المجلس الأعلى للتعليم ... ولا جامعة عربية معترف فيها ؟؟؟
بسم الله الرحمن الرحيم
دشيت موقع المجلس أدوّر على الجامعات العربية المعترف فيها من قبل المجلس الأعلى، مالقيت ولا جامعة معترف فيها. ويوم دشيت موضوع الأخ معيذر جنوب تفاجأت بأن هناك الكثير والكثير من الجامعات التي تفوق بعض الجامعات المعترف فيها من دول كـ (تايوان والهند والنمسا وجنوب افريقيا ونيوزلندا) مع كل الاحترام والتقدير لهذه الدول بس الكلام عن بعض جامعاتها. حتى بعض جامعات بريطانيا وأمريكا واستراليا وفرنسا وألمانيا المعترف فيها في تصنيف متأخر كثيراً عن هذه الجامعات العربية منها جامعات الملك سعود والملك فهد والملك عبدالعزيز.
أسئلة دارت في راسي:
1- يعني جامعات عربية لها سمعة عالمية وتعتبر من الدرجة الأولى غير معترف بها وجامعات اجنبية تعتبر من الدرجة الثاثة والرابعة في بلدانها معترف بها !!
2- الحين اللي بيودونه بعثة لليابان ولا كوريا ولا الصين ولا تايوان ولا النمسا ولا البرازيل ياخذ له سنتين ولا ثلاثة يتعلم اللغة وبعدين يدرس، وهو يقدر يوفر السنتين ولا الثلاث سنوات هذي لو دش جامعة عربية مرموقة ذات تصنيف دولي عالي أعلى من بعض الجامعات في الدول الأجنبية الغير ناطقة بالعربية والأنجليزية ؟؟؟؟
3- وإذا بغى يروح جامعة عربية لايبتعث واذا راح ودرس على حسابه وجاب الشهادة ورجع قالوا له جامعتك غير معترف فيها ؟؟؟
4- يعني لو يقدم على وظيفة مايتوظف علشان جامعته غير معترف فيها من قبل المجلس الأعلى والأخ العربي اللي متخرج من جامعة في بلده العربي يتوظف عادي !!
مجرد أسئلة دارت في راسي وحبيت أشاركم فيها
