البنوك والتسهيلات العقارية....(موضوع نقاش ج
بسم الله الرحمن الرحيم
آسف ياجماعة ليس من عادتي كتابة المواضيع لكن لفت انتباهي شي ممكن اكون على خطاء او على صواب...وارجوا التنويه
من فتره بسيطة تقدمت احد البنوك الوطنــــــية في الدولة بطرح خدمة تمويل بغرض الاجارة حيث ان البنك قد كان عرضه كالاتي:
35% يدفعها العميل و65% على البنك من قيمة أي عقار...وطبعا في الاتفاقية بنود
يتضمن بعضها...
- 70 % من قيمة التأجير تعود للبنك والمتبقي للعميل
- لايشترط ان يكون مقدم الطلب احد عملاء البنك
يعني لو نحسبها بلغة الارقام هي بهذي الطريقة عقار قيمتة مليون ...العميل يدفع 350 الف
والبنك يكمل 650 الف يقسط المبلغ الباقي على 20 سنة وبطريقة حسابيه معقدة
يقولك لابد ان لايقل الاجار عن 10000 آلاف ريال قطري 7000 آلاف ريال للبنك والباقي للعميل<<<طبعا المبلغ الباقي للعميل ..لان الفكره لارباح العميل اساسا<<ياعيني
ولو نضرب المده في المبلغ المدفوع...بعد 20 سنة اذا الله احيانا ..تكون قد سددت الدبل
أعتقد الكثير باستطاعتهم دفع ال35% من قيمة أي عقار لكن القليل اللي بيستحمل 20 سنة انتظار لكي يمتلك العقار او مابيقدر يسدد القسط
وطبعا مثل مانحن شايفين سوق العقار كيف ارتفع بطريقة غريبة دون حسيب او رقيب
الموضوع غريب ...وانا لحد الحين ماوصلت للغرض الرئيسي منه ...
يمكن راح تستغربون او ان الشي عادي....طبعا كل انسان وتحليله...وماكذب عليكم كثير من الاحيان ابالغ في وصف الشي ...وانشالله هالمره غير crazy
قرار من البنك المركزي بتخفيض تسهيلات القروض الشخصيه وتحجيم معدلها لدرجه
مبالغ فيها...
ياجماعه الخير...في عالم في البنوك ضرب سلفيات والسبب هالقرار..اللي ينقل من البنك لان الثاني بيعطي اكثر...وياعيني على بنك من البنوك في نفس الوقت سمع عن القرار انه راح يطبق نزل اقوى تسهيلات للقروض الشخصية في تاريخه وتاريخ الدوله
يعني اللي راتبة 8آلاف ..عادي توصل سلفته مليون وزود
خلونا نراجع الاخبار مع بعض ونحلل:
- قروض عقاره غريبه 35% وشغلات حلوه ...الكثير يقول آآخ عليها لو كانت من زمان.
- تسهيلات بنكية غريبه من بعض البنوك لجذب العملاء180ضعف الراتب وانقز.
- القرار الغريب اللي راح يطبق يوم الاحد الجاي الموافق 8/07/2007 تخفيض القروض الشخصيه الى 7 سنوات الحد الاقصى للسداد<<<يعني خراب بيوت.
وكل هالكلام ظهر في وقت واحد وفجأه ودون سابق انذار والحق ماتلحق وهيله يارمانه
اسف على التعبير لاني اشوفها من زاويه حاده جدا ...جدا
القرار اللي راح يطبق الاحد الجاي...من يقدر يقولي راح يخدم من ولا من .
من وجهة نظري لا أعتقد راح يخدم اي عميل او اي شخص على وجه التحديد
سواء كان ذوي دخل محدود او تاجر او هامور
الكل راح يتضرر من دون استثناء...وطبعا كل واحد وطبيعة وضعه الاقتصادي
خلوني اضرب مثال صحي بارز في يومنا هذا
موضوع الاجارات المرتفعة وارتفاع اسعار بيع العقارات ...الفلل والاراضي بوجه التحديد
نفرض ..العميل جنير راتبة 10000 ريال..متزوج من قريب ...طبعا ماخذ سلفة ...ولاتنسون سلفة السيارة ...نجمع من غير مانطرح ...يطلع مبلغ وقدرة....
والبنك صاحب العرض 35% من قيمة العقار بغرض التأجير موجود لكن للاسف البنك مايعطي هالسيوله للعميل والسبب المديونية السابقة وعلى طول راح يضطر انه يطلع من البنك ويتجه الى هالبنك صاحب 180 ضعف الراتب....وبما ان البنك الاول لم يشترط انك تكون عميل عنده...بكل بساطة راح تمتلك عقار بهالطريقة ... وحتمال كبير انك ماتأجره على شخص غريب ...بالعكس راح تسكن فيه وتسدد القيمة الباقية عليك بطريقة ما ام بأخرى...اعتقد ان كلامي لحد الحين مقنع....ولو نفرض ان صاحب هالفكره عنده مدخول ثاني....احلى واحلى...راح تتقلص مدة السداد ...ويملك العقار في فترة زمنية قياسية .... وبأقل الفوايد....(ياسلام ...كلامك منطجي ياأستاذ )...
لكن ...آآآآآآآآآآآآه هذا القرار الصادر من البنك المركزي هو اجحاف للوضع الراهن...بل زاد الطين بله ... وجعل الناس يتهافتون على النقل من البنوك...والغرض هالنوع من الصفقات
ولكن للاسف ليس لها تخطيط مسبق...
والسبب هي العجالة....وعدم كفاية الوقت
كثير من المواطنين ساكنين على الاجار....ويدفعون مبالغ رهيبة للمؤجر تفوق رواتبهم
وانا متأكد لو كانت هالسيوله موجوده من دون القرار....كنا بنشوف تعاون في الاسرة...والفكرة...ادفع شهريا على عقاري...ولا اتكدر آخر الشهر يوم اتذكر وقت سداد الاجار المستحق علي وفي شي ماأملكه وخسارة من جيبي...؟ّ!!؟ّ
:con2: ارجوا امعان النظر في الموضوع :con2:
آخر خبر
قبل يومين في احد البنوك...دخلت عجوز ملامح الكبر واضحه في يديها...تترجى تخليص معامله
سلفة شخصية لابنها العامل حديثا في احد المؤسسات الحكومية حيث انه متدرب
ولايستطيع ان يأتي الى البنك لانه يعمل في المناطق الجنوبية 77 كيلوا تقريبا...ومتدرب يعني
استريح مكانك لو طلعت ..راح نكتب انك مهمل ولا تصلح للعمل
اسمعها تقول...ياجماعة الخير خلصو الولد لاتطيحون حظه نبي نزوجه قبل القرار
اقسم بالله ان شعر جنبي وقف...والله العظيم كنت مستغرب من هالرد
ماهو وجه الترابط بين الزواج والقرار ....!؟
والحمد لله جزاهم الله خير الاخوان....في البنك...وخلصوا العجوز...الله يبارك فيها
ويعطيها الصحه والعافية....طبعا بعد مادخلت على مدراء ورئساء اقسام
<<<<<<<<<<<للعلم صاحب الموضوع...كان متواجد لمدة ساعتين عشان يخلص معاملة
بسيطة ماتاخذ دقايق لكن الضغط من العملاء...يخليك تنتظر...وللاسف تسمع الطراطيش
ــــــــــــــــــــــــــــــــــــــــــــــــــ ـــــــ
انشالله تكون الفكرة وصلت
وانشالله ماكون ملغت او طولت عليكم
اترك الموضوع لكم....وانشالله الكل يستفيد
وتقبلوا تحياتي
