مراجعة التصاميم المعمارية وابداء الملاحظات عليها (محدث)

بخصوص بناء الهيكل الإنشائي .. معروف الهيكل الخرساني هو الأساس .. ببساطة كل شيء خرسانة ممكن نبدأ مثلاً شهر 8 في تجهيز الموقع وبدء الحفر هذا ممكن ياخذ أوقات شهرين نقل كبائن وتكرمون حمامات خاصة وعمومية لها للعمال وللطاقم الهندسي والمالك .. والتسوير المؤقت أو الدائم لو الموقع كبير ونبغي له حماية دائمة أقل شيء تسوير مب مشطب .. والكاميرات لو المالك محتاج حماية الكترونية .. يعني على بداية شهر 10 نبدأ أي عملية صب ممكن وفي أجواء مناسبة وبنيان الهيكل لو مشينا صح وبتصاميم انشائية متطابقة مع ما نبغي من معماري بيخلص بنيان الهيكل في الفترة المحددة قبل شهر 5 بإذن الله

أعمال الطابوق تعتبر جزء أسهل وممكن تستمر خلال الفترة الأكثر حرارة .. يخلص شغل الطابوق معاه شغل عزل السقف أقل شيء مائي استعداد لموسم الأمطار والشتاء وبنفس الوقت نستغل الوقت صح لباقي الشغلات مثل التمديدات وأعمال البلاستر تكون مع بداية تحسن الأجواء وبهالطريقة بشكل مختصر ممكن نخلص خلال سنتين والأهم نبني صح

أتابع مع المواصفات القطرية أو بدايتها اللي هي شروط البناء القطرية وشروط التعاقد العامة

هنا العمر التقديري للمنشأءات بأنواعها وانا أتسائل إذا المباني الصغيرة عمرها الإفتراضي 50 سنة وانا أشوف 75 ممكن يتحقق بسهولة ولازم يتم التصميم على أساسه .. ومب معناها نكثر خرسانات وحديد بالعكس نسوي تصميم اقتصادي ونحتاط لمواقع الفشل الكثير الحدوث منها ونصر على الصيانة الجيدة بقوانين بعد ملزمة وسهلة والأهم بأيدي عاملة متخصصة ومرخصة من الدولة وعليهم مسؤوليات حدود معينة عليهم عملها

https://i.imgur.com/JRvXQIJ.png
مثال على مشاكل الصبانة اللي شفتها عند الكثير من الملاك .. المالك يقرر يغير البلاط أو الرخام يجيه مقاول أو عامل وللأسف يركز على الإتفاق الكلامي ويشتغل شغل تكسير وازالة حتى الدفان يزيله .. أوقات يجيب بودرة ردية ويملاها ماي ويحط فوقها مونة رقيقة وأي مادة تشطيب ولو يبغي باركيه يركبون له بلاط شعبي بعدين باركيه وهو لو ركب سكريد بدون دفان أفضل له بمراحل والسكريد يشرب مايه وبجف بسهولة وخلال أيام بعدين يبلط عليه أو يركب باركيه مباشرة بدون وسيط الا طبقات الحماية الضرورية .. المشكلة المياه اللي في البودرة تبقى وترشح على الجدران بعد الصبغ والمالك يكره الساعة اللي سوى فيها صيانة هشكل

لغة العقود الإنجليزية ولو فتحنا مجال للعربية تدخل عندنا لهجات غريبة ما عليها توافق وقانونياً كلها تعتبر ثغرات الا في حالة توصيف كل كلمة شتعني بالضبط ومرادفتها بالانجليزي وانا مع التعريب بس الإنجليزي أدق وكلمات محددة

هذي قصاصة عن استعمالات الموقع .. طبيعي المقاول بيخزن شوية أغراض وبتكون فيه غرفة حارس لحماية المعدات وملاحظة أي شيء بس السكن ممنوع الا بتصريح رسمي ورخصة رسمية وبقوانين سكنية محددة مذكورة في الجزء الأول القسم 10 .. مثل هذي الكتب اللي المفروض تكون في موقع الكتروني سهل التصفح تكون فيها إشارة وقت ضغطها تنقلك لهذا القسم وتشوف الشروط بوضوح

https://i.imgur.com/ktxKf2r.png

حتى مسئلة النظافة وترتيب الموقع لازم تحدد بوضوح أكبر .. عند بيتنا كامب يفترض إنه بسيط للعمال في سور الحديقة من كاس العالم وللحين شكله بيبقى دائم .. في الليل ضرب على هياكل الشاحنات والنشاشيل ينظفونها من الأتربة اللي فيها بطريقة بدائية ومزعجة الساعة ثنتين وثلاث وأصوات العمال وهذرتهم واصلة لمكتبي فوق من مسافة حول 100 متر .. جاري إخوي أقرب بيته لهم والله يعينه بيته مب معزول متأكد يسمع انا مكتبي بعد مب معزول بس درايشه معزوله .. لكن باقي البيت الحمد لله ما يوصل الصوت

حماية الموقع هي مسؤولية المقاول وللحماية شروط مثل التسوير المؤقت وانا أشوف عمل تسوير بنيان طابوق أسهل وأفضل في البداية وعمل بوابات مؤقتة شينكو وحديد حتى تنظيم الموقع لناتج الحفر لإستعماله في الدفان بعدين .. تخطيط الأعمال الأرضية ضروري من الأساس وهذا من ناحية التعاقد من المالك والإستشاري يفرض على المقاول وأفضل يكون المقاول مسؤول حتى ما ندخل في متاهات قانونية وناخذ إحنا المقاولة مع عمالة سائبة وشغل ركيك بعدين نلعن اللحظة اللي فكرنا فيها في هذا الإتجاه

https://i.imgur.com/dpZuiys.png

هذي طريقة عفى عليها الدهر وقديمة جداً ما أعتقد البلدية تعتمدها مرجع ألحين .. في كل منطقة يحطون نقاط مساحية تحدد الإرتفاع وموقع النقطة من خطوط العرض والطول الدولية ومنها يقيسون المساحين ويعتبرونها مرجع .. هذي تبني حولها حماية وتتثبت في الأرض بس أوقات بسبب دوس السيارات حولها تتحرك شوي وتعطي قراءات خاطئة وتستوي مشاكل في التحديد المساحي أوقات مكلفة وقضايا

تطورت الأُمور واستوى العالم يتبع النظام الرقمي أي نقطة في الفضاء أو الأرض لها إحداثيات محددة وفريدة لها بس شماليات وشرقيات حسب خطوط العرض والطول وارتفاع من سطح البحر يعني X, Y, Z حتى بالملم وبقياس دقيق بالأقمار الصناعية وقراءة كم قمر لتصحيح أي نسبة خطأ

مستغرب الكود هذا موضوع سنة 2014 وهذي التكنولوجيا تستخدم قبل ال 2000 عندهم وهم للحين يحافظون على تراث يدوي تليد .. الشغلة وايد تسهلت وممكن رجل واحد يقيس كل هذي بجهاز توتال ستيشن المعروف المساحي الحديث .. الطريقة السابقة تحتاج عدة أشخاص كنا نشوفهم قبل في الطرق بمثل المناظير واعمدة متدرجة وكل واحد يصارخ على الثاني من بعيد يسجلون القراءات .. هذي دقايق ما تاخذ وتسجل الكتروني تروح المكتب وتنزل البيانات والكمبيوتر يسوي لك أي حسابات أو خرائط مساحية اليدوية تتبعها حسابات وجلسات وشغل طويل

https://i.imgur.com/nJoT6hP.png

ملاحظة

أغلب المكاتب المتطورة تحط المواصفة العامة وتعدل عليها كمواصفة خاصة أعلى وصحيح إحنا للحين ما دخلنا في العميق وتونا في الشروط بس بعد مهم نكون واقعيين

هنا إجراءات طلب رخصة البناء .. المفروض يذكرون من يفتح الفايل ووشي الإجراءات يما إننا نتكلم عن اجراءات ولو موقع الكتروني يحدد .. واحد يقول بديهي معروف الإستشاري بس يفترض مفهوم الكلام وواضح للكل

https://i.imgur.com/go6uVL4.png

فيه شروط للصرف الصحي محددة على الطريقة القديمة منهولات ومواصفاتها والبايبات المعروفة .. لاحظت السلوب للبايبات 1:60 هذا يعني ننزل 10 سم لكل ستة متر طول أقل شيء .. لو خليناها 15 سم لكل 10 متر أو 1.5% تطلع شوي اقل من المطلوب بالكود المطلوب باالكود بالنسبة المئوية تطلع 1.6666% .. فيه وايد شروط ما أعتقد تهم كثيرين منكم وهذي يعرفونها الإستشاريين المتمرسين ويدققونها قسم الصرف الصحي في أشغال بس بعد يبقى الإشراف العام منهم على تطبيقها ومحاسبة المقصرين من استشاريين اشراف ومقاولين على تطبيقها لو كان فيه خطأ خبركم شغلة تافهة يسويها المقاول بدون دراية ويطبقها يسبب مشكلة كبيرة بعدين

هذا جدول استرشادي لعمل خزان الصرف الصحي بناءً على العدد المتوقع للساكنين ودوم نحط عدد أكبر في تقديرنا المفروض .. مثلاً لو متوقعين بيت فيه 10 أشخاص والوقت الحالي فيه 6 نزيد شوي وممكن نروح ل 20 أو لو النظام يسمح نروح حق مقاس بين A and B ونسوي حق 15 شخص .. المقاس باللتر نحوله للمتر المكعب وأعتقد المتر المكعب فيه 100 لتر أو 1000 ناسي بالضبط كم وممكن نبحثها بس على فرض 100 خزان 6500 لتر فيه 65 متر مكعب هذا لو بنسوي ارتفاعه أو عمقه 2.5 متر نقسم 65 ÷ 2.5 تعطينا 26 ولو عندنا طول متوفر 6 يبقى العرض 26 ÷ 6 بطلع 4.33 أو 4.4 متر

https://i.imgur.com/BqdMSXQ.png

طلع 1000 لتر في المتر المكعب وهذا يعني الخزان يطلع أصغر 6.5 متر مكعب وهذا لو عندنا ارتفاع بس متر ونص تستوي مساحة القاعدة 6.5 ÷ 1.5 = 4.33 نفترض 4.5 متر مربع وكل ضلع ممكن واحد 2 والثاني 2.25 نخليه 2.3 أفضل لو المساحة متوفرة .. بس اللي الاحظه الإستشاريين دوم يسوون أكبر بوايد ومعاهم حق بسبب ما نحتاج نتصل كل وقت نطلب شفط وتفضية

مسؤوليات المقاول كثيرة والمقاولين أنواع بعضهم فاهم وعارف لو حطيت شرط اتباع المواصفات القطرية وحددت المواصفات العامة برقمها اللي الاستشاري دارسها طبيعي بيسعر وهو حاط في باله كل هذي المسؤوليات عليه في حدود العقد ومراحله لو عظم بتكون مواد التشطيب كلها مستثناة ولا لها حساب لحمايتها أو تخزينها الا يكون مذكور في العقد .. المفروض يكون اتباع شروط البناء العامة حاصل بدون كتابته في العقد لأن المقاول يشتغل بترخيص وفي دولة قانون ( كما يقولون ) ولازم ينفذ شروط الدولة العامة ثم شروط العقد الخاصة لو ما تتعارض مع الشروط العامة وتزيد عليها

https://i.imgur.com/3MgpuVH.png

هذي الفقرات مسمينها التداخل والمفروض يسمونها حدود الشغل .. نعرف إن مستحيل مقاول يشتغل في حدود الأرض بالضبط الا تكون الأرض كبيرة وحتى لو كبيرة بيطلع شوي خارج الحدود لبناء الأسوار .. المفروض يجي تحديد خطوط عمل المقاول من البلدية بمخطط واضح ويحدد المجال اللي يتعداه والفترة شكثر وبشروط واضحة .. مستغرب شلون قاطين شغلهم على المهندس وذاكرين المهندس بس بدون تحديد أي مهندس هل هو تابع للبلدية أو للتخطيط أو للطرق في أشغال أو مهندس المكتب المشرف .. توقعت المواصفات القطرية أدق من هشكل بوايد

https://i.imgur.com/8YuGCG0.png

دوم أذكر نفسي بملف المشروع وأوقات أهمله وهذا يستوي ملفين وثلاثة ممكن من كثر الأوراق ونخلي جزء منها في البيت .. أشوفه للحين أفضل من الإلكتروني مع ضرورة التحول الالكتروني أسهل للحفظ والرجوع وقت الحاجة .. هنا تسجيل المقابلات وتوثيقها وأشوف هذا واجب الإستشاري المشرف عمل جلسات عمل سواء في الموقع أو المكتب بحضور المالك أو بدونه بس يبلغ بالنتائج والنقاش والمفروض بايميل أو ألحين وتس أب .. البعض يسوون قروب وتس أب يجمع المقاول والاستشاري والمالك وموظفيهم

ملاحظة ملف المشروع المفروض نبدأ فيه من التصميم ونسجل كل ما نوصل له واختياراتنا لكل شيء يتعلق بالتصميم

https://i.imgur.com/yTf3hCE.png

فيه تكملة ولستة طويلة حطيت بدايتها بس وأكيد ممكن تاخذون نسخة من المواصفات هذي وهي كتاب ضخم فوق 2400 صفحة من النت واحتمال من موقع البلدية وأكرر المفروض موقع الكتروني يسهل البحث والوصول للمعلومة اللي محتاجينها

مقابلات تطور الإنجاز وما تم عمله هذي للمشاريع الصغيرة ما تكون كل شهر ممكن كل مرحلة نعتبرها مرحلية وأفضل نترك تحديد فترة كل مرحلة وحتى تكلفتها على المقاول حتى يقر على نفسه .. لو تأخر بيكون تأخيره تراكمي ويضاف لفترة المشروع لو بدون أسباب تطبق عليه الغرامات وينذر قبلها بوقت كافي .. مثلاً مرحلة صب الأعمدة قررها خلال اسبوع أعمال الحدادة والتخشيب والصب تعتبر مستحيلة الا يكون عندنا نوع خرسانة بمسرع تصلب يخلي قوتها التصميمية توصل خلال 3 أيام .. من الجدول نعرف إنه مستحيل ونحدد فترة منطقية 3 اسابيع اسبوع تجهيز واسبوعين رش الخرسانة وادامتها بالماء بعد فك الخشب بعد الصب بيومين .. فك الخشب يكون بحضور ومعاينة الإستشاري والتوثيق بالتصوير حتى يلاحظ أي تعشيش قبل ليخفيه المقاول بالترقيع باسمنت عادي وهذي تصير كثير .. خلال الأسبوع الثالث يقدر المقاول يجهز للسقف أو قبله يكون بنهاية الأسبوع الثالث منتهي من نظافة الأرضيات وصب الصبية الأرضية حتى يسهل عليه تركيب الجيكات الحديد والخشب للسقف .. هشكل يستلم دفعة الأعمدة اللي هو مقررها في حساب الكميات وماضي شوي في دفعة السقف مجهز لها .. كذا شغلنا يكون نظامي وسهل

https://i.imgur.com/w38F3Ko.png

هذي فقرة مهمة من يسجل نسخ المقابلات وحسب المشروع الفورمات أوقات بسيطة تغطى في دقائق والتوجيه من الاستشاري للمقاول لو كان المقاول متمرس يكون بسيط وملاحظات بسيطة .. هنا ضروري يكون المالك في الصورة وترسل له حتى لو كانت هندسية 100% وبعيدة عن فهمه .. المالك عن طريقها يعرف أداء الإستشاري لواجبه وحتى مب مذكور المهندس الاستشاري بس المهندس .. ولو عندنا توثيق ومتابعة من مكتب توثيق بيكون التحكم أكبر ومتابعة أداء المكاتب .. يعني يفترض 4 أطراف توصلهم هذي المقابلات ونتائجها وترسل بأي وسيلة تواصل سهلة

https://i.imgur.com/t092DMZ.png

غلطان طلع الكتاب 4517 صفحة وانا قلت 2500 قبل وتوني مخلص منه 43 صفحة ووايد مغالطات تحتاج تعديل كشروط خاصة لو نبغي مشروعنا يتم صح .. ويستمر عيبنا في ركاكة القوانين .. لا وحاطين صورهم في بداية الكتاب وبعضهم دكاترة للأسف

هنا الحديث عن التزام المقاول بطريقة تنظيم عرض المواد وأخذ الموافقات عليها من الإستشاري والمالك وتكون حسب المواصفات المطلوبة .. بس بداية العنوان الفرعي أول الصفحة الأخطاء في المعلومات هذي المفروض تصاغ بصيغة ثانية كلكمات انجليزية دقيقة مثل Mistakes of information submitted by the contractor ما اعتقد في صحيحة مترجمينها حرفياً من العربية والمهم يهمنا المضمون بأن المقاول مسؤول وانا أشوف المسؤولية بعد ضمنياً تقع على الإستشاري .. المهم البند الأول يحمل المقاول تصليح أي خلل يحصل نتيجة تركيب قطعة هو أعطى عنها معلومات انها مناسبة ومشت وتوافق عليها واكتشفوا انها سببت مشاكل .. مثل بايبات معينة للصرف الصحي إكتشفنا ضعفها وتسريبها في الأرض بسبب تكسرها من الدفان فوقها .. الضعف ممكن يكون بسبب سوء التصنيع بس المقاول مسؤول عن اصلاحه وعلى نفقته

https://i.imgur.com/cXrA0Yp.png

الشوب دراونغز هي مخططات تنفيذية توضح طريقة تركيب القطعة وهذي مهمة ومهم يحتفظ بها المالك بعد انتهاء المشروع .. ويضاف لها الكتلوجات والضمانات وكل ما تم ذكره

المخططات المساحية والمخططات المعدلة واللي تجي كما هو الواقع في المبنى تحتوي على تغييرات معينة تختلف قليلاً عن التصميم .. وهذي المفروض المقاول ( ما ادري ليش كل شيء قاطينه على المقاول ) والمفروض الإستشاري المشرف يرتبها ويوضحها على مخططات التصميم ويرسلها أو يسلمها لمفتش البلدية واللي بدوره يرسل كلما يتعلق بذوي الإختصاص غيره للحفظ مثل حتى الدفاع المدني وتكون عندهم نسخة الكترونية لإحتياجاتهم جاهزة للإستعمال .. مثال لو صار حريق أو إختطاف أو تكتل اجرامي في مبنى ونادر يصير بس ممكن تكون سيارات الأمن توصلهم المخططات للمداخل والمخارج وطبيعة الموقع ومكان غرفة الكهرباء أو المجمع الكهربائي وهم في الطريق لموقع الحدث .. هذا يسهل عمليات كثيرة

استلمت في السابق مسؤولية الأرشيف الهندسي ويسمونه مخزن الوثائق .. ما طولت فيه كتبت تقرير قوي عن اللي شفته وطلبت تعديل ومحاسبة للسابقين في هذا القسم .. كان فيه انذار حريق بدائي وطفايات بدائية .. مكاتب قديمة وغبار وأدراج خشبية فيها مخططات يدوية متهالكة ومنتهية حتى الأدراج صعب تنفتح وتنسحب .. مخططات الواقع تختلف كثير وبنسب كبيرة وتتحول علينا من قسم الإشراف طلبت ما دام الإشراف يديرون المشروع لازم يكونون مسؤولين عن دقة هذي المخططات .. كان فيه تصوير على أفلام مصغرة وهذي طريقة قديمة للتخزين ولازم هذي الأفلام تخزن في خزنة حديد ضد الكسر وضد الحريق وضد الرطوبة وكانت موجودة بس حصلت فاتحينها والرطوبة خربت الأفلام واستوت بلا فائدة وحطيت المسؤول عنها في المسؤولية .. وهنا أذكر أرشيف استشاري كبير ( إتحاد قطر للتخطيط ) كانوا مستأجرين شقة كاملة للمخططات بس مقابل الديوان في الجسرة وكانت فيها مخططات ذاك الوقت فوق 20 سنة والحين فوق 45 سنة والمهندسين فخورين بها .. كانت دوم مظلمة والمكيفات تشتغل بالتناوب ومغلقة .. لأن النور والرطوبة تخرب المخططات اليدوية القديمة

أكيد ألحين تغير الوضع كثير بس بعد الحفظ بمراحل حفظ الكترونية مطلوب وكذلك تحويل اليدوي لإلكتروني مطلوب مثل الصور حالياً .. معليش شوي طلعت عن الموضوع بس ذكريات

هنا يتكلمون بتفصيل أكثر عن مخططات الواقع المنفذة

https://i.imgur.com/LOkJGPs.png

الجدول لسير الأعمال من أهم الأمور اللي نغفلها في بناء المشاريع الصغيرة .. مهم نطلبه من المقاول قبل العقد ويضاف كملحق تابع للعقد وفيه يحدد المقاول مسار أعماله والوقت المطلوب وتكلفة كل مرحلة .. هذا يفيدنا كثير ويسهل علينا العمل بلا ربكة ونعرف هل نحن ماشين مع الجدول أو متأخرين وكذلك نعرف شالمطلوب منا لو اتفاقنا كان مع المقاول جزئي

مثال تقدر تخطط أعمال موقعك حسب إحتياجك وميزانيتك لو فرضاً انت مب مستعجل وقررت تبني كل مرحلة لوحدها هذا النظام مع حساب الكميات الدقيق ومع توصيف الأعمال فيها بدقة بيفيدك .. انا مثلاً ناوي أحوط أول شيء أرضي وأرض ولدي مع عمل البوابات وتحويط دائم بطابوق بيتشطب لاحقاً بس بدال الشينكو مرة وحدة والبناء للبوابات وتركيب أبواب مؤقتة ممكن شينكو وحديد عادي .. ومكان سور المجلس بينقطع السور هنا بيكون سور حديدي مؤقت .. هذي مرحلة الإعداد قبل الحفر وتكويم الدفان في جهة وأعمال التأسيس أكيد بتكون مهمة لحماية الموقع وعدم تعرض طفل مثلاً للسقوط في حفرة

https://i.imgur.com/uyKdypW.png

اللي يتعمق في الكود واحنا في بداياته يقول ما بنشوف مشاكل والكل بيسوي شغله صح .. عمل جبار بس على الورق لكن الواقع كلش غير بسبب عدم وجود الضبط القضائي وعنصر الإشراف العام اللي يستجيب لشكاوي العامة والملاك ويحقق فيها ويشوف أي مخالفات لشروط ومواصفات الدولة العامة ويردعها ردع مباشر بدون محاكم وقصة طويلة لأن الضبط القضائي الهندسي واضح قوانين ومواصفات وعملية 1+ 1= 2 ما يختلفون فيها اثنين الا اذا ناوين يلفون ويدورون والا ما يدرون شسالفة

أكيد يا اخوان إحنا ما نطبق كل شيء في الكود حتى الكود القطري غير ملزم ويعتبر استرشادي واختياري والا لو المقاول بيطبق كل هذا المطلوب لكل مشروع حتى بو مليون بيحتاج طاقم متخصص وهذا يفسر ليش الكود فوق 4000 صفحة .. إحنا يفترض نذكر في عقدنا إن تطبق الشروط والمواصفات القطرية العامة حسب هذا الكود اصدار سنة 2014 وأي قرارات نولت بعده من أي الدوائر الحكومية ذات العلاقة .. بنفس الوقت يفترض الإستشاري ملم ببنود الكود ويعدل على بعضها كمواصفة خاصة بس التعديل لازم يكون للأفضل وليس للأسوأ .. بعض البنود ممكن نتقاضى عنها مثل مخطط ضمان الجودة نكتفي بالمخططات التنفيذية والضمانات للشغل المنجز قبل الدفعة المستحقة ومثل مخطط الصحة إحنا شدخلنا في صحة العاملين

https://i.imgur.com/RYaa1j9.png

7.6.3 Inspection and Test Plan (ITP) Schedule هذا بند مهم نركز عليه وبيفيدنا كثير مع الجدول الزمني للمشروع والجدول المالي كذلك للدفعات والمراحل .. الفحص والتدقيق بيكون تقريبي قابل للتعديل حسب تطور البناء بس يحدده المقاول حتى نحسب مشاكل التأخير ونقدر بعضها حسب ظروف العمل .. الإختبارات بعضها يحضر الإستشاري يشوفها على الطبيعة وبعضها يسلم المقاول نتائجها مدققة وموثقة من قبل الإستشاري كذلك

7.7 SITE DIARY أشوفه مهم ويكون جزء من ملف المشروع يستلمه المالك بنهاية المشروع لأي عودة قانونية له في المستقبل خلال 10 سنوات فترة الضمان على الهيكل الإنشائي

التقارير المكتوبة أوقات لو المشروع بسيط تكون بسيطة وسهلة وممكن يكتبها فورمن المقاول ويأكدها الإستشاري وضروري توصل نسخ للمالك ويتابعها .. أوقات كثيرة تستوي أخطاء وتغييرات في الموقع المقاول ينفذ شيء غير كلش عن المواصفات والتفاصيل ولا يكشفها لا المالك ولا الاستشاري أو يغطي عليها ويمشيها الإستشاري .. مثل صار في بيتي كانت رؤوس الأعمدة تحت الأرض عريضة زود حول 10 سم عن فوق حتى يكون عندنا غطاء خرساني كافي واللي صار المقاول بالخطأ سواها نفس اللي فوق والإستشاري حل الموضوع بعمل عزل بيتومين خاص ومكلف عن العادي أعتقد Rubberized cold applied bitumen وهذا مكلف أكثر من تعريض الخرسانة تحت .. ما كنت بادري به بس الإستشاري أمين وشرح لي الوضع وكنا نقدر نهدم ونبني هذي الجزئية من جديد

https://i.imgur.com/HSuIZfJ.png

طبعاً حالياً عندنا التقارير المصورة لكل شيء في الموقع ترسل بسهولة على الوتس اب صوت وصورة ومقاطع فلمية من المقاول ومن الإستشاري والمفروض عمل قروب وتس اب لهذي النقاشات والتقارير

طبعاً فيه مواصلة للتصوير ما بنقلها بس واضحة واللي هي تصوير الموقع قبل البناء وظروف الموقع وتوضيحها ومواصلة التصوير لكل شيء .. صراحة ممكن المالك يدير عن بعد بنيان بيته وممكن الإستشاري كذلك يدير بدون تواجده بشرط المقاول يصور فحص السيارات سيارة سيارة للقمع وهبوط الخرسانة ويصور شغل الصب وبعد الإستشاري يمر يتأكد مما تم عمله

مقصر في متابعة الموضوع هذا وإن شاء الله أتابع خلال نهاية الأسبوع .. شغال على كتاب والكود القطري وباطلع منهم شوي صوب تصميم بيتي وشرح التعديلات على مخطط الإستشاري اللي تعبني بشغله اللي يخرب شغلي

مثل هنا أذكره بالواجهة للبوابة وهو مسويها جدران سيدة ومجوفة من داخل مع ان فيها سقف المفروض

https://i.imgur.com/TKkVRbP.png

هذي صورة لمخطط البوابة من فوق المفروض السقف يغطي .. شكله يبيني مقيم عنده واصحح له كل شيء .. الخطوط الحمر تعديلاتي وبعد نسيت تغطية الممر تحت صوب غرفة الحارس هذي لازم اسويها ما بيفهمها

https://i.imgur.com/gmuzpBp.png

كانت هذي نهاية خط الصرف الصحي ووجود منهول الحكومة ألحين جاري بناؤه في الزاوية الشرقية الشمالية للبيت .. لله الحمد أشوف هذا الخط ممكن وباخسر شيء بسيط متر أو متر ونص لو طلبت البلدية

https://i.imgur.com/Q5quxe4.png

وهذي صورة لكامل الارض ناقصة الأرض الثانية اللي بنسورها معاها وبنسوي لها بوابة وغرفة للزراع وممكن معاه سائق ثاني لو دعت الحاجة ومن هناك فيه منهول صرف صحي ثاني بنشبك معاه بعد

https://i.imgur.com/Jwz2mtu.png

الدوائر الحمر تشير الى منطقة ملاحظة والملاحظة مكتوبة في جنب فاضي مثل منهول تصريف المياه الجوفية إن وجدت ما حطه وغير ملاحظات كثيرة كنت مضمنها المخططات الأصلية ما سواها كلش

https://i.imgur.com/fqLT1gk.png

وهذا الدور الأرضي .. مسوي فيه درج حلزوني في الطرف للخدمات في السطح ومهرب طواريء للي فوق والمفروض يحط باب لا ومعطيه الرسمة والتفاصيل بس ينقلها ما نقلها صح .. هذي معاناتنا .. يعني انا بعدين أقعد مع المقاول واسوي تعديلات شكثر

https://i.imgur.com/kKFX1Hl.png

الباب للغرفة طالب واجهة زجاجية متصلة بباب مفرد سوى لي مفصولة والباب خشب ومزدوج

هذا شكل مقرب لواجهة البوابة من فوق من قريب

https://i.imgur.com/frDEZXE.png

إن شاء الله يعطوني لها ارتفاع خمسة متر ويسمحون بعملها شبه مكعبة الشكل تظلل الباب تحتها هالمرة سويت الباب داخل على داخل حق ولدي ما رضوا يبونه مع حدود الأرض وبدون تظليل على البوابة كأنهم هم اللي بيسكنون وبيبنون

وهذي الواجهة جهة الشارع البيت داخل حول 22 متر والواجهة حق المجلس المثمن بيغطي على البيت وابي أوجه البيت جنوب .. موافقيني بس اشترطوا افتح باب في المجلس وأسويه بشكل مدخل حتى تبين واجهة ثانية .. سويت مضطر تحت الدريشة اليسار الثانية مباشرة مستحيل يبين من الخارج سويت حتى فوقه مظلة صغيرة بارزة ممكن هذي تبين بس بيت الشخص له مب معرض حق يشوفونه الناس وكل الجهات واجهة إذا الأرض مناسبة وفيها منشآءات ثانية

https://i.imgur.com/sfA0weY.png

أحد الإخوان يقول لي تصميم واجهة بيتك تقليدية تراثية وانا ردي كان هي صحيح بسيطة لكن مودرن أكثر منها تراثية صحيح قليل من العناصر اللي أضفتها تعتبر من أساس تراثي تقليدي مثل القمرية .. بس هذي فكرة من خيالي طورتها بتغيير حديث ممكن حد عرفها خلال هالفترة وسواها وحلال عليه

مثل هذا التاج ما له علاقة كلش وتصميم يعتبر حديث وخطوطه بسيطة وما له علاقة بالتراثي والتقليدي عندنا في الثري دي والشكل الواقعي أكيد بيبين ميلان الأوجه وارتفاعها والسُمك للقطعة واختلافه من مكان لمكان

https://i.imgur.com/j63Y8WO.png

هذي القطعة جي ىر سي وبتكون بسمك 20 سم أو شوي أقل 15 أو 10 لسبب اكون محمية من سيلان المطر اللي ينزل على وجه الجدار الباقي وممكن ينزل معاه غبار ويعلم فيها 15 ممكن مقاس مناسب .. القطعة هندسية مفرغة من داخل والفراغ بتكون فيه إنارة بسيطة الليت الصغير بيعطي شكل غير لهذي التجويفات .. عندنا بعد شطفة الزوايا والتقويسات المزدوجة فوق هذي بينت عدل في الثري دي والأنميشن وهذي بعد بتكون فيها إضاءة تنورها من تحت لفوق

والقصد أكيد يكون التصميم حديث بعناصر بسيطة تجميلية بأساس تراثي أو تقليدي ومب شرط يكون فقط قطري .. هذي الصورة الجاية مثلاً زوايا مغربية وبعد غير انعملت بشكل هندي أبسط وغير عن الزوايا المغربية المعروفة بمقاسات محددة وكذلك الزوايا المصرية والمسننات المستمرة هذي جات بس زوايا المسننات تستخدم كعنصر تزييني للمساجد القديمة .. جربتها في مبنى صغير وطلع كثير حلو وناوي أسويها بتطوير بسيط غير اللي هو إضاءة للوجه المايل .. الإضاءة تقريباً 1 وات تعادل 1 شمعة بسيطة ومسلطة بس على هذا الوجه وطبعاً بلون مناسب غير عن اللون العام

https://i.imgur.com/pAj5w7v.png

وضحت الإنارة بنص دائرة حمراء وما بتبين من مسافة أكيد

هذا اللي فوق بالأزرق قرميد مايل وله كسرة بسيطة في خرسانة واجهة الباب وبيتكرر في كم مكان حتى يوزن القرميد اللي كان وحيد صوب المكتب ويعتبر بعد تصميم تقليدي أجنبي ومتجدد لأن استخدامه لسقف كامل في الغالب وهنا تطعيم بسيط .. محتار بين الشكل الأول والثاني

هذا الأول

https://i.imgur.com/An0ou9s.png

وهذا الثاني

https://i.imgur.com/NewawO6.png

والثالث بيكون من طول القوس محدد بالخطوط الحمر وممكن يكون هو الافضل

هذا بيكون الشكل من الشارع طبعاً الواجهة اللي تنشاف هي المجلس والبيت داخل حول 22 متر ما بيبين من الطريق القريب وجاري تنفيذ حديقة خلاص أقروها بين الطريق المجاور والطريق الرئيسي اللي يبعد حول 100 الى 150 متر .. يعني ما فيه داعي أخلي واجهة البيت للطريق واجهة داخلية كفاية وهذي الواجهة تكفي

https://i.imgur.com/S3amJ0F.png

اللي بداية اليمين إضطريت أحرك المجلس شوي من الزاوية متر ونص حتى أسوي ممر خلف المجلس لمنهول الصرف الأخير اللي حددوه في هالمنطقة أشغال بعدين التغطية بالطابوق لدرج الخدمات الحلزوني واصلة لسقف البيت شكل برج قديم بعد بفتحات للتهوئة وبيكون الدرج داخلي ومحمي

التضبيط ببعض التعديلات البسيطة مستمر .. ما ادري محتار بين 3 أمور أما أضيف قرميد لجزء الحايط البارز هذا اللي شايل حول متر و 40 سم من دورة المياه بشكل بارز وفوقه منور سقفي متصل مع الدريشة العريضة والمرتفعة .. مع زيادة ارتفاع الجزء العلوي 40 سم مثل ما يبين في اليسار واليمين خليته مثل ما هو للمقارنة .. أو بس أزيد الإرتفاع وبدون قرميد .. أو أخليه مثل ما هو؟

https://i.imgur.com/YJYxwAd.png

جزء القرميد بيكون بشكل أدق أصغر شوي مثل هذا وممكن تحته شريط انارة مخفي ينور واجهة هذا الجزء البارز + إنارة وسطية في التجويف تعطي نور حول أطراف التجويف خط نور يكون ولون ثاني من الإنارة ممكن ذهبي أكثر + إنارة الزوايا ووضحتها سابقاً في تصاميم الثري دي صعب احصلها ألحين حتى سويت لها أنميشن وتبين كصورة فيها انارة

https://i.imgur.com/L6NAo9n.png

هذي التفاصيل خلاص بتدخل العقد والمواصفات حتى تنزل مناقصة وجدامي وقت حتى ابدأ المهم ألحين رخصة البنيان وأبدأ التسوير والبوابة والباقي مرحلة ثانية حتى كل شيء يكون محفوظ والموقع مغلق للبنيان بدون تسوير مؤقت .. البنيان الفعلي أتمنى ألحق قبل الموسم الجاي وقت الخريف والشتاء وشوي من الربيع على الأقل للهيكل الخرساني

أهم شيء في اي مشروع سواء كان معماري أو غيره هو الإشتغال على التفاصيل قبل التنفيذ وإسمحوا لي أنقلكم لتفاصيل كثيرة يمكن ما تهم الكثيرين وللأسف استشاريينا ما يبذلون فيها جهد بالعكس يخربونها ممكن أو ما يفهمونها خصوصاً الجنسيات العربية ( بعضهم ) والسبب هو تقصير من المقننين والمسؤولين عن عملية الترخيص ومتابعة هذيلا المرخصين

انا بديت في كثير من التفاصيل اللي عندي فكرة وخطة مسبقة لها بس باقي التحديد والإختيار ووضعها في العقد حتى ما تصير ربكة .. وعقدي بإذن الله بيكون مجزأ في البداية باكتفي بالسور والبوابات وسور مؤقت جهة المجلس وما حوله .. أكيد السور بيكون طابوق وخرسانة بسيطة .. فكرتي أسوي الجوانب 15 سم طابوق والأعمدة بعد طابوقية .. الأساسات بتكون خرسانة شريطية وما علي شيسوي الإستشاري باصغر وباخليها مناسبة وهذي بتكون عقد منفصل مع مقاول ناوي أجربه كبداية .. الحديد أكيد مغلف والعزل والحمايات شيء ضروري .. وطريقة البناء بتكون غير صف طابوق فوق بعض بدون مونة بس صف يكون متقن وسيدة .. وفي فراغات الطابوق بيتم صب خرسانة معمولة في الموقع .. خرسانة بسيطة وحديد عمودي في بعض الفتحات .. نفس شغل الأمريكان وبالفواصل الإنشائية والتمدد كل ستة أمتار طولية

الواجهات الشرقية والغربية هذي على شوارع ومفتوحة بتكون طابوق 20 سم وفيها البوابات وبنفس طريقة البناء .. سويتها 20 بس للكسرات العلوية حتى تكون مناسبة وبنفس الوقت أقوى لأن ما بتغطيها بيوت قريبة أو أسوار ملاصقة .. في النهاية بيتنا القديم له فوق 50 سنة سوره مبني بطريقة مقاربة وأقل تدعيم ومفتوح من الاربع جهات

هذا مثلاً تفصيل ناقص أشياء بسيطة مثل البلاستر وسمكه والصبغ داخلي وخارجي المهم يوضح طريقة البروز والمنور لدورات المياه الطرفية الثنتين وهو فقط 1.3 متر

https://i.imgur.com/v6vbvYX.png

صورة مكبرة أكثر توضح الكسرة الخرسانية اللي بيركب فيها القرميد وبيركب أما على اسمنت بورد أو أي خشب مارين بلايوود ممكن وممكن البدائل الصناعية المناسبة .. المارين بلايوود يمسك زين مع البراغي وينعزل بالقرميد وببلاستر وصبغ مناسب من فوق ولا بيبين بيكون كقاعدة فقط للقرميد ونفس الشيء للسور

https://i.imgur.com/iOOKShb.png

زيادة تفاصيل للجزء هذا لأنه مهم يوضح لنا عدة عناصر والربط بينها .. مثلاً الجدار الخارجي لازم في المواصفات يتحدد الربط بين الطابوق ال 20 سم المفرغ من جهة الداخل والطابوق أو ألواح السيبوريكس والبديل لها ممكن طابوق عادي 10 سم مفرغ بس أشوف السيبوريكس أفضل للعزل وأخف وهذا لو سعره مناسب .. الربط بيكون ميكانيكل بقطع حديد خاصة تركب أثناء تركيب الطابوق وبعده عازل الفوم وبعدين جزء الحايط الخارجي اللي يعتبر حماية للفوم .. ودي أخلي فراغ تهوية بين الفوم والسيبوريكس حتى يزيد العزل بحدود 3 سم الفراغ وبيكون السيبوريكس 7 سم سمكه بس متوقع يستصعبها المقاول مع إنها تصير وسهلة بنشوف إن شاء الله

https://i.imgur.com/osAsLFr.png

تقريب لمنطقة العارضة الخاصة العلوية اللي تحمل الجدار فوقها واللي يلتقي به المنور المائل لسقف دورة المياه البارز عن محيط البيت ومتصل مع الدريشة .. هذا بيكون بعرض 2.6 متر بعرض كامل العرض لدورة المياه وبطول 1.1 متر يغطي منطقة الشور والبانيو بحيث يعطي شمس مباشرة من بدايات الصباح للظهر وباقي الوقت نور طبيعي مناسب لكل دورة المياه

طبعاً الجسر الحامل هذا بيكون مغطى بجبس من الداخل ومرتفع جهة اليمين مع الإضاءة الكهربية العلوية .. الفكرة كتصميم إنشائي يتبع متطلبات الوضع المعماري المراد تطبيقه .. هنا مضطر أسوي الجسر بكامل العرض أما في التقاء الأرضية مع الجدار بيكون حتى الجسر معزول ونفس الشيء ينطبق على النوافذ العادية .. حتى لو ما رضى الإستشاري ومتوقعه ما يرضى وايد مصعب الأُمور باتفق مع مقاول جيد يسوي كل هالتفاصيل وعلى بعض التعديلات الإنشائية .. لازم أغامر شوي بس بتكون مغامرات محسوبة ومحسوبة صح والغرض منها توفير عزل حراري جيد والقضاء على أي جسور حرارية

https://i.imgur.com/LW2vz12.png

بعدين بكمل التفصيل مع صورة أكبر لتوزيع دورة المياه في هذي الجهة لأني ضروري أوضح صورة التوزيع الداخلي والسقف كيف بيكون وكيف التقاءه مع الجسر هذا وكيف الإنتقال من قسم المنور السقفي النازل بحدود ارتفاع 3.5 متر الى ارتفاع 4 أو 4.5 متر .. محتار أحافظ على كامل الإرتفاع والا انزل السقف المستعار

من تفصيل الحايط الخارجي والمنور السقفي ننزل حق تصميم دورة المياه من داخل وعلاقتها بدورة المياه فوقها وتحتها .. الموضوع سهل بس الإستشاري الله يهداه مفكر دقة قديمة وين بتحط الدكت وشرحت له مرات يروح الرسام يمسح اللي سويته ويعطيني مخططات ثانية حسب اللي هو يشوفه صح .. إصطدمت بعقليات شغلها كله نسخ ومال أول هذا ما وجدنا عليه آبائنا

هذا تصوير للتوزيع الداخلي جهة اليمين بعد الدخول من الممر الموضح والممر بيكون ضيق بعرض 1.2 متر بس مناسب للحركة الداخلية يوصل لبابين يمين ويسار واحد لحمام احتياط صغير بس ثلاث قطع يمين وواحد أكبر يسار بيكون ست قطع وستيم معاه يعتبر 7

https://i.imgur.com/J0WfoIv.png

البيت بشكل مقطعي شبه مكتمل باقي تفاصيل لازم تضاف

https://i.imgur.com/Xgc3RVE.png

فوق وتحت حمامات بتكون متصلة والدكتات داخلية وطالعة فوق السطح للتهوئة واللي تهمنا هذي المنطقة الموضحة تحت .. البايب الأصفر بيكون دكت للتهوئة للهواء المسحوب وبيكون ممرر في عمود طابوق وفيه مثبتة مروحة الشفط ومخفية

https://i.imgur.com/G3Y2YVf.png

بالنسبة للجزء النازل من الدريشة بيكون مغطى بلوفر ألمنيوم قابل للتسكير وقت الليل وينفتح وقت النهار والزجاج عاكس وجزء دورة المياه الرطب هو اليسار فيه الجكوزي موضح والسقف المستعار خليته على ارتفاع 3.3 متر والرجال الواقف في الممر 1.8 متر طوله وداخل 1.7 متر بيكون في السقف فجوات جانبية مخفية فيها دكت سحب الهواء وانارة مخفية فوق منطقة الكرسي ومنطقة المغاسل أما في منطقة الشور بتكون الإنارة سبوتات فقط والإنارة أكيد بتكون كم مستوى وباحددها بإذن الله

هذا هو التوزيع الداخلي بس بعد خرب فيه الرسام عدلت اللي أقدر عليه ولازم يبي له قعدات مطولة ( الشغل مع هالناس يحتاج الواحد يداوم عندهم ) والله يعين

https://i.imgur.com/gQIu0xU.png

مثلاً كبر الدريشة على كيفه وهنا بتمر بايبات الصرف والتغذية لا وحاطها صوب الشور ومسويها شكبر ولا فكر تحت بتنزل وين

من قلة ذوقه انا مسوي الزجاج خط عريض وأزرق هو مسويه أحمر طالع لي فيها

هذي دورة المياه السفلية كلش في الدور الأرضي تحتها بيسمنت الخدمات والتمديدات يعني البايبات مثل ما وضحتها قبل رجعت أوضحها ألحين بتكون ضمن الجدار للشور وضمن الجدار الثاني .. في البداية سويتها جانبية بس تذكرت إن ما فيه جسور وممكن تتخلل الأرضيات مواقعها بتتحدد من الأساس وبتنعمل البايبات قبل الطابوق ومكانها بيتغطى بإسمنت بورد وتبليط أو صبغ في ممر الغرفة يسار

هذي المنطقة عندي فيها تقريباً 4 دورات مياه وحدة في الأرضي وثنتين متقابلين في الأول ووحدة رابعة في البنتهاوس .. الأرضية سهل التمديد لها مباشرة من بيسمنت الخدمات الأرضي سواء للصرف أو التغذية بس لازم نعمل لها فتحات ببايبات شوي أكبر .. حمام البنتهاوس واللي أصغر منه الثانوي للغرفة الرئيسية بيكونون على نفس الخط ومن خلال الخط اليسار .. وكلها تصان وتسلك من تحت في البيسمنت الخدمي الا لو الخلل داخلي

https://i.imgur.com/lzKuQfk.png

هنا تعقد الوضع شوي لأني ركبت صورة الدور الأول على الأرضي .. وبعض الجدران تختلف مواقعها لأن نظام التصميم الإنشائي يسمح .. البايبات في اليمن بتنتقل من الإتجاه الأفقي لين الإتجاه المعاكس كما يبين في الصورة والوضع سهل وممكن بأكواع 45 درجة وتكون ضمن الجدار .. اللي على اليسار بتكون فوق الجدار بالضبط وعلى استقامة وحدة

https://i.imgur.com/cQmHNyr.png

ودورة المياه الأخيرة في البنتهاوس بتكون مكان الإكس الأخضر ولها نفس البايبات اللي يسار الصورة تحت

https://i.imgur.com/IqgoHyn.png

عارف شوي الصور ما توضح المقصد بس دوم أسويها للخدمات والإنشائي أطابق المخططات فوق بعض وأشوف لخبطة الإستشاريين .. المشكلة يكتشفها المالك وحتى المقاول بعدين وتستوي خلافات وحلول ترقيعية

نصيحة تصميمية

من ملاحظة وتتكرر للأسف .. بعض الإستشاريين أو كثير منهم يصممون موقف ويصغرون السيارة وفي الواقع هذا الموقف ما يشيل سيارة معتبرة .. مثل من أيام واحد يشتكي إنه اشترى بيت وطلع الحوش جدام 5 متر وهو في الواقع 5 لين حافة الجدار الخارجية يعني ناقصة منه 20 سم يطلع 4.8 متر .. فوق هذا مسوي الإستشاري درج كبير وايد حق مدخل البيت وأعمدة مخربة المساحة جدام .. حاولت مجتهد أشوف حل الحلول صعبة لدرجة جبت سيارة فولكس واغن الخنفسانة وسويتها بمقاسها الحقيقي 4.3 في 1.8 متر عرض .. هذي تدخل بس ما فيه سعة حولها ويمكن الكامري تطلع أكبر

المعلومة المهمة اللي ابغيها توصل هذ اللكزس مثلاً فوق 5.6 بشوي بكم ملم ما اذكر الرقم بالضبط .. هذي شلون تدخل في مكان 4.8 متر

مالك البيت كان بحركة بسيطة يقدر يوفر 1 متر وممكن حتى 1.2 كلها استثناء من البلدية ويخلون الارتداد بين البيت والملحق 1.5 متر هذي نص متر وفرها .. بعد ممكن يوفر من الملحق هو عامله 4.4 ممكن ينزل لين 3.5 متر ويوفر 0.9 + ال 0.5 السابقة

السيارات مهم اننا نحميها داخل بيوتنا هالوقت

اقتباس:

---

المشاركة الأصلية كتبت بواسطة معماري قطري

نصيحة تصميمية

من ملاحظة وتتكرر للأسف .. بعض الإستشاريين أو كثير منهم يصممون موقف ويصغرون السيارة وفي الواقع هذا الموقف ما يشيل سيارة معتبرة .. مثل من أيام واحد يشتكي إنه اشترى بيت وطلع الحوش جدام 5 متر وهو في الواقع 5 لين حافة الجدار الخارجية يعني ناقصة منه 20 سم يطلع 4.8 متر .. فوق هذا مسوي الإستشاري درج كبير وايد حق مدخل البيت وأعمدة مخربة المساحة جدام .. حاولت مجتهد أشوف حل الحلول صعبة لدرجة جبت سيارة فولكس واغن الخنفسانة وسويتها بمقاسها الحقيقي 4.3 في 1.8 متر عرض .. هذي تدخل بس ما فيه سعة حولها ويمكن الكامري تطلع أكبر

المعلومة المهمة اللي ابغيها توصل هذ اللكزس مثلاً فوق 5.6 بشوي بكم ملم ما اذكر الرقم بالضبط .. هذي شلون تدخل في مكان 4.8 متر

مالك البيت كان بحركة بسيطة يقدر يوفر 1 متر وممكن حتى 1.2 كلها استثناء من البلدية ويخلون الارتداد بين البيت والملحق 1.5 متر هذي نص متر وفرها .. بعد ممكن يوفر من الملحق هو عامله 4.4 ممكن ينزل لين 3.5 متر ويوفر 0.9 + ال 0.5 السابقة

السيارات مهم اننا نحميها داخل بيوتنا هالوقت

---

صارت معاي نفس هالمشكلة في البيت الحالي .. بدون مبالغة السيارة الوحيدة اللي ممكن تصف و ينزل وراها الباب هي الميني كوبر ... غير هالسيارة بيكون نصها ظاهر من الباب!

اقتباس:

---

المشاركة الأصلية كتبت بواسطة SouthK

صارت معاي نفس هالمشكلة في البيت الحالي .. بدون مبالغة السيارة الوحيدة اللي ممكن تصف و ينزل وراها الباب هي الميني كوبر ... غير هالسيارة بيكون نصها ظاهر من الباب!

---

شيء محبط اخوي ساوث كي

انا في تصميمي لأي بيت أحط أولوية لدخول السيارات وبعدد كافي حسب مساحة البيت وعدد غرفه .. حق بيتي الحالي وفرت مواقف كثيرة وحتى للضيوف وأي حد بيجيني استحي يوقف برا أخليه يدخل ويوقف وراء سيارتي قريب ويكون فيه مجال حق خروج سيارات كثيرة وهو واقف يعتبر في الطريق .. الباب سويت عرضه 3.8 متر مريح وواسع ريوس والا سيدة وسهولة المناورة داخل خليتها سهلة وخروج السيارات سهل سيدة بدون ريوس لو حب الواحد

والله حاضر للي يحب اراجع مخططاته قبل لتطيح الفاس في الراس والحلول أسهل على الورق

رحت حق استشاري مختص انترير وحق صديق لي وعرفنا ببعض قلت له انا ما ابغي تصميم ابغي اكمال الخدمات على أساس التصميم المعماري ذيه والتوزيع ذيه .. تم يحاول يفتي في شيء انا دارسه ولي فترة طويلة قال لي ليش ما تلغي دخول السيارات للبيت وتسوي طبيلات أبوابهم من برا تدخل وتوقف بس توفر مساحة ويكون عندك مجال تسوي حديقة أكبر .. تصدقون بروحي أحاتي مسئلة ان الزراعة وايد على الوضع الحالي والأخ يبي يلغي الطريق ويسوي بس ممرات داخل الحديقة وفيه بعد للدخول .. زين وين برستيج السيارات تدخل وتوقف في مواقف مرتبة وينزل الواحد عارف اتجاهه وقريب للخدمات وللمداخل وحتى للسايق

https://i.imgur.com/t3H7MbG.png

إستغربت كمية الغباء الهندسي فيه وخليته لا وكل شوي يقول لي اللي مصمم لك مب مقتنع ولا مصدق اني انا اللي مصمم وانا ابغي هذا الشيء .. مستغرب من 13 سيارة + 4 احتياط في موقف مفتوح داخل .. هذا احتياجي وعارفه وممكن يكونون أقل بس الطبيلة الكبيرة فيها 4 سيارات جدام و 4 وراء يعني مخزنين ممكن اللي جدام وكنت في الأساس مصغر الطبيلة حق 5 بس بعدين شفت عندي مساحة كفاية وعمق قلت أزيد .. وهذي ارضي وأرض ولدي يعني بينبني الجزء اليسار

اقتباس:

---

المشاركة الأصلية كتبت بواسطة معماري قطري

شيء محبط اخوي ساوث كي

انا في تصميمي لأي بيت أحط أولوية لدخول السيارات وبعدد كافي حسب مساحة البيت وعدد غرفه .. حق بيتي الحالي وفرت مواقف كثيرة وحتى للضيوف وأي حد بيجيني استحي يوقف برا أخليه يدخل ويوقف وراء سيارتي قريب ويكون فيه مجال حق خروج سيارات كثيرة وهو واقف يعتبر في الطريق .. الباب سويت عرضه 3.8 متر مريح وواسع ريوس والا سيدة وسهولة المناورة داخل خليتها سهلة وخروج السيارات سهل سيدة بدون ريوس لو حب الواحد

والله حاضر للي يحب اراجع مخططاته قبل لتطيح الفاس في الراس والحلول أسهل على الورق

---

ما شاء الله الارض عندك كبيرة على ذاكرتي و عندك مساحة .. احنا من سكان القراقير!

جعلك ذخر و أكيد ما لنا غنى عن خبرتك و رايك الطيب.

اقتباس:

---

المشاركة الأصلية كتبت بواسطة SouthK

ما شاء الله الارض عندك كبيرة على ذاكرتي و عندك مساحة .. احنا من سكان القراقير!

جعلك ذخر و أكيد ما لنا غنى عن خبرتك و رايك الطيب.

---

الله يرزق الجميع أكبر منها .. وصحيح جات متأخرة سنوات طويلة وبعد ما بنيت

بيتي الحالي 1200 متر مربع والبنيان 1070 ومخلي مساحة وراء .. فيه سبع أقسام زراعية بأشكال مختلفة وفيه مظلات سيارات تكفي ل 8 سيارات ثنتين منهم وراء بعض يعني علشان تحرك اللي جدام لازم تشيل اللي وراء .. صحيح تخليت عن المجلس الخارجي بس لو يرجع بي الزمان كنت سويته وسويت تحته بعد طبيلات

ألحين شغالين عندنا حفريات للبنية التحتية وشوي سووا لي خربطة بس باتعايش معاها في المنطقة الجديدة قصدي .. صدموني ان جهة بيتنا لازم يربطونها مع شمالي معيذر للصرف الصحي ومشروعهم بيتأخر لين 2030 يعني الشغل ما بيوقف .. بس عندنا منتهين تقريباً شهر 4 بيكونون خالصين مثل ما وعدوا بعد تأجيل من شهر 11 .. بيكون الصرف الصحي يتجمع في مناطق محددة خزانات تحت الأرض يسحبون منها بدال ما يدورون على البيوت .. حل وسط وزياراتهم تكون آخر الليل وبدون صوت مزعج .. خبركم شغلهم لازم يسوون مشاريع لزوم المشروع أعلاه

النص الجنوبي لمنطقتنا لا تم ربطه مع معيذر الجنوبي ومشى الوضع انتهوا المشروعين مع بعض

اقتباس:

---

المشاركة الأصلية كتبت بواسطة معماري قطري

الله يرزق الجميع أكبر منها .. وصحيح جات متأخرة سنوات طويلة وبعد ما بنيت

بيتي الحالي 1200 متر مربع والبنيان 1070 ومخلي مساحة وراء .. فيه سبع أقسام زراعية بأشكال مختلفة وفيه مظلات سيارات تكفي ل 8 سيارات ثنتين منهم وراء بعض يعني علشان تحرك اللي جدام لازم تشيل اللي وراء .. صحيح تخليت عن المجلس الخارجي بس لو يرجع بي الزمان كنت سويته وسويت تحته بعد طبيلات

ألحين شغالين عندنا حفريات للبنية التحتية وشوي سووا لي خربطة بس باتعايش معاها في المنطقة الجديدة قصدي .. صدموني ان جهة بيتنا لازم يربطونها مع شمالي معيذر للصرف الصحي ومشروعهم بيتأخر لين 2030 يعني الشغل ما بيوقف .. بس عندنا منتهين تقريباً شهر 4 بيكونون خالصين مثل ما وعدوا بعد تأجيل من شهر 11 .. بيكون الصرف الصحي يتجمع في مناطق محددة خزانات تحت الأرض يسحبون منها بدال ما يدورون على البيوت .. حل وسط وزياراتهم تكون آخر الليل وبدون صوت مزعج .. خبركم شغلهم لازم يسوون مشاريع لزوم المشروع أعلاه

النص الجنوبي لمنطقتنا لا تم ربطه مع معيذر الجنوبي ومشى الوضع انتهوا المشروعين مع بعض

---

مب شايل هم المساحة اكثر من اشتراطات البلدية العجيبة .. سنين و نفس القوانين محطوطة و هدر المساحات بسببها مشكلة ما لها حل!

ارضي يقولون ان البنية التحتية جاهزة على الاقل من ناحية التوصيلات و اكاني انطر التشغيل!

توزيع العناصر في التصميم تعتمد على حاجات اهل البيت و للاسف ما مريت على رسام يفهم هالشيء .. كل رسام يعطيني رسم مبدأي لبيت ما يسكنه آدمي لكن أكيد ف مصممين مبدعين و مؤكد ان الشخص لما تكون عنده المهارة الفنية يصمم اللي يناسبه!

اقتباس:

---

المشاركة الأصلية كتبت بواسطة SouthK

مب شايل هم المساحة اكثر من اشتراطات البلدية العجيبة .. سنين و نفس القوانين محطوطة و هدر المساحات بسببها مشكلة ما لها حل!

ارضي يقولون ان البنية التحتية جاهزة على الاقل من ناحية التوصيلات و اكاني انطر التشغيل!

توزيع العناصر في التصميم تعتمد على حاجات اهل البيت و للاسف ما مريت على رسام يفهم هالشيء .. كل رسام يعطيني رسم مبدأي لبيت ما يسكنه آدمي لكن أكيد ف مصممين مبدعين و مؤكد ان الشخص لما تكون عنده المهارة الفنية يصمم اللي يناسبه!

---

الله يعينك ويعين الجميع

صادق البلدية والتخطيط يحتاجون شغل متطور مب اللي حاصل ذيه وفي مجالات كثيرة لين كنت شخص عادي شافوا عقارك مشوه للمنظر ولين كنت سوبرمان ما يجون صوبك وخرابتك مجملة المنظر

سوق العقار وسوق البناء وسوق المقاولات والسوق الهندسي كله يحتاج ضوابط واجراءات صحيحة

إذا دوائر الدولة المختصة يحطون مهندس كهرباء في منصب مهندس مدني أو معماري .. وإذا الخبراء والمستشارين غالبيتهم شغل قديم وبالطريقة السائدة اليدوية والآلات البالية شنتوقع الحال يكون؟

حتى مشاريع الدولة بخطط طويلة المدى وملخبطة يبدون مشروع متصل بآخر بطريقة غير متصلة ويروحون يدورون حلول بديلة ومؤقتة ومكلفة وتكلفتها جارية .. ودي تطلع إحصائيات تعرفنا عن مقدار تكلفة المشاريع الحكومية في منطقة ما ومقدار تكاليف المشاريع الخاصة في نفس المنطقة متوقع نشوف فرق كبير ومشاريع الحكومة وايد أعلى ووايد فيها نواقص وأوقات فشل

ليش أقول فشل؟ انا عندي تسوي شارع تاخذ فيه شغل من سنتين ل 5 سنين أوقات ومن تمر سنة تستوي هبوطات ومنهولات ترتفع وأوقات حفر عميق مثل ما صار في منطقة الوجبة حفرة لو يطيح فيها واحد يمكن ما يطلع بس رقعوها بسرعة والقار توه جديد .. المفروض شارع صممته وسويته يخدم 50 سنة بأقل مقدار صيانة والصيانة الإستهلاكية مثل إعادة رسم الخطوط

الأسواق اللي ذكرتها كلها مرتبطة وممكن نضيف عليهم سوق العمالة وتدريبها وتأجيرها تأجير قانوني

اقتباس:

---

المشاركة الأصلية كتبت بواسطة معماري قطري

الله يعينك ويعين الجميع

صادق البلدية والتخطيط يحتاجون شغل متطور مب اللي حاصل ذيه وفي مجالات كثيرة لين كنت شخص عادي شافوا عقارك مشوه للمنظر ولين كنت سوبرمان ما يجون صوبك وخرابتك مجملة المنظر

---

و الله انك صادق .. من سنتين بغيت احوط أرضي و قلت للموظف باحط شينكو نقز و قال لا و ممنوع و جنبي ارض مسكره بشينكو ماركة ابو كلب و مشوهه المنطقة و لا واحد فيهم كفو يتكلم .. القانون على الناس اللي تحترمه بس!

اقتباس:

---

المشاركة الأصلية كتبت بواسطة SouthK

و الله انك صادق .. من سنتين بغيت احوط أرضي و قلت للموظف باحط شينكو نقز و قال لا و ممنوع و جنبي ارض مسكره بشينكو ماركة ابو كلب و مشوهه المنطقة و لا واحد فيهم كفو يتكلم .. القانون على الناس اللي تحترمه بس!

---

عندهم بلاوي وطلعوا منها فجار بوزن تجار شيسوون .. سمعت عن واحد مختص يأجر بيوت بغالي ويقسمها وعنده شبكة علاقات مع المفتشين ما يطالعون بيوته كلش .. يقولون مطلع ذهب اغتنى غنى فاحش

للأسف هذي بلادنا والقانون فيها انتقائي وغير مطبق بالكامل وكل شخص ومقاسه ولو بغوا يطلعون مخرج لشخص أو شركة قالوا هذا ترخيصه من الوزارة الفلانية .. ياليت فيه مكتب موحد للشكاوي انا في سالفة عيادة بيطري جدام بيتنا شوي يمين حاطين وراء كباين يجمعون فيها تكرمون كلاب خصوصاً أوقات الكرسمس مثل الإقامة لهم جانيت وميمي وأخواتهم يسافرون ويخلون كلابهم في الحفظ والصون وذيلا يجمعونهم ونباح وروائح كريهة .. لدرجة أن واحد من مفتشي البلدية قال لي باسويها ودي وباحذرهم بس لو اشتكوا علي باضيع لأن ما عندي سند قانوني وذيلا ترخيصهم من التجارة

المهم كلمهم وخفوا فترة ورجعوا بعدين .. عندي لهم تسجيل صوتي قلت بارسله بس خفت انه من برا بعد وأكون ظالمهم .. يمكن يكون كلب ( حبنتي ) شقي يغازل الكلاب اللي في الكبينة ويمر على الجدران لعله يراهم أو يرى من يراهم .. معاناتي لها حول 7 أو 8 سنين ويمكن أكثر .. كلمت وكيل وزارة الإقتصاد ومن هلي وما قصر بس قال جيب لي اسمهم أو صور لوحة الإسم وللحين ما اهتميت شبه يائس .. باقي الوزير بعد أكلمه وخواله من الأهل بعد كل هالواسطات علشان كلاب أجانب حسبنا الله ونعم الوكيل اللي يتورط مع أجنبي أوروبي حقه ضايع ضايع

تشعبنا شوي وطلعنا عن مواضيع التصميم ومراجعته

من فترة راجعت تصميم لأحد الإخوان وللأسف إنحرجت أسئله لو أحطه في المنتدى للإستفادة .. معماري كان يحتاج تحسينات كثيرة وإقترحت كثير منها وكله في حدود ومجال المساحة المطلوبة ومع الإنشائي المطلوب بالعكس التعديلات كانت تحسن البنيان وتقلل التكلفة .. كان مسوي بيسمنت حق غرفة الخادمات والغسيل والمطبخ .. فكرته حلوة نزل الملحق تحت البيت .. فيه مخزن تابع للمطبخ بس بدون مخزن إضافي واقترحت مخزن تحت بيت الدرج بيحصل مساحة حول 7 متر مربع جيدة بتكون يحتاج باب وجدار بسيط

عجبني التصميم الإنشائي وأول مرة أشوف مكتب عادي يصمم انشائي هشكل مكتب آفاق للإستشارات الهندسية أو هورايزون فيه إضافات كثيرة ونقاش .. أهمها كان رافع أرضية الدور الأرضي 90 سم اقترحت يخليها 45 خصوصاً إن البيسمنت عنده بارتفاع صافي 3.3 والبيسمنت للخدم في الغالب .. يقدر يحافظ على نفس مستوى الحفر ويخلي ارتفاعه الصافي 2.85 كفاية وزود حتى 2.6 يمشي يعني ممكن يقلل الحفر بعد 25 سم ويحفر مناور جانبية للمنهول ومثل البلكونة النازلة اللي يدخل منها النور والهواء وهو عنده ارتداد كافي ورا 3 متر ممكن يسويها بعرض متر ويبقى متر للزراعة ومتر للخدمات أو حتى أقل

سالفة طبيلة السيارات والمدخل تكررت بعد هنا وسويت لها حلول ممكنة والتوزيع الداخلي بعد كان يحتاج ترتيب والحمد لله ترتب وحبه المالك والله يوفقه

هذي صورة حبيتها لتصميم داخلي لحوض سباحة في أحد فنادق قطر

https://i.imgur.com/zCYIp2O.png