المشاركة الأصلية كتبت بواسطة معماري قطري
عليكم السلام ورحمة الله وبركاته
الله يوفقك المقاولات تحتاج حركة ودراية ومشاوير وتخليص معاملات أول بأول ومقابلة ناس في يدهم القانون والرد السديد .. هنا ممكن الإفادة تكون حسب المجرب والمعروف
أقدر أفيدك في إن تكلفة الحديد تختلف حسب القطر بعضهم يجي الطن منه أغلى من الأقطار الضعيفة بس ناسي كم وصلت .. لكن تقدر تستفسر عن الشركة اللي تعمل الحديد جاهز للتركيب وتحنيه وتربطه وتنقله للموقع .. هذي تنفعك في سرعة التركيب وفي حساب كمية الحديد لو عندك الخرايط وتكلفتها
تكلفة المتر المكعب خرسانة من 270 الى 300 ريال حسب قوته والردي مكس اللي يسويه
أغلب اللي يسعرون بالمتر المربع من المقاولين يفشلون ويخسرون لأن المواصفات تحكمهم والكميات كذلك تختلف من تصميم لتصميم .. لازم يكون عندك حاسب كميات مختص يسوي لك حسابات دقيقة ويجيب لك تكلفة كل شيء من السوق ويحط نسبة الربح المتوقعة .. واللي يقول لك اسوي حساب كميات جربه في مسئلة بسيطة وشوف كيف يضيع فيها .. حساب الكميات تخصص وشهادة وخبرة في السوق المحلي والعالمي لبعض الشركات الكبيرة
بالنسبة للقطرية أكيد تقدر تفتح باسمها وللخليجي اتوقع مجال التجارة مفتوح بضوابط معينة وحسب الشراكة وعادي تشترك مع زوجتك هي 51 وانت 49% حتى لو على الورق .. لكن انتبه العمالة لازم على كفالتك ومشددين من هالناحية والحصول على أرض للمستودع وسكن للعمال في الغالب بتضطر تأجر لفترة يعلمها الله
للمقاولات صعب تحسب ربحك بأنه 20% أو حتى 50% بيغطي كل مصاريفك الجارية من رواتب وأُمور ادارية وإيجارات وشراء مواد وشغل فعلي في الموقع أوقات يطول وأوقات العميل يتأخر في الدفع
لي صديق متمرس معماري قديم في قطر وقبل في السعودية في قطر له حول 30 سنة واشتغل منها 7 سنين في المكتب الخاص وحول سنة في اسباير وفتح شركة وفشل فشل كبير مسكين .. هو هندي ومتحرك ويتكلم كم لغة وعنده دراية وخلفية هندسية كبيرة .. في النهاية جاني يبيني اكفل شركته واشاركه ورفضت لأنه كان مغطي عليه واحد قطري ياخذ منه نسبة بسيطة وهو يسوي الشغل والقطري بعد القوانين الجديدة تهرب من المسؤولية
بتشوف كثيرين يبون شريك وكفيل بس العملية تحتاج تفرغ ومتابعة دائمة ومن ناحية ثانية السوق فيه المنافسة قوية والناس تروح للغالي المضمون وتبتعد عن الرخيص واللي توه مبتديء
