مراجعة التصاميم المعمارية وابداء الملاحظات عليها (محدث)

أعانك الله اخونا بو عبد الله على البنيان ويسر أمورك

اقتباس:

---

المشاركة الأصلية كتبت بواسطة سالم الزهران

أعانك الله اخونا بو عبد الله على البنيان ويسر أمورك

---

جزاك الله خير اخوي بو زيد والله يوفق الجميع .. تصدق كلما تعمقت في الواجهات الداخلية والتفكير في الفراغات أذكر أشياء مهمة تضيف أكثر تعملها من التأسيس أفضل وأكيد بتبقى أشياء ما اعرفها بس مبدئياً باحسب حسابها مثل نظام البيت الذكي وأبغيه بشكل مبسط بدون مبالغات أعرف اللي عندنا تسلمه بيتك يحاول يبيعك كل اللي يقدر عليه تكييف يحط لك الف طن لو طاوعته بيت ذكي يسوي لك بيت يمشي لو تبي

مثلاً عندك بو زيد إنارة الدرج أبغيها تماتيك تشتغل وقت محد يمر وتطفى بعد 10 دقايق ومحتار أخليها تجميلية بس تحت مسكة الدرابزين أو جدارية لأن عندي ارتفاع عالي بيكون وصعب التغيير الجدارية سهلة .. والجدارية أقدر أركب نقاط خاصة بلوحات مثلاً اضافة للعامة .. شوف مثلاً هنيه عندي ارتفاع من أرضية الدرج لأعلى نقطة في السقف 5.68 متر وهذا الجدار اللي هو الشمالي يمين المقاس ذيه المكتوب في المخطط الأخير يمين بتكون فيه الدرايش وفيه رواشن مضاءة في الوسط إنارة ليتات جانبية جدارية هذي يبي لها ترتيب ناقصة هنا .. المستوى الأخير لو نحبه انارة العتبات بس شكلي لو باحط أسفل مسكة الدرابزين ما بسوي بعد للعتبات لخبطة هشكل .. أحسن شيء أخلي الدرابزين مضاء والتجاويف وانارة جدارية تعتبر عامة

https://i.imgur.com/wK6Alnt.png

هذي صورة للمخزن العلوي اللي بيكون فوق طلعة الدرج بداية الطلعة للبنتهاوس .. ضيق وبصعوبة يترتب بيكون له باب 80 سم في ارتفاع عادي 2.2 متر حتى ما اعطيه أهمية خصوصاً إرتفاع فتحة اللفت اللي جنب الباب بتكون قريبة من هذا الإرتفاع .. المخزن عرضه 1.2 متر 80 للباب وتعتبر ممر و40 بتكون أرفف .. اللي يسار الصورة في الطرف رف كبير بعمق 60 سم يختلف عن الجانبي لأنه في الأخير ولي الحرية حتى لو ابي أسويه متر وطول المخزن عندي 5.3 متر

https://i.imgur.com/DcvNfIP.png

الإنارة بتكون معلقة واللي تجي ال اي دي مثل النيون حطيت صورتها .. رخيصة ومتوفرة والمفتاح للإنارة وضحت مكانه جنب فتحة الباب ومعاه سنسر يشتغل تماتيك السويش لو احترق بس وحد بيبدله .. نقطتين كهربة عاديين لأي غرض وممكن لو تغير استخدام المخزن في المستقبل

هذي صورة لبداية الدرج ويمين في البداية مفتاح التشغيل والسنسر للإنارة .. القوس الوسطي صعب أسويه بعمق 20 سم أما 5 أو 10 لو حبيت أو أكتفي بلوحة عليها انارة أو إنارة موجهة مسلطة عليها مركبة مقابل على جدار المصعد .. تحت يبين آخر الستور اللي بيكون شكل حرف U تحت بسطة الدرج

https://i.imgur.com/4rB5qq5.png

ذيك كانت الجهة الداخلية للدرج وما اكتملت بعد فيه إضافات أضفت مكيف سبلت بيكون مقابل ظهر المصعد وعندي في المصعد أو بيته تجويف فارغ في الخلف للتهوية هذا بتكون فيه فتحة من المنطقة الوسطى تحت بغريل يدخل منها الهواء البارد وينسحب يدخل بيت المصعد ويطلع من فوق السطح بمروحة شفط أو حتى بدون لأن الهواء الحار يرتفع ويتكدس فوق ويدخل هواء بارد بداله من الفتحة السفلية وبنفس الوقت يساهم في تجديد هواء البيت

هنا توضيح للدرابزين اللي بيكون 7 سم ستانلس ستيل دائري تحته قطعة خشب 10 سم في 4 العرض في أسفلها يكون شريط ال اي دي لإنارة جانب الحائط والعتبات .. الدرابزين بيكون مار جدام الكسرات في حائط اللفت المقابلة لكسرات متناضرة معاها على الحائط الخارجي وهناك ما فيه درابزين مسكة فقط جهة وحدة

https://i.imgur.com/LtPO8K0.png

النعلات كلها بتكون 28 سم مخفية وفوقها فرزة ستانلس ستيل 2 سم .. مفكر في مناطق البورسلان تكون بورسلان وفي مناطق السجاد تكون خشبية أو بديل الخشب لو أرخص وعملي طلع .. الفرزة أو الشانيل بتكون حسب التناسب مع لون الديكور الداخلي للفراغ

أكيد الدرابزين المفروض يبين طرفه مرتفع أو نازل وهذا سوء تنفيذ في الرسم مني .. مهما أحط من تفاصيل تبقى تفاصيل ناقصة بس وقت التنفيذ تتنفذ مثل هذا الشكل التقريبي في الصورة

https://i.imgur.com/xVnR6TJ.png

الجهة المقابلة من الفراغ عندي هذا الحائط وأضفت التكييف فوق

https://i.imgur.com/XaAtz6C.png

ناقص أوضح النعلة هنا بعد

توضيح للنعلة والفرزة اللي فوقها وهذي بعد ممكن نركب فيها شريط إنارة يكون وايد أخف من اللي تحت الدرابزين وبلون غير يعطي تداخل إضاءات وتغيير للمكان .. عندنا بتكون إنارة الجدار العامة + إنارة أسفل مسكة الدرابزين + إنارة أعلى النعلات + إنارة التجاويف الجدارية وفي الأخير الإنارة الطبيعية

https://i.imgur.com/5HBO7Ut.png

هذي بإختصار دراسة الفراغ وتطويره للتنفيذ وليكون مريح وجميل وعملي بنفس الوقت ولازم يمشي الواحد على خطة تسهل عقده وتسهل بنيانه بدون ربكة وتغييرات وتفكير ضايع لازم الخطة

شيء أخير بالنسبة للإنارة عندي الكسرات في الزوايا ارتفاعها 2 متر + تبدأ من فوق 30 سم يعني 2.3 متر أعلاها هذي ممكن ننيرها بليتات صغار حول 2 سم قطرها تنور لأعلى ويكون بعد لونها الأزرق لوني المفضل تعطي جو حلو وتكون مشبوكة مع اللي أعلى النعلة تمشي مع بعض

https://i.imgur.com/XB8t38o.png

سامحوني التحديث قليل ومتابعتي قليلة وكنت حاسب حسابي أخلص قبل انتهاء عطلة العيد وبإذن الله ممكن لأن بعد العيد عندي خطة عمل على عدة اتجاهات للبدء في شهر 9 بإذن الله والشغل على التفاصيل ما يخلص ودوم فيه تردد ونسيان بعض الأشياء وكل شيء بإذن الله ملحوق المهم الخطة

انتهيت مبدئياً من توزيع جدران دورة المياه الرئيسية وهذي صورة توضح الجدران المتقابلين الداخلية .. الخارجي يمين والداخلي القريب من الباب يسار .. فتحة الباب بتكون مثل الصورة تحت يسار ينفتح على جهة المغاسل .. والمغاسل على كاونتر وشوي بارزين حتى يقترب منهم المستخدم بصورة كاملة وعرض الكاونتر 40 سم بيكون معمول من فريم حديد واسمنت بورد مغطى بالبورسلان .. فيه كسرات في الأطراف يستوي بس 20 سم عرضه .. إرتفاعات كل شيء موضحة

https://i.imgur.com/wGmJx44.png

وهذي مقربة لمنطقة المغاسل يسار وللجدار الخارجي يمين .. دخول الهواء بديل المسحوب بيكون من فوق من غرفة الملابس لتجديد هواء غرفة الملابس بيكون في الزاوية العليا يمين المغاسل والخروج يسار في الزاوية العليا جهة الشور .. بس الشور ممكن يكون له سقف مغطى بولي كاربونيت حتى البخار ما يطلع لو بنسوي حمام بخار وتجديد الهواء بيكون عن طريق فتح الباب مال حيز الشور

https://i.imgur.com/lRaS0hS.png

هذي منطقة المغاسل بشكل مقرب يبين فيها تركيب ومقاسات البوكس اللي تحت المرايا بيكون بعمق 15 سم 10 بارزة وخمسة مغمورة ومحفور لها في الحائط والفتحة تعمل أثناء البنيان .. المراية والباب تحتها بيكونون أعرض يخفون شريط انارة وبتكون انارة صغيرة مقاس 2 سم مسلطة على الوجه وضحتها لكل مراية 20 قطعة .. هذا غير عن انارة السبوتات بيكونون واحد مسلط على كل مغسلة واثنين شوي أكبر على منطقة الشور .. وآخر شيء الإنارة العامة المخفية في التجويفين العليويين فوق المغاسل وفوق كرسي الشور

https://i.imgur.com/kzNrHQ9.png

الضلعين الثانيين بطول 4.4 متر هنا صورهم مجتمعين

https://i.imgur.com/9fTMKY1.png

هذي شوي مكبرة للي يهمنا حالياً .. الجدار اليمين فيه الباب والمفصلات جهة قاعدة المثلث يمين والقفل جهة اليسار .. يسار الباب الحايط اللي عليه المغاسل وبين الباب والحائط هذا قطعة الحائط الصغيرة عليها نقطتين مكان تعليق المناشف .. وراء الباب جهة اليمين عندنا سخان الفوط لتنشيفها ونفسه موجود في الجهة الثانية قرب المغسلة الثانية

https://i.imgur.com/0oJ4aJ2.png

أعتقد كل شيء واضح

تكبير لمنطقة المغسلة من الجنب والدوائر طلعت وردية فوق راس الرجال يمين شوي هذي علاقات الفوط ما تبين عدل من بعيد

https://i.imgur.com/0QduDCd.png

وتقريب أكثر لها

https://i.imgur.com/Cyb1WbA.png

بينها 20 سم وفيه نوعيات مب متقيدين بهالنوع ممكن متصلة وجاهزة وغير في الشكل وحتى الإرتفاع أحسه كبير ممكن يكون أقل فقط هذي تذكيرية

كل شي ممتاز

بس عندي ملاحظه على الارتفاع احسه كبير جدا للحمام . نظريتي تقول كل ماقل ارتفاع الحمام كل ما كان اسرع شفط الهواء الحار والرطوبة

اقتباس:

---

المشاركة الأصلية كتبت بواسطة سعود.

كل شي ممتاز

بس عندي ملاحظه على الارتفاع احسه كبير جدا للحمام . نظريتي تقول كل ماقل ارتفاع الحمام كل ما كان اسرع شفط الهواء الحار والرطوبة

---

متقبل رايك بس سويته في بيتي الحالي ولا ناوي أكرره .. نظريتي تقول استفيد من الإرتفاع حتى لو الحمام ضيق بعد الإرتفاع زين بس تقدر تفصله فاصل محسوس لكن غير مرئي .. اللي هو تسوي البلاط لين ارتفاع 2.6 متر حتى يكون مع الأبواب والدرايش خط واحد وفوق خله صبغ جيد ايبوكسي .. الهواء الرطب يكون حار ويرتفع فوق جهة السقف وفتحة الشفط هناك والهواء البارد ينزل تحت فتكون استفدت برودة وتجديد هواء وتخلص من الرطوبة

شوف مخطط السقف شلون بيكون .. حسب الرسم التجويف المرتفع أكثر عند مستوى 4 متر هو اليمين واللي أعلى الصورة هذا فيه الإنارة المخفية وفيه 3 سبوتات واحد فوق كرسي الشور واثنين فوق المغاسل .. المستوى النازل شوي بيكون حول 3.8 أو 3.6 بين هالرقمين وبين مستوين الجبس فيه قاطع جبس عمودي وكله بسيط وسهل ينعمل .. هذا تكون مخفية فيه فتحة قناة الشفط اللي بتروح فوق السطح مثل ما موضح الخط الأحمر المتقطع يسار فوق .. وقناة تدخيل الهواء بتكون يمين تحت .. الإنارات بتكون عندي داون لايت الكبار 20 أو 15 سم على منطقة الشور والجكوزي والباقي سبوتات لايت سبعة سم انتي غلير أو مانع التوهج إثنين بس في منطقة المغاسل في السقف النازل بالغلط ما مسحت الثالث اللي جاي مب على نفس الخط

مع هالترتيب استوى المنور عندي جاي بالضبط وسط السقف النازل 1.4 متر من اليمين ونفس الشيء من اليسار لو شلنا التجويف اللي 40 سم ونفس الشيء من فوق وتحت

https://i.imgur.com/Ait5eYf.png

الإنارة عندي بتكون مخفية العلوية وهذي عامة تشتغل بحساس حركة وتستمر في الإشتغال نص ساعة بعد الحركة .. والسبوتات هذي انت تشغلها أو تخليها تماتيك والداون لايتس ذي يدوي أحسن وقت السبوح .. غير فيه إنارة المغاسل المخفية والتجاويف وكذلك إنارة مرايا المغاسل الجانبية للوجه وأخيراً إنارة المناور هذي كلها بتكون تشتغل بخلية ضوئية مع النهار تطفى وبتكون في أعلى جسر المنور المقلوب .. بعد الإنارة الطبيعية بيكون لها دور كبير وحلو للمكان

باقي أشياء تجي مع الوقت منها تصميم خطوط المياه وخطوط الكهرباء وين ابغيها في كل حائط حتى نعمل حسابها .. المهم الرسم الأساسي هذا وكل شيء عليه سهل بإذن الله .. بعد عندك تصميم البلاط والعملية سهلة جداً بعد اختيار النوع المناسب والمرغوب .. ينصف بالحبة وحتى ينحط صورة بالتشكيلة اللي يجي عليها

شغلك عدل مدل

اقتباس:

---

المشاركة الأصلية كتبت بواسطة سعود.

شغلك عدل مدل

---

جزاك الله خير

وعادي السقف سهل تتحكم فيه وفيه عدة أنواع من الأسقف المستعارة .. في أمريكا أذكر نظام حلو كلش ما شفته عندنا بس رافكو مسوينه بطريقة خاطئة .. كان نظامهم يعتمد على النيون فوق في أعلى السقف ينور على ناشر بكامل السقف 60 في 60 محمول على ألمنيوم نفس الحامل للسيلوتكس قبل والناشر بولي كاربونيت خفيف ورخيص تشوف السقف كله مضاء ممكن حبتين نيون تكفي .. رافكو مسوينه بس الناشر بلاستيك سميك ولونه أبيض مب شفاف يبين النور من وراه بس يحتاج كمية نيون كبيرة لحمام بيتي الرئيسي ركبته بس ما ركبت النيون فوق ركبت قطعتين 60 في 60 وألحين غيرتهم لإل اي دي بانل .. حسبوا لي النيون 18 حبة حتى يبين النور تحت وما بيكون كافي .. هالمرة بابتعد شوي عن رافكو وباسوي جبس بسيط

خيبوا الظن لؤي إخو فريد .. محافظنا باعت اليوم وكانت عند الظن فوق 7.7 مليون خردة للعيد .. ومن تداول مثل ما اتوقعت قليل 119 مليون تقريباً هم بس يكفون أذاهم وتداولهم العبثي سوقنا يستوي بخير .. وأفرادنا ما قصروا بتداول قريب 118.7 مليون وبيع حول 4.25 مليون عكس ما توقعت

من باع أيضاً اليوم؟

أفراد الخليج بسيط جداً وأفراد العرب بسيط .. والافراد الأجانب حول 4.6 مليون بيعهم

الشراء فقط من محافظ الخليج قريب العشرة مليون فوق 9.9 مليون .. والمحافظ الأجنبية 6.6 مليون حلوة أرقامهم ستات وتسعات .. والمحافظ العربية بس شوي فوق 10000 ريال

توجه السيولة اليوم أكثره على الخليج الدولية وأتوقع غالبه دخول استثماري ومؤسسات مع الأفراد أكيد كتغيير مراكز وتجميع في سهم مهم .. ثاني شيء بنك قطر الوطني وهذا معتاد دوم سيولته عالية والحلو ارتفاعه دعم السوق .. ثالث سهم صناعات بعد نفس الخليج الدولية والداعم الرسمي ارتفاع النفط

ما شاء الله 10 أسهم الأعلى سيولة كلها خضراء ومهمة .. والأكثر سيولة من الأسهم الشعبية الإجارة وارتفاع حلو فوق 3% مع إن سيولته حول 5 مليون .. مزايا ثاني بسيولة 4 مليون وارتفاع بسيط .. العجيبة قطر وعمان سيولة تحت 1.2 مليون وارتفاع 4.4% والسهم سهل التحكم فيه ورفعه أعلى وأعلى بسبب قلة أسهمه

المعذرة المشاركتين فوق بالغلط تعليق على الأسهم القطرية

أنهيت تقريباً منطقة المكتب وملحقاته وأفكر في مسئلة التكييف ممكن وحدة الدكت سبلت للمكتب في سقف دورة المياه لأن هذي بتكون قليل استخدامها حتى لو الصوت مزعج دخول دورة المياه قليل تحتوي على كرسي ومغسلة فقط .. وبالنسبة للصالة ممكن يكون التكييف في سقف الموزع أو في سقف المخزن مع عمل تمديد بايب يودي المياه للزراعة في الخلف باوضح طريقته بعد في الرسم ما دام جهزت مخطط الحوائط كل شيء سهل بيكون

https://i.imgur.com/ne0IiKI.png

تم ترقيم الزوايا بأحرف حتى تسهل معرفة جهة النظر بدال الإتجاهات والطريقتين يمشون

https://i.imgur.com/DLlyEbq.png

من التعديلات اللي مصر عليها ومسلمها للاستشاري في الأساس تكون الدريشة طرفية وبما إن عمقها كبير بتكون جهة الخارج داخلة شوي حتى لو سويناها بكامل الإرتفاع ممكن تتغطى بستارة لو نحب بس قلت هذا حمام صغير ودريشة مرتفعة كفاية بعرض 60 سم الصافي منها بين 48 سم أو 46 حسب سمك الفريم .. الله يهداه متفيهم أزيد من اللازم راح غير وحط الدريشة وسط وانا ابغي مساحة كافية للدكت مسوي الدكت وايد صغيرة هو خليتها مثل ما سواها بس مغيرة في تفصيل الحائط وأصلاً الدكتات بتكون منطقة مفتوحة مغطاة باسمنت بورد باسوي تفصيلها بعد وبتكون من ضمن الحائط


https://i.imgur.com/GBdRoYH.png


أرضية المكتب وصالة التلفزيون جنبه مرتفعة بس 10 سم عن أرضية البيت لذلك يقل ارتفاع الدرايش ل 250 سم والأبواب كذلك

https://i.imgur.com/kbG9tJD.png

هذي الواجهة بتكون زجاج وفريم يو بي في سي وبيكون الزجاج شفاف حتى تمتد الرؤية ليل ونهار للحديقة ولحوض السباحة القريب .. ومساحة الزجاج هنا فوق 12.5 متر مربع باخليه أغلبه ثابت فكرت في الفولدنغ بس ما يسوى الغبار والجو التعيس عندنا بابين في الأطراف وعملت حساب نص متر كتف من الصوبين للستارة تتكدس فيها من الجهتين وبتكون ستارة خفيفة مفكر في البلاستيك الشرايح الطويلة لسهولة الفتح حتى لو لافة للنور

التلفزيون بيكون مكانه يسار ووراه التجويف اللي ممكن أسوي له بروز 15 سم من تحت خشب ويكون مثل الكبت الغاطس في الحائط بعمق 20 سم وعرضه يكون 35 سم للكتب ولحفظ الوثائق والفواتير والضمانات

https://i.imgur.com/kbG9tJD.png

باكمل مع البقية بعدين

هذا قطاع في دورة مياه المكتب والمكتب جهة الشمال .. الكسرة اللي في الحمام ( الروشنة ) أفكر أسويها بكامل الإرتفاع للأرض

https://i.imgur.com/ba3iQLF.png

وهذا قطاع يبين الجدار من اي الى دي جهة المغسلة والكرسي في دورة المياه وبعدين الستور وبعدين الموزع أو المدخل اللي بيكون فيه كبت أدراج صغير أو أبواب وارفف داخل

وهنا قطاع أخير للحائط دي سي يوضح جهة الكبت في المكتب وممكن نسويه وقت الحاجة أشوف الغرف فيهم كبتات كفاية وغرف ملابس

https://i.imgur.com/R06BicT.png

وهذا قطاع للحائط الداحلي وأخطيت هنا والواقف يشوف هذا الحائط بيكون اف جهة اليسار وإي جهة اليمين يعني معكوس موضوعه سهل .. المكتب بيكون وسط البابين وممكن يوصل ل 3 متر كعرض

https://i.imgur.com/0PV3DH0.png

هذا تصحيح للسابق الرسم معكوس

https://i.imgur.com/d9KPHBF.png

وأحسن هشكل المكتب تحت نطلع من الباب اليسار يواجهنا الموزع بالفتحة المستطيلة بعرض 1.1 متر وندخل من الباب اليمين يقابلنا الحمام مثل ما هو موضح فوق

هذا مقترح السقف كيف بيكون لدورة المياه مع التكييف .. التكييف كله بيكون تحته مثل الحوض المعدني لجمع المياه لو صار تسريب وتنزيلها في بايب يكون ممدد في الحايط ومتجه للخارج .. وهنا عندي إمكانية أركب ثلاث وحدات تكييف ممكن وممكن ثنتين اقل شيء وحدة في دورة المياه ووحدة في الممر او الموزع أو في المخزن

وضحت المغسلة والكرسي لدورة المياه وزدت طول الكسرة .. أول شيء جهة المشاهد تجي المغسلة بعدين الكرسي وبعدين الكسرة الطولية

https://i.imgur.com/UJ3Tdk2.png

الخط الأحمر المتقطع هذا بايب أو قناة مرنة حق الهواء الداخل من فوق من الغرفة للحمام ومنه للخارج .. بيكون الدخول في الزاوية اليسرى فوق المغسلة والسحب في الزاوية اليمنى فوق الكرسي .. عاد أما للسقف أو جانبي هنا الجنب ميت ما فيه شيء غير زراعة

بالنسبة لمخطط السقف الجبس بيكون سيدة مع فرزة في الأطراف ما عدا دورة المياه فيها مستويين لدكت دخول الهواء المخفي وسحب الهواء كذلك مع إنارة مخفية + إنارة عامة بانل ال اي دي 60 في 60 .. أفكر فتحة التكييف وصيانته وبن بتكون لازم ينفتح الليت .. ممكن تكون فتحة الصيانة هي ال 60 في 60 ينشال الليت ويصان التكييف أو نكتفي بالإنارة المخفية + السبوتات ال 2 واحد فوق كل قطعة .. ممكن نسوي إنارة خطية بعد فوق مستوى البلاط هنا ناوي أخلي ارتفاع البلاط 2.6 متر وفوقه فاصل ستيل ممكن عمل U Channel فوق الفاصل في الجبس وفيها شريط ال اي دي مكشوف .. باوضحها في واجهة الحائط بإذن الله

https://i.imgur.com/PnhbzDM.png

المكتب الخطين الدبل جنب بعض ذيلا مكان الجبس وفوق الكبت بيكون امتداد للجبس بيكون الكبت كأنه غاطس في الحائط .. التراك لايت بيكون خطين في سقف الجبس مثل ما هو موضح والعامة هي الثلاث بانلات ال اي دي ذي مجربها في بيتي ألحين ومرتاح منهم الدرويش يجيبون جودة عالية وعمر طويل

المخزن النور المعلق حتى يكون قريب من الأرفف .. والموزع داون لايت أو أخليه مزدوج خط ال اي دي مع نور حائط كفاية وزود حتى أخلي مجال لصيانة التكييف

إضافة أخيرة للكبتات كلها نور داخلي يشتغل مع فتح الباب .. وللتجويفات كلها نور مخفي

قواك الله بو عبدالله، عندك بعد الخزانات الجديدة اغلبها مضاءة، و تحتاج توصل لها الكهرباء لذلك الفيش هذا مطلوب في كل مكان.

اقتباس:

---

المشاركة الأصلية كتبت بواسطة سالم الزهران

قواك الله بو عبدالله، عندك بعد الخزانات الجديدة اغلبها مضاءة، و تحتاج توصل لها الكهرباء لذلك الفيش هذا مطلوب في كل مكان.

---

صحيح الله يسلمك لذلك أحاول أركز على هذي المتطلبات حتى عقدي يكون واضح وبدون ربكة في الشغل وما انسى شيء .. دمج تصميم الإنترير بالتنفيذ الإنشائي

حالياً شغال على الغرفة اللي فوق المكتب وهي متكررة في الأرضي والبنتهاوس لاحظت الدرايش الثنتين حول السرير أصغرها شوي أفضل من عرض متر ل 90 سم تعطي كتف للستارة وتكون متناسبة مع فتحة المدخل .. ولو تشوف الجدران متطابقة بس دريشة المكتب عريضة وما بتتطابق مع حدود الدرايش للغرف .. المهم الجزء الظاهر الدور الأول والبنتهاوس على خط واحد وتحت ما تتلاحظ

https://i.imgur.com/X0C64GO.png

هذي بتكون واجهة جهة السرير بالمفاسات .. أثناء تركيب الطابوق وعمل التمديدات بتكون الأمور كلها واضحة

https://i.imgur.com/Lvc1X0d.png

وهذي الواجهة بالأثاث .. إحتمالية تكون الستاير طويلة ومخفية في الجبس تكون لها كسرة طويلة بعرض الحايط وممكن دكت الراجع للتكييف تكون مخفية في هذي الكسرة وسط بين الدريشتين لو يصير والدفع جدام السرير سواء بغرل مكشوف نازل أو مخفي بنفس الطريقة بس بكامل العرض

الهيد بورد بيكون منجد وثابت جلد أو قماش حسب الرغبة لراحة الإستناد وتكون التمديدات الكهربية فيه وكذلك الإنارة والتحكم فيها وبيكون مرتفع قليل عن الروشنة في الحائط والروشنة بتكون فيها انارة تحت تنور على فوق وبتكون مخفية بالهيدبورد وتشطيب الجوانب للروشنة بيكون أما خشبي في الغالب أو حتى ممكن ورق جدران بس الخشبي بيطلع أحلى مع أرفف زجاج يمر النور منها

دورة المياه عدلت عليها تعديلات بسيطة .. تختلف عن دورة مياه المكتب ذيك عرض 2.2 متر هذي 3 وممكن أسويها 3.2 فكرت فيها وسويت التصميم بس تراجعت لأن المساحة كافية .. كنت مفكر أخلي الجدار صوب الدريشة عشرين بس العمق طلع مب حلو وباخسر الروشنة الطويلة تراجعت .. ممكن أضيف روشنة في الشور على جنب الكرسي حتى تكون قريبة من الجالس وهنا بيكون الشور اليدوي للي يبي يسبح وهو جالس وفي الطرف الثاني الشور المطري والروشنة الطولية جنبه للصابون والشامبو من قريب

https://i.imgur.com/E5dop2j.png

بعد سويت كسرة للتلفزيون بعمق 10 سم يكون غاطس فيها ما يضيق المكان ومكانه محدد في النهاية عرض الغرفة ذي 3.4 متر وحتى لو نزل العرض ل 3 متر كافي على هذا الترتيب بيكون متر كامل جدام السرير للمرور لو تمر وحدة قاطرة ومقطورة بتقدر تسلك :)

هذي غرفة الملابس المغلقة والخاصة صحيح بمقاس صغير بس بتخزين طولي 3.6 متر وفوق ممكن نسوي ارفف عريضة ثابتة للشناط والتخزين الطويل بس نحتاج لدرج حتى لو صغير للركوب لسحب اللي نحتاجه عندي في غرفتي هشكل .. عندنا الكبت بعد بطول 3.4 متر المجموع 7 متر المشكلة البنات بيقولون ما يكفي في وقت من الأوقات وعندنا ألحين حفيدتين الله يحفظهم لطوف وهيوه متمرسين في جمع الملابس

https://i.imgur.com/PQPpt2c.png

هذا عندك تحليل مسارات الحركة الرئيسية نسيت جهة غرفة الملابس بعد ومعاها اتصال الدرايش .. حركة الدرايش هذي شفتها كثير تنفذ في أمريكا وايد حلوة وشرحة بس هنا تعطيك امتداد للغرفة جهة الحايط

https://i.imgur.com/qLWTglg.png

هذي واجهة دورة المياه الداخلية والملابس والمدخل .. هنا بيختلف عن تحت في المكتب بيكون له باب وممكن نركب باب ثاني لو فيه إزعاج من التكييف يحصر المدخل بين بابين ويعزل الصوت عن الغرفة أو بيكون الصوت مثل صوت تكييف الفنادق دوم التكييف فوق في الممر الموصل للغرفة

https://i.imgur.com/hGSqHDK.png

وباكمل الباقي بعدين ورجاء أي شخص حاب التصميم أو أجزاء منه يامر ويوصله وحتى باطبقه على أرضه لو يحب

شرح عام لما استعرضته في الغرفة الأخيرة بفيديو أتمنى يكون واضح وكافي

https://www.youtube.com/watch?v=U7zimF2U8oA&t=38s

شغلي بطيء وكاره البطء اللي فيني .. أنهيت فكرة ومقترح توزيع التكييف للدور الأرضي والأول وإن شاء الله الشركة اللي بتنفذ تبني عليه هذا تصميم أكيد مبدئي بدون تفاصيل فقط موقع المكيف معلق في السقف ومسار الدكتات الهواء البارد أزرق متقطع والحار الراجع أحمر

عندنا منطقة الدرج بيكون فيها مكيف سبلت عادي بين الدريشتين في أول طلعة الدرج من الأرضي للأول .. ومنطقة المدخل دبل هايت ومفتوحة على الدورين بتبرد من المحيط حولها مثل بيتي ألحين المدخل بارد بدون تكييف .. المطبخ تكييف كاسيت السقفي المعلق

https://i.imgur.com/QdYEdIP.png

والدور الأول بيكون كله دكت سبلت ما عدا غرفة الملابس الرئيسية بيكون تكييفها بعد كاسيت معلق

https://i.imgur.com/uTlaLsy.png

والبنتهاوس مقارب للأول بيكون ناقص قسم الغرفة الرئيسية

راعيت نزول البايبات سيدة لسهولة استبدالها ووجود التكييف في ممر ما يسبب إزعاج داخل دورات المياه .. بالنسبة لتمديد تصريف مياه التكييف هذا باوضحه بناءً على التصميم المبدئي الموافق عليه والمتفق عليه من شركة التكييف ليكون ممدد للخارج جهة الزراعة وبايبات مناسبة في القطر والإنضغاط

تم ارسال المخططات لشركة تكييف لتقييمها وترتيبها بشكل أفضل وإبداء أي ملاحظات مع التكلفة .. وكلفت ولدي بالمتابعة مع 3 شركات أُخريات بنفاضل بينهم ونقرر أي شركة نتفق معاها .. تمديد البايبات لبايبات النحاس من فوق بشكل عمودي سهل وعلى أساسه بطابق توزيع السقف ووين التكييف بالضبط .. هذا ما هم الإستشاري ولا نبهني عليه كله شغلهم نواقص حتى الواحد لو اتفق مع مقاول يدفعه فوق السعر المتفق عليه شغلات كثيرة ومعاه حق

هذا اللي وصلت له لتوزيع السقف وبحيث تكون المكيفات أماكنها قريبة من خروج البايب عمودي للسقف .. بيكونون عندي 17 وحدة تكييف رقمتهم فوق مع الصبية تحتهم 20 سم + عمود الكهربة وبايب الغاز هذا عشرين في عشرين والمفروض بإرتفاع مناسب 80 سم مثلاً .. بس معطيني ارتفاع لسور السقف الأخير 50 سم ولازم أغطي الوحدات وكذلك أحمي أي حد يركب السطح .. مفكر في إني أسوي ساتر خفيف بديل الخشب أو غيره شكله يكون زين وبارز بلون ثاني فوق خط سور السطح بحدود متر يكفيني يعني متر ونص إجمالي من أرضية السقف لأني بعد ناوي أثبت مظلات حديد في قاعدة المكيفات حتى تظللهم وباناقش مدير البلدية في هذي النقطة بإذن الله

https://i.imgur.com/NuzzuYr.png

تكبير شوي لموقع المكيف الوحيد اللي بيكون ملاصق للمنور والمنور مرتفع فوق متر وقاعدة المكيف تحت حول 20 سم ارتفاعها بس .. هذا المكيف الوحيد لحسن الحظ اللي بيكون فوق سقف الدور الأول والبقية كلهم فوق سقف البنتهاوس

https://i.imgur.com/uSI9Nph.png


هنا توضيح حق خطوط ميل السقف لتصريف مياه المطر وفتحة التصريف اللي المفروض تنزل بعد عمودية سيدة بدون عائق من دريشة أو باب .. تنزل لتحت الأرض وبايب يوديها للزراعة الحوض الخلفي بيكون نازل وفيه سوك أوي لتصريف المياه في الأرض .. نفس الحال بايبات تصريف مياه التكييف ممكن نشبكها مع تصريف المطر اللي بيكون 4 إنش وتصريف التكييف بالكثير 2 تنزل المياه نقاط للزراعة بعد

https://i.imgur.com/D2tgl4W.png

فتحة الصعود لسقف البنتهاوس من خلال درج حديد يمر من غرفة الخزان وهذي باشوف لها باب مناسب يغلقها حتى غرفة الخزان ما تنملي غبار

https://i.imgur.com/bxMcEik.png

وصلني أول عرض بحدود 260000 للتكييف بس بدون سكتشات مبدئية أو تأكيد للسكتشات اللي أرسلتها وبعد الإتفاق بيسوون التفاصيل .. بنشوف شيصير مع الباقين ونعرف وين نتجه انا هذي أكثر شركة مرتاح لها والسعر معقول ومقبول بس تهمني التفاصيل وأكيد لازم مفاوضة وممكن تعديل بسيط .. باقي تكييف الملحق وعرفة السايق والمجلس هذا بيكون سبلت عادي وممكن يكون من شركة ثانية

إن شاء الله أقدر وأتابع معاكم تفاصيل كل شيء في هذا المشروع لفائدة الجميع ولنفسي بعد أعتبره مثل التفكير بصوت عالي

حصلت مهندس سمارت هوم واضاءة محترم وباشوف اقتراحاته بعد برسل له المخططات

إستكمال للتصميم تم تعديل غرفة البنتهاوس الطرفية اللي بتكون تكرار للغرفة اللي فوق المكتب وبنفس المساحة حائط فوق الحائط بالضبط وخدمات فوق بعض

التعديل هذا ممكن أمشي عليه للغرفة تحت بعد .. ليش؟ لأني أشوفه وايد أنسب بسبب نقل الكبت قرب دورة المياه وعمل المدخل شوي متصل بدون قوس فوق وبدون أكتاف .. الأكتاف تعطينا فصل بسيط بين الحيزين والفتح يعطينا اتصال واستمرارية لخط السقف وللارضية وممكن سعة أكثر .. حل ثاني أسوي التغيير بس فوق حتى أعطي كل غرفة نوع من التغيير والتميز

https://i.imgur.com/dzGB9Lt.png

شطف الزاوية بعد في المدخل يعطي سعة وجمال

وهذي الغرفة اللي تحت بدون دريشة جنوبية لأن فيه صالة ملاصقة فوق في البنتهاوس الدريشة السفلية هذي جنوبية ومطلة على السقف

https://i.imgur.com/ia6pC1v.png

باحافظ على التصميم بس اقتنعت بتحريك باب الحمام شوي تحت وعمل فتحته مثل فتحة الباب في الغرفة العلوية

ميزة فصل المدخل بأكتاف وجسر فوق هنا بيكون التكييف في المدخل ويصد الصوت شوي وممكن لو الصوت قوي نركب باب ونفس الشيء ممكن نعمله لغرفة البنتهاوس مع اني أتوقع ما بنحتاجها في البداية الغرف كافية ممكن تكون احتياط للمستقبل ولفكرة زواج أحد الأبناء وتكون شقة كاملة له 3 غرف وصالة وبانتري مستقل مغلق مطبخ صغير وحتى طاولة طعام

هذا مخطط الدور كامل دور البنتهاوس بس ملخبطه الإستشاري انا ما طلبت باب للسطح صفاقتين ولا خشب يو بي في سي متصل مع الدريشة هشكل لو تم العقد عليه بندخل في تعديل وتكاليف اضافية .. باحط مقترحي للعقد إن شاء الله

https://i.imgur.com/dILgKnl.png

تقريباً أبغي الصالة هشكل

https://i.imgur.com/DcAbMnk.png

فاصل بسيط بين مدخل المصعد والجلسة وحامل بنفس الوقت للتلفزيون حتى الدرايش اليمنى الشرقية بتكون جهة الخارج والستارة داخل التجويف

ما بيطلع حلو الحائط البارز يمين البانتري نخليه مفتوح أحلى مع زاوية مشطوفة .. وعندنا مساحة مناسبة لمخزن صغير لمواد التنظيف وممكن ارفف فوق للشناط الكبار

https://i.imgur.com/CwD0it3.png

الغرفة اليسرى دورة المياه فيها بتكون نفس اليمنى أفضل غرفة الملابس تكون مستقلة ما تكون ممر للحمام حتى تتسكر وتنقفل لحفظ أغراضنا الشخصية

https://i.imgur.com/gRR5rwa.png

من ضمن التعديلات الأخيرة تعديل وضعية الدرايش هنا لدورة المياه وللغرفة حتى تدخل ضمن التعديل الداخلي

https://i.imgur.com/tgMDiIr.png

طبعاً كانت ارتب من هذا الشكل لكن الإستشاري فكر يطورها ما ادري ليش وبطريقته

هذا مخطط الإستشاري

https://i.imgur.com/b0HyDdZ.png

ممكن التطوير أكثر على دورة المياه بهذي الطريقة كاونتر يكون للمغسلة متصل مع كاونتر فوق الكرسي والكرسي بيكون معلق في كل الأحوال وبخزان مخفي أو بدون خزان بضغط الماء مثل النظام الجديد .. المساحات زينة ومناسبة لدورة مياه 3 في 1.8 متر

https://i.imgur.com/hmHaE0V.png

فتح الباب عكسته حتى أول ما يدخل الواحد يشوف الدريشة الطولية والنور الطبيعي والدريشة متطرفة جهة الخارج