يوتيوبيات البناء .. مقاطع تثقيفية متجددة

أتابع فيديو للمهندس اليمني وهذا مؤلف كتاب ويتحدث مع شخص كلامه فيه وايد مغالطات والفيديو المشكلة طويل .. يقول الصبة الرغوية ما تعزل حرارياً والصحيح الصبة الرغوية عزلها وايد أعلى من السكريد الكثيف .. وإحنا نحط صبة رغوية حتى ما نثقل على البنيان .. زين شالثقل اللي بيجي من السكريد العادي وهل هو غير محسوب في التصميم؟ الإجابة محسوب حتى لو تصب السقف حديد ما بيصير شيء ويتحمل .. غالب المكاتب تصمم السقف بدون أي تخفيف وتعتبره مثل أرضية الدور الأول والدور الأول نعرف الأوزان اللي عليه واللي يتحملها

الصبة الرغوية لو نبغي نوفر ما لها داعي 1 سم فوم يعطي عزل حراري أكثر منها وهي عازلة جيدة حسب موادها ونوعيتها وكثافتها كلما قلت الكثافة كلما زاد العزل .. للتأسيس السكريد الأساسي اللي مهمته ضبط الميول أفضل مسويه رمل واسمنت واضافات مقوية مثل مواد السيكا والفيبر المقوي ضد الكراكات ونسويه بسمك مناسب وفي حالة ضبطناه صح ما نحتاج فواصل تمدد الا في السكريد الأخير اللي هو سكريد التغطية وحماية العازل الحراري هم يغطون بدفان وفوقه تبليط وطريقتهم تختلف .. إحنا عندنا سنغل سكريد ودبل سكريد شرحتهم كم مرة خلال المواضيع هذي والدبل وايد أفضل وله تفاصيل

https://www.youtube.com/watch?v=f-26cEltZEY

انا أعتب على المهندس وعلى اللي مسوي معاه اللقاء .. الثاني يروج حق شغله هو يسويها وتكلفتها عالية وبعد ما يقول حقائق علمية مثبتة ومؤكدة والأول ما عنده اطلاع ومعرفة كافية

في النهاية العزل المائي والحراري للأسقف وللجدران مهم وكذلك مهم حتى للأساسات لو نبغي نبالغ شوي .. لكن عندنا للأساسات نعزل مائي ولا نعزل حراري لأن الحرارة المتسربة من الأرض قليلة لكن في الدول الباردة هذي تعتبر ضرورة قصوى