مراجعة التصاميم المعمارية وابداء الملاحظات عليها (محدث)

عندنا اتصال رأسي بين الفراغات في المدخل مزدوج الإرتفاع بيكون ارتفاعه قريب ال 10 متر تحتها بشوي لأنه يغطي الأرضي والأول .. والمكان الثاني اللي يغطي كل الأدوار بيت الدرج والمصعد .. هذا تكييفه بيكون سبلت جداري وتهويته لازم أسويها مع هواء خارجي داخل مفلتر فيه سبلت يدخل اوكسجين نقي من سامسونغ وال جي وبدون غبار تكنولوجيا كورية بس ما انتشرت والله أعلم لو مواصلين فيها أو لا .. وشكثر هواء نقي ككمية بتكون قليلة بس شيء أفضل من لا شيء .. لكن أسلم لو نعمل فتحة يدخل منها هواء مفلتر بالإضافة للهواء المكيف والمزالة رطوبته اللي بيدخل في المدخل مزدوج الإرتفاع .. بعدين من فوق الأسقف خلال دكتات يمر الهواء ومعاه الهواء النقي للغرف ومنها لدورات المياه يطلع مع السحب من فوق .. هشكل بتكون دورة هواء صحية وبنفس الوقت ما بيستوي البيت كتمة صيف وشتاء لأن في الشتاء طبيعي بنطفي المكيفات خصوصاً اللي في المدخل ويدخل هواء نقي بيكون البديل لدخول الهواء الفتحة أو الفتحات اللي في بيت الدرج


هذا الدبل هايت وكنت مقترح عدم تكييف هذي المنطقة وصحيح ما تحتاج تكييف لأن الصالات مفتوحة عليها فوق وتحت لكن المكيف بيكون مساعد وبيكون لدخول الهواء النقي الخارجي من فوق من هنا .. الإضافة على التكييف بتكون حول 30 ألف ريال لهذي الوحدة وأنقل الفكرة للي يحب يسوي نظام تهوئة فعال مع هواء نقي وبارد

https://i.imgur.com/NL5fGHD.png

حل ثاني يكون قسم الدرج تغلق الفتحات مالت التهوئة صيفاً ونكتفي بالهواء الداخل من الدبل هايت وتفتح شتاءً

هذي صورة حق منطقة الدرج والمشاهدة من داخل الدرج جهة الشمال صوب الحائط الخارجي .. نلاحظ بيكونون فيه مكيفين على وسط الحائط فوق القوس والروشنة اللي في الوسط .. ومن أعلى لازم نحسب حساب عمل الفلتر من فوق وفتحة له أثناء الصب .. وأفضل يكون الفلتر فوق السطح للصيانة والإغلاق وقت الصيف

https://i.imgur.com/7SuztiE.png

يعني المفروض يكون بهذي الطريقة

https://i.imgur.com/s7iAoEb.png

الخط المتقطع فتحة السقف لقناة مربعة 30 في 30 سم ولازم يتم تنفيذ الفتحة بجسر مقلوب ويكون حامل بنفس الوقت ورافع لبوكس الفلتر

نسيت حاجة مهمة .. هذي الصورة معكوسة حق نفس المنطقة بس الرؤية من شمال للجنوب مقابل بيت المصعد ونشوف فتحات التهوئة لبير المصعد ثنتين تحت القوس والروشنة اللي بعمق 10 سم

https://i.imgur.com/AUWFiGM.png

يعني دورة الهواء حتى داخلية داخل فراغ بير المصعد

اليوم اشتغلت شوي على الفضاءات الخارجية والزراعة وسويت كم فيديو توضيحي .. مثل ما تقولون تفكير بصوت عالي .. فيديوهات قصيرة حطيتها في قروبات بناء وتصميم وقروب المشروع ولازم انزلها يوتيوب واحطها هنا بعد .. هذا الفيديو الأول

https://youtu.be/vZeuIOH1O4A

معليش تصويري مباشر حتى انعكاس النور وصورتي تبين خفيف المهم شيء يمشي الحال

هذي صورة للمنطقة اللي ركزت عليها .. ألحين الفرق بين خط غرفة السايق وبداية الطبيلات 30 سم لو أزيدها في الطبيلات تستوي صافي العمق 6.8 للطبيلة تنقص منها 20 سم تستوي 6.6 متر زين ومناسب .. العشرين سم وممكن عشرة هذي واجهة لجسر الطبيلات اللي بيغطي الحديد وراه ومفكر أخليها كتلة وحدة متصلة من غرفة السايق لين مظلة فوق الباب لين قسم توانكي المياه وبيكونون 2 متصلين لسهولة الغسيل والإستبدال لأحدهم وبيكونون على الرصيف اللي يسار الباب .. بس في هالحالة لازم أراجع البلدية مرة ثانية بالتعديل ولازم نسوي بوابة للبيت واجهة مرتفعة شوي ومتصلة مع الغرفة مثل ما كانت الخطة السابقة وبنفس الوقت متصلة مع الطبيلات ومنطقة توانكي الماي .. يعني 4 متر ارتفاع غرفة السايق بنحاول نخلي البوابة أعلى جسرها 4 نفس ارتفاع غرفة السايق وأسفل الجسر 3.6 .. يعني عمق الجسر 40 يخفي الحديد مال السقف .. وتحت الحديد ممكن نسوي اسمنت بورد وإنارة خاصة بالبوابة

https://i.imgur.com/r5bHe8i.png

تطلع قريبة من هذا الشكل المنقطة المحددة بالخطوط العريضة المتقطعة .. ممكن أسوي الجسور كلها نفس الإرتفاع 4 متر بس أعتقد هم محددين 3 للسور ولازم ناخذ موافقة

https://i.imgur.com/xxuKlTJ.png

هذا الجزء الثاني لشرح اللاندسكيبنغ حق بيت ولدي

https://www.youtube.com/watch?v=NzH5O0tFzGI

الجزء الثالث

https://www.youtube.com/watch?v=aduPSDYLrrA

هذا الجزء الرابع
https://www.youtube.com/watch?v=A67vegNIEVE

وأخيراً وصلنا للجزء الأخير


https://youtu.be/HgPAZjxXLSs

حل ثاني حق اتصال البوابة وغرفة السايق ومكان خزان الماء والسيارات ككتلة وحدة يكون بقسم الكتلة لثنتين وحدة تشمل واجهات البوابة الداخلية والخارجية يكون الجسر بإرتفاع 4 متر متصل مع سور سقف غرفة السايق وباقي المظلة بإرتفاع أقصى 3 متر مع السور جاية بهذي الطريقة

https://i.imgur.com/ofkVmjg.png

هشكل بتبين من برا خليت مربعات الإستشاري اللي حاطهم بس باشيلهم باخلي الخطوط العرضية في البلاستر وباسوي الكورنبش فوق من الحجر ممكن مع إنارة مخفية فيه

https://i.imgur.com/rjjgN4X.png

إرتفاع السور 2.6 طلع يمشي مع ارتفاع واجهة الطبيلة 2.2 لين 2.6 من فوق بس بنحاول نطلب 3 أو 2.8 أقل شيء بيمشونا بعض أسوار منطقتنا 4 ويمكن فوق .. فتحة البوابة ممكن نسوي فيها زوايا ديكورية وكذلك تاج في الوسط

الحمد لله إنحلت غالب العوالق والتعديلات بزيارة للبلدية بس طلعت أمور ثانية مثل رخصة البناء بتمشي بس احتمال يطلبون مهندس لإجراءات انهاء اتمام البناء .. بنجتمع مع المقاول اليوم 8 ونص وبإذن الله تتسهل

بوافيكم بالتعديلات النهائية فيه أشياء بسيطة شفت أسلم تتغير والمالك طلب زيادة سعة المجلس لحدود بين 20 الى 25 شخص .. كانوا 12 وفيه امكانية .. الداعم الرسمي والفني طبعاً انا

البلدية فجاة قالوا التعديلات جائزة بس بعدين تدخل مخططات تعديلية مع رخصة اتمام البناء وبحيث تكون متناسبة مع القوانين التخطيطية وفي حدود معقولة

بيتم تكبير المجلس وحتى ممكن يكون على السور مباشرة وهذا موجود كثير حولنا مثل مجلس إخوي والوالد الله يرحمهم بس اشترطوا موزع وعندنا بعد مشكلة منهول الصرف بيكون مكان آخر الخط المتقطع يمين فوق

https://i.imgur.com/MSh1NwC.png

بعد هناك ما تحدد مكان باب الميلس وممكن نخليه وسطي بيطلع أحلى بس سالفة باب وموزع هذي تعني أما إرتداد أو الموزع يكون داخلي وزجاج مثل قفل الهواء ( Air Lock Area ) أو منطقة حبس الهواء .. شغال عليه حالياً وبانقل الفكرة .. انا ما احب الربكة بس ولدي مع اقتراب البناء قام يغير ويطمع وأشوفه بعد طمع مشروع وما يأثر على الشكل العام

سويت 3 إقتراحات بابدأ بالفاشل أول .. هذا بدون ارتداد مشكلته في إن منهول الحكومة يمين الباب تحت بيكون داخلي وأتوقع ما يصير

https://i.imgur.com/jvABF4Q.png

الثاني مقارب بس بمدخل زجاجي

عدد اللي فيه 19 حتى أقل من اللي عجبني

https://i.imgur.com/ChINVU9.png

الثالث والأفضل

باب وسطي وليوان داخلي مفتوح للنور وممكن زراعة اصيصات فيه ويكفي 20 كرسي مساحته شوي أصغر بس مناسب وعندنا المنهول مكانه صاد

https://i.imgur.com/DOioVXt.png

وهذا شرح فيديو لتوسعة المجلس

https://youtu.be/Ff_wdJ7N3CY

الرواشن أفكر أسويها حديثة أكثر بالعرض كامل مع إنارة مخفية وبإرتفاع بسيط طول كبير وارتفاع بسيط مستطيلة يعني وبعمق 20 سم مثل الكسرات الموجودة في البيت .. تقريباً الأقواس بتكون بس في الممر جدام المجلس المودي للحديقة ومكان الخيمة وفي ممر خدمات حوض السباحة والباقي كله خطوط مستقيمة

هذا فيديو لشرح التوزيع العام لمنطقة الحوض والمجلس وفكرة تظليل المنطقة استوت سهلة


https://youtu.be/viwWN275t7M

الحديد اليوم بنجتمع مع التيسير لطلب عرض سعر يجهزونه ويقصونه بدون هالك ويجيبونه ويركبونه في الموقع بعناية لأنه كله مغلف ايبوكسي .. باقي المقاول يعدل سعره وصراحة بالغ وايد في السعر شكله طلع فوق 1200 ريال للمتر عظم وهذا كان باني لنا في 2015 ب 1000 ريال تشطيب وسط بناية سكنية تأجير .. الزود علينا كان المصعد وشوي تعقيدات الدفاع المدني .. عندنا شخص ثاني بيسوي الخشب بسعر مناسب والخشب متوفر مع الجيكات من صديق ما قصر .. بعد هذا البند بنحاول نشيله بس بيشتغل تحت اشراف المقاول ولو عصلق المقاول بنخليه وبنشوف غيره .. مشكلة التفاوض ذي فترة مهمة وكان المفروض بادين فيها شهر 7 أو أول 8 حتى نبدأ بنيان أو 9 لكن هشكل ممكن نتأخر شوي .. بس اللي يهمني صب الخرسانات نخلص منه أول وقبل شهر 4 .. الهيكل يعني والطابوق بعد ممكن شغلته سهلة

كان المقاول طالب 250 لشغل طن الحديد وشغله بيكون لازم فيه قصور وفيه هالك .. التيسير وصلنا معاهم لتسعين ريال بدون هالك شامل التوصيل والتركيب في الموقع .. شوفوا الفرق شلون .. هذا غير عن تكلفة الحديد بس الإستشاري يدرس التصميم ويعيد حساباته في بعض التوفيرات الممكنة ممكن ينزل حول 10% .. أوقات حتة زعبوط يضرب ضربة كبيرة بدرايته وادارته لا ويروح يسوي الشغلة بالطريقة الصعبة .. ألحين الموضوع سهل ومتطور وفيه شركات تجهز الحديد وتوصله للموقع نظيف ومرتب والنهايات مصبوغة ايبوكسي بعد القص .. هو لو يسوي السهل والمتطور حط في بطنه 160 ريال للطن هذي في 96 طن 15360 ولو ينزل عدد الأطنان بيقل السعر أكثر وايد أكيد .. الثني لحديد الكانات فيه طريقتين زاوية 135 للقفل وايد أفضل وأقوى وزاوية 90 ضعيفة وهي الدارجة وتمشي الحال بعدين القفل تبادلي كل مرة في جهة

صحيح التوفير ولا شيء يمكن ما يوصل 5% بس شغل مضمون والمقاول فعلياً بيسويه أي كلام وسعر وايد أرخص من التسعين .. عقدنا مع الرونق للتكييف رتبناه وضفنا مكيف كاسيت ثاني للمجلس بما إنه كبر باقي بس العينات والتوقيع وباحط نسخة للإستفادة .. لأن مرحلة العقد معاهم خذت حول 3 شهور وزود لف ودوران وبنود تلغي بنود وكلام معسول لكن المكتوب كله ضد المالك .. باقي عقدنا مع الفيتري حق الصرف الصحي وباشوف صرف مياه المطر ومعاها التكييف والكهرباء وتغذية المياه .. هم شغالين على المخططات التفصيلية جزاهم الله خير وأتوقع سعرهم صدمة بس بيكونون بروفيشنال وشغل نظيف وحق ربعنا هم قايمين عليها وملاك الشركة معانا في القروب تعرفنا عليها من خلال القروب .. حتى مخططات As Built يسوون يحفظها الواحد

باقي البيت الذكي والكاميرات لازم نلحق عليها مع الإنارة .. صراحة البنيان جهاد والله يعين الجميع

تم بحمد الله توقيع عقد التكييف ودفع دفعة أولى مقدمة 20% بقيمة 47000 واجمالي العقد 230000 مع شركة الرونق والتكييف متسوبيشي متضمن جهاز واحد مع هواء نقي نفس نظام البكج للدبل هايت + نظام مراوح شفط مركزية أعلى السقف خارجية مجزأة لكل دورتين أو ثلاث دورات مياه على خط واحد فوق بعض + سنسر معاها للحركة وتايمر يخليها تشتغل نص ساعة

لاحظت التكلفة كبيرة والمقاول نص ونص بيتصيد للعمال من السوق وكلمت مقاول محترم حصلته في اجتماع مع أشغال سألته عن شغلهم الحالي قال 3 مشاريع مع أشغال وعندنا طاقة حق غيرهم كثير ووعدني يسعر أفضل من مقاول السيارة وصراحة الإثنين مجربين وفي عمارات .. لازم أتركد شوي وكل تأخيرة فيها خيرة بإذن الله .. عندي لو أكسب المقاول القوي حتى لو سعره زود 100 ريال للمتر أفضل من إني أقعد مع مقاول ضعيف مسعر لي 1200 ويطالبني بماي وكهرب بعد يبيني أوصل للموقع وهناك بيت أحد الإخوان قريب ما بيقصر بس على هذا السعر المفروض يشيل كل شيء

شاغل نفسي حالياً بشوية تعديلات على اللاندسكيبنغ ( الفضاءات الخارجية ) في بيتي .. إن شاء الله تنضبط مبدئياً مضبوطة للحين .. تم عمل توسعة للمدخل هنا لوقوف السيارات قرب الحوض الزراعي هنا بدون ما يضيقون المدخل للطبيلة ولباقي البيت .. هذي الصورة توضح التوسعة حول 60 سم وبعد تكسير الطابوق وعمل تأسيس حق البلاط .. خليته أبيض كاسر حدة الرمادي ونفس الحال للدوار ولحواف أحواض الزراعة الثانيين

https://i.imgur.com/rdSNHEG.png

قطعة الخشب المحطوطة ارتفاعها 25 سم بتتركب تقريباً مثل ما هي وعرضها 5 سم سميكة شوي بتكون حاجز للتربة المرتفعة شوي وبتعطي شكل غير وأكيد بتنصبغ .. وبعد بتترتب الزراعة والمنطقة فوق وباحط فيها أشجار متسلقة خصوصاً الجهنمية بتنفع هنا وبتتسلق فوق النخل وباشوف معاها بعد ياسمين نفس اللي خذتها قوية وجيدة أزهرت

هنا العمال يركبون خشب بيكون على شكل برغولا جزئية .. الغرض منها شكل يحدد الدوار ويربط بين الواشنتونيا .. وكذلك تتثبت عليه الإنارة لكل شجرة كشافين من تحت لفوق وكشاف وسطي لتحت بيكون مسلط على شجرة الياسمين

https://i.imgur.com/PxebJzL.png

إمتداد الخشب كان مسوي النموذج السفلي طلبت يعدله للعلوي وتم اعتماده

https://i.imgur.com/gn0dU3k.png

الخشب هذا مجرب مسويه وراء البيت

هذي الصور كلها مأخوذة من فيديوهات حطيتها في قروب الوتس أب هنا شغلة أنزلها الصور أسهل وتؤدي الغرض .. هذي آلة القص ربعنا متطورين عندهم هالنوعية

https://i.imgur.com/ASUo1wV.png

هذي صورة وقت تجربة الخشب ركبوه ببراغي صغيرة في الشجر بس بعدين بيكون تثبيته ببراغي وبعد حبال تعطي شكل

https://i.imgur.com/CsXjvup.jpeg

والحواف هنا انعملت بلاط ممكن تركب عليه السيارة وهي تلف وبارتفاع بسيط سيارتي نازلة ركبت عليه بسهولة .. الإرتفاع 11 سم وبتابع معاكم بعدين

بعد انتهاء تركيب الخشب النتيجة مرضية بالنسبة لي

https://i.imgur.com/xZ960l4.jpeg

بتكون الإنارة مخفية بين قطع الخشب وقطع خشب واصلة بين القطعتين الطوليين بتتركب .. للحين ما تناقشنا في السعر بس اسحق ما يقصر وسعره دوم معقول .. مفكر في اضافة انارة متغيرة الألوان مخفية موجهة لفوق أو لتحت .. شريطية مع الإنارة المركزة أو السبوتات .. حصلنا زاوية انتشار 36 وكنت ابغي 15 ما ادري بيطلبونها 15 أو 36 و 15 كافية لتكون فوق الياسمين .. الإنارة اللي لراس الواشنتونيا بتكون ثنتين جنب كل جذع على فوق ومركبة على قطعة خشب أيضاً بين خشبتي البرغولا ذي

لازم اطلب صبغ أساس زين يمنع المياه ويقاوم الشمس وفوقه صبغ نهائي مب معلمكم لونه سارة تحب هاللون يخليها تزمجر

https://i.imgur.com/LR8uElR.jpeg

هذا فيديو توضيحي

https://youtu.be/UgA0nnaFlRE

هذي الصورة نسيتها أعتبرها أجمل صورة في الدفعة الأخيرة

https://i.imgur.com/lc2jwfv.jpeg

المفروض ما احط فيديوهات كثيرة للشغل بس عندي شوية حماس والشغل بطيء شوي .. اليوم ما جاوا باقي يكملون باقي الأحواض .. وأمس تم تركيب النافورة وكنت متوقعها شغلة صعبة طلعت دقايق ما تاخذ لا وما تحتاج نقطة ماي ينصب فيها كل ما نقص مع سقي الزرع


https://youtu.be/25LE1PH3vec

https://youtu.be/nfOxoL5lRlo

https://youtu.be/uEqdpABGVI0

النافورة من السوق الصيني ب 4000 ريال ومصنوعة من مادة حجرية أعتقد جي ار سي صب بس بسمك مناسب للتحميل .. تحتاج قاعدة فيها نقطة الكهرباء وبدون ماي ومع التركيب سعرها .. فيه فيبر أخف وأرخص وايد بعضهم حول 1000 ريال في أنصار غاليري بس ما حبيت شكلهم

القواعد كلها اللي تشوفونها حديدلس فقط خرسانة في الموقع وخلط يدوي .. حتى اللي تدوسها السيارة في الطرف وأتعمد اركب التواير عليها

الشغل كله كجره escape

اقتباس:

---

المشاركة الأصلية كتبت بواسطة sara jsm

الشغل كله كجره escape

---

الكجرة في عين صاحبها جمال ههههه

تصوير أخير للدوار بعد إضافة باقي الياسمين وشجرة بونسيانا مع صبغ الخشب باللون اللي تحبه سين جيم .. سارة بنت جاسم اللي قاهرني اسمها كشخة

https://youtu.be/33NpWhNSTZ0

علقوا بآرائكم عادي ممكن ناسي شيء .. باقي الليتات ما وصلت كلفت حول ال 2400 من محطة البناء + 4000 للنافورة + الله أعلم شغل العمال كم متعود ذيلا حسب المعرفة وحسب الشغل صعب تحديده وفيه تغييرات وأعتمد على اسحق حتى في شراء المواد ما عدا ولدي في الليتات والزراعة

باقي الشغل بيكون صبغ الواجهة غاطين جوتاشيلد حتى نقدر نركب المظلة القماشية المعلقة وهم ثنتين وحدة مثل الشرح في الفيديو وثانية شرحتها قبل في فيديو غير + أرضية الدوار بتكون عشب صناعي وتحته قماش جيوتكستايل فابريك يسرب الماي تحت ولا يسرب أي رمل وبيكون يحمي الارضية من الحرارة نوعاً ما + وأخيراً تركيب الليتات لين وصلوا

عندي فكرة بعد بانفذها بعدين وهي إضافة مرشات رذاذ أو ضباب معلق في الديكور الخشبي فوق أشجار الياسمين للتبريد وقت الصيف وإحتمال زراعة إضافية في أطراف الدوار أفضل الإصيصات لسهولة التحكم في التربة وتغييرها ولين برد الوقت بتكون زهور موسمية

اشدعوه بيبي بلو :happy: هاي حفلة بيبي ..
كان خليته خشب اسود او ابيض عشان لما يتسلق عليه الياسمين بيطلع احلى ..
وبعدين حاط البونسيانا في النص !! عقب كم سنة بتطيرك انت وبلكونتك الكجره :strong

اقتباس:

---

المشاركة الأصلية كتبت بواسطة sara jsm

اشدعوه بيبي بلو :happy: هاي حفلة بيبي ..
كان خليته خشب اسود او ابيض عشان لما يتسلق عليه الياسمين بيطلع احلى ..
وبعدين حاط البونسيانا في النص !! عقب كم سنة بتطيرك انت وبلكونتك الكجره :strong

---

إنتي محترة اني عندي دوار وحديقة لو تلفين الخور ستي كلها ما بتحصلين مثل هالدوار

اقتباس:

---

المشاركة الأصلية كتبت بواسطة معماري قطري

إنتي محترة اني عندي دوار وحديقة لو تلفين الخور ستي كلها ما بتحصلين مثل هالدوار

---

ههههههه الخور كله مطاب
ومش بس الخور،، يقول لك :
من الخور للخيران ما شي مثل ساره
خبيرة تشوف الزرع والفال و الميرة

* الخيران هذي بالكويت فور يور انفورميشن يا بو عبدالله و أوعى حضرتك تزعل بنتنا ساره قاسم

اقتباس:

---

المشاركة الأصلية كتبت بواسطة سالم الزهران

ههههههه الخور كله مطاب
ومش بس الخور،، يقول لك :
من الخور للخيران ما شي مثل ساره
خبيرة تشوف الزرع والفال و الميرة

* الخيران هذي بالكويت فور يور انفورميشن يا بو عبدالله و أوعى حضرتك تزعل بنتنا ساره قاسم

---

سارة عيارة كبيرة لو صج هشكل زوجها مسكين الله يعينه .. والدوار وتعديله الأخير يا اخوي ريحني وايد استويت احب اوقف شوي في الحوش والمهم رضاك انت المستخدم وقناعتك ورضا أهل بيتك واللي يزورونه .. باقي بكرة بعد بيمرون بنكمل بعض الشغلات

هاهاهاها يالكوميدي انت وياه :anger3:

:

يالله راونا النتيجة النهائية للحضانة اووه اقصد الدوار :eek2:

اقتباس:

---

المشاركة الأصلية كتبت بواسطة sara jsm

هاهاهاها يالكوميدي انت وياه :anger3:

:

يالله راونا النتيجة النهائية للحضانة اووه اقصد الدوار :eek2:

---

عاد تصدقين كاشفتني .. انا صج مفتقد هالمرحلة أصلاً دخلوني أول ابتدائي مدرسة عين خالد .. كان فيها من أول لين 5 ابتدائي السادس مفقود .. وكان عمري 5 سنين وقتها وكان في المدرسة صفين بس صف حق 5 فيه ناس منتهية صلاحيتهم بعضهم يمكن 30 في العمر .. والصف الثاني فيه 4 صفوف كراسي أول في طرف وثاني جنبه و ثالث جنبه ورابع جنبه .. التركيبة السكانية كلش ما فيها تجانس يومها طلعت الثامن على الصف لأن فيه بس 8 طلاب وكانت عندي دويرات حمر في كل المواد

هذا يفسر حنيني للروضة المرحلة اللي افتقدتها ,, سارة بنت جاسم والا سين جيم أحسن شرايج أرفع قضية على الحكومة أطالب بتعويض؟

إهداء للشيخة سارة بنت جاسم

https://www.youtube.com/watch?v=HQKROhu9lR8

ياسلام ابدعت بوعبدالله المفروض تحط الخلفيه اغنيه تناتيف :strong
المكان فرق عن قبل ودايما التغيرات الصغيرة تاثر في نفسيه الانسان الله يهنيكم ..
يالله باقي تعلق النفافيخ وتجيب كيكة عيدالميلاد :happy:

اقتباس:

---

المشاركة الأصلية كتبت بواسطة sara jsm

ياسلام ابدعت بوعبدالله المفروض تحط الخلفيه اغنيه تناتيف :strong
المكان فرق عن قبل ودايما التغيرات الصغيرة تاثر في نفسيه الانسان الله يهنيكم ..
يالله باقي تعلق النفافيخ وتجيب كيكة عيدالميلاد :happy:

---

والله فكرة يا ام جاسم بس وين نقاتي ينفخ البلالين زكية زكريا الله يرحمها توفت

باقي شوية تناتيف بعد تكتمل شوي شوي للحين يشتغلون في البلاط واليوم ركبوا شوية ليتات وباقي غير