حياك الله إخوي مازن انت من المتابعين القدامى لهذي المواضيع وانا أكيد استويت مقصر في الفترة الأخيرة وقل نشاطي كثير
عرض للطباعة
آمين واياكم أجمعين
تدري يا اخوي انت ذكرت نقاط مهمة .. البيت الأمريكي مثال فيه أُسس طيبة والكل يتبعها حسب طريقة العيش والحياة عندهم .. بيوتنا كذلك لكن قبل التكييف غير وألحين غير لازم تتطور وتتغير .. عندنا ضروري واجهة البيت يكون فيها المجلس العائلي أو خل نقول المجلس الرسمي ونسوي مثل الفصل بين المجلس وباقي البيت وهذا يعتبر عامل مزعج أحياناً ويخلي بيتنا مقسوم لكن دوم للمجلس حاجته
اللي عنده مساحة خارجية يقدر يسوي مجلس خارجي شيء زين ويستوي عنده مكان استرخاء واجتماع للرجال في خصوصية وبعيدين عن بقية البيت وتبقى للمجلس الداخلي خصوصيته أو حتى ممكن للي يبي يسوي صالة عائلية تحت في مقدمة البيت وفيه مدخل جانبي يقدر يدخل منه ويروح فوق لو عند هله حريم .. بهالحالة يكون استغل مقدمة البيت للضيوف ولأهل البيت لو ما فيه ضيوف .. الانتقال الرأسي أحسن شيء درج ومصعد مدمجين في بعض حتى يكون اقتصادي وعملي أو على الأقل قريبين من بعض حتى ما يضيع مساحة محور حركة وانتقال
أوقات يجيك المالك بينتقم من وضع معين .. أعرف شخص بيته صغير والله فتح عليه واستوى من أصحاب الملايين .. قال بيبني وصمم غرفته بس كانت 8 في 12 .. أسئله شبتسوي فيها قال ابيها مفتوحة قلت وايد كبيرة وما بتريحك قال باقسمها بعدين ومبين ما عنده خطة .. شخص ثاني مصور صورة وقايل للاستشاري ابي الواجهة نفسها والاستشاري شغله يرضيه .. مسوي حتى درايش دورات المياه للأرض وتورط في توزيع القطع داخل .. في النهاية بيتك بتسكنه ما بتبرزه للناس يشوفونه تبي راحتك وبنفس الوقت تبي شراحة والنور الطبيعي هو رمز الشراحة .. ضروري تسوي دريشة بكامل الارتفاع تطل على حديقة حتى لو صغيرة خلفية بس ما اسوي هالدريشة فوق تكشف البيت للناس .. بنفس الوقت ضروري اركز على درايش كفاية ونور طبيعي وفي رايي الأهم المناور السقفية لبعض الأماكن أو كل الأماكن عدا غرف النوم والمخازن .. حتى المطبخ لو قدرنا نسوي له منور سقفي بيطلع حلو
انفتاح المساحات على بعض شيء ضروري ويعطي شراحة وبنفس الوقت يسبب اختلاط الأصوات وشوية ازعاج لو هذي الأماكن قرب غرف النوم .. يعني لازم نوزنها
البعض يصر يعمل غرفة النوم جنبها غرفة جلوس خاصة به ويسويها كبيرة وبينه وبين صالة البيت فوق جدار لو يكسره يكون يبين حق عياله وبقية الأهل .. مب ضد هذي الخلوة بس لو محتدين نسويها صغيرة وممكن يكون خيارنا مكتب مدمجة معاه جلسة صغيرة وحتى المكتب يكون ملموم وفيه مكان لتخزين فواتيرنا وملفاتنا المهمة
بعضنا يبالغ في ممر عادي وياخذ من مساحة مجلس أو غرفة ويحطها في الممر والطامة الكبرى بعض الاستشاريين يصممون ممر ما له داعي من الأساس وياخذ حيز ومرت علي أمثلة لهذي الاختيارات
بعض الأشخاص يتعب ويندوش ولا يركز ولا يهتم لموضوع بيته ولا يتابع مع استشاري أو مثل حالتي ناس يقتنعون بالتعديلات اللي اقترحها بعدين يغيرون وتستوي لخبطة تأثر على أشياء ثانية ولا حتى يرجعون لي أو يمكن للاستشاري اللي صمم لهم
في الأخير الاستشاريين بشر وبعضهم للأسف عندنا مب مهندسين كلش وبعضهم مهندس كهربة يسوي شغل معماري وبعضهم رسام شاب .. صج خطير في برامج الكمبيوتر بس 1 أو 2 من 10 في التصميم ويسمونه الباش مهندز وتحصله شاب يعني لا خبرته في الرسم ومتابعة استشاريين ومهندسين ومعماريين كبار نفعته ولا تخصصه .. وهذي المكاتب تبين من ندخلها ونشوف الطاقم اللي فيها ولازم نسال عن المعماري ومساعدينه مثل مهندس الانشاء اللي يكون مدني ومهندس الكهرباء ومهندس الميكانيك .. أعمارهم وخبرتهم وبعدين نتابع مع المكتب ونسأل عن التفاصيل المالية