تجربتي مع مناقصات السلبيات والايجابيات ونصيحتي..
السلام عليكم ورحمة الله وبركاته
كتبت الموضوع للفايده وهذا ما اصبوا اليه.
الايجابيات..
1.. اسعارهم اقل من المعروض وهذا من تجربه وانا اعرف بعضكم يقول بيغشونك في شي ثاني لا ابدا كنت جدا دقيق ع كل شي وحاط فوق الاستشاري اللي عندي 2 غيره من وراه..
2.. كاتصميم للامانه الاخت المصريه هناك مبدعه لاكن لازم تكون معهم في كل خطوه مثلا.. وهذا اعتبره خطا منهم. قلت لهم مابي بنت هاوس قالوا لي اوكي بنسويه ع الاقل في المخطط
وع ارض الواقع بيتي نصه فوقه فيه وارنش ونصه لا
قلت للمقاول ليش قال هذا مناقصات وكانت شركه الخاطر للمقاولات ولما رجعت للمناقصات قالوا احنا تعمدنا مانحط عشان تحط في المخطط جي ار سي.
قلت لهم بس انا اللي بدفع مفروض تسون كامل وارنش يعني بصراحه في تعليقات
3.. للامانه اكثر من مره واقفوا معاي وخاصه استاذ معتز وهو سوداني كان ممتاز ومحترم حتي ظغط ع المقاول واجتمعنا مع بعض وقاله بنسحب منك بند الكهرباء والبلاستر فرد المقاول بتخربون بيتي فسامحته وليتني ما سامحته تعبني بعدين.
فيه مناقصات عقدهم قوي جدا لامانه محد رضى من المقاولين يفرض ع نفسه شروط مناقصات اتكلم من برا مناقصات الكل رفض مثلا تاخير 700 او 1000 او مثلا تقدر انت ياصاحب المشروع تسحب 20 في الميه من قيمه المشروع مثلا. المقاول حاسب علي العازل ب40 الف انا سحبت منه ورحت بنفسي لقيتها ب30الف. وفرت 1000 في مخباي وكنت بسحب منه البلاستر. وطبعا انصح تسحبون من المقاول اذا يتاخر. وهن متاخرين عن مشروعي فوق 6 شهور. والسبب قله اهتمامهم وغلط الفورمن مايتابع.
4.. بصراحه اشوفهم يخافون اكثر من مناقصات اكثر من المالك لااسف واخر شي يمشون ع كلام مناقصات وكالعاده اي مقاول يقرا كلامي راح يحط ع مناقصات وانها تستغل وهذا غير صحيح.
5.. عقد مناقصات جدا قوي. لهذا وقعت معهم.
السلبيات..
1.. استاذ محمد المهندس الكهرباء حط الاضاءات والمكيفات ع كيفه بسرعه بسرعه كل شي بسرعه ماعندهم وقت. كلمته ياشيخ مايصير قالي ماعليك المقاول قبل لا يسوي بيقولك وانت تختار. اللي صار مقاولي سوا ع المخطط وحط مكيفات يمين ويسار عشوائي وكسرت وعدلت اكثر من مره بسببت اهمال مهندس الكهرباء وايضا المقاول.
مناقصات صعب تصيدهم يالله يردون عليك بالتلفون لاكن اذا جيت لمكتبهم وطلبتهم بشكل رسمي للامانه مايقصرون وهم في صفك لا تخاف. من تجربه والله يشهد علي..
انتبه اذا جيت اول مره لمناقصات ولا توقع اي ورقه لان اذا ماعجبك العرض راح تدفع تكاليف 1 في الميه من مشروعك تخيل...
النصايح..//
اتمني من الاخوان في مناقصات يكثرون موظفينهم عشان يردون ع العملاء وقت ماتكون مشاكل. ونقول نحن في صفكم واتمنى ما يوقعون مع شركات تعبانه لان راح يخربون سمعتكم.
في النهايه..
انصحك في مناقصات.. والسبب جشع المقاولين
رغم اني اقارن ودقيق ف كل شي.. ومتابع.كل شي..
وحتى المقاول يوم توقع معاه يحط شروطه هو اللي تحميه وهذا غلط...
