المشاركة الأصلية كتبت بواسطة معماري قطري
عندي شقف ما عندي شغف حياك بو عبدالله
يمكن من الحاجات اللي حبيتها ويمكن أجدت فيها التصميم .. أذكر حبيت الاظهار ثلاثي الأبعاد ووقتها البرامج ضعيفة ولا عندنا غير الاوتوكاد ونسخة مضروبة والكمبيوتر بطيء وممل .. إشتغلت على مشروع كبير كلفته 350 مليون ذاك الوقت عبارة عن مدرسة وقاعة تخريج كبيرة ومبنى اداري وبينهم ممر زجاجي بأقواس وتظليل ومواقف وتشجير وشغل على مستوى أنهيته في 3 أيام عمل متواصل ليل نهار وسلمته للمستفيد حتى يعرضه ويحصل موافقة ولا وافقوا بسبب الميزانية ذاك الوقت
يمكن من المهن القريبة من نفس الانسان مهنة العمارة والتصميم وأنصح كل مبتديء يتجه لهذا الشيء .. ألحين وانا اتخيل المشروع وكيف كان وتفاصيله اعيش فيه واعيش ذاك الوقت .. كان مزج بين المباني الزجاجية والتقليدية ذات الطابع القديم واستوى نموذج تنفذ بطريقة ثانية حق مدرسة تخصصية ثانية الأُولى كانت لغات وكمبيوتر
من التصاميم الثانية ما كنت انا الأساس فيه بس كان مصممه استشاري مختص وانا كنت متابع مع واحد من الرسامين اللي اشتغلوا عليه كان ميدان رماية لوسيل .. وهذا طبيعته تختلف أذكر رحت في بداياته وكنا نمهد الارض ونتعرف على وين بتكون المباني .. صج شغلة في الحر والجو مرهق والمكان بعيد وكان شارع الخور ضيق وقليلين يمرون عليه .. أتذكر أشياء كثيرة ناقشناها وعلقنا عليها وبمكن مريت مرة بعد ما انتهى المشروع بعدها لا
من الذكريات في هالمشروع كنا نسوي له اظهار كصورة من الرسم نخلي الكمبيوتر يسوي حساباته ونروح البيت نجي ثاني يوم نحصل باقي بعد شوي ويخلص .. اللي جرب هذي الأُمور قبل كانت صج صعبة وتطول أما ألحين كل شيء تغير بس ما يسويها الا الشغف وحب المهنة وتاخذ وقت طويل
بعد فترة قمت ركز على الجانب العملي والتقني وابتعدت عن التخيلي وثلاثي الأبعاد بس دوم الصورة المعمارية تكون في خيالي وتفكيري .. هذا التركيز يبين واضح على التصاميم اللي اشتغل فيها واعدل عليها للمنتدى وشغفي وحبي للتصميم ثلاثي الأبعاد خف وزاد التركيز في الجانب الهندسي العملي