تعرّف على أخطر سلاح للمستهلك ويخشاه التاجر ... كل واحد يجهز سلاحه ... ليست المقاطعة!!

السلام عليكم ورحمة الله وبركاته ...

هذا الموضوع راح ناخذه خطوة خطوة ... ونضيف فيه كل شوي ومع مشاركاتكم باذن الله راح نقضي على جشع التجار ...

في البداية... أحب أقول ان الجشع والطمع ما ينطبق على كل التجار ... فهناك بعض التجار وللاسف قد يكونون أقلية ممن يخافون الله عزوجل ويهمهم مصلحة المواطن ...

أول سلاح في وجه جشع التجار ... هو القنــاعة وعدم شراء مالا تحتاجه ...

الأسئلة اللي المفروض الواحد يسألها نفسه .. هل الشي اللي راح اشتريه فعلا أحتاجه ... هل اقدر اعيش فترة من غيره ...

شاللي راح يصير اذا ما اشتريته ... هل فيه بديل موجود عندي ... هل فيه بديل أفضل منه ... ما هو الهدف من شراؤه؟؟

الاقتصاد العالمي الحالي بشكل عام قائم على مفهوم اسمه Manufacturing of Demand ... أو صناعــة الحاجــة ...

يعني ... الشركات تقوم بتحويل بعض المنتجات من كماليات إلى أساسيات .. وخلق وهم بأن السلعة الفلانية تحتاجها الان ولا تستطيع الاستغناء عنها ...

ثم تقوم بعد شرائها باقناعك أن السلعة اللي (توك شاريها) انتهى تاريخها وانها من العصر الحجري وان عليك شراء أحدث ما توصل إليه العلم والعالم ... وبمواكبة العصر ... وبهذا تضمن الشركات استمرارية الشراء لدى المستهلكين طوال الوقت ...

هذا الكلام ينطبق تقريبا على كل شيء ... أنا ما أقول إنك ما تشتري سيارة آخر موديل ... أو أحسن جوال ... أو أغلى ثياب ...

لكن اللي أقوله ... قبل ما تشتري الشي اسأل نفسك ... هل فعلا تحتاجه ... هل تستطيع الاستغناء عنه ... أو حتى هل ممكن تأخر شراؤه ... حتى لو كان المبلغ المطلوب عندك ...

باختصار ... لا تجعل عدم شراؤك للسلعة هو سعرها ... بل حاجتك لها ..

السلاح الثاني في وجه التجار ... هو ايجاد البديل ...

مشكلة الكثير من الناس انهم يركزون على سلعة أو ماركة معينة أو مطعم معين ... وما يفكر انه يغير ... يقولك انا مرتاح لهذا أو يعجبني طعمه ... وبعضهم يقولك مادري ليش .. أشوف كل الناس يشترونه ...

في نظري هذي كلها أسباب غير مقنعة ابدا ..

وفي النهاية التاجر هو المستفيد فيقوم برفع السعر واستغلال المستهلكين ...

أعطيكم مثال واقعي ...

ليش كل الناس يتجهون للتويوتا ... مع ان اسعارهم غالية وخدمتهم تعبانة وما عندهم عروض ويستغلون الناس بشكل مب طبيعي ...

السيارات ممتازة ولا عليها كلام ... أوكي ...
سعر البيع مافي أحسن منه ... حلو وبعد ...
قطع الغيار تحصلها في كل مكان ... ممتاز ..
تقدر تصلحها عند أي ميكانيكي ...

أنا اتفق مع ان سيارات التويوتا ممتازة ... لكن ما اتفق مع الباقي مع انه صحيح ... شلون ؟؟

نوعية السيارات هذي تحددها الشركة المصنعة ... لكن الاعذار الثانية هذي احنا اللي خلقناها ... بعد شلون ؟؟

سعر البيع العالي نتيجة الطلب ... لو كان الطلب على سيارات ثانية ما ارتفع سعر البيع بهالشكل ... شوفوا دول العالم الثانية كل دولة لها سيارتها المفضلة والمعروفة ... وفيه دول مثل اوروبا التويوتا ماله سوق أبدا ... فاللي يحدد سعر البيع هو المستهلك ...
وقطع الغيار متوفرة لأن السيارات منتشرة يعني بعد بسبب المستهلك ... ونفس الكلام بالنسبة للتصليح ..

فالخلاصة ... احنا اللي خلقنا السوق ... واحنا اللي عطينا العذر للتجار انهم يستغلون ...

وإن شاء الله للحديث بقية ...

... أخوكم fhd4 ...