الداخلي كان بناءً على التصميم المعماري الأساسي بدون أي تغيير بس وضح شلون بيكون الشكل ويقول كلفه أكثر من التصميم والرخصة

صافي ارتفاع الدور الأول ممكن يطلع 4.1 متر لو استعملنا أرضيات بعمق 30 سم وما بيفرق كثير عن هالرقم .. بس ملاحظ غرفة الملابس كبتاتها في العادة تكون بين 1.8 و 1.6 متر ارتفاعها وقصدي القواطع الداخلية لأن الإنسان العادي السوبر طويل نفترض 1.8 متر طوله ثيابه ما توصل لين 155 سم وممكن أقل وإحنا ناخذ ارتفاع راس القاطع بحدود 1.7 لهذا النوع من الكبتات اللي تكون بدون ابواب وبدون تخزين فوقها الا ممكن بعض الشناط أو السلال وهذي ينحط للوصول لها بسهولة درج صغير أو عتبات متحركة خشب أو غيره بإرتفاع 30 أو 40 سم لسهولة تناولها والوصول لها .. يعني ماكسيمآم ممكن ناخذ ارتفاع مترين .. لذلك ممكن نسوي هنا ميزانين فلور ونستغل الغرفة هذي لتكون من مستويين أو ننزل السقف بدرجة معقولة بحدود متر بسقف مستعار

حطيت الفلور بلان فوق حتى يوضح القطع وين جاء والتفاصيل لواجهة القطع الداخلية موضحة تحت

https://i.imgur.com/bbBXWiV.png

دريشة غرفة الملابس اللي وضحتها بتكون ثلاث صفوف من طوب زجاجي وجهة الغرب بتنور الغرفة كلها ونقدر نرفعها بعد شوي بحيث تكون قريبة من جبس السقف وبحيث يزيد عندنا مستوى التخزين فوق القواطع .. رفيجنا الطويل حطيته في الحمام في غرفة الملابس ما بيحتاج درج يده طويلة لو نط ممكن يوصل السقف بس للأشخاص العاديين 1.7 وحولها إرتفاع الخزاين مناسب وباحط شخص أو شخصة تتناول الملابس من العلاق لو حصلت رسمة مناسبة

الحل الثاني للدريشة هو الدريشة الطولية وهذي مناسبة في حال بنسوي ميزانين فلور لمضاعفة المساحة التخزينية وبوضحها لاحقاً

داخل دورة المياه احنا نوقف ورانا يمين منطقة المغسلة والكرسي والبديه ويسار الباب .. القطع مار في الكاونتر أو التسريحية الداخلية بعرض 45 سم وارتفاع 75 سم .. هذي تفصيلها حسب رغبة المالك ممكن بأدراج جانبية ومراية أو مراية مع تخزين خلفها مثل المغسلة بس هنا لو جات مراية عريضة وفيها انارة شريطية بارزة أو نقطية مثبتة جانبياً وعلى الكاونتر قطع بسيطة عطورات ومجفف شعر وأي احتياج خاص بتكون أحلى وأدراج جانبية بسيطة كفاية .. طبعاً نحتاج نقطة كهرباء ممكن نخليها مخفية في درج أو ظاهرة ما اعتقد مشكلة المنطقة الرطبة معزولة بحاجز زجاجي

وضحت الدرايش بفريم أزرق داكن عن الأزرق الفاتح الخاص بالفاصل لمنطقة الشور والجكوزي ورفيجنا بو جريدة قاعد على كرسي الشور المبلط أو ممكن نعمله خشبي من خشب خاص لو حبينا .. إرتفاعها بيكون 250 سم وارتفاع فريم الزجاج الفاصل 340 سم .. فوق الفريم بيكون حديد تثبيت للفريم مغطى بالجبس النازل مثل الجسر وبعدين يجينا سقف الجبس متصل معاه ومقطوع بالجسر النازل وبعدين مستمر لبقية الحيز مع انارة مخفية في الجهتين فقط يمين ويسار مثل ما هو موضح .. الروشنة موضحة في الفلور بلان لكن نقدر نواصل بها حتى قرب الشور نترك جزء بسيط بس اللي يكون فيه البايب ومفتاح المياه وممكن نعدل ارتفاعها شوي ننزلها 10 أو 15 سم حتى تكون قريبة للتناول من الجكوزي .. سويتها بارتفاع كبير شوي 60 سم ممكن نفصلها برف زجاجي وهذا أكيد يحتاج دعامة وسطية بعد زجاجية وممكن نسوي الزجاج طبقتين 12 ملم ملتصقين ونركب انارة خلف الزجاج تنور الرف بس ما تبين لنا يبين الرف منور غير عن الانارة المخفية اللي ممكن تكون ملونة ومزاجية وتجي في أعلى زاوية الروشة الداخلية .. رف الزجاج بسهولة يسوونه محلات الزجاج وحتى برخيص وتكون حافته مبرومة

https://i.imgur.com/dc2Z4JU.png

بنفس الوقت بنكون استغلينا الجسر الجبس الساقط لتمرير بايب أو دكت دخول الهواء من غرفة الملابس للتجويف المخفي مال الانارة وثم للحمام وممكن نسوي قسمين لتوزيع الهواء الداخل واحد صوب الشور والثاني صوب بقية الحمام وسحب الهواء نفس الطريقة من الطرف الآخر وللخارج .. لو بنسوي حمام بخار مع الشور والجكوزي ممكن نحتاج آلية لإغلاق دخول الهواء وتجديده ونكتفي بفتح الدريشة للتهوئة لو زاد البخار ولا تحملناه

https://i.imgur.com/dc2Z4JU.png

مكان رفيجنا ظريف الطول ممكن يكون كرسي عادي بلاستيكي للجلوس والتنشيف أو طاولة نازلة للفوط ولوضع الرجل عليها للي ركبهم تعبانة مثلي

شيء أخير ضرورة تركيب قبضات وقضبان مساعدة للتمسك والثبات وتساعد للقيام من الشور والكرسي هذي بتحتاجونها مع التقدم في العمر وزين نرتب لها أول بأول

https://i.imgur.com/dc2Z4JU.png

معليش كررت الصورة ثلاث مرات كل مرة أنسى اني حطيتها دليل اقتراب الخرف

الدكت اللي على اليسار هي للهواء الداخل من الغرفة الجانبية وممكن نخليه نازل بحدود 60 الى 70 سم حسب نزول الجبس عندنا في الغرفة الجانبية ممكن نحتاج تكييف بدكتات مع اني أشوف التكييف المناسب لغرفة الملابس المعلق في السقف ويدفع لأربع جهات بس لو بنركب دكت سبلت ممكن بسهولة وفتحة دخول الهواء مغطاة بلوفر تحت الجبس وفي الحمام مثل ما شرحت تنفتح في التجويف الجانبي

اقتباس:

---

المشاركة الأصلية كتبت بواسطة معماري قطري

معليش كررت الصورة ثلاث مرات كل مرة أنسى اني حطيتها دليل اقتراب الخرف

---

:funny: عالقوة

اقتباس:

---

المشاركة الأصلية كتبت بواسطة sara jsm

:funny: عالقوة

---

الله يقويج .. انتي خرفتي وخلصتي من كم سنة

هذا السكشن كامل وواضح إن الإستشاري ما صمم الجدران فوق بعض وانا التزمت بتصميمه لأنه الإنشائي منتهي .. المالك سوى دراسة انشائي ثانية وبعد ما طابقوهم فوق بعض مع إن تحريك الجدران شوي بين 40 و 20 سم ما يأثرون في المساحات كثير

https://i.imgur.com/kImK1P2.png

لو نرجع للمطبخ والتوزيع الارضي له نلاحظ المغسلة حلاتها في وسط الدرايش الثلاث وهذي سهلة تتعدل .. والكبت يسار ممكن يكون مفصول جزء سفلي وجزء علوي كل واحد بباب مستقل يعني بابين فوق بعض أو كبتات فوق وأدراج تحت مب مفصولة بسطح عمل أسطح العمل عندنا كفاية

https://i.imgur.com/Schfxpv.png

بعد لو شلنا ثلاجة نقدر نسوي مساحة نضيف كبت زيادة ونقدر نفتح باب على الستور

عندنا فكرتين لجبس وتكييف واضاءة المطبخ .. التكييف أما معلق السبلت اللي يدفع في 4 اتجاهات أو تكييف دكت سبلت خاص بالمطابخ وهذا له مواصفات خاصة

الجبس لو حبيناه مغطي فوق الكبتات وفوق الثلاجات بحيث تكون كأنها مبنية داخل الحائط ممكن وبيعطينا شكل أفضل خصوصاً المطبخ كبير .. مثل هذا الشكل تقريباً وأكيد التفاصيل يسويها فني الجبس المهم المبدأ
https://i.imgur.com/znWzBlY.png

الكبت خذته من مخطط ستاندرد كان بارتفاع 2.1 متر وما حبيت أزيد الإرتفاع لأنه بيكون صعب حد يطال فوقه بدون درج .. عدلت عليه بس سويت الكبت الطويل والجبس بسهولة ينعمل يغطي الفراغات فوق الكباتة وفوق الثلاجات حتى اللي مقابلتنا .. واللي مقابلتنا بعمق 60 سم غير عن العلوية اليمين اللي بعمق 35 سم .. وممكن نسوي فيها بلت ان مايكروويف وفرن للتصخين العادي وغيره من العدة اللي نحتاجها والمساحة كبيرة

الحمام هنا وضحت الكرسي الخرساني شلون يبين بزوايا لافة وباكبر مكان الباب من تحت كيف يغلق مع النعلة وممكن نحط ربلة حتى يكون اغلاقه محكم وهذا الحال حتى للغرف لو حبينا

https://i.imgur.com/YpGqcMS.png

ما ادري عن البقية بس اللي أعرفه هذي المخططات تعطي المعماري آفاق جديدة للتفكير والخيال ويعرف شلون بتكون العيشة في الحيز العمراني هذا وشلون الإستخدام وأكيد التكاليف .. خلصت البيسمنت أمس وارتفاعه 3.4 صافي ممكن لو فكرنا نقلل التكلفة نكتفي ب 3 متر ويكون الحفر لحدود 2.7 لأن عندنا ارتفاع أرضية الحوش 30 وارتفاع أرضية الأرضي 80 من مستوى لشارع يعني بنرتفع 80 وبننزل 2.7 بيكون عندنا عمق 3.5 متر بيروح منها حول 20 لصبية الدور الأرضي وحول 30 للبيسمنت .. بتبقى 3 ولو بنركب جبس بتقل لذلك 3.4 إرتفاع معقول وحفرنا بيكون حول الثلاثة متر وشوي زود للتأسيس للفرنش درينيج .. وباوضح بخطوط سميكة متقطعة مسار البايبات لاحقاً

https://i.imgur.com/dyr1DpC.png

هذي شوي أكبر للي نظرهم خفيف مثلي

https://i.imgur.com/Swkf6sN.png

يمين يبين المنور المحفور وبياخذ 60 سم من الحوش ونقدر نسويه بالعمق اللي نحب هنا خليته شوي تحت عتبة الدريشة السفلية والدريشة كبرتها 1.8 في 2.0 ارتفاع .. والمنور المحفور النازل مقابل الدريشة عرضه بعرض الدريشة وداخل 40 سم تكفي للنور والهواء وممكن نحط فيها اصيصات زهور أو نباتات متسلقة والفتحة مغطاة من فوق بشبك حديدي لمنع السقوط أو دخول الحيوانات .. جدام شوي جهة الرؤية بيكون باب المطبخ الخلفي المطل على الحديقة وزجاج يدخل نور جيد وهذي جهة الشرق .. نفس الجهة الشرقية عندنا 3 مناور ساقطة تنور مكان الصالة الرياضية وصالة الطعام ومنطقة الترفيه بالإضافة للمنور الوحيد الشمالي اللي مقابلنا موضح في الصورة

مبدأ الفرنش درينيج بسيط بعد ما نحفر ونوصل مستوى تأسيس البيسمنت ويكون يابس وصلب نسوي شقوق طولية بعرض 30 سم نمدد فيها بايبات مخرمة من فوق ومن الجوانب وتكون ملفوفة بقماش خاص اسمه جيوتكستايل فابريك يسمح بدخول الماء ويمنع التراب والطين .. تلتقي هذي البايبات ببايب ثاني جاي من الجهة العرضية ونازل جنب الجدار حتى ينزل له أي ماي متسرب وملامس للجدار وحتى الماي ما يبقى ملامس للجدار نحط مكان الخط البنفسجي كنكري ملفوف بنفس القماش حتى ما يسد الفراغات اللي بينه التراب ويمسك الماء ويكون نزول الماء لتحت بفعل الجاذبية أسرع .. ينزل تحت ويدخل في فتحات البايبات الممددة وتنقل الماي لمنهول فيه مضخة غطاسة ترفعه لأعلى وتشتغل تماتيك وهذي مكانها في الليوان النازل اللي وضحته قبل .. وممكن هذا السيستم ما يشتغل كلش لعدم وجود ماي بس إحتياط مثل طفاية الحريق نشتريها ونتمنى ما نستعملها

https://i.imgur.com/OJRTS35.png

أنصح كل واحد بيسوي بيسمنت يسوي هالنظام

الحفر اللي بتكون تحت الأساسات هذي بعد ما نمدد البايبات فيها نحط حولها كنكري بعد حتى لو طلعت مياه جوفية ما توصل أسفل أرضية البيسمنت .. ممكن نسوي كل متر ونص بايب أو حسب خوفنا من المخاطرة لو زدنا أفضل

صورة مقربة وجزئية لنعلة باب دورات المياه .. هنا بارتفاع 3 سم يسكر معاها الباب وفيه ربلة تخلي الباب معزول تماماً وممكن نخليها في كامل الفريم .. لمعرفة المقياس يبين فريم الزجاج الفاصل للشور وهو 7 سم وممكن ناخذ أصغر وممكن بدون فريم الخيارات كثيرة وسهلة ومتوفرة

https://i.imgur.com/ZsiVfLh.png

كذلك ممكن الباب يو بي في سي بنعلته الالمنيوم والإطار اللي كله ربلات

السكشن كامل ناقص بس سور سقف البنتهاوس .. درايش غرفة البنتهاوس اليسرى بتكون غربية مطلة على السكة يسار أفضل مما تكون مطلة على الجار وشمال نفس الشيء دريشة الغرفة اليمنى ممكن نلغيها أو نسويها باشتراطات البلدية بلوفر .. وعدلت على التوزيع الأرضي حطيت دريشة جنب السرير باوضحها في صورة بعد هذي

https://i.imgur.com/jQKO0gX.png

هذا توزيع الغرفتين فوق اليسرى مقترح ممكن تكون مخزن في البداية وتحويلها سهل لأي استخدام .. عندنا ست غرف نوم لو اعتبرناها غرفة مب ستور وبتكون جيدة لبيت متوسط كبير لأن الحاجة للغرف مع كبر العيال بتكون ضرورية في المستقبل وست غرف نوم ولا شيء لعائلة متوسطة

https://i.imgur.com/Y5lfYlO.png

الدرايش أكيد اللي جنب السرير حلاتها مستمرة للأرضية وتكون طولية وبدون أثاث جدامها

فيه ملاحظة مهمة حاب أوضحها واللي هي مب مهمة كثير المساحة المتاحة لنا كثر ما هو مهم ترتيبها .. هنا ممكن نزيد عرض دورات المياه بسهولة لمترين أو متر و80 سم بس حبيت أوضح كفاية ال 1.6 متر كعرض لو رتبنا الحمام صح .. وهذا خذته من تصميم بيت ولدي وهناك مضطر لهذا المقاس ومكفي لأن عرض الغرف 3.4 وهي غرف ثانوية ولا بشرط إن كل الغرف تكون مبحبحة .. بيت ولدي من دورين وبنتهاوس بدون بيسمنت ومساحته شوي فوق الألف حول 1050 متر مربع بكامل البنيان من ملحق ومجلس وغرفة سايق .. كثرنا الغرف وصلوا 10 بعدين الغينا غرفة ضميناها لغرفة الملابس الرئيسية استوت الغرفة كبيرة .. وألغيت غرفة تحت تحولت لمكتب وقللت غرف البنتهاوس من 4 لثلاث استوى المجموع 7 غرف ومكتب قابل للتحول لغرفة .. بس بعد التصميم راعيت فيه امكانية عمل توسعة مستقلة لبيت كامل في الحوش كبنيان مستقبلي لو دعت الحاجة .. القصد لازم نفكر في التوسعة وباعرض التصميم بإذن الله هنا وهو تصميم مطور من تصميم سابق اشتغلت عليه مقارب لتصميم بيت اخوي وبيوت كثيرة مثله

صورة مقربة للحمامين الصغار في البنتهاوس وعدلت لباس البنت الجالسة الجوتي أحمر والقبعة خضراء .. ما حصلت آيكون مناسب غير المهم توضح الجلسة والكرسي هذا

https://i.imgur.com/dp33wzI.png

شغال على تعديلات أخيرة لبيتي للموافقات .. نزلت المجلس شوي بس المنور الزجاجي بيكون مخالف للإرتفاع المحدود ب 6.5 متر بيطلع 7.3 وإن شاء الله يتوافق عليه .. الزوايا المرتفعة هذي حدها 6.5 بالضبط .. البيت المنور الهرمي البارز فوق حده 16 متر ممكن بعد يعارضون عنه بس عندنا في المنطقة مجلس 16 متر ارتفاعه .. هذا المنور الهرمي بيكون فوق الصالة اللي للدور الأول وبنفس الوقت فيه درايش مفتوحة عليه من البنتهاوس يعني بيكون من داخل البيت من أرضية الدور الأول مرتفع بزود إرتفاع يزيد عن 10 متر .. هذا غير عن المنور الثاني الجانبي اللي فوق الحديقة الداخلية ذاك بيكون بارتفاع حول 6 أمتار من أرضية الدور الأول ممكن أكثر أذكر من الدور الأرضي 14 متر

https://i.imgur.com/BP5NoU9.png

قللت الزوايا القمريات خليتها بس في بعض الأماكن مثل المداخل وهنا البروز لمكان منور ودريشة دورة المياه سويتها .. الدريشة بتكون داخل ومايلة ملتقية مع طرف جسر السقف يعني هذي الزاوية بتكون تبين من داخل ومن برا والبروز حول الدريشة بيكون حماية وشكل

https://i.imgur.com/Cf2K9O8.png

البرواز حول تجويف الدريشة بيكون 5 سم قطع داخل خالي بلون أبيض فاتح أكثر من لون البيت والقطع الزوايا والقطعة الوسطى يسمونها كي ستون وبالعربية أكيد لها مصطلح يختلف هذي بتكون كلها مع القمريات جي آر سي بلون معين مخلوط في خلطة الجي آر سي .. ومفكر في إن تكون الدريشة فريمها 10 سم داخل وجدامه بشوي أما أسوي سترب لايت أو النور اللي يسطع على الحواف بدون ما يبين مصدره

ملغي فكرة الشتر بسبب خرابه من الغبار