وشارع النصر والمطار القديم والوكرة.
عرض للطباعة
للأسف صار هالشي مهنة ، من كم يوم واقف بسيارتي قدام البيت انتظر أمّي إلا وحدة جاتني على طول لابسة وكاشخة ومو مبين عليها الفقر وهذا أسلوب يتبعه الكثير أنه عزيز قوم ذل وإنه ولد ناس بس الدنيا لطشت فيه، وطبعاً عرفت مسبقاً إنها متسولة قبل لا توصل وقالت لي : مكسور عليّ إيجار البيت ساعدني .. وهالكلمة الكل يقولها .. ولازم تلاقي قبل لا تمر عندك أو حولها سيارة شخص ..لاني شفت هالنوعية عند مواقف المجمع الحكومي فرع الهلال ، وصوب سوق واقفوالمولات نفس النوعية والجنسية ونفس الكلام وتحصل زوجها موقف بالسيارة قريب منها ..لو تتبعتها بتحصلها تركب السيارة.
المواقف كثيرة وأنا أتكلم عن تجربة وفيها منهم من يلمّح لأمور أكثر من التسوّل ..
أحسن شي اللي عنده فلوس يوزعها بطريقته أو عن طريق ناس ثقة لضمان وصولها للمحتاجين وهذا اللي أسويه أنا .
وعليكم السلام
صدقت اخوي كثرت هالظاهره الغريبه وبطرق عديده
بس عني انا اذا احد جاني اعطيه المقسوم ويكون شي بسيط
عشان يقنع ولعاد يكررها
ومره حصل لي موقف في الخريطيات بس عورني قلبي والله:eek3:
توني بحول من السياره الا واحد يدق دريشتي وماسك بنته بيده ومعاه كيس فيه جلابيات يبيعها
قمت قلت لدريول كلمه قله يروح
وراح يدور على السيايير وبنيته في يده ومحد اشترى منه
وبيني وبينك ندمت اني ماشريت منه حتى لو ما البسها لاني قلت لو انه يطر ما كان باع ملابس
هذا دليل انه فعلا محتاج يبغي رزق حلال
والله ليومك كل ماتذكر الموقف احس بتأنيب الضمير وقلت ياليتني شريت منه الملابس واتصدق بها:eek3:
واكسب اجرين اجر اني عنته واجر الصدقه
احيانا ماندري وش ضروف الناس
والله يرزق كل مسلم برزق من عنده
،
،
المحتاج الله يعينه ويغنيه من فضله الدوله فيها الجمعيات الخيريه للمقيم المحتاج واللي عنده ضروف وهم يدرسون هالحالات اللي تجيهم .. بس السالفه ترو زادت عن حدها فيه التسول تحت غطاء الشغل مثل يجيك عامل تنظيف سياره او تنظيف الشوارع او حتى الحلاق بعضهم مب الكل وخاصه بعض محلات الحلاقه شي جديد اشوفه كم حسابك كيفك بابا يعني انت وكرمك فارد عليه اذا كيفي بحلق ابلاش وطلع .. والحالات الثانيه اللي يجيك سيده يطلب مساعده او يبيع شي وصارت معاي فالسد والريان ومعيذر واصبحت ظاهره ما كنا انشوفها قبل ابد .. ذكروني بالمتسولين فالسعوديه وشلون يعانون منهم تلقاهم فكل شارع واشاره وصراحه المنظر صار غريب علينا .. نعم انحب نساعد بس كم مره راح تساعد وتعطي لوجه الله ..الوضع منظر عام للدوله يمكن يكبر وينتشر ووضع امني ماراح تضمن هالشخص شلي راح يسويه سرقه قتل عشان يعيش ..
اللي اتمناه ولا قصور في وزارة الداخليه والجهات المختصه عند تقديم اي مواطن من دولة عربيه لرغبته في الحصول على التأشيره كالتالي :
ـ وجود اثبات محل الاقامه والتدقيق على طريقة اقامته (( ان كان فندق او وجود منزل يقيم فيه )) خلال فترة وجوده بالدوحه
ـ سبب التقدم بطلب الحصول على التأشيره او سبب رغبته في زيارة قطر
ـ توفير اثبات من بنك معتمد بأ لديه رصيد كاف للاقامه والصرف على نفسه او عائلته خلال فترة الاقامه
ـ وجود كفيل ( ضامن ) واذا وجودت مشكله يجب الرجوع للكفيل بتسليم المواطن العربي للجهات المختصه او الاعتماد على الكفيل بضمان رجوعه بعد انقضاء مدة الزيارة ولا سوف يتحمل الكفيل كافة العقوبات اللازمه ان وجدت
ـ توقيع الراغب بزيارة قطر عدم تجاوز قانون البلد مثل عند الانتهاء من فترة الزيارة الرجوع لبلده + عدم توفير مصدر دخل مادي عن طريق التسول