مدير مشروع او Project Manager

السلام عليكم ورحمة الله وبركاته
من الأخطاء اللي طحت فيها في مشروع بيتي اني ماوقعت عقد متكامل وبتسليم مفتاح مع مقاول جيد ومعروف و بمواصفات وبنود مفصلة واضحه في العقد وفي مده زمنيه محدده واشراف قوي من شركة استشارات هندسية معروفه.
طبعا يقولون اوفر لك تتفق مع مقاول عظم وبعدها تشطب بيتك على مزاجك وتتفق وتتعاقد مع شركات عزل وكهربا وسباكه ومصاعد وجبس وسيراميك ورخام وابواب ونوافذ وحديد درابزين وحجر وقبب زجاجيه وتكييف مركزي كل ن على حده وتنسق انت ما بينهم وراح توفر فلوسك....
طلع هذا الكلام غير صحيح البته للأسف (طبعا يتثنى من ذلك الفلل الصغيره والبسيطه) وراح تدخل في دوامة عدم الألتزام منهم كلهم ورمي الأتهامات في مابينهم ومشاكل وتعطيل وفرق سعر والكل بيتم ينهش وماراح تخلص هذا اذا استمريت معاهم كلهم وممكن تطرد كذا شركة وبترجع تدور حد يكمل شغل الأولي وصعب تلقى من يقبل يكمل شغل غيره.
وبالتالي النفس ماراح تطيق هذا كله وسنين عمرك بتمر بسرعه وبتضيع في دوامة الغش والطمع وعدم الألتزام والحق ضايع للأسف
الان بعد ماطاح الفاس في الراس
هل يوجد مدير مشروع جيد وحازم وخايف الله وملتزم وقوي وفاهم يلمهم كلهم وينقذ الوضع ويسلمك مفاتيح بيتك والقصد هنا ليس اشراف فقط وانما متابعه ومحاسبه يوميه مع وضع جدول وتنسيق مع جميع الأطراف وتواصل على مدار الساعه دون تهاون
ودمتم بود

الله يعينك ويوفقك

صج هذا طريق دوامات وأذية

أما إنك تبني عظم بشركة متوسطة توفر عليك شوي وتاخذ راحتك حتى أثناء بناء العظم بالبحث عن متخصصين جيدين يكملون الباقي وكله تحت إشراف هندسي جيد وتنسيق أو تخلي غالب التشطيب على مقاول معين سواء اللي بيبني العظم ويستحسن تخلي اتفاقك مبدئي لبناء العظم وثانوي لبناء باقي التشطيبات مع المقاول نفسه حتى يجتهد في انهاء العقد الأول بطريقة صحيحة وبعدين باقي اختياراتك من التشطيبات حتى لو بيسوونها مقاولين ثانين شرط التنسيق مع الاساسي ضروري ولازم ينكتب في العقد ويتحدد وشو يوفر للمقاولين الثانيين

ضروري بتاخذ الأبواب من مقاول مختص نجارة أو يو بي في سي والنوافذ كذلك وممكن تبغي الارضيات رخام أو باركيه وتبغي المقاول الأساسي يسوي عمل محدد للأرضيات ويحمي أرضيات المقاول المختص .. نفس الشيء للجبس لأن الأساسي بيمدد الكهرباء وبيركب الليتات

نصيحتك واضحة وكذلك نصيحتي للكل

نجي ألحين لمدير المشروع وقليلين يرضون بهذي الشغلة لأنها متعبة وتاخذ كل وقتهم وبعدين مردودها ضعيف .. أعرف هندي كان معانا مهندس معماري وطلع اشتغل 7 سنين في المكتب الخاص وطلع اشتغل في اسباير مؤقت وألحين متفرغ بس كلمني وأرسلته لواحد يبغيه يشرف على مباني عدة .. هو مقاول ومستثمر يشتغل لنفسه بس عرض عليه 3000 ريال وهو طالب أقل شيء 15000 ألحين رجع كلمه يبغيه .. مثل هذا تحصله عند المقاول الجيد مدير مشروع وتحته يشتغلون فورمنية هو يوجههم ويزور المواقع قليل بس هو الأهم بعد مدير الشركة .. على أيام رواتبنا 13000 كان واحد باكستاني في مدماك ياخذ 20000 بس كان القلب النابض لموقع بناء كبير

نصيحتي اسأل المقاولين ممكن حد يعطيك واحد إعارة بس الله يعينك الرواتب تغيرت والتكاليف زادت على الكل وللأسف القوانين رخوة وضد اللي يبني أوقات يدفع ويدفع ولا ياخذ الا القليل والمحاكم ما يهمها الوقت

بارسل لك لستة مهندسين ومقاولين تقدر تسألهم وتطلبهم شيء محدد .. لي رفيج يمكن تعرفه يبني بيت خرافي الله يوفقه وهو المقاول يقول كل يوم من بعد صلاة الظهر لين صلاة العصر دوام في الموقع .. هو مقاول وقطري وخدوم بنى سكن عمال ثلاث أدوار وتعب وايد مع عماله وشركته وقلص كثير منهم ألحين متفرغ لبيته بس .. باستئذنه تتصل فيه وتتفاهم معاه وحتى تمر تشوف بنيانه انا يطرش لي صور وفيديوهات واوعده بامر بس ما اتجرأ اطلع في هذا الحر حتى مشاوير الصبح قد ما اقدر اخليها الليل

وعليكم السلام ..

اخوي ثامر كلنا وقعنا في نفس الفخ ..
يزينون لك السالفه انه ارخص وعلى ذوقك تكمل كل شي ..
واخر شي تهلك هلاك بسبه الخلافات اللي تصير بين الشركات ..

ان شاءالله بتحصل اللي يكملك باقي الشغل من اللي بيطرشهم لك معماري ..
واختار بعنايه ووضوح وعقود رسميه بينك وبينهم عشان تنجز ..
الله يوفقك ..

مشكور اخوي الكبير بوعبدالله وجزاك الله خير وانت مايحتاي راعي فزعات
الحمدلله على كل حال ومثل ماعلمتك بديت وصلحت في البيت بعد صدور حكم الأستئناف النهائي وتعاقدت مع تكييف السنترال وصممت البيت تصميم داخلي وجاري التنفيذ وايضا الكهربا والسباكه والمصعد وكاميرات وانترنت واشيا ثانيه كثيره ولله الحمد واتمنى القى مهندس يباشرهم وينسق مابينهم ويعلمني بأي شي غلط يشوفه علشان اخلص واسكن عيالي بعد صبر ومعاناه 8 سنين

مشكورة اختي ام جاسم بارك الله فيج
والله يسمع منج

العفو الله يسلمك وييسر أُمورك

بالامس تشرفت بزيارة ولقاء الاخ والعضو ثامر

ونعم الرجال والا هو قصور في باقي الاعضاء

وندعو له بأن الله يوفقه في بنيانه

شيء أكيد والله يوفق الجميع

انا عرفته بالتلفون وهو من أهل قطر الخيرين .. الله ينجينا من تعب البنيان وخسايره وينجي الجميع

بو سعود شوف لنا فلم زين في السينما وهالمرة العزيمة علي لكن عليك تحديد الفلم والموقع وفيلاجيو في الليل مبدئياً مناسب لتوديني فلم Pg13 بس

بخصوص التكييف بديت اقتنع أكثر بالنوعية الجديدة في آر في شفته في شاليه في جزيرة ميكونوس حاطينه على الأرض في غرفة مسكرة بباب أعتقد بفتحات تهوئة وباحط له صور إن شاء الله .. دائري كأنه برميل وطالعة منه بايبات كثيرة وماركة دايكن بس صوته همس كان سبلت في غرفتنا اثنين واحد فوق مثبت على الأرض بس حاطينه جنب المغسلة كنت افرش الفوطة فوقه حتى ما يصلخ وجهي البرد

الثاني يبرد الصالة تحت سبلت عادي .. هذي المكاين قوية وصيانتها سهلة بعضها تجي بعدة كمبريسرات يشتغل واحد ويريح الثاني ولو تعطل جزء تبقى شغالة وانا خطتي احط التكييف تحت الارض في البيسمنت الخدمي والمهوى يعني بيناسب هذا النوع بدون مشاكل ان شاء الله

التمديد باخليه من خلال بايبات عريضة 10 سم أو ممكن حتى 15 سم وبعدين غرف بتكون دكت سبلت وغرف سبلت عادي وأعتقد ممكن مكينتين أو أربع ثنتين لكل قسم كفاية

بالنسبة لي ما بنيت لكن عاصرت بنيان اللي بنوا من اخواني. ويمكن الخص عدة نقاط بشكل عام ولا غني عن تعقيبات الاخوان وتوجيهاتهم السديدة.

البنيان نشاط مجهد و متعب و يحتاج له اعداد جيد و وضوح في الخطة واعصاب حديد.

يمكن بالبداية تأكدون علي العقد وطريقته وهذا مهم لدرجة اننا ما بنذكره لانه مفروغ منه.

لكن نقاط سريعة يحتاجها كل مبتدي في البنيان.

اولاََ، اختيار التصميم الجيد من ناحية الغرض والميزانيةوالالتزام به قدر الامكان.

المقاول ( سر النجاح)، ابتعد عن الطرفين.. رخيص و غالي.. خذ المعقول.

الثاني : الاستشاري يعالج بعض المشاكل ما يعالجها كلها ويمكن بسهوله يلفه المقاول يمرر أمور دون علم الاستشاري. لذلك نرجع للموضوع الاساسي وسر النجاح (المقاول وسمعته).

المقاول الزين تجده ما ياخذ فلل اكثر من طاقته.. لذلك يمكنك ان تعرف أن المقاول مشغول أو متفرغ (لك) بوسائل كثيرة.

المقاول الجيد متواجد في المواقع و ملم بالاساليب المتعارف عليها، يراقب اعمال الحفر والدك و الاعماق والاحجام ويراقب النجار والحداد لان هذيلا لو تبغي بيت من قصب يسوون لك، يغلطون واغلاطهم تكلف.

اي مقاول ما يتواجد باستمرار في الموقع هذا يعني انه اي كلام، الا في حالات نادره يكون عنده فورمنيه ممتازين.

اخيراََ البناء بالطرق الحديثة مطلوب وهدف لكن تأكد من ان العمال يعرفون يوصلون للمستوى الجيد عند تنفيذ اعمال (عزل او تمديد.. الخ).

فكم من مدعي للانجاز ولكن انجاز مشوه.

َمع هذا الى الان اعترف ان مشكلة البنيان كبيرة واشوف ان يحتاج لها توقفات فقد لاحظت ان العامل اللي تعبانين عليه مشتغل جدار بشكل ممتاز وجدار بجودة أقل.. فهل ممكن يكون هناك تأثير الأجواء او لاختيار وقت العمل علي كفاءة اليد العاملة.

الله يعين الجميع و لا الوم اي انسان يوقف مع العامل والمقاول من اول ضربة الي آخر ضربة عشان يطمئن ويعرف ان اللي في الموقع عمال ملتزمين وليسوا في سباق للاتجاه لموقع آخر ولمواطن آخر يقصون عليه

ايضاََ كلمة مبدئياََ خلنا نسوي، والين نوصل للشغلة الفلانية بنلقى حل.. هذا الكلام تمويه وفرض أمر واقع ونتيجة لا مفر منها في النهاية؟

لابد يكون عندك تصور كامل. وشكراََ

أطراف البناء إخوي سالم كثيرة وكلها عوامل مؤثرة وتأثيرها كبير

أولها المالك وقناعته واعتقاده ومقدرته

ثانيها الاستشاري والتصميم وتفاصيله المكتملة

ثالثها العقد والمواصفات

رابعها الإشراف الجيد ويجي من ضمنه متابعة المالك وهنا لازم يكون دور المكتب الهندسي المشرف هو مدير المشروع

خامس شيء يجيك المقاول ومهم يكون جيد وعنده تأمين ومرخص وشغله قانوني وحتى إحتياط تذكر في العقد إن على المقاول تخليص كل المعاملات القانونية مع الدولة وتحمل الموقع وسلامته

سادس شيء مهم هو إشراف الدولة العام والجانب القانوني وهذي الثغرة مهمة ومفقودة عندنا لذلك يزيد اللعب ومن الكل مقاول ما يسوي اللي عليه واستشاري يتابع عن بعد وشغله بس يوقع وعمالة سايبة تشتغل أي كلام

هذي العناصر المهمة

عاد نجاح البنيان وبحدود ميزانيتك هذا يعتمد على إختيارك وتوفيق رب العالمين ودوم اسئل شخص محايد وبعيد عن الشغالين حولك وتثقف ما يضرك شيء أوقات انت اللي توجه الإستشاري وتنبهه سواء للتصميم أو الإشراف

ذكرت ست عوامل مهمة يبقى عامل سابع وهو تجار البلاد واستيرادهم لجميع مواد البناء الجيدة وهنا يدخل كذلك عامل تنظيمي ورقابي مهم من الدولة لوضع مواصفات معينة لا يقل عنها أي منتج مستورد وكذلك مواصفات تركيب معينة يلتزم بها الجميع وتقع المحاسبة القوية على المخالف

للأسف بعض المحلات فيها عمال وموظفين يمكن أكثر من البضاعة واللي بيطلب شيء معين يطلعونه من عينه بالسعر العالي والانتظار فترة طويلة

اقتباس:

---

المشاركة الأصلية كتبت بواسطة معماري قطري

شيء أكيد والله يوفق الجميع

انا عرفته بالتلفون وهو من أهل قطر الخيرين .. الله ينجينا من تعب البنيان وخسايره وينجي الجميع

بو سعود شوف لنا فلم زين في السينما وهالمرة العزيمة علي لكن عليك تحديد الفلم والموقع وفيلاجيو في الليل مبدئياً مناسب لتوديني فلم Pg13 بس

---

حاضرين يابوعبدالله انت تامر بشوف لك فلم عمر 18 واطلع :thumbup:

اذا تبي فلم مش مقطع سينما اللؤلؤة من بعد الساعة 12 omen وممنوع دخول الصغار

ضحكتني يا بو سعود

قصدي فلم هادف ما احب الأكشن وأحب القصص الحقيقية أو شيء يضحك

كيفك اللؤلؤة عدي بها أيام البرد الله يعودها علينا

زين ان مشاركتي جابت مشاركتك يا معماري.. هذي امور لازم تتقيد بالكلبش قبل لا احد يتورط

اقتباس:

---

المشاركة الأصلية كتبت بواسطة سالم الزهران

زين ان مشاركتي جابت مشاركتك يا معماري.. هذي امور لازم تتقيد بالكلبش قبل لا احد يتورط

---

الحلول يا اخوي موجودة ويعرفونها المسؤولين بس ما يبون يدوشون راسهم وحابين الوضع ذيه والتوثيق المدقق للعقود والمحدد باضافة أي شيء ناقص يخدم الطرفين ويحفظ حقوقهم أداة من هذي الأدوات

الإستشاري هو مدير المشروع وممثل المالك حسب القانون بس من يحاسبه لو لعب بذيله ويا كثر اللي ذيولهم تلعب في حلال الناس

الشرف لي اخوي العزيز ومشكور على الضيافه الطيبه ومنزل مبارك ماشالله متعوب عليه والفال لنا
وحقيقه استفدت منك في المنتدى ولما جيتك وشفت كل شي على ارض الواقع ومن تجربتك فبيتك انتبهت لأمور كثيره غيرت فيها تفكيري
وطبعا الأخ معماري والأخت ساره وسعود وغيرهم فعلا خبره ماشاء الله ونتعلم منهم جزاهم الله خير و وفقهم الله

ماعليك زود اخوي الكريم
نعم تعرفت عليك من 6 سنوات وجيتك البيت وتقهويت عندك وخذتني بجولة في البيت ورويتني القبه الزجاجيه وطريقة عزلها وحمام السباحه وكذا شي ناسيهم.
وبعدها تلاحقنا لمعيذر خلف النادي ورويتك مشروع فلتي والمشاكل اللي وقفت بنياني
بوسيف بيجيني الفيلا هاليومين اذا ودك تمرنا وتشفون سير العمل وتعطونا من بعض مالديكم من خبره لايستهان بها حقيقه لاقوة الا بالله وماشاء الله

اخوي بوعبدالله
اخوك درس عدل نظام VRF or VRV وتعمقت شوي في تفاصيله وابهرني واقتنعت فيه وفكرت احول من الباكج السنترال الى الفي ار اف وقبل ما ابدا اشطب من 6 شهور
بس للأسف متأخر
الفيلا تأسست للباكج سنترال وفتحات الدكتات الكبيره موجوده من التأسيس من السطح ومحوله على كامل الأدوار وتسكيرها شغله وتكلفه ثانيه
والباكج زين بس الوحدات الخارجيه كلت كل السطح
عموما حاضر لك بأي نصيحه او معلومه اعرفها سواء من الشركات الجيده المتمرسين والخبره او من البراند المناسب والمميزات والعيوب

وبصراحه حرام ففل كبيره وفخمه تكلف ملايين نشوهها بمكيفات سبلت او دكت سبلت كونسيلد ومانركب في ار اف او سنترال
وجهة نظر مقتنع فيها من بنيت بيتي ولا غيرت فكرتي لين اليوم وانصح الكل يفكر فيها ويطبقها اثناء عمل خرايط بيت العمر

نظام الفي ار في ممكن يكون سبلت أو أي نوع ثاني ما عدا الوندو غير عن البكج واحتمال تقدر تركب عليه بكج .. بس قد ما تقدر تخلي كل غرفة مفصولة بوحدة داخلية أفضل ممكن تضيف لها غرفة الملابس ودورة المياه أو تكتفي بالتهوئة حق دورة المياه .. وإنت تختار سبلت عادي والا دكت سبلت والا نظام المعلق في السقف والا الواقف على الأرض

بس كل البيت دكت سبلت مبالغة والا كل البيت بكج بعد مبالغة والمعاناة تبدأ من تستلم شغل شركات التبريد عندنا كشرة بكل ما تعنيه الكلمة .. واحد بيته جديد ومكلف جبس وايد غالي شغل المكيف أول الأيام يجربه سوى رطوبة وخرب الجبس وسوى مشكلة كبيرة يقول الأرض تتزلق عليها من الماي ولا يدري وين جاء وشركة التكييف ما يبون يعترفون بخطأهم

اقتباس:

---

المشاركة الأصلية كتبت بواسطة Thamer_Qat

وبصراحه حرام ففل كبيره وفخمه تكلف ملايين نشوهها بمكيفات سبلت او دكت سبلت كونسيلد ومانركب في ار اف او سنترال
وجهة نظر مقتنع فيها من بنيت بيتي ولا غيرت فكرتي لين اليوم وانصح الكل يفكر فيها ويطبقها اثناء عمل خرايط بيت العمر

---

نشوهها عاد !!! :court:
انا نصيحتي كل واحد يمد رجوله على قد لحافه .. :nea:
عندنا واحد من الاعضاء تبهدل بسبه المكيفات المركزيه ويمكن صارله 13 سنه في نفس الدوامه ..
البساطه مطلوبه .. عندك استطاعه ابدع في بيتك لكن ماعندك حاول تخلص لان العمر بيخلص والشخص للحين ماخلص بيته ..

نصيحتي بشكل عام مب لك اخوي ثامر ..

اقتباس:

---

المشاركة الأصلية كتبت بواسطة sara jsm

نشوهها عاد !!! :court:
انا نصيحتي كل واحد يمد رجوله على قد لحافه .. :nea:
عندنا واحد من الاعضاء تبهدل بسبه المكيفات المركزيه ويمكن صارله 13 سنه في نفس الدوامه ..
البساطه مطلوبه .. عندك استطاعه ابدع في بيتك لكن ماعندك حاول تخلص لان العمر بيخلص والشخص للحين ماخلص بيته ..

نصيحتي بشكل عام مب لك اخوي ثامر ..

---

صحيح كلامج اختي
اتكلم عن اللي تكلف في مجالس وصالات فخمه وديكورات وتصاميم داخليه ومايبي يتكلف في تكييف يتناسب مع مستوى الشغل
وترى الكويت والرياض وبوظبي من السبعينات والثمانينات يتعاملون مع المركزي
ومره ثانيه اتكلم عن فلل مثل مستوى فللنا وان كانت فلل اهل قطر لايعلى عليها في الفخامه والمساحه

يا ليت اللي يشتغلون في المركزي وحتى الدكت سبلت على قد المسؤولية ويسوون شغل زين كان خسارة الواحد في محلها .. الدول الثانية فيها تنظيم وقوانين تطلع حق العميل عندنا الشركات والجهات المسؤولة عنها تطلع عيون المواطن بس لكن العملاء الثانيين غير لين اشتكوا شكوتهم مسموعة

اقتباس:

---

المشاركة الأصلية كتبت بواسطة معماري قطري

يا ليت اللي يشتغلون في المركزي وحتى الدكت سبلت على قد المسؤولية ويسوون شغل زين كان خسارة الواحد في محلها .. الدول الثانية فيها تنظيم وقوانين تطلع حق العميل عندنا الشركات والجهات المسؤولة عنها تطلع عيون المواطن بس لكن العملاء الثانيين غير لين اشتكوا شكوتهم مسموعة

---

فعلا وهذا الحاصل معاي ومع غيري
عارفين لقطري طيب ومحترم وبيدفع حتى لو الشغل مب مضبوط ورايح فيها ويبي الفكه ويسكن عياله بيتهم ولو اشتكى في المحاكم هو الخسران

هذا القصد من الطرح والنقاش هو تنبيه الناس وبنفس الوقت الشكوى حتى يتحركون المسؤولين عن هذي الشغلة صح .. وما يتحركون الا إذا جاهم أمر من كبار المسؤولين .. ما يصير بلادنا متأخرة هندسياً وفي القوانين اللي تخدم هذي المهنة وفيها جامعات كبيرة ما تساهم وكبار المسؤولين مهندسين وما يركزون في اصلاح القوانين

كثيرين منهم عندهم شركات خاصة وكثيرين يسعون كبار المقاولين لإرضاءهم .. غيرهم يحط رجل على رجل ويستلم بيته بدون تعب وبدون مشقة وبدون حتى يدفع