انا للحين عندي امل فيهم وترى في منهم المهتم وفي منهم الغير ملتزم وما نقدر نعمم .. والله يجزاهم خير على تفاعلهم وترى لو صار حادث خطير او حريق للامانه يتواجدون في وقت قياسي الله يقويهم ..
انا صارلي 3 مواقف سلبية بذكرهم بشكل مختصر ..
الاولى لقينا ناطور عندنا مضروب وسارقين منه "خمور" كان يخشها عنده .. مباشرة تحركت للمكان ومسكنا العمال واتصلنا على تسعات وبعد ساعه ونص من المكالمات الوارده لنا وكل واحد يسأل شالسالفة ؟؟ .. ما جاتني دورية واخر واحد قالي تعال قدم بلاغ .. حليت المشكلة بتسفير العمال .
الثانية رحت لملك خاص وقالولي العمال ان في عامل منخش في غرفة اللفت ومعاه بنت فلبينية .. نفس الشي اتصلت على تسعات وبعد ساعه ما جاني حد وقالولي تعال قدم بلاغ .. وهنا رحت اقدم بلاغ وكان الضابط المناوب سلبي معاي وقالي روح قدم في الامن الوقائي مالنا حق ندخل عقار !! .. اقوله العقار ملك وشقق والشخص على كفالتنا والفلبينية معاه في غرفة اللفت انا اعطيك الصلاحية الكاملة تدخل وتكسر اي باب تبي بصلحه على حسابي .. قال لا روح الامن الوقائي هم يراقبون المكان .. تحركت من عندهم واتصلي ضابط ثاني هاجري الله يجزاه خير يسأل شصار في الموضوع وقتله الي صار معاي في المركز وزعل وتضايق واعتذر مني وهو ما شاء الله عليه اتصلي كذا مره من بداية البلاغ كان مهتم ويحاول يرسلي دورية بس ما قدر ..
الثالثة كنت احاول تأجير عقار وجاني واحد مصري يبي العقار كامل بشيكات اجله الدفع بإسم شيخ وجابلي كل الاوراق الثبوتية ودفتر شيكات .... بعد ما سويت تحرياتي اكتشفت ان الشيخ الله يرحمه متوفي ... رحت بكامل الاوراق لمركز العاصمه ودخلوني على الضابط وايضاً كان سلبي معاي ويقولي شدراك ان متوفي ؟ .. وبعد نقاش يقولي لو صار بينكم شغل ونصب عليك عقب قدم شكوى !!! ..
طبعاً كل هالمواقف بين 2008 الى 2012 .. ومن عقبها ما اذكر اني اتصلت الا لبلاغات عادية مثل تلف اشاره مرور او بلاغ حريق كان جنبي بادي وما كنت طرف في الشكوى فما ادري شصار عقب .
