مراجعة التصاميم المعمارية وابداء الملاحظات عليها (محدث)

هذا وضع مهم نعرفه .. وبس لأن بنياننا في قطر في الغالب ما يعتمد الجدران الحاملة مع إنه نظام فعال واقتصادي ويستخدم في كل العالم .. ممكن نعتمده بسهولة للملاحق والمجالس .. وهنا الكاتب يتكلم عن انبعاج الحائط وهو تقوسه من الوسط يستوي بارز مثل الكرشة وهذا يعني هبوط السقف قليل عليه ولا يتحمل سواء حائط حامل أو التحميل على الفريم الخرساني في حالة التحميل على الفريم معناها فيه ضعف وأدى لتقوس الحائط وهذا ما ذكرته قبل ما ادري ليش يغفلون عنه بعض المهندسين .. الضعف ممكن يسبب تقوس وشلخ بسيط أو قوي حسب التقوس .. والسبب في الغالب الحديد العادي يصدي ويضعف الخرسانة ويصير التقوس بعد فترة والتقوس حتى لو هبوط من الجسر كم ملم ممكن يضغط ويسبب هذي الشلوخ اللي في الغالب تكون طولية أو بزاوية 45 درجة

https://i.imgur.com/NBcefj2.png

هدم الجدار وبناءه قد لا يكفي وضروري ندعم الهيكل حسب الحاجة ومدى قوة هذا التقوس

أول مرة تمر علي هالمعلومة اللي أعرفه فيه صلاحية للإسمنت وينتهي في شهرين من إنتاجه .. ما ادري عن نعومة وخشونة الإسمنت واللي عندنا جودة عالية ولله الحمد

https://i.imgur.com/FV63c0U.png

خلصنا 90 صفحة من 2413 صفحة ورانا مشوار طويل وأدري غالبيتكم يمكن ما يعرف شنتكلم فيه حاولت أسهل قد ما اقدر والله يوفق الجميع لفهم هذي الأشياء والأهم يطبقها ويلاحظها في البناء عنده

هذا سؤال مهم

https://i.imgur.com/bw8jfz4.png

تعقيبي عليه الفئران شيخليها تدخل لين السقف الا البيت مليان فئران وعندنا استوت ماضي خلاص طلعت شوي جنب بيتنا لأن كان ساكنينه عزوب بنكهة موظفين الظاهر من كثر ما دعيت عليهم سكرت الشركة وسافروا .. من قذارة مكانهم والتجمع فيه بعدد كبير انتشرت الفيران عندهم وطبعاً جيرانهم لازم يتضررون

بعدين البلاستر لو بنحطه على الفوم نركب شبك ينضرب بمسامير في الخرسانات الجانبية ونسوي بلاستر عليه أو نركب جبس ونأسس لحوامله على خرسانة الأعصاب

الحريق فيه نوعيات ما تمسك النار فيها وسهلة تجربتها حتى بموقد قوي

مواد العزل من أكثر المواد تطور وتغيير سريع وفيه نوعيات كثيرة من بس البيتومين والفرق بين نوع ونوع كبير وهذي أعرف بها المختصين والمجربين في مجال العزل ودوم العزل يجي عدة طبقات ومواد وحمايات

https://i.imgur.com/zg5RoXf.png

الدفان بعد العزل لازم يتخلله حماية بأي مادة أقلها النايلون السميك والقوي حتى ما ينخدش العازل

هنا أشوف الخيار الثاني أفضلهم والمفروض نضمنه في عقودنا إن على المقاول الحفر للتأسيس للوصول للأرض الصلبة ثم التأسيس عليها ولو كان الحفر لكل قاعدة جاء مختلف يتم تعويض الهبوط الزائد برقاب الأعمدة .. ويفترض تصميم رقاب الأعمدة مسبق من المهندس الإنشائي حسب الطول تكون مساحة القطاع أكير لضمان تغطية الحديد وقوة رقبة العمود .. أما تربة الإحلال لازم بيصير فيها هبوط مهما دكينا والتعويض للفرق بصبية نظافة لو كانت بسمك عالي دخلت في مشكلة كبيرة أنها تكون هشة وقابلة للكسر بسبب وزن المبنى والهبوط كذلك

https://i.imgur.com/aG6SkqB.png

من أهم الطبقات وتحمي البلاستر يستحسن تعمل بعد جفاف البلاستر أول بأول

https://i.imgur.com/18dMYvQ.png

صحيح والمهم ضمان جفاف البلاستر وخلوه من الرطوبة .. الأساس يعطينا حماية إضافية للبلاستر وباقي طبقات الصبغ نقدر ننفذها بعدين حسب مراحل الشغل عندنا

https://i.imgur.com/RTMT4KP.png

فيه فائدة لو درسنا تأثيرات الألوان لكل لون تأثير خاص به .. مثلاً بعض درجات الأصفر تعطي حيوية ونشاط ما تصلح للنوم كلش

https://i.imgur.com/DTwxxOO.png

دار كلام كثير خلال الكتاب عن خلطات الألوان ونوعياتها واقصد خلطات المواد وأساس اللون وهذي
شغلات متجددة ومتغيرة حسب الشركات المصنعة في كل بلاد وحسب المستورد من هذي الأصباغ وأكثر واحد يفيدنا فيها اللي مشتغلها ومجربها واللي دوم يتعامل بها والأهم ناخذ نصيحة مسؤول المبيعات عن طبقات الصبغ واحتياطات الخلط إن وجدت وشروط عقدنا مع الصباغ ووشي مواصفات كل مرحلة وشلون نتأكد منها ومن إتمامها بطريقة صحيحة

من أحدث الأصباغ الإيبوكسية والبوليورثين وهي من أقواها وأثبتها وطبعاً أغلاها

ما كان فيه داعي أنقل هذا السؤال هنا لكن للمهتمين ولا أعتقد مهندس انشائي ولا مشرف يخطيء في هذا التفصيل ولا حتى فورمان فاهم ممكن العليمي يخربط السالفة .. وللتوضيح لو عندي أساس بمقاس 2 في 3 .. يكون الحديد الرئيسي لتقوية الشد في الإتجاه 3 وهذا يكون تحت لأن أرجل أو إمتداد القاعدة ينحني للأعلى بسبب ضغط التربة من أسفل وضغط الوزن من أعلى .. ويجي صف الحديد الثانوي في الإتجاه الثاني ال 2 متر

https://i.imgur.com/mATvksE.png

هذا باختصار فحص القمع وحطيت له فيديوهات يسمى فحص هبوط الخرسانة وفيه نوعين أما القمع العادي أو المقلوب .. هنا يذكر المؤلف العادي للخرسانة العادية اللي المفروض يكون محتواها المائي حول 40 - 45% مقارنة مع محتوى الإسمنت وبدون حساب المحتويات الباقية .. والفحص ضروري ويعطينا فكرة عن إن الخرسانة مناسبة وقليلة المياه + فحص الحرارة مهم للخرسانة وتكون بحدود ما تزيد عن 35 درجة والمفروض كذلك حرارة الجو ما تزيد عن 35 درجة طول فترة الصب وفترة التقسية اللي توصل ل 28 يوم أو خلونا نقول أول اسبوعين هم الأهم .. بعد ثالث شرط مهم ما تكون الخرسانة طلعت من المعمل وزادت فترة خروجها عن ساعتين

https://i.imgur.com/yIqsJCB.png

في العقد ضروري نحدد مسؤولية المقاول بالتفاهم مع معمل الخرسانة ونحاول نحدد 3 معامل معروفة بسمعتها الطيبة وجودة خرساناتها عندنا مثل قطر ردي مكس وناصر بن خالد وسريع أو الربان .. ونوضح الشروط الثلاثة

في حالة الخرسانة ذاتية الدمك أو المايعة الإختبار يكون القمع مقلوب ويقاس انتشار الخرسانة على شكل دائرة وقوتها ومحتوياتها يضمنها المعمل ونتأكد منها باختبار ضغط الخرسانة بعد 7 و 21 و 28 يوم

https://i.imgur.com/yIqsJCB.png

هنا يتكلم عن المكعب والعينات سلندر .. هو فيه مقاس للعينات بحيث تكون 15 في 15 في 15 بشكل مكعب وأعتقد السلندر ممكن أو الاسطواني بلغة عربية واضحة .. المهم يقاس الضغط بالكيلوغرام على مساحة القاعدة بالسنتيمتر المربع وتطلع القوة نيوتن .. ما تهمنا طريقة الحسبة المهم المختبر يعطينا نتيجة كل عينة وهم ياخذون ثلاث عينات ونحسب معدلها أو نشترط ما تكون عينة تحت القوة التصميمية .. ثلاث عينات لكل اختبار وفي يدنا ناخذ أكثر وفي يدنا نكرر الإختبار بدال مرتين لأربع مرات نهاية كل اسبوع من الأربعة

https://i.imgur.com/Oui59JD.png

هذا سؤال مهم للي يبي يصين وعنده أعمدة متكسرة ومتهالكة .. أوقات استبدالها ضروري وأوقات حتى استبدالها صعب إذا الأساسات متهالكة .. يعني الخافي علينا لازم نختبره ونحفر ونشوف واللي يصير العمود ما يتعرض لظروف صعبة مثل الأساس وكذلك مثل بعض الجسور اللي لو انحنت شوي خربت كل الطابوق تحتها

https://i.imgur.com/f13tjHe.png

ممكن هذي الطريقة نسويها لكل عنصر خرساني بس يحتاج شغل دقيق ولازم نكبر من كل جانب بغطاء خرساني كافي وخرسانة جيدة كنوع وممكن تكون خاصة وبخلطة غير .. كذلك الحديد اللي يثبت الحديد الخارجي هذا المفروض يدخل من صوب ويطلع للجهة الثانية ينحفر له بدريل

https://i.imgur.com/TfQDADg.png

هذا شيء معروف وهو رش الخرسانة والمحافظة عليها طول الوقت رطبة والمفروض مثل ما ذكر لمدة 28 يوم لكن ممكن نقلل شوي حسب العنصر الإنشائي .. فيه مواد حديثة طلعت تسرع العملية وحتى ما تحتاج رش ماي لفترة طويلة وبعضها ما تحتاج رش ماي نهائياً كله حسب نوعية الخرسانة ومواصفاتها وشروطها .. كل هذي يحددها المكتب المختص مع معمل الردي مكس والكلام صحيح للخرسانة التقليدية

https://i.imgur.com/xj3kMTE.png

الصورة مهمة للسؤال الأخير ونسيت احطها .. نلاحظ رشوا رؤوس الأعمدة وغطوها بالبلاستيك للمحافظة على الرطوبة وتوجد رولات بلاستيك كبيرة وكافية لتغطية الخرسانة بعد اكتمال الرش

https://i.imgur.com/BWa1llo.png

إختبار مطرقة شميدت .. إختبار سهل يقدر كل استشاري يسترشد به في الموقع بس عمري ما شفته عند استشاريينا العظام

https://i.imgur.com/M1pxp10.png

مميزات وعيوب الجهاز

https://i.imgur.com/T9ZuJlR.png

صورته

https://i.imgur.com/vnubDfa.png

سؤال عن معالجة أي وجود للنمل الأبيض أو احتمال وجوده لأنه تقريباً موجود في كل مكان وكل تربة خصوصاً اللي فيها ملوثات خشبية مهما كانت قليلة .. انا أشوف كلامه صحيح بس فيه طرق أفضل اللي هي عمل حفر صغيرة بدريل خاص وملئها بالمبيد والمبيد هذا خاص موجود في الشركات الزراعية والمختصة بالمبيد .. والحفر تنعمل بعد دك التربة وبعدين تتغطى ببلاستيك سميك يستحسن 1000 مايكرون .. طبعاً هدف البلاستيك السميك هو عدم شرب التربة لمياه الخرسانة وابعاد الخرسانة عن أي رطوبة من الأرض وبعد لو انعمل عدل يحمي من خروج وتسرب الأرضة لداخل المبنى

شيء ثاني مهم لازم نعمله هو إننا نستخدم للأطراف قبل صب الخرسانة الأرضية نستخدم بورد قابل للانضغاط بأساس خشبي أو كرتوني هذا يسهل اختراقه وحتى أكله بواسطة الأرضة .. هذي البوردات حتى تتحمل انتفاخ الخرسانة وضغطها على الجسور الأرضية .. نقدر بدالها نستخدم نفس البلاستيك وممكن نسويه مثني من الأطراف لفوق حتى يكون متواصل مع اللي تحت .. وممكن نضيف عليه قطعة بلاستيك اللي تجي بسمك حول 5 ملم وفيها فجوات وسطية وقابلة للإنضغاط وبعد المساحات الصغيرة ما بيكون فيها ضغط كبير من الخرسانة اللي تنصب على الأرض وهذا حل مثالي وسد لطريق مرور الارضة

شيء ثاني مهم هو قبل لنبلط نستخدم سكريد كامل .. إحنا حق بيتي وأقصد الإستشاري وصف لي مواصفة جيدة بدون حديد تقوية للخرسانة ونفس الشيء للسكريد فوق الخرسانة الأرضية وتحت البلاط .. المواصفة بانقلها لكم كما هي في كتاب حساب الكميات واللي يبي نسخة يشوف موضوع عقود البناء المثبت فوق

( Grade slabs ( crack controlling additive " Grace Cemfiber F12 as supplied by Grace construction products or similar approved to be added )

هذا ببساطة محلول صناعي سائل يصب في الردي مكس ويتحول لخيوط قوية تقوي الخرسانة اللي تكون ضعيفة ورخيصة رمل واسمنت ومياه شوي أكثر مايعة .. ولا نحتاج للحديد لأنها تمنع التشقق وتمنع انتفاخ التربة من تحت لأن الخرسانة فيها قوة شد في كل اتجاه .. هذا عملته في بيتي من 2004 حول 20 سنة من الآن وألحين الردي مكس يوفر سكريد بقوة 20 أو 15 نيوتن ومعاه فيبر مانع للتشقق وبسعر وايد رخيص مقارنة مع الخرسانة العادية والحديد .. حتى للحوش استعملت نفس المواصفة للأرضات تحت البلاط

المهم بعدين قبل لنركب البلاط نحط سيليكون على الأطراف حتى نضمن سد أي فجوة ونركب البلاط أو أي أرضية مع ترك فراغ بسيط قرب الجدران حتى نص سم يكفي هذا نعبيه سيليكون ونغطي فوقه بالنعلة أو بأي فاصل .. بيفيدنا كفاصل تمدد للبلاط أو الباركيه مع إن الباركيه ما يحتاج غالبه فاصل تمدد وبيسد أي انفصال بسيط ما نشوفه ممكن تنفذ منه الأرضة

أظن شرحت كفاية لأهمية الموضوع


https://i.imgur.com/mePWNxf.png

طبعاً المؤلف عطانا طريقة وحدة وخلانا نفكر في اتجاه واحد فقط والضمان 15 سنة لكن الحل اللي شرحته لو تنفذ صح مضمون مدى الحياة بإذن الله

هي المفروض سهلة وما تكلف لو تصممت اقتصادية وتصممت صح .. بس عندنا مبالغات خيالية يعاملون هذي القاعدة الكاملة ( اللبشة ) معاملة قواعد صغيرة منفصلة وتكون بتسليح معقد ومكلف وخرسانة سميكة أكثر من اللازم فيخسر المالك كثير بدال ما يوفر .. وبدال ما تكون سهلة في التنفيذ حديد علوي على كراسي حديدية أو فيبر خاصة وحديد سفلي على كراسي اسمنتية وحتى الكراسي الحديدية تثبت على كراسي أصغر اسمنتية مع ضمان غطاء خرساني مناسب لا يقل عن 5 سم من تحت ومن الجوانب مع العزل جيداً
تحت في صبة النظافة وببلاستيك سميك قبل لنركب الحديد .. كل هذا يؤدي لزيادة السعر وتعقيد العمل ولازم عليه اشراف جيد .. وتستوي القواعد المنفصلة تمثل جزء من سعر اللبشة

https://i.imgur.com/8Yrl6mD.png

نصيحة اللي بيسوي هالنوع من الشغل يسوي فرنش درينيج تحت إحتياط .. إن شاء الله ما يحتاج له بس مهم يسوي مسرب للمياه الجوفية لو طلعت تحت القاعدة الكبيرة ذي

https://i.imgur.com/FvIVnU4.png

هذا السؤال والصورة معاه لعمارة جنب أرض ممكن تنبني عمارة أو بيت مثل ما ذكر المؤلف .. عندنا ما ينطبق اللي قاله لأنه من التصميم والرخصة ما تنفتح درايش إلا لو البناية مفصولة وفيه ارتداد مناسب محددته البلدية أو طريق حتى لو ضيق .. لكن شغلة افتح درايش مؤقت وبعدين سكرها ما لها وجود عندنا والحمد لله

https://i.imgur.com/VP9SkUT.png

سؤال آخر مهم

https://i.imgur.com/KC7ZGS9.png

https://i.imgur.com/qmLskva.png

واضح وأكيد فيه نماذج عدة لكل شركة ردي مكس

حذرت قبل من التعاقد أو بناء المظلات القماشية وكلنا لاحظنا شسوى فيها المطر والهواء خصوصاً في بعض الأماكن أعتقد نتيجة غش في المواد وضعف .. حبيت أأكد وأضيف هذا التنبيه

نرجع لمتابعة كتابنا وهذا السؤال

https://i.imgur.com/8EcMFS2.png

يمكن ما يهمنا بس نشوف شالمقصود بالكرسي

هو الحديد القُطري مع الحديد القائم اللي يدعم الحديد العلوي .. وهذا سهل تركيبة بعد تركيب شبكة الحديد السفلية على بسكوتات وتتثبت الكراسي عليها وعلى الكراسي يتثبت الحديد العلوي

https://i.imgur.com/kSoDOLe.png

هنا المؤلف ما ذكر العيب الكبير واللي هو صدأ وتآكل هذا الحديد واللي يستخدمه للبيسمنت غلطان غلط كبير وما بيطول 15 سنة لو محظوظ وبتبدأ التسريبات بسبب هذي الثغرة

https://i.imgur.com/obLAnxH.png

https://i.imgur.com/Qpb3RTS.png

البديل شوي أصعب وهو تركيب بايبات نمرر خلالها حديد مسنن ببراغي خاصة تغلق وتنفتح وتبقى البايبات البلاستيكية داخل الخرسانة وهذي تسد بعدين بمواد ايبوكسية قوية وبماستك خاص مرن فتكون عازلة طول العمر للمياه ولا تصدأ

https://i.imgur.com/YsF2XkR.png

ممكن يكون أصغر من محيط العمود بس أكبر لا

هنا ممكن نترجم هذا بما معناه وزن المتر المكعب وهو وزن صندوق كل بعد فيه 1 متر ببساطة .. لو حشيناه حديد بيعطينا حول 7.850 طن في المتر المكعب أو 7850 كيلو غرام .. يفرق عن الماي النقي اللي وزنه 1000 كيلوغرام في المتر المكعب يزيد شوي ويقل شوي حسب ظروف كثيرة ونفس الحال للحديد حسب تركيبته

https://i.imgur.com/VjkqdTt.png

مهم طبعاً للي يحب يعرف كثقافة عامة .. وزن الرمل الخالي والسكريد الخفيف حول 1800 للمتر المكعب مقارنة بالماء قريب الضعف .. ولو جينا نبغي نعرف كم وزن العشرة سم من المادة في المتر المربع يطلع نقسم هذي الأرقام على 10 لأن المتر فيه 100 سم وعندنا 10 سم فنقسم على 10

هذا صحيح واللون الأبيض حتى تبين في الليل .. بس بعد الإنارة الحمراء المتقطعة ضرورية وصارت حادثة طائرة هيليكوبتر وتوفى الطيار من اصطدام بسلك كهربائي معلق وبعدها بدوا يحطون كور بلاستيكية وحدة حمراء ووحدة بيضاء وكم وحدة وعلى مسافات معينة

https://i.imgur.com/9tjxFoP.png

ودي لو عندي وقت اتابع هذا الموضوع خصوصاََ التعليق على كتاب الأخ المهندس المصري.. في موازين حسناتك اخوي بو عبدالله

اقتباس:

---

المشاركة الأصلية كتبت بواسطة سالم الزهران

ودي لو عندي وقت اتابع هذا الموضوع خصوصاََ التعليق على كتاب الأخ المهندس المصري.. في موازين حسناتك اخوي بو عبدالله

---

جزاك الله خير اخوي بو زيد

انا بروحي ملول ووصلت توني 125 صفحة والمشوار طويل الكتاب 2415 صفحة .. فيه أشياء وايد ما تهم الشخص العادي بس ما ادري ليش أحس ممكن لها أهمية أو ثقافة عامة

عندك هذا السؤال مثلاً للمسؤوليات الملقاة على عاتق مدير المشروع .. ومدير المشروع يكون هو ممثل المالك واتصاله دوم بالمالك سواء كان شخصي أو جهة حكومية .. كله شغل مراسلات تحته ممكن فريق إدارة وسكرتاريا وموظفين ولازم فريق هندسي وممكن الفريق الهندسي استشاري خارجي معين بعقد هو الإستشاري المشرف أو الإستشاري المصمم أو مجموعة استشاريين حسب المشروع .. الكلام اللي كاتبه المهندس سطحي وبسيط وألحين كل شيء بعقود واضحة عن المسؤولية وحدودها

مثال انا رضيت استلم مشروع وترشحت لمشروعين كبار واحد منهم كتارا في بداياته وراح لمرشح ثاني ودخل في مشاكل وفشل وبنيان كتارا خذ حول 20 سنة وما زال مستمر .. مشروع ثاني كان بنيان واحة العلوم والتكنولوجيا وهذا مشروع كبير أكيد مستمر للحين قابلني للنقاش واحد سعودي مسؤول شاب أصغر مني بحول 15 سنة شرح لي المسؤوليات يبون مدير مشروع طرزان يشتغل 24 ساعة .. رديت عليه بعد ما فكرت بايميل ان لازم تكون فيه فترة تحضير وتجهيز لكادر كبير هندسي ويكون فيه تحديد للمسؤوليات ولأهمية هذا المشروع لازم ربطه مع الإدارة العليا وكانوا يبون يربطونه مع هذا الشاب وهو واضح ما عنده خبرة في المشاريع الكبرى كلش .. غيري بيسأل كم الراتب وبيوقع وكل هالمشاريع وانا في شغلي انتداب يعني والحمد لله ما تورطت فيها لأنها شغلة عذاب لين يستوعبون ويوفرون اللي يطلبه مدير المشروع من اختصاصيين في كل التخصصات ومتابعين والمدير يكون فوقهم .. اللي يتحمل المسؤولية المباشرة مثال في خطأ في تنفيذ التكييف يكون مختص التكييف اللي يتابع ومختص التكييف المصمم لو الخطأ تصميمي بس عندنا ما عندهم الا المدير

https://i.imgur.com/qbhHiXz.png

مشروع واحة التكنولوجيا والعلوم مباني عدة تغطي مساحة 150 هكتار .. حتى ما كنت متأكد الهكتار كم طلع 4400 متر مربع .. 66000 متر مربع من المباني واللاندسكيبنغ والخدمات .. من المستخدمين؟ مايكروسوفت وموبيل أويل وإكسون وشركات عالمية كثيرة يعني تتابع معاهم ومع المالك ( قطر فاونديشن ممثلة في هذا الشاب اللي قابلني ) ومع المقاولين ومع الإستشاريين اللي خلاص بيتخلصون من الإدارة الأجنبية السابقة ويبغون مدير قطري فذ خارق للعادة يعين ناس من السوق المحلي أو العالمي وعليه كل هالمسؤوليات .. صج كنت محظوظ ما عجبهم تعليقي وجابوا واحد من قطر للبترول شاب يدير هذا المشروع وأكيد بيدخلون في جدولة ومراحل وقصة طويلة منها تغير موازنات بالزيادة أكيد وتغيير استشاريين وصعب تلم بكل شيء الا مستحيل وآخرتها ممكن تحصل نفسك مساءل عن أمور كثيرة خارج سيطرتك

هنا بعد سؤال مهم عن متر التشطيب والكاتب ذاكر في مصر ولا ذكر أي سنة وذاكر العملة ريال حتى ولا ذكر أي ريال .. ممكن عماني ويفرق كثير والا السعودي والقطري والدرهم الإماراتي متقاربين كثير.

جوابي انا صعب تحدد بدون مواصفات وبدون عقد فعلي ومخططات واضحة .. من السابق تقدر تبني صورة للتكاليف وتسوي حساب كميات مبسط مثلاً الأرضيات بروحها بند متغير من مساحة لمساحة الا يكون المالك يبغي كل البيت رخام نوع خاص ويبغي تدفئة تحته فسهل حسبتها بمعرفة السوق وتكلفة الرخام سلابات أو قطع حسب طلب المالك وتكون تخلصت من هذا البند اللي ممكن يوصل ل 10000 للمتر الى 500 أو حتى أدنى لو رضيت ببلاط شعبي أو سكريد منعم محمي بمادة حماية ممكن توصل حتى ل 50 ريال في هذا البند

بند الأسقف والإنارة هذا بند بعد متغير ويعتمد شيبغي المالك يبغي جبس عادي سادة مودرن بدون كورنيش والا نوع معقد وفيه دزاينات تختلف

بند الخشب كله تحسب الأبواب ومساحة كل باب ونوعية كل باب وغير من الخشب ممكن النعلات وممكن الكبتات والبراويز والمطابخ .. لا وتنفصل تحت هذي البنود بنود كثيرة المفصلات والأقفال

القصد من هذا المثال مواد التشطيب إنت تتحكم فيها وإنت لك الخيار شكثر غالي وشكثر قوي ومناسب أو قد يكون غير مناسب مثلاً كإستعمال أرضيات مودرن على أسقف كلاسيك وخلطة ممكن تطلع عليك ما تنفع .. وبعد من البنود الرئيسية هي الكهرباء والسباكة وشتبغي فيها من مواد وعدة حديثة وممكن مكلفة كثير وممكن معتدلة هذي بروحها تحديدها صعب بس تمشي على احتياجك ولا ترضى بحلول تحت المستوى ممكن توصلك لمشاكل وتخسر حتى بيتك لو لا قدر الله صار حريق بسبب الكهرباء ورداءة ما ركبت

https://i.imgur.com/9Va2nlT.png

هذا إختبار لفحص التربة المدكوكة ومدى كثافتها وهي مضغوطة حتى نعرف قوة تحملها .. ما شفت استشاري عندنا يسويه ويمكن في الطرق يسوون فحوصات أعمق وأكثر

https://i.imgur.com/fx7fhL9.png

للي يحب يعرف تفاصيل الإختبار هذا فيديو يوضحه

https://www.youtube.com/watch?v=ojH0W3xq3P0&t=373s

يمكن الفيديو يضيع الكثيرين وهذي طريقة درسناها قبل بس ناسيها كلش ما استعملتها طول أكثر من 30 سنة .. المهم نعرف وجود إختبار أو عدة إختبارات لقياس قوة الدك للتربة .. رأيي انا في البيوت ما نحتاج لهالتعقيد ولو احتجنا لازم نفحص كم مكان لأن كل مكان بيختلف قليل .. لكن لو دكينا على طبقات ورشينا ماي شوي قبل الدك وتابعنا الإجراءات متابعة جيدة بالمعاينة بنعرف إن التربة مدكوكة زين ولا نحتاج ندك أكثر

توضيح لهذا السؤال وهو ليش ما نصب الدرج بشكل مائل بدون تحديد العتبات وبعدين نبني العتبات على هذي الأرضية المائلة؟ نصبه مستقيم من تحت وفوق كأنه أرضية ويكون الحديد سيدة بعدها نسوي العتبات من الكتلة الخرسانية أو من الطابوق والبلاستر وهذي يسوونها في دول كثيرة وبعدين تشطب بأي مادة نهائية حتى الخشب ممكن أو الرخام أو أي نوع بلاط

https://i.imgur.com/HOtaPql.png

التبرير أول شيء المقاول سيجد صعوبة في الحركة على هذي الأرضية المائلة بدون عتبات وهذا صحيح لكن ممكن يبني العتبات بكل سهولة .. والثاني ما اظن يصير عندنا لازم ينهي كل شيء والا ما تدخل الكهرباء .. أكيد العملية أسهل من البناء التقليدي المتبع عندنا للدرج وأشوفه آمن ويمشي لكن متعودين أكثر على الطريقة التقليدية وكثرة الحديد وشغله في الدرج هنا يتكلمون عن وضع اقتصادي ومناسب وكان متبع عندهم

سؤال آخر مهم ومهم لكل شخص يبي يبني يطلب من الإستشاري والمقاول تحديد جدول زمني للمراحل وكل ما يتعلق بها من مراحل فرعية .. واللي متمكن من الجداول البيانية يقدر يسويها ويتابعها بروحه

مثال مرحلة التأسيس تتضمن الحفر كمرحلة فرعية أولى .. وتجهيز الموقع كمرحلة فرعية صفر .. المسح الميداني بواسطة شركة مختصة بعد نشاط ممكن ياخذ نص يوم وممكن يدخل معاه نشاط ثاني مثل التسوير ونشاط ثالث مثل الكبينة أو المباني المؤقتة .. الحفر شكثر بياخذ ونقل الدفان لموقع ثاني لو الموقع ما يكفي شكثر بياخذ .. كل هذي العمليات يحددها المقاول لين بناء الأساسات وعزلها ودفنها طبقات ودك كل طبقة حسب المواصفات المطلوبة .. هذي كلها مرحلة التأسيس ولها تقسيم لين مراحل فرعية من الأفضل إنها تذكر مرحلة مرحلة ويحدد تاريخ بدئها وانتهائها .. ممكن المقاول يخلص قبل ويستلم دفعته مع نهاية المرحلة حسب الإتفاق وحسب الخصومات لو فيه دفعة اولى ودفعة محتجزة للصيانة

في النهاية مجموع المراحل يساوي فترة المشروع وحساب الكميات يسهل لنا جرد كل مرحلة وتحديد تكلفتها بدقة وتسهيل التفاوض عليها وهذا ينسجم مع ادارة المشروع بكافة جوانبه وحتى أخذ بعض المهام علينا للإتفاق عليها مع مقاول آخر

https://i.imgur.com/BJz1j1B.png

هذا مصطلح مرعب الكل يخاف منه .. يصير بسبب ضعف التدعيم قرب العمود وحسابات انشائية خاطئة أو بسبب ضعف الخرسانة مع العمر ومشاكل صدأ الحديد أو بسبب التحميل المبالغ فيه كأن نحول غرفة فوق لمخزن لأشياء ثقيلة والمبنى مصمم لإستعمال عادي

https://i.imgur.com/JC7v5Fd.png

بعد يتم استغلاله بصورة خاطئة في المبالغات الإنشائية .. إحنا أصلاً لو بالغنا في تصميم سقف وسويناه سميك زيادة زاد وزنه ويحتاج تدعيم إضافي وعمود عريض وجسر ممكن كبير حتى يتحمل وزن هذا السقف لذلك التصميم الإنشائي المدروس من كل جوانبه يبعد عنا هذي الصورة

حاجة مهمة يصير العكس في الأساسات العمود ممكن يخترق الأساس وهذا بالنسبة للسؤال السابق

السؤال هذا جوابه مختصر ومن ضمن الأسباب سبب مهم هو الكلور في مياه الخلطة هذا أهم مسرع لصدأ وتآكل الحديد .. مثل ما الأحماض تنظف الصدأ بعد تسرع الصدأ وإستعمالها يحتاج عناية وازالة ..وسبب رئيسي ثاني هو رداءة الشغل في الموقع وعدم صب الخرسانة في درجات حرارة تحت 35 مئوية وعدم رشها بالمياه وحصول شقوق حتى لو مجهرية توصل الرطوبة والهواء للحديد

الحلول شفايدة ندهن ايبوكسي بعد ما نكسر وننظف وقصة طويلة ممكن نتلافاها لو عملنا الوقاية مسبقة للحديد كله يكون مغلف إيبوكسي ومغلف غير عن مصبوغ والطبقة أكبر

https://i.imgur.com/YNOlYA7.png

خزانات المياه انا أشوف طريقتنا أصح والأصح هو بدال ما نستخدم خزان واحد سعة 3000 غالون مثلاً نستخدم خزانين كل واحد 1500 ونربط بينهم ببايبات نقدر نفصل أحدها واستعمال الآخر لين ننتهي من صيانة أو استبدال أو غسيل واحد ونرجع نفتحهم على بعض .. نفس الحال لخزان السقف أو لو بنستخدم خزانات فرعية تحت أو تحت البيت في بيسمنت جزئي خدمي

https://i.imgur.com/YWIyN2w.png

ليش انا اسوي كل هالشغل خرسانة ويكون تحت الأرض ممكن يتكسر ويخترب مع مرور الوقت وليش ما احط خزانات منفصلة وفوق الأرض حتى أقدر احط العدد اللي احتاجه ويناسبني

https://i.imgur.com/iM03IMf.png

غرامة التأخير حبيت طريقة الحسبة وهي بأن نحسبها بقسمة التكلفة على المدة .. يعني عقدي مع المقاول 2 مليون والمدة 500 يوم تطلع غرامة اليوم 2 مليون على 500 = 4000 لكل يوم تأخير .. يفضل في هذي الحالة تكون عندي دفعة ضمان محتجزة عن كل دفعة مستحقة للمقاول بحدود مثلاً 10% من قيمة العقد وهنا بتكون 200 الف ريال تزيد كنسبة للدفعة الأخيرة تتجمع عندي 200 الف يستلمها المقاول بعد انتهاء فترة الصيانة ناقص منها غرامة التأخير .. والتأخير اللي من طرف المقاول يحسب على أساس كتب رسمية توضح التأخير وأسبابه من الإستشاري ولازم يحدد في العقد نوع التأخير وأوقات التأخير لأسباب معينة بعد تحدد

باقي النسب اللي حطها المؤلف أشوفها تلخبط الحسبة

https://i.imgur.com/4qnHUii.png

بعض المشاريع ممكن تطبق الغرامات على كل مرحلة رئيسية بس لازم تحدد المرحلة الرئيسية وجدول زمني واضح للمرحلة والمراحل الفرعية فيها .. وهنا يفضل تحديد غرامة المرحلة بقسمة تكلفة المرحلة على مدتها .. مثلاً مرحلة الأساسات مدتها شهر وقيمتها 100000 نقسم 100000 على 30 تطلع 3333 لكل يوم تأخير وهنا نكون عطينا المقاول حرية تحديد مدة المرحلة وكذلك قيمتها مع التفاوض حول قيمتها لو كانت غير معقولة واحتمالية استبعاده واختيار مقاول ثاني وهذي الطريقة تنفع للمناقصات أكيد والشروط تحدد بشكل مسبق وتنفع للتفاوض في إختيار المقاول الأنسب والسعر الأنسب .. ممكن مرحلة غير تطلع تكلفتها 50000 وتاخذ شهر وتطلع الغرامة نص السابقة لكل يوم .. وممكن نفصل غرامة التأخير نطبقها كخصم مباشر من مستحقات المقاول بدون ارجاع ونطبق الخصم كذلك بالنسبة المحددة ممكن 10% لتكون محتجزة لدفعة الصيانة

بعض المشاريع يتم فيها انصاف أكثر للمقاول وتشجيع له للإنتهاء بسرعة بحيث تكون توجد مكافأة انتهاء قبل الموعد بعد ذي لها تحديد بشكل مسبق عن كل يوم وهذي يعمل بها في مشاريع بعض الدول مثل مشاريع الأردن الحكومية

حساب الكميات علم معقد وصعب وممل صراحة العرب ما يتقنونه كلش .. هنا المهندس حاط مثال وكاتب صراحة كميات الخرسانة والحديد في القواعد ومسوي جدول مبسط فيه كميات الخرسانة بس .. زين وين الحديد؟ بعد فوق هذا الخرسانة للقواعد تنقسم الى صبة النظافة وتكون بإسمنت مقاوم للأملاح مع مواصفات عزله وكل كمية مع مواصفاتها مكتوبة أقلها بإختصار نوعية الإسمنت وقوته وإذا فيه إضافات نذكر رقم المواصفة المكتوبة أو تكون النوعية والمواصفة على الرسم وكل هذي تكون مكررة أفضل حتى ما يكون فيه إختلاف ومجال للخطأ من المقاول أو المهندس المشرف لأن المهندس المشرف يطبق التعليمات أوقات بدون تفكير زايد

https://i.imgur.com/HfBFQZ7.png

حسبة الحديد تختلف بالطول والقطر والوزن كل نوع يختلف مغلف أو لا عندنا النوعين أعتقد وإحتمال فيه أنواع ثانية دخلت السوق وأتوقع لها جداول سهلة تسهل الحسبة بس من تفاصيل الرسم نطلعها بشكل دقيق .. لو انتركت للمقاول أوقات في تقديره وتسعيره يضرب في 1.5 خمسين في المئة زود ووقت التنفيذ يحط القليل والمالك دافع قيمة التسعير الأساسي

https://i.imgur.com/g5Slbhx.png

بعض حسابات الكميات تكون فاصلة الخرسانة كلها في جدول معين والحديد كله للبيت في جدول معين والخشب والألمنيوم وغيره الطابوق والبلاستر وكميات الحفر التقديرية .. المهم هو توضيح المواصفات وتوضيح طريقة التركيب والشروط الأساسية ما يخسر الإستشاري شيء حتى لو شيء معروف كمواصفة قياسية التذكير بها واجب

https://i.imgur.com/0qqX8Gy.png

انا حاط حساب كميات كامل حق بيتي مع المواصفات ومع شروط العقد للي يحب يتابع في موضوع عقود البناء والاستشارات المثبت فوق

هذا جزء من حساب كميات جدول حاطه الكاتب يوضح الكميات اللي تقاس بالوحدة الطولية ما يبين لي واضح

https://i.imgur.com/Nt0hWe9.png

ما يبين لي واضح وصعب أعلق عليه بس فيه جدول كميات استرشادي لحساب قيمة العقد والكميات تقريبية ما يحق للمقاول يطالب بحسابها مرة ثانية في الموقع ولو زادت شوي أو نقصت شوي مب مشكلة وفيه جدول كميات ما يكون دقيق يكون بسيط أكثر يعمل بعد للتسعير وتسمى كميات يعاد قياسها في الموقع .. وهذا مشاريع الدولة تتبعه خصوصاً في الحفريات والبنية التحتية يحسبون الكميات والتعديلات بشكل دائم وتكون فيه اضافات والغاءات كثيرة لذلك المقاول يضمن حقه وبطريقة صح والحكومة تعرف التسعير بشكل مسبق .. بعد فيه جدول كميات مع تسعير أولي قابل للتغيير حسب السوق وغلاء المواد أو رخصها

عندنا في السابق كان موجود مكتب النقل والمعدات الوطني .. هذا مكتب تحت إدارة البلدية أيام البلدية بلدية ويسجل الآليات والسيارات والشاحنات اللي ملك المواطنين ويطلبها بالتلفون حسب الحاجة لها سواء من مقاولين متقاعدين مع الدولة أو من أي جهة من جهات الدولة وأظن هذا المكتب موجود لأنه ضروري وأتوقع فيه له موقع الكتروني سهل الطلب ومعرفة الأسعار لكل معدة وممكن بعضهم يسوون خدمات خاصة كالآلية مع سائق ( ما أدري لو حد عنده تحديث يبلغني )

https://i.imgur.com/wTkUXWL.png

الكلام هنا عن البوكلين الحفار والآليات والمعدات كثيرة والمفروض جهة معينة مثل الإجارة القابضة تأجر معدات حديثة إضافية تكون إضافة كبيرة لسوق البناء

هذا السؤال جوابه طويل المفروض حسب أهميته

لو حصل تسرب ما تحس به بسهولة بس بعض المضخات الحديثة تعرف إن فيه محبس ضعيف أو تسريب في بايب معين وتوقف تلقائياً .. نشغلها ونكشف لو فيه محبس ينقط ممكن منه ولو ما حصلنا معناها فيه تسريب .. قيمتها حول ال 2000 ريال وترتبط حتى بالتلفون الجوال .. وفي حال نبغي نعرف وين ندور وفي أي خط نكشف على الخطوط من السطح نفتحها واحد واحد ونسوي اختبار ضغط لو حصلنا الضغط ينزل معناها هذا الخط نتتبعه وتتبعه سهل أما داخل دكت معين يمكن التسريب برا بيكون سهل فتح الدكت ومعرفة وين التسريب واصلاحه أو تحت البلاط بعد ننتبع وفيه جهاز بسمعات حساسة تكشف صوت الماي وهو يتسرب بالضبط وين وهناك نقدر نكسر تكسير محدود ونصلح.

نصيحة دوم خلوا ضغط البرشر على 2.5 بار الى 3 بار لتزيدون وايد مشكلة واخذوا مضخات ذكية اللي تعطي ضغط حسب الحاجة وتكون شبه موقفة لو تم اغلاق جميع المحابس

https://i.imgur.com/6F1bmY7.png

الحل الثاني اللي ذاكره الكاتب ممكن وممكن نزيده حل ثالث وهو عمل تمديد جديد بالكامل لو البيت قديم ومتهالك وتغطيته بحائط مستعار والتبليط فوقه بيكون أسهل من التكسير كل اللي نحتاجه فتحات للبايبات بدريل والبايبات لو عندنا دكت ننزلها فيها والا على الجدار حتى لو مكشوفة بتكون خلفية أو جانبية تنصبغ ولا تأثر في الشكل ما تتلاحظ بسهولة

حبيت الترعة .. طبعاً عندنا شيء مقارب وصعب جداً اللي هو الصبخة أو المناطق البحرية وعندنا بعد المناطق اللي ترتفع فيها المياه الجوفية فجأة .. تصدقون عادي منطقة مبنية وأرضها جيدة وعلى بعد أمتار منها منطقة المياه الجوفية ما تخلص منها وصارت وحطيت لها صورة جوية من قوقل في السابق .. في مدخل عين خالد القديم المقابل لفريج الغانم ( مدخله ) وانت داخل على اليسار وراء المباني اللي على الشارع كانوا مستثمرين حافرين بعمق كبير حول ستة متر أو 4 وطلعت مياه كثيرة يسحبون وتطلع بقوا سنوات .. كانت نيتهم يبنون مول محترم .. خذوا وقت طويل في الحفر والحفرة واقفة والماي ما يوقف يمكن 10 سنوات والمباني اللي جدام واقفة ولا فيها شيء لا والشركة من أقوى شركات المقاولات في قطر

آخرتها سووا إحلال تربة ومواد مقوية اسمنتية واحتمال اضافات ثانية مثل الشباك البلاستيكية القوية وغيروا البنيان بدون بيسمنت تحت وكانت النية يسوون دورين بيسمنت .. اللي يصير عندنا أراضي قطر غالبيتها متشبعة مياه جوفية ضحلة وهذي معلقة وسط وبعيدة عن المياه الجوفية العذبة وتحتها توجد المياه الجوفية الملتقية مع مياه البحر بينها فاصل بسيط بس يفصل العذب عن المالح بسبب المالح أثقل ويبقى تحت وهذا شيء شرحه لي خبير جيولوجي قطري مسوي أبحاث دكتوراء حول هذا الشيء .. المهم المياه هذي لو أزلنا طبقات من الأرض نكون سوينا منطقة ضغط سالب يتجه لها الماء ولازم أي واحد ينوي يبني يشوف أشغال قسم الطرق أوقات عندهم تقارير تربة عن المياه الجوفية وتكون قريبة لمكانه .. انا حصلت تقرير قرب بيتي حول 2 كيلو يقول المياه الجوفية على عمق 7 أمتار بس ما نأمنها لأنها متغيرة لظروف كثيرة

https://i.imgur.com/Ur4n6aR.png

الإحتياطات كثيرة بس غالبيتها مكلفة منها أساسات الأوتاد وهذي سهلة والمفروض معقولة السعر بس عندنا نحتاج شركة مختصة وفوق هذا تكون عندها ذمة .. لأن الشغلة حق بيت ممكن ما تاخذ يومين أو ثلاثة لو انعملت بمعدات صح بس المعدات مكلفة

السؤال الأهم شلون ناخذ فكرة عن تحمل الأرض وعمق التأسيس؟

أسهل طريقة هي حفر حفرة أو عدة حفر استكشافية ونلاحظ بالعين قوة الارض ومكونات التربة .. أوقات تكون صخرية قوية نفترض هذا عمق التأسيس ولا نهتم نزيده أهم شيء يخبي الأساسات ويزيد عليها .. متر ونص مناسب جداً ومتر وعشرين تمشي لو سمك أكبر أساس 60 سم

أكيد لعمل هذي الحفرة ضروري تكون الرخصة جاهزة أو أقل شيء رخصة تحويط ونكون محوطين حتى لو مؤقت .. وفي حال التصميم جاهز بالكامل يكون الإستشاري مفترض قوة الأرض متحفظ فيها ومنزلها وطبيعي يسوي الأساسات كبيرة ومبالغ فيها .. ممكن نخفظ تكلفتها لو سوينا اعادة تصميم لها حتى لو 10 - 20% نستفيد منها في باقي البناء .. لفحص قوة الأرض يستعملون مجسات بأوزان حقيقية تضغط الارض ويشوفون مقدار الهبوط ويقدرونها تقدير قريب للواقع .. هذي تنفع للمشاريع الكبيرة أما الصغيرة ممكن تكون دوشة شوي مع إن الفحص ما ياخذ فترة طويلة وأعتقد فيه اختبارات سريعة وسهلة

ما يوصل عندنا في الغالب عمق التأسيس 7 متر الا تكون فيه إرادة لعمل دورين بيسمنت وضروري نحفر ل 7 متر وفي هذي الحالة أوفر وأسهل وأسلم عمل دراسة تربة متطورة من مكتب خاص مرخص

https://i.imgur.com/4e0qQg0.png

هنا يقصد بالضمان النهائي هي النسبة المقتطعة من كل دفعة مستحقة كضمان للصيانة وهذي تتجمع كنسبة 10 أو 15% ولازم تحدد في العقد بشكل مسبق وتبقى لإنتهاء فترة الصيانة المحددة أيضاً في العقد .. موضحها بشكل أكبر في موضوع العقود للي يحب يعرف أكثر

https://i.imgur.com/2QQaXYJ.png

سؤال آخر مهم وهشكل بنكون وصلنا صفحة 154 من 2413 ورانا مشوار طويل .. السؤال مختصر والإجابة كذلك بس حسب معرفتي باوضح أكثر شالمقصود .. الإنشاء بالحوائط الحاملة من أسهل الأنظمة ويستعمل في غالبية دول العالم بسبب رخص النظام .. عيبه عدم مقاومته للهزات والحمد لله ما عندنا هذي المشكلة

الإسنشاري الشاطر يفترض يسوي هالنظام للأسوار وللملاحق وللبوابات مع عمل أعمدة فقط لحمل الأبواب .. لكن شعار استشاريينا الشغل بطريقة وحدة وبس وبمبالغات انشائية مكلفة وأوقات مكلفة جداً

طبعاً فيه المباني الفراغية شكل قبب أو اللي تعتمد مبدأ القبة وتماسكها وقواعدها بس على المحيط وبدون عمود كلش

فيه مباني حديدة خفيفة ( Space Frame ) هذي مثل السنتر في الدوحة المبني من الثمانينات وللآن موجود .. أعمدة حديد خفيفة وهيكل حديد فوق ثلاثي الأبعاد والحسابات ثلاثية ويعطي حتى شكل معماري جميل

فيه المباني المعدنية الغير منتظمة مثل تصاميم زهاء حديد ومثل تصميم المتحف في قطر الحديث وهذي التصاميم سلاح ذو حدين مكلفة والمساحة المستفاد منها بسيطة والمواد خفيفة وحديثة وغالية أوقات تصنع للمشروع فقط .. بس أوقات تطلع عنصر جذب معماري ورمز للمنطقة كشكل خارجي جاذب

https://i.imgur.com/Yvw9onI.png

أكثر نظام يستخدم عندنا الهيكلي مع إني شفت مباني دورين وثلاثة عندنا معتمدة الحوائط الحاملة وسيبوريكس

سؤال آخر مهم أنقله كما هو وهذي إحدى الطرق والآن تطورت خلطات الخرسانة وتوجد نوعيات فيها مقاومة للشد والأوزان ومناسبة وبدون حديد لأن الحديد ضعيف والسبب الصدأ مع مرور العمر يضعف ويضعف الخرسانة وتنتهي صلاحيتها سرعة عكس المقويات الثانية مثل الفيبر .. والخرسانة على الأرض تستمد قوتها من قوة الأرض تحتها ما تنضغط

https://i.imgur.com/ysuuRE4.png

https://i.imgur.com/12vhFst.png

الخشونة تحصل في الإسمنت بسبب سوء التخزين وقدم العبوات وتكون بسبب الرطوبة وتكتل حبات الإسمنت

https://i.imgur.com/468dc0O.png

أذكر أحد كبار التجار كان بادي تجارته باستيراد كميات اسمنت من السعودية وتخزينها في أرض مسورة ثم بيعها في الشتاء وقت ازدياد الطلب على الاسمنت في قطر .. يعني مخزن في ظروف سيئة وله فوق ست شهور منتهي الصلاحية

فيه سؤال عن كيفية حساب كميات الخرسانة للأعمدة والجواب سهل ونفسه للي مر علينا عن القواعد .. طول في عرض في ارتفاع في عدد الأعمدة المتشابهة ونجمع الكميات مع الباقي الغير متشابهة يطلع مجموع الكمية للأعمدة .. نفس الشيء للجسور ونفس الشيء للأسقف بس بشرط ما نحسب الجزء المشترك بين الجسر والسقف مرتين أما نحسبه في الجسر ونخصمه في السقف أو نحسبه في السقف ونحسب فقط الجزء الساقط من الجسر

استخدمت لون اسمنتي إن شاء الله مناسب

https://i.imgur.com/Rx8kUt9.png

الكلام فوق نظري ويخوف .. هذي حوائط استنادية مهمة ومعنى انبعاج وتشققات شيء قوي والوزن كله مرتكز عليها .. معالجتها معالجة جذرية ضرورية ولو نقدر نحفر من الخارج حولها والمحيط يسمح مع عمل تدعيم وصيانة قوية زين أو نشوف حلول من الداخل تدعيم بحديد بقطاعات كبيرة مناسبة آي بيمز قصدي

من فترة بسيطة كلمني أحد الإخوان باني عمارة وبيسمنت وصارت تشققات في أرضية البيسمنت من السيارات .. وانا أعرفه هو يبني لنفسه وبناء على البركة .. يقول جبت استشاري عربي وهول لي القصة وسوى لي عقد مبدئي بمليونين ريال شغل صيانة قوية .. قلت له نصيحة صيانة عظمى البلدية تتدخل فيها ورخصة وقصة مزعجة .. إنت شوف مهندس وكسر الارضية ممكن تحت بايب مياه أو صرف صحي مسبب هالمشكلة وممكن الخرسانة ضعيفة وتحتاج صب خرسانة جديدة وعطته رقم مهندس قديم أعرفه من الشغل وخبرة في الإنشاءات كلمه وأدار له الشغلة ما كلفته الا تحت ال 50000 ريال من مليونين لتحت الخمسين ألف وبدون ما يمر بإجراءات البليدية

هذا السؤال ما ينطبق عندنا لأن الحديد عندنا معروف ومصنعه قطري حكومي .. مختوم ب QS منقوشة على كل قطعة بس يفرق فيه مغلف بالإيبوكسي وأنصح فيه بقوة وفيه العادي .. كنت أنصح بالمغلف للأساسات بس بعد ما عرفت سبب تقوس الجسور وضغطها على الطابوق ونشوء الشلوخ أشوف لكل البيت أفضل .. غالب الإستشاريين يوصفونه في عقودهم إحتياط ممكن المقاول يكون مستورد حديد رخيص ويستعمله

https://i.imgur.com/qMzUnBZ.png

https://i.imgur.com/fbQfELd.png

من أهم الضروريات هو استخدام الهزاز في كل مراحل الصب يمكن الا صبة النظافة وطبيعي صبة السكريد الناعم كثير المياه ذاتي الإستواء وبعد الخرسانة اللي فيها اضافات تخليها ذاتية الإستواء ويكون حجم الكنكري فيها صغير وتكون كميات الحديد معقولة ولا فيه تشابك كبير وصعوبة تمر الخرسانة بين الحديد حتى وهي ذاتية الإستواء

https://i.imgur.com/BCDmnbf.png

عندي فيديو نزلته على الوتس اب بس ما ادري شلون انزله في المنتدى .. مضمون الفيديو هو إن تجربة تبين أهمية استخدام الهزاز وتكتل الخرسانة بشكل ما يغطي الجوانب كلها وشغلوا الهزاز وبدت تطلع الفقاعات بس بقوا مشغلينه لحدود دقيقة والفقاعات تطلع بطيئة .. ممكن نبقى لين نشوف بداية انفصال الماي ونوقف ونروح مكان ثاني ونرجع والا في الموقع كم هزاز شغالين كل واحد يغطي المساحة كلها حتى نضمن مرور الهزاز مرتين أو 3 على كل نقطة

هذا ما أعتقد يهم مالك بيت بس يمكن معرفته مفيدة وهي الطبقة الرقيقة فوق أعصاب الهوردي لا تقل عن ثلث عمق الهوردي في السمك

https://i.imgur.com/PdJ2eMx.png

دوم الإستشاريين المتمكنين يحطون في عقودهم للمقاول التأمين وبقيمة معينة حق بيتي حاطين مليون وبعد حوادث غير محدد .. يعني طاح عامل ومات المقاول مسؤول عنه .. صار حريق لأي سبب المقاول مسؤول .. إنهيار المقاول مسؤول وممكن يكون من الهواء .. بعض المقاولين عندهم تأمين دائم لكل شغلهم بس يعطون نسخة من بوليصة التأمين وتكون بتاريخ ساري تخليك كمالك متطمن ومرتاح

https://i.imgur.com/Ix775yn.png

الكلام هذا غير صحيح وغير دقيق .. ليش؟ تعتمد على ظروف كثيرة وأوقات الخرسانة المكسرة تكون فيها مشاكل وضعيفة وممكن سهلة الكسر عادي نحصل العامل يخلص أكثر وبوايد ... أوقات تكون عندنا معدات تكسير قوية وسريعة ما تاخذ العلملية ثواني .. وأوقات صج ما تاخذ ثواني لو استعملنا التفجير المدروس ( وهذا لو كنا في دولة قوانينها متفتحة وكل شيء متوفر وسهل ) وقصدي بالمدروس هو عبوات صغيرة ينحفر لها بدريل وتدخل تشيل عمود أو جسر كامل وينزل كأنه قطع صغيرة

https://i.imgur.com/IFpFBDX.png

صباح الخير بو عبد الله، اتفق معك كلام غير دقيق، ليش؟ اولاََ نص الكلام هذا كأنه ماخذه من عقودنا،، هذا كلام مكتوب واللي يصير في الواقع ان المقاول يرقع و ممكن يفلس ويطلب مهلة لاتمام الاعمال مشفوعة بالمبررات ويعطونه مهلة و حتى يوصل انه يسلم العمل الناقص لمقاول ثاني يكمله و احنا ما عندنا غير نوافق ونوافق ونوافق و نمدد و نحجر على شيك الضمان اللي هو عشرة بالمية من قيمة المشروع،، يعني لو المشروع خمسة مليون،، الشيك بخمسمية الف.. ومصيره يستلمه في النهاية الا اذا هو مرة مقصر.

المكتوب شيء والواقع شيء... فيه مقاولين مظلومين وحسب التحكيم طلعوا مب مقصرين لكن حملناهم مبالغ بحكم المحكمة ومحد له عندنا شيء..

اهم شيء الجودة والاستدامة و طريق الحرير يمر من صوبنا.. وحضرتك يا مهندسنا قلت لي انه طريق البعير لكن بكره بتجوف هل هو طريق حرير ولا طريق بعير و بدك من جاف؛)

اقتباس:

---

المشاركة الأصلية كتبت بواسطة سالم الزهران

صباح الخير بو عبد الله، اتفق معك كلام غير دقيق، ليش؟ اولاََ نص الكلام هذا كأنه ماخذه من عقودنا،، هذا كلام مكتوب واللي يصير في الواقع ان المقاول يرقع و ممكن يفلس ويطلب مهلة لاتمام الاعمال مشفوعة بالمبررات ويعطونه مهلة و حتى يوصل انه يسلم العمل الناقص لمقاول ثاني يكمله و احنا ما عندنا غير نوافق ونوافق ونوافق و نمدد و نحجر على شيك الضمان اللي هو عشرة بالمية من قيمة المشروع،، يعني لو المشروع خمسة مليون،، الشيك بخمسمية الف.. ومصيره يستلمه في النهاية الا اذا هو مرة مقصر.

المكتوب شيء والواقع شيء... فيه مقاولين مظلومين وحسب التحكيم طلعوا مب مقصرين لكن حملناهم مبالغ بحكم المحكمة ومحد له عندنا شيء..

اهم شيء الجودة والاستدامة و طريق الحرير يمر من صوبنا.. وحضرتك يا مهندسنا قلت لي انه طريق البعير لكن بكره بتجوف هل هو طريق حرير ولا طريق بعير و بدك من جاف؛)

---

طريق الحرير يا بو زيد أساسه البعير

كلامك صحيح في جزئية كبيرة لكن اللي صار عندكم نهضة عقارية ونهضة علمية ونهضة قانونية كبيرة .. على الأقل حكم المحكمة يتنفذ والكل يحسب حسابه .. إحنا عندنا أهواء ومجاملات ولف ودوران حتى الحكم الواضح في صالحك ما يتنفذ صح

الكتاب أكيد مؤلفه مهندس مصري شغال في السعودية .. انا اللي يهمني متابعة الكتاب والمعلومات ومقارنة الوضع عندنا وتوضيح هذي الأساسيات للي يبي يعرف ويتابع .. العلم واحد والأرض وحدة والجاذبية وحدة بس تختلف طبيعة الأرض العامة من بلاد لبلاد ومن منطقة لمنطقة .. قطر طبيعتها تقريباً وحدة الا قرب البحر ومناطق الصبخات والمناطق اللي مياهها الجوفية ترتفع