عرض للطباعة
السلام عليكم ورحمة الله ومساكم الله بالخير.
بغيت اسالكم عن نظام الصرف تكرمون وش الافضل.
انا حصلت النظام التقليدي اللي بيارات فالحوش.
ونظام انا اول مره اسمع عنه وهو بدون بيارات تكرمون.
يعني بيبات دايركت مع فالف مايسمح للما يرجع وبدون صبيات وطابوق.
فايدته انه ما يخلي مكان للصراصير تعشش وتبيض.
يا ريت تنصحوني واللي جرب هالنظام ووش علومه من سلبيات وايجابيات.
واللي بيسالني عن رايي؟ اللي بيفكني في الحشرات باسويه. لكن متخوف حبتين
والسلام عليكم ورحمة الله وبركاته.
عليكم السلام ورحمة الله وبركاته
ما فيه شيء يدعو للخوف .. بعض المهندسين ماشيين على نظام واحد ولا يغيرون وبعضهم يطلعون ويحسنون .. هذا نظام نقدر نقول عنه محسن يعتمد على التوصيل المباشر مع فتحات صغيرة للتسليك لو دعت الحاجة
أكيد تحتاج مهندس مختص يسوي لك الرسومات والمواصفات وفي الغالب يكون ميكانيكي أو مدني
للداخل 4 إنش كفاية لكن انصحك اللي مدفون تسويه 6 أو 8 إنش وتركب الجزء اللي جاي على شكل حرف واي y في كم منطقة ويجي طرفه مسكر بغطاء من نفس المادة مسنن مثل البرغي تفتحه لو احتجت للفحص والتسليك .. الرداد حاول تركب نوع جيد والله يعينك وتحصل وحاول تركبه مع كل مخرج أسفل الحمام وقد ما تقدر خله ممكن ينفتح ويتبدل لو اخترب أو يتصلح
عزيز يو كي مركب وواحد من الربع ركب بس عمل منهولات احتياط لو ما نفع النظام الظاهر شكله تشتت بين عدة آراء .. يعني سوى منهولات وركب مباشر بوصلات يعني المنهولات ما يدخلها ماي بس إحتياط
هذا النظام لو انعمل صح وكانت البايبات سمك جدرانها كبير ومضمونة ما تخترب وهي في الغالب ما تخترب لأنها معتمدة على الجاذبية .. مكان دوس السيارات نحتاج نصب حولها خرسانة حتى ما تنكسر من الوزن أو ندفنها على عمق مناسب بحدود متر وأكثر
ميزته نقدر نمرره جنب الحايط أو محيط البيت ونخلي باقي المساحة للزراعة وحتى شكل أي كونكشن طالع للفحص والتسليك ما يكون منظره مزعج
صحيح قالوا لي نظام y.
اجل باشوف المقاول.
لكن الفتحه اللي تكون طالعه للحوش بلاستيك ول حديد ؟ وكم مفروض مقاسها
شوف الاستشاري قبل افضل بعدين المقاول .. المقاول شغله ينفذ والاستشاري يعطيه شروط التنفيذ ويشرف عليها
الفتحة بلاستيك واحتمال فيه معدنية حسب نوع البايب والمقاس حسب مقاس البايب والواي كونكشن فيه 4 و 6 و 8 للرئيسي لازم قطر كبير لأن يصب فيه كم قسم قطر 4 إنش