ليش يصورون لنا ان فرحة العيد قبل 20 سنة احسن من الحين؟
السلام عليكم
بكل بساطة واختصار ليش دايم يصورون لنا في التلفزيون ان العيد وفرحت العيد كانت اجمل قبل 15 سنة او 20 سنة واكثر؟ ودايم يطلعون لنا فديوات قديمة وصور الفلوس القديمة وحتى لو كان تصوير جديد لازم الوضع يطلع احسن قبل 15 و20 سنة؟
وصل التاثير انة كل ما قرب العيد اسمع الناس والعالم يقللون من فرحة العيد ويقولون قبل 15 و20 سنة احلى
وتاثر بكلامهم الصغار وكانهم فاتهم شي ومالحقوا علية. واذا جا يوم العيد كثير من الي اسمعهم في هذا اليوم يتكلمون عن ان العيد قبل احلى.
وبرامج التواصل الاجتماعي اغلب الصور فيها عن مظاهر العيد في السابق.
ليش يعني يصورون ان العيد في وقتنا الحالي مالة فرحة ولا طعم الله يجزاهم خير. يعني مانفرح بالعيد واذا جا نهار العيد نقعد نظرب كرك ونتذكر ايام العيد يوم كنا صغار؟ وليش ما يطلعون لنا في التلفزيون والعالم الي في تويتر وانستقرام ويحطون لنا
(ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ)
اذا كانوا الاشخاص الي في التلفزيون الي يسوون هذي البرامج قاعدين يتوجدون على ايامهم ذيك السنين ويطلعونها لنا على شكل برامج فالافظل انه يحتفظون بها لأنفسهم.
اختم كلامي واتمنى انكم تفرحون بالعيد ولا ياثر عليكم الي يقلل من قيمةالعيد. العيد شعيرة من شعائر الله واكبر من الفرح والوناسة والعيد مش عادة اجتماعية ولكن من الشرع والمناسك (وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ)
وعليكم السلام ورحمة الله وبركاته
مرحبا اخوي ،
الفرحه موجوده ومافي أي تقليل منها ، ( تفرق من محيط لمحيط ) ، لكن العيد في السابق كان بكامل "حلاوته" ، حاليا شوف عينك :
- الأغلبيه تسافر وقت العيد .
- الأنشغال بالتجهيز والتحضير بشكل مبالغ جدا ، ونهار العيد ZzZz . ( شالفايده؟ )
- الزيارات صارت ( سكيتي ) كل واحد لاهي بجوالة ، فنجال وبياله وعيدكم مبارك ، لا علوم ولا سوالف .
واذا تبي الزبده :
البساطه بح بح .
