-
أرتفاع سقف الدور الارضي
السلام عليكم اخواني بغيت منكم استشارة في كذا شي بخصوص البيوت بعضها سابق بعض:
الشي الاول ارتفاع البيت عن منسوب الشارع انا الشارع الي قدام البيت في ميول نازل والبيت فيه 3 عتبات0.45 والملاحق 0.15 عتبه وحده فقط هل تنصحون ارفع البيت بعد عتبة اضافية احتياط والملاحق بعد؟
انا الارتفاع الكلي للفيلا عندي 14.85 هل اذا رفعت البيت ياخذ من الارتفاع الداخلي يعني اذا حطيت اعتبة اضافية خارجية ينقص الارتفاع الداخلي عندي؟
الشي الثاني بخصوص ارتفاع دور الارضي عندي تغير عن الخريطة زاد على المخطط نص تقريبا بسبب الدكت للمكيفات اصبح صافي تقريبا مابين 4.20 الى 4.50
المشكلة مش هنا الحين الدرج جاي عندي في صدر البيت ودائري الحين هل يترتب على الدرج ان يكون في زيادة في عدد العتبات؟
وهل فيه شي ثاني يترتب على التغيير نفس الدرج او بس هذا الي راح يتغير؟
شنو لازم انتبة له بعد لاني ماكان عندي خبر؟
الشي الثاني بخصوص الديكور الداخلي الجبس شنو افضل جبس حاليا في السوق هل هو المحلي او العماني؟
انا عندي ف التصميم الداخلي بخصوص الديكور مذكور grg واغلب الي موجود في السوق المتوفر يقولون نفسه هو الجبس وماعندهم خلفية عن GRG الا فئه نادرة من بعض الشركات لكن غلايا جدا ومشغولة في مشاريع كبيرة في الدولة يعني اذا بتسوي لك الديكور مش اقل من 500 الف وراح يعطونه شركة صغيره بالباطن وبتلعوز معاهم.
هل فيه حد ينصح في محل ديكور ممتاز وعارف شغلة وسعره مناسب لان شغل الي عندي فيه نحت في البراويز والاسقف بارز شوي برى من طوفه.
-
نص متر تعني على الأقل زيادة ثلاث درجات ولو تسويها 4 أو خمس لو تقدر وتوزعها على الارتفاع الكلي بتطلع لك العتبات ارتفاعها مريح
هذي حسبتها سهلة .. لنفترض قاس لك الفورمان الارتفاع وكان 4.5 صافي + سمك سقف الأرضي لنفترض 30 سم نحتاج درج يوصلنا من 0 اللي هي في حالتك 45 سم وأشوفها كافية بس تعتمد على سلوبات الحوش لتصريف مياه الأمطار .. خلنا في سالفة الدرج أول الإجمالي بيكون 4.8 متر تحتاج لها لعدد 32 عتبة بالضبط .. 4.8 نقسمها على 0.15 ارتفاع كل عتبة .. و0.15 انا اشوفه ارتفاع مزعج وافضل 0.14 أو أقل ولو نبغي 0.14 4.8/0.14 تعطينا 34 وكسور ولو اعتمدنا عدد 34 وقدرنا نسويه بيكون عندنا ارتفاع العتبة تقريباً 14.1 سم أو 141ملم .. مناسب جداً لو نبي تدليع أكثر ورفاهية للركوب 35 درجة تعطينا 137 ملم .. كله نقسم الارتفاع الكلي على عدد العتبات اللي قادرين نسويها .. للأسف الاستشاريين ما يهمهم هالشيء عادي يسوي العتبة 20 سم يعني عندك ارتفاع 4.8 يسوي لك 24 عتبة والا بالكثير 28 ويطلع ارتفاع العتبة 17.1 سم
إرتفاع أرضية البيت من الشارع كمتطلب تخطيطي لازم 0.6 أو أربع عتبات 15 سم كل عتبة .. بس للمدخل حلاتها تسوي العتبات للدخول 12 سم والا 10 بعد .. تحتاج خمس عتبات لتوصل ل 0.6 وتسويها عراض بعرض 40 سم أو 35 سم أقل شيء .. يسمونهم عتبات شرفية
ال 0.6 شلون نوصل لها ويمكن كثيرين يسوون أكثر بدون ما يدرون نفترض مستوى الشارع رقم معين من مستوى سطح البحر اللي تعارفاً يعتبر 0 وهذا الرقم نعتبره ال 0 التصميمي عندنا منه بنطلع رامب بحدود مريحة يستحسن 30 سم حتى ندخل الحوش ومن الباب لنهاية الحوش بنرتفع بالتدريج حتى نوصل ميلان يضمن لنا تصريف المياه .. هذي ال 30 سم + الميلان اللي يفترض نسويه 1% أو حولها حتى 0.75 مقبول ممكن توصل لنا لعتبة مدخل البيت 35 سم يبقى لنا من ال 60 سم اللي حسبناها في الأساس 25 سم تكفي لها عتبتين مدخل كل وحدة 12.5 سم .. في بيتي مع السلوبات والرامب صفيت على عتبة وحدة 10 سم بس
شوف موضوع مراجعة التصاميم كاتب الارتفاعات حسب النقط في بعض التصاميم حتى تفهم الوضع أكثر ولازم تتابع مع استشاري فاهم وتوضح له إنك فاهم وما تبي الدرج يكون مزعج ولو تبي استشارة أكثر ارسل تصاميم بيتك باحطها في موضوع مراجعة المخططات ونناقش كل شيء بتفصيل أكثر
-
-
العفو يا اخوي
فيه اتجاه آخر الواحد يقول ابي الدرج يكون رياضي وأي صعود ونزول ابي احرق سعرات حرارية أكثر .. هذا عادي تسويه حتى 22 سم بس للياهل بيكون متعب ولكبير السن كذلك
ما ادري حد جرب يسوي رامب للركوب بميلان بسيط وبدون عتبات كلش؟
-
اخوي معماري ماقصرت ويرحم والديك
الحين الدرج عرفت وفهمت تقريبا من الاستشاري راح نزيد 3 درجات اضافية من الدور الارضي الى الاول
زيادة احتمالية في تقوية العمدان الخرسانية للدول اللفيلا لتحمل.
بس سالفة ارتفاع منسوب البيت هذي الى الان ما اعرفت شنو اسوي فيها
والشي الاخر الديكور ونوعيتة الجبس وال grg او احد ينصح بمكان فاهم شغل الديكور والجبس
-
ووالديك في الجنة
الدرج تأكد من ارتفاع كل عتبة مثل ما شرحت لك .. شيء يناسب الاستشاري يمكن ما يناسبك الا اذا صعبة تزيد عتبات أكثر هنا إنت مضطر .. وزيادة تقوية الأعمدة ما اشوفها تفرق لو زدت نص متر لكن بتفرق لو الزيادة كبيرة وأكيد مع زيادة النص متر بيحسب لك جسر وسطي عند مترين ونص يدعم الأعمدة ويدعم الجدران
سالفة ارتفاع المنسوب هذي تعني الارتفاع النهائي أكيد بيزيد واحتمال تدخل نفسك في مشاكل مع التخطيط وما يعطونك شهادة اتمام بناء .. نصيحة سو تعديل بموافقات وأي استثناء اخذه موقع واحفظه لوقت الحاجة
الجبس للداخل في الغالب والجي ار سي للخارج يتحمل العوامل الجوية .. بس لو بتسوي كتل كبيرة حتى الجبس ينفع للخارج بس مهم ينصبغ بصبغ زين ويبعد الرطوبة لكن أضمن تركب جي ار سي
-
اخوي الارتفاع الفيلا الحالي زاد عندي صار 14.85 في السابق كان 14 ارتفاع الفيلا الى بنت هاوس
الحين زدنا الطابق الارضي نص صار 5.60 من غير الارضية والدكت والديكور والباقي في الدور الاول والبنت هاوس.
الحين يقولي الاستشاري لزوم ندعم العواميد تقريبا اكثر من 20 عمود خرساني عندي وهذا ياخذ مبلغ اضافي يمكن يكلف لان تغيرت الحسبة عندي.
وقالي راي ثاني اذا عشان الدكت نقدر نرفع فقط الاماكن الي بيمر فيها مسارات الدكت وهذا ممكن ماراح يكلف شي زائد بالاضافة ممكن ماراح نحتاج نزيد عتبات الدرج.
فما ادري وش اسوي صراحه تحيرت كثيرا يمكن اقول له يدعم الخرسانات لكن خايف من المقاول يصدمني بالسعر دام فيه فلوس.
وخاف اقول له ارفع فقط في الاماكن الي فيها بس مسارات الدكت ويكون الشكل مش حلو في الارتفاع.
-
1 مرفق
-
هذي العمدان الي ممكن يقويها
-
ما شاء الله بيتك غابة أعمدة وبعد بيقويها؟
لاحظت الاستشاريين وخصوصاً من نوعية بص يا افندم من يطيح في يدهم واحد يبي تغيير بسيط يطلعونه عليه أغلى من السوق بالتعاون مع المقاول .. الزيادة كلها 85 سم وهذي مثل ما فهمت موزعة على البيت كله ولو كانت على الأرضي بس ما اظن بتحتاج تقوية
هشكل يا اخوي بتفتح عليك باب صعب تسكره وكل شوي بتحصله هو ناط لك وقايل لك ليش ما تغير كذا والتكلفة بسيطة وكل شوي بتدفع وبغالي .. كان لازم من التصميم تقرر كل شيء ووقت التنفيذ ما تسوي ربكة انت بتكون فيها الخسران
انا اقول لك اذا ضروري هذا التعديل خلصه مع التخطيط أول بموافقات وبخطة متكاملة وقبل اعرف كم بيكلفك مع المقاول ومتطلبات الاستشاري .. وإذا تعديل على الجسور لتمرير الدكتات الاستشاري ممكن قادر يسويه بسهولة وبدون ما تزيد الارتفاع وبدون زيادة تكلفة وبدون حتى موافقات ثانية