النمسا وسويسرا

السلام عليكم ورحمة الله وبركاته

ممكن تساعدوني بمخطط رحلة لشخصين بين سويسرا والنمسا
وين تنصحوني تكون منطقة الوصول والمغادرة المناطق الي تستحق الزيارة
التنقل بين المدن راح يكون بالسيارة بس وين ممكن الاقي الاحداثيات اذا ممكن
بالنسبة للمدن انا زرت فيينا من قبل فحابه اغير وين تنصحوني بمدينه غيرها
اكثر شي احنا مركزين على الطبيعه فشرايكم بين زيلامسي وانتر لاكن واذا زرتها كلهم كم المسافه بالسيارة بينهم
ولكن بعد نبي مدينة حلوة

ارجوكم ساعدوني بجدول حلو بالمدن من وين ابتدي ومن اي منطقه استاجر السياره والمغادره والمسافه بين المدن كم ساعه

عليكم السلام و رحمة الله و بركاته

أتمنى لك التوفيق.

دام زرت فيينا وحاب تغير، وتبي تزور النمسا وسويسرا وخصوصًا الأرياف.، فيا انكم تنزلون في ميونيخ اذا وجهتكم الأولى النمسا أو تنزلون في زيورخ أو جنيف اذا وجهتكم الأولى سويسرا

بالنسبة للمقارنة بين زيلامسي وانترلاكن كلهم حلوين وطبيعتهم متميزة وكل وحدة تغني عن الثانية بس دام بتزورون البلدين فرصة تمروا المنطقتين. بينهم 5 ساعات تقريبا وفي مدن حلوة وقرى وإرياف بينهم تنفع للتوقف أو للمبيت والراحة.

إذا ممكن تقول كم مدة الرحلة بالضبط (يوم الإقلاع ويوم العودة ) والباقي بسعادة فيه ومقدور عليه أن شاء الله

بالتوفيق

وعليكم السلام ورحمه الله وبركاته

ياهلا ومرحبا فيج اختي

لا ابد مابه ازعاج الله يسلمج

لو تخلونها اسبوعين افضل عشان يطلع لكم جدول نرتب ومرتاح
ولاتضغطون نفسكم بتنقلات بفترات قريبه من بعض

الجدول المبدئ اختي

اذا عندكم اطفال خبريني !!!!

الوصول زيوريخ ( سويسرا )
الذهاب الى انتر لاكن ( سويسرا )
والذهاب الى بيرتساو ( النمسا )
والذهاب الى زيلامسي ( النمسا )
والذهاب الى ميونخ ( المانيا )
ميونخ هي طريق العوده للدوحه

اذا معك اطفال بغير مكان الوصول
بدل زيوريخ بخلي الوصول يكون في شتوتغارت الالمانيه وقريبه من الحدود السويسريه للذهاب الى اوروبارك
تبعد اوروبا بارك عن زيوريخ 45 دقيقه فقط

خارطه المخطط


http://up.arabseyes.com/uploads2013/...3579631561.png العاب

بدون أطفال

الرحلة راح تكون بشهر ظ© ان شاءالله مدتها من ظ،ظ* ايام لين أسبوعين

شهر 8 من 10 ايام لين اسبوعين

ما قصر الاخ غير البشر وهو مبدع في هالمجال ما شاء الله
بس حبيت اكتب وجهة نظري وبعض الاقتراحات اذا بتفيدج، ويمكن تخلي الصورة تتضح اكثر بالنسبة لتوزيع الايام
اولا: انتي رايحة للريف فقط حسب اللي افهمه من كلامج، او ودج الزيارة تتخلها مدن رئيسية كبيرة للاقامة او للتسوق على شاكلة فيينا مثل زيوريخ او جنيف او زيوريخ، طبعا انا ما اقصد المدن الصغيرة او القرى مثل فرايبورغ او لوسيرن او ارياف انترلاكن نفسها او زيلامسي وما حولها. انا اقصد المدن الكبيرة هل هي ضمن جدولدج ومهم زيارتها او لا
ثانيا": انتي سألتي عن زيلامسي وانترلاكن، وقلت لك كلهم حلويين كطبيعة ومناظر وجو وطبعا الاذواق تختلف في ناس يفضلون مكان عن مكان، لكن اعتقد الاغلب يتفق انهم يتشابهون بنسبة كبيرة في موضوع الفعاليات والانشطة هناك. يعني اللي بتسوينه في زيلامسي غالبا" بتسوينه في انترلاكن والعكس صحيح. فهالشي حبيت انك تكونين عارفته. لان بعض الناس يصيدهم تشبع من تكرار التجربة او يفضب يستغل اجازته في مكان مغاير.
ثالثا": هل جربتوا السواقة في اوروبا؟ وهي سهلة ومريحة عموما". لو نعم جربتوها، كم تشوفين اقصى مسافة تقدرون تتنقلون منها بين مدينة ومدينة. يعني بعض الناس يشوف 3 ساعات (وهاي غالبا" اقل فترة) وقت كبير والبعض عادي يسوق 5 ساعات ويمكن اكثر. طبعا" الحين نتكلم عن التنقل البعيد من فندق لفندق اخر او من مدينة لمدينة اخرى مب عن المزارات اليومية حول مكان الاقامة.
البرنامج الرئيسي المقترح مني (ولا يهون مشرفنا غير البشر اللي برنامجه مميز كالعادة)
(طبعا" اذا بس تبون ارياف بدون مدن رئيسية كبرى)
مطار زيوريخ
5 ايام في انترلاكن (سواء السكن فيها او في احد اريافها)
5 ايام في زيلامسي (سواء السكن فيها او في احد اريافها)
مطار ميونيخ
والبرنامج عليه ملاحظات انتي تقررينها حسب رغبتك وهي:
1- الافضل ان يوم الذهاب والعودة مب محسوبين من ضمن الجدول
2- هل بتسوقون السيارة من انترلاكن لين زيلامسي؟ هي حوالي 6 ساعات لو سكنتوا في احداهم واقل شوي لو سكنتوا في الضواحي، او تبون يوم توقف وراحة ( بيرتاسو نفس ما تفضل المشرف او بريقنز حسب رأيي)
3- وضع زيوريخ مكان وصول و ميونيخ مكان عودة هو يعتمد عليكم، غالبا" الناس يفضلون هالشي لانهم يتسوقون من ميونيخ لان الاسعار اقل في المانيا من النمسا وفي مزارات وفعاليات في ميونيخ اكثر وامتع. وايضا" الافضل تقارنين سعر التذكرة هل في فرق كبير بينهم او لا. واغلب الناس يقعدون يومين للتسوق في المدينة نفسها.
4- بخصوص السيارة في شركات كثيرة والافضل تستلمون السيارة من المطار لو سكنكم في الريف، مع انه اعلى نسبيا" بحوالي 10 بالميه
5- هاي اماكن رئيسية وطبعا حواليها ارياف وفعاليات وقمم جبال وبحيرات كثيرة ومتنوعة وزحليقيات صيفية والعاب انتي تساعدين في تحديدها بتوضيح ميولكم ورغبتهم

وعفوا على الإطالة

انا رحت لها قبل رمضـان .. كان الجوو رائع

نزلت في ميونـخ خذت سيارة من المطار كنت حاجزها .. استلمتها وانطلقت وكانت الوجهه ( كابرون وزيلامسـي ) .. ممتع الطريق من ميونخ للنمسـا
جلست 5 ايام في كابرون وزيلامسـي .. والناس تمدح سالزبورغ بس ما رحت لها

الزبدة النمسـا ( كابرون وزيلامسي ) قريب من بعض .. والطبيعـة والاماكن اللي تستاهل الزيارة كثيـرة .. راح تستمتعون

وبعدها لـ أنترلاكن .. كانت المسافة بالسيارة حدود 5 ساعات بس ممتعـه جدا .. لاحظت فرق السعر بين النمسـا وسويسـرا وخاصة في انترلاكن احس استغـلال .. الفرق وصل للدبـل .. سواء فالمطاعـم .. الاماكن السياحيـة (رسوم الدخول) .. السكـن ... راح تحسون بالفرق

بس من رائيي الذهاب لانترلكن بعد النمسـا تكرار للجدول تقريبـا نفس الاشياء هنا هناك

شوفوا مكـان آخر يستحق الزيارة ونفس مسافة انترلكن وروحوا له

وبس أي استفسـار حاضرين .. وترى ( غيــر البشــر ) هو الخبـره ما يقصـر ابد

ممكن تقترح مدينه حلوه تستحق الزياره بدال انترلاكن تكون مثل لندن مطاعم وتسوق

بدال انترلاكن يعني تفضلين زيلامسي، أقرب مدينة كبيرة مثل لندن هي ميونيخ.

إذا فضلتي انترلاكن على زيلامسي فاقرب مدينة هي زيوريخ او جنيف او تشدون حيلكم وتوصلون باريس

عفوا اختي عشان تتضح الصورة لك وتبين تختارين إحدى المنطقتين يا زيلامسي أو انترلاكن، فيا أنكم تزورون زيلامسي النمسا مع ميونيخ أو تزورون انترلاكن سويسرا مع زيوريخ او باريس

كلام الدحيــل مضبوط .. لانه المسألة متعلقة بالمسافة .. وأقرب مكان لك مثلا للنمســا ( كابرون وزيلامسي ) أقرب لهن ألمانيـا (ميونخ) حق تسوق ومطاعم و روحوا قارمش يمدحونها طبيعه قريبة من ميونـخ

أو إذا قررتوا سويسرا ( أنترلكن ) فشوفوا مثل زيورخ في سويسرا - باريس في فرنسـا - ميلان في إيطاليا .. أعتقد قريبه مب بعيده وايد

ختي بالإضافة للي فوق:

زيلامسي وانترلاكن وما حواليهما: طبيعة خلابة، بحيرات متنوعة، قمم جبال، وديان، فعاليات، زحليقات صيفية كثيييرة والعاب بسيطة، تلفريك.

باريس: مدينة معروفة، موضة، مزارات متنوعة، برج ايفل، متحف اللوفر، ديزني لاند ، اكوريوم، أوت لت، أسواق كثيرة. أغلى نسبيا'' من ميونيخ في السكن بكثير والحياة عموما''. أقرب لسويسرا لكن حوالي 5 ساعات تنقل من انترلاكن.

ميونيخ: مدينة عصرية، مباني اثرية، متاحف، اسواق، اكوريوم، أوت لت مميز، ملعب رياضي مميز، مدينة العاب قريبة . أرخص من باريس طبعا . أقرب للنمسا حوالي ساعتين من زيلامسي

سوال اذا كانت الرحلة راح تكون شهر عشره فهل الرحلة مناسبة فهالوقت من السنه

حسب رأيي مناسبة لو:

ما تهمكم عروض الصيف التسويقية.
بعض الألعاب (خصوصا الزحليقات الصيفية والتلفريك) أما تسكر أو توقف موقتا بسبب فرصة سقوط الأمطار
النهار في الصيف أطول وهاي أفضل للفعاليات، بس بعد شهر 10 يكون الليل والنهار تقريبا متعادلين.
الأسعار شهر 10 أقل بكثيييير والزحمة أقل والسياحة عموما اريح خصوصا لو حجزتوا بدري

درجة الحرارة في اوروبا شهر 10 تكون بين 16 و 10 تزيد أو تنقص حسب مكانكم بس الأغلب هذا المعدل
أمطار متفرقة، ما في ثلج

كتجربة ورأي، مناسبة

اقتباس:

---

المشاركة الأصلية كتبت بواسطة الدحيل 16

حسب رأيي مناسبة لو:

ما تهمكم عروض الصيف التسويقية.
بعض الألعاب (خصوصا الزحليقات الصيفية والتلفريك) أما تسكر أو توقف موقتا بسبب فرصة سقوط الأمطار
النهار في الصيف أطول وهاي أفضل للفعاليات، بس بعد شهر 10 يكون الليل والنهار تقريبا متعادلين.
الأسعار شهر 10 أقل بكثيييير والزحمة أقل والسياحة عموما اريح خصوصا لو حجزتوا بدري

درجة الحرارة في اوروبا شهر 10 تكون بين 16 و 10 تزيد أو تنقص حسب مكانكم بس الأغلب هذا المعدل
أمطار متفرقة، ما في ثلج

كتجربة ورأي، مناسبة

---

وشلون الاسعار في شهر 9؟

الأسعار تقل تدريجيا في أوروبا من نص 9 تقريبا وطالع.